Zakaria 6
6
Usolwelo wa matemba awana
1Yingumona Usolwelo ukwo. Chisuho chino yingumona matemba awana waze aneza mukachi ka milundu yaali 2Temba litangu kaanalikoko kuli tuvwalu awana achila, lia muchaali kuli tuvwalu alaa, 3lia muchitatu kuli tuvwalu atoma, lia muchiwana kuli tuvwalu a yibeka yibeka. 4Mba yinguhula mwe kanganda ka mwilu ngwami: “Aa mwata, matemba wano kuchi analumbunuka?” 5Yangukumbulula ngwenyi: “Jino jili fuji jiwana jize jinakatuka kuli Mwene Zambi wa hashi heswe.”
6Temba lize lia tuvwalu alaa te linatalikisa ku Babilonia ku norde, lize lia tuvwalu atoma linayi ku chitokelo, ni lize lia tuvwalu a yibeka yibeka linatalikisa ku chifuchi cha ku sude. 7Muze tuvwalu a yibeka yibeka haatuhuka, yaazanga kwendesa hashi. Kanganda ka mwilu ngwenyi: “Yeenu, nwendese hashi!” No yaaya. 8Mba kanganda yakololoka kuli yami ngwenyi: “Tuvwalu waze ayile ku Babilonia ku norde haahwimisa ufwatulo wa Mwene Zambi.”
Chipangula mumu hali Yoshua
9Mwene Zambi yangulweza maliji wano 10ngwenyi: “Anda yawana yize ahanyine njize Heldai, ni Tobija, ni Jedaya. Mba yako maha Josia mwana wa Zefania. Malunga wano eswe akatukile mu undungo mu chifuchi cha Babilonia. 11Linga chipangula cha prata ni oru chize ahanyine, uchijike ku mutwe wa mwata wa mahako, Yoshua mwana wa Jehozadake. 12Mulweze ngwe, Mwene Zambi Mukwa Ndundo Jeswe kanambe ngwenyi: ‘Lunga yoze akuvuluka ngwo, Mwe Mutango, muukatuluka muma muze atwama, mba makatungulula zuwo liami. 13Mwe iye mwe makalitunga, makatambula uhenya wa mwanangana, makayula atu jami. Umwe hako makamana ku chitwamo chenyi, no maakalinga hamuwika ni uhwimino.’ 14Che chipangula muchikabwa chiwulukilo mu zuwo lia Mwene Zambi hanga alemese Heldai, ni Tobija, ni Jedaya, ni Josia.”
15Atu waze atwama kusuku maakeza ni kukwasa kutungulula zuwo lia Mwene Zambi. Mba muze hiliahwa kutungulula, munukanyingika ngwenu, Mwene Zambi Mukwa Ndundo Jeswe mwe wangutuma kuli yenu. Yuma yino yeswe muyikabwa nyi nwononokena liakulu Shimbi ja Mwene Zambi, Zambi yenu.
Currently Selected:
Zakaria 6: CHK1970
Highlight
Share
Copy
Want to have your highlights saved across all your devices? Sign up or sign in
The Bible in Chokwe © Bible Society of the Democratic Republic of Congo and Bible Society of Zambia, 1970, 1991.
