Zakaria 14
14
Yerusaleme ni mavungu
1Tangwa lize Mwene Zambi makabatwila atu hiliakundama. Hohene akwa kole maakabuba yuma ya mu Yerusaleme, ni ye yuma maakayiteta ku meso jenu. 2Mwene Zambi makakungulula mavungu eswe hanga akase jita ni Yerusaleme. No maakatambula lie limbo, ni kububa yuma ya mu mazuwo, ni kukwata mapwo ni tachi. Mbunga yimuwika ya atu maakaatwala mu undungo, alioze mbunga yikwo maakasala mu limbo. 3Hohene Mwene Zambi makatuhuka ni kwasa jita ni mavungu waze ngwe chize te akulinga ku shakulu. 4Ha tangwa lize makamana ha mulundu wa Olive ku chivumbuko cha Yerusaleme. Mba mulundu wa Olive muukabulika yihanda yaali, chize ku chivumbuko ndoo ku chitokelo chingulunga chinene muchikabwa ko. Chimwe Chihanda cha mulundu muchikaya ku norde, chikwo ku sude. 5Mba munukachinyina mu chingulunga chize muchikahandununa mulundu mu yihanda yaali. Mba ye yimbandwa muyibwa chinyingi cha milimo yo ya munanyi. Munukachina ngwe chize tushakulu twenu achinyine munyiko ha matangwa ja mwanangana Uzia wa Yuda. Mwene Zambi, Zambi yami, makeza hamwe ni tunganda eswe a mwilu.
6Muze tangwa lize hilieza, kukuchi kabwa nawa chishika hanji chiwe, 7chibwe milima kuyichi kabwa ko. Tangwa heswe mukukabwa mwalwa, chibwe ha ufuku. Muze yuma yino muyikabwa Mwene Zambi wika kananyigika.
8Muze tangwa lize mulikeza, meya akeke maakapukumukina ku Yerusaleme, Chihanda cha meya muchikapukumukina ku chitende cha Kufwa, chikwo ku kalunga lwiji Mediterane. Maakapukumuka mwaka weswe wamuwundu, ha lushiho ngwe ha lwiza. 9Hohene Mwene Zambi makayula hashi heswe. Atu eswe maakawayila Zambi umuwika, maakamunyingika ni jina limuwika.
10Chifuchi cheswe, chize ku Geba#14:10 GEBA: kilometro 10 ku norde ya Yerusaleme. ku norde ndoo ku Rimone#14:10 Rimone: kota limwe limbo kilometro 57 ku sude ku chitokelo cha Yerusaleme. ku sude, mukukabwa chana. Alioze Yerusaleme makamuzundula helu lia chifuchi chize chamujingilika. Lie limbo mulikatanda chize ku chikolo cha Benjamine ndoo ku chikolo cha Ha Mbango kuze kwabwile chimwe chikolo chikwo hatangu, ni chize ku zuwo lisuku liakukoleka lia Hananele ni ndoo ku ukamino wa vinyu wa mwanangana. 11Atu maakatwama mo mu uhwimino, akwa kole keechi koonona nawa.
12Mwene Zambi makaneha musongo ubi hali mavungu eswe waze akwasa jita ni Yerusaleme. Misunya yo muyikabola shimbu te achili ni mwono, meso jo ni malimi jo maakabola.
13Ha tangwa lize Mwene Zambi makevwisa mavungu mwongo, mba mutu mweswe makakwata yoze anasulangana nenyi ni kulimika nenyi. 14Ayuda maakasa jita ni kufunga Yerusaleme. Kumaakabuba ubite wa mavungu eswe: oru, ni prata, ni mahina anji.
15Musongo ubi muukakwata nawa tuvwalu, ni mula, ni tumelu, ni yimbulu, ni yimuna yeswe yize yili mu misumba ya akwa kole.
16Mba eswe waze maakasala ni mwono a kuli mavungu waze ashile jita ni Yerusaleme maakayaya mwaka ha mwaka ni kuwayila Mwene Zambi Mukwa Ndundo Jeswe, mwanangana wo, ni kulinga chiwanyino cha Yikulika. 17Nyi amwe mavungu maakalituna kuya ni kuwayila Mwene Zambi Mukwa Ndundo Jeswe, mwanangana wo, aho vula kechi kanoka nawa mu chifuchi cho. 18Nyi akwa Egiptu maakalituna kulinga chiwanyino cha Yikulika, mba Mwene Zambi makeevwisa musongo uze akumwesa eswe akwo waze akulituna kuya ko ni kuwayila. 19Lino lie lamba lize mulikabwa hali akwa Egiptu ni mavungu akwo, nyi keechi kuya ni kuwayila ku chiwanyino cha Yikulika.
20Ha matangwa waze chibwe maakola ha manyima ja tuvwalu maakabwa ni Chisoneko chino ngwo: “Wa Chijila cha Mwene Zambi.” Ndeho (yimbia) jakutelekela yifwo mu zuwo lia Zambi mujikabwa ja chijila ngwe misenge kulutwe lia chilumbilo. 21Ndeho (yimbia) jeswe mu Yerusaleme ni mu Yuda mujikabwa ja chijila hanga awayile najo Mwene Zambi Mukwa Ndundo Jeswe. Atu waze akulambula milambu, maakayitambwola ha kuteleka mo yifwo ya milambu. Muze tangwa lize hilieza, kukuchi kabwa nawa umwe mukwa kulanjisa mu zuwo lia Mwene Zambi Mukwa Ndundo Jeswe.
Currently Selected:
Zakaria 14: CHK1970
Highlight
Share
Copy
Want to have your highlights saved across all your devices? Sign up or sign in
The Bible in Chokwe © Bible Society of the Democratic Republic of Congo and Bible Society of Zambia, 1970, 1991.
