Zakaria 7
7
Kulitwamina kulia ni mbunge jaali
1Ha mwaka wa muchiwana ha tangwa lia muchiwana lia kakweji wa muchilivwa#7:1 ha mwaka WA muchiwana… kakweji WA muchilivwa: mu Kutatu ha mwaka 518 muze te Yesu Kristu kanda achisemuka. (kakweji wa Kisleve), wa kuyula cha mwanangana Dariuse, Mwene Zambi yangulweza amwe maliji.
2Akwa Betele#7:2 BETELE: limbo kuze Aisraele te akuwayila Zambi, kilometro 19 ku norde ya Yerusaleme. te haatuma Sharezere ni Regemeleke ni atu jo ku zuwo lia Mwene Zambi Mukwa Ndundo Jeswe alembe hanga Mwene Zambi aawahise, 3ni kuhula mahako ni akwa munanyi chihula chino ngwo: “Chatutamba kunyongonona ni kulila ni kulitwamina kulia ha kakweji wa muchitano ngwe chize twakulinga ndoo ni musono, mumu akwa kole haanabuzula zuwo lia Zambi, nyi?”
4Mwene Zambi yangulweza maliji wano 5ngwenyi: “Lweza atu a mu chifuchi ni mahako a Zambi ngwe: ‘Muze te nwakulitwamina kulia ni kunenganyana ha kakweji wa muchitano ni wa muchishimbiali ha miaka yino makumi shimbiali, te nwakuchilinga hanga nungulemese, nyi? 6Chibwe muze nwalile ni nwanwine, kunwachilingile ni kuliwahisa yenwene, nyi?’ ”
7Maliji wano akwa munanyi a Zambi atangu aahanjikile nikulita ni maliji a Mwene Zambi muze te Yerusaleme akuyuka ni akuzala ni atu, ni muze te atu anji akutwama mu membo waze ajingilika Yerusaleme, ni mu chifuchi cha ku sude, ni ha mindundena ku chitokelo.
Zambi yatwala Aisraele mu undungo mumu ha uhulia
8Mwene Zambi yalweza Zakaria maliji wano ngwenyi: 9“Ku shakulu nahanyine Shimbi jino kuli atu jami ngwami: ‘Chanutamba kubatula milonga ni ululi, ni kulilweza utu ni keke umwe ni mukwo. 10Kanda nubinjisa mapwo waze haanafwisa malunga, ni ana a shiwa, ni yilambala waze atwama mukachi kenu, ni yiswale. Kanda nutakila mukwenu Chuma chibi.’
11“Alioze atu jami yaakwata pami, yaalituna kungubanjika, yaakalisa mbunge jo, 12yijikala ngwe mawe. Nevwile wuli unji mumu te kaasolo kubanjika ku maliji jami waze alongesele akwa munanyi ku shakulu. 13Kaabanjikile ko muze nahanjikile, kashika ni yami chaabanjikile ko muze angulembele. 14Naamwangine ngwe fuji ya kangonga mu yifuchi ya yilambala. Mba chifuchi chino chibema yichisala chahululu, niumwe kasalile mo.”
Currently Selected:
Zakaria 7: CHK1970
Highlight
Share
Copy
Want to have your highlights saved across all your devices? Sign up or sign in
The Bible in Chokwe © Bible Society of the Democratic Republic of Congo and Bible Society of Zambia, 1970, 1991.
