Zakaria 4
4
Usolwelo wa chikwachilo cha ndeya
1Kanganda ka mwilu yoze te unahanjika ni yami yeza nawa, yangukasumuna ngwe mu tulo nguli. 2Yanguhula ngwenyi: “Yika unamono?”
Yingukumbulula ngwami: “Ngunamono chikwachilo cha ndeya chakulinga ni oru. Helu chili ni musenge wa kusa maji. He ha chikwachilo hali ndeya shimbiali, ndeya ni ndeya yiibwa ni mikungo shimbiali ha kusa mo ngoji. 3Ku sali lia che chikwachilo cha ndeya kuli mitondo yaali olive, umuwika sali, umuwika sali.” 4Mba yinguhula mwe kanganda ngwami: “A mwata, ye yuma yino kuchi yinalumbunuka?”
5Yanguhula ngwenyi: “Kuma kuwanyingikine, nyi?”
Chilakenyo cha Zambi kuli Zerubabele
6Kanganda ka mwilu yangwaha maliji wano a kuli Mwene Zambi ha kulweza Zerubabele ngwenyi: “Kumuukumba, alioze hi ku tachi ja tujita ko, hanji ja yena mwene, alioze ku tachi ja mwiku wami. 7Yikwiko yinene ngwe milundu muyijimuka kulutwe lie. Kumuutungulula zuwo lia Zambi. Mba muze muukanangika liwe liakusula, atu kumaakakololoka ngwo: ‘Hoho nawa! Hoho nawa!’ ”
8Mwene Zambi yaweza maliji akwoo 9ngwenyi: “Zerubabele hasa fundamentu ya zuwo liami, kumakalimanununa. Mba atu maakanyingika ngwo, kuma yami Mwene Zambi nakutumine kuli ayo. 10aKaanevu chinyengo mumu milime yinayi kulutwe makoke makoke. Alioze maakamona ngwo, Zerubabele kanalikoleza lume ni kutunga zuwo liami, mba maakawahilila.”
Yingukumbulula ngwami: “Ka mwata, Chanyingikine.” 10bIye ngwenyi: “Ndeya shimbiali jili meso shimbiali a Mwene Zambi waze akumona mbango jeswe ja hashi.”
11Mba yingumuhula ngwami: “Mitondo yaali ya olive, ku sali ni sali lia chikwachilo cha ndeya, kuchi yinalumbunuka? 12Kuchi chinalumbunuka mitango yaali ya olive yize yili ku sali ni sali lia mihembo yaali ya oru kuze kunatuhukila maji a olive?”
13Yanguhula ngwenyi: “Kuma kuwanyingikine, nyi?”
Ngwami: “Ka mwata, Chanyingikine.”
14Mba yangwamba ngwenyi: “Wano kaali malunga aali Waze Zambi atongwele ni awayishile maji hanga amulingile, iye Mwene Zambi wa hashi heswe.”
Currently Selected:
Zakaria 4: CHK1970
Highlight
Share
Copy
Want to have your highlights saved across all your devices? Sign up or sign in
The Bible in Chokwe © Bible Society of the Democratic Republic of Congo and Bible Society of Zambia, 1970, 1991.
