Zakaria 10
10
Mwene Zambi yalakenya kulamwina atu jenyi
1Mwitenu Mwene Zambi anwehe vula musazu ha mwaka. Mwene Zambi mwe wakutuma malelwa a vula, mwe wakutatwishila atu eswe mwambu wa wisu. 2Atu kaakuhula mahamba ni tahi, alioze kumbululo lio liakubwa lia mahuza kanda liamokomoko. Amwe kaakulumbununa yilota, alioze kaakuchilinga hanga apiangule atu. Kulembejeka cho chili chamokomoko. Kashika atu kaakwendangana ngwe mapanga waze keeshi kafunga. Kaali mu lamba mumu keeshi tetekeli.
3Mwene Zambi kanambe ngwenyi: “Yilambala waze akuyula atu jami nguneevwila ufwatulo, mungukaamwesa lamba. Ayuda kaali niami, yami, Mwene Zambi Mukwa Ndundo Jeswe, mungukaafunga. Maakabwa ngwe tuvwalu twami a tachi a jita. 4Mukachi ko mumukatuhuka akwa kuyula, ni tetekeli, ni miata a tujita waze maakayula atu jami. 5Ayuda makabwa akwa kukumba ngwe tujita waze analiachila akwa kole jo mu malowa a mu majila. Kumaakasa jita, kumaakakumba chibwe waze akwendela ha tuvwalu, mumu Mwene Zambi makabwa hamwe no.
6“Mungukatakamisa Ayuda;
mungukalamwina Aisraele.
Mungukeevwila keke;
mungukaahilwisa eswe ku mahio.
Kumaakabwa ngwe cheehukile ko nichimwe.
Yami nguli Mwene Zambi, Zambi yo;
mungukakumbulula yilemba yo.
7Aisraele maakatakama ngwe tujita a tachi,
maakabwa ni chiseke ngwe waze haanwa vinyu.
Ana jo kumaakewuluka kukumba chino,
kumaakawahilila ha chize Mwene Zambi halinga.
8“Mungukatambika atu jami
ni kwakunga hamuwika.
Mungukaalamwina,
mungukookesa ngwe chize abwile hatangu.
9Chibwe naamwanginyine mukachi ka mavungu,
hindu kumaakangwiwuluka,
chibwe kusuku kuze atwama.
Ayo ni e ana jo kumaakatwama ni mwono,
kumaakahiluka eswe hamuwika ku mahio.
10Chize ku Egiptu ndoo ku Asuria mungukaahilwisa ku mahio
ni kwatungisa mu chifuchi cho.
Mungukaatungisa nawa mu Gileade ni mu Libano;
chifuchi cheswe muchikazala ni atu.
11Muze maakazauka kalunga lwiji wo wa lamba yami,
Mwene Zambi, mungukalamba ye miavu,
mba majinga ja Nile maakoma.
Aasuria, akwa kulengumuka,
mungukaakehesa,
yitakame mu Egiptu, tachi jo kumujikahwa.
12Mungukatakamisa atu jami;
kumaakanguwayila ni kungwononokena.”
Mwene Zambi hachamba.
Currently Selected:
Zakaria 10: CHK1970
Highlight
Share
Copy
Want to have your highlights saved across all your devices? Sign up or sign in
The Bible in Chokwe © Bible Society of the Democratic Republic of Congo and Bible Society of Zambia, 1970, 1991.
