Marku 10
10
Yesu yalongesa hakutwala ku kushiha ulo
(Tala nawa Mat 19:1-12; Luk 16:18)
1Yesu yakatuka ko, yaheta ku chifuchi cha Yudea, yazauka Yordau. Mbunga jinene yaamukunguluka nawa. Neye yaalongesa nikulita ni ndako yenyi.
2Afariseu#10:2 AFARISEU: tala 2:16. yaamukundama yaamweseka ni kumuhula ngwo: “Muchilita ni Shimbi lunga kulakula pwo lienyi, nyi?” 3Yesu neye yaahula ngwenyi: “Shimbi yika anuhele Mose?” 4Ayo ngwo: “Mose watayijile kusoneka mukanda wa kushiha ulo, mba lunga mahasa kulakula mukwo pwo.” 5Alioze Yesu ngwenyi: “Ha kukala cha mbunge jenu, kashika Mose yanusonekena Shimbi yino. 6Alioze chize ku Ubutukilo, muze Zambi atangile yuma yeswe hichinasonewa ngwo: ‘yaatanga lunga ni pwo. 7Kashika, lunga makahichika tato ni naye, akalinunge ni pwo lienyi. 8Mba ayo aali maabwa mutu umuwika.’ Ha chino, hi aali nawa ko, alioze mutu umuwika. 9Kashika, chize Zambi hananungu, mutu kanda achihandununa.”
10Mu zuwo, tumbaji twenyi yaamuhula nawa chikuma chize. 11Yesu yaakumbulula ngwenyi: “Lunga yoze malakula pwo lienyi ni kumbata weka, malingila mutangu utanji. 12Chimuwika nawa, pwo yoze mecha lunga lienyi, ni kuya ulo weka, malinga utanji.”
Yesu yawahisa ana
(Tala nawa Mat 19:13-15; Luk 18:15-17)
13Atu yaanehena Yesu ana hanga aase moko, alioze tumbaji yaakanjisa atu waze. 14Yesu yachimona, yevwa wuli, yaamba ngwenyi: “Tayizenu ana eze kuli yami. Kanda nwakanjisa, mumu Wanangana wa Zambi wa atu ngwe wano. 15Chamwenemwene ngunanwambulwila ngwami, yoze keshi kutayiza Wanangana wa Zambi ngwe mwana mukepe kechi kanjila mo.” 16Mba yasa ana mu kondo, yasa moko hali mwana ni mwana, yaawahisa.
Pichi
(Tala nawa Mat 19:16-30; Luk 18:18-30)
17Muze Yesu hakatuka ha kuya mu wenyi, umwe lunga yazomboka, yafulamana ku meso jenyi, yahula ngwenyi: “Longeshi mubema, Chuma chika Changutamba kulinga hanga ngukabwe ni mwono wa miaka yeswe?” 18Yesu ngwenyi: “Kuchi unanguvuluka ngwe, mubema? Wakuhi mubema niumwe, shina Zambi wika. 19Unanyingika Shimbi ngwo: ‘Kanda ushiha mutu, kanda Ulinga utanji, kanda wiya, kanda ushindakenya mahuza, kanda ulaka, lemesa tatenu ni noko!’ ” 20Mwe lunga yakumbulula ngwenyi: “Longeshi, Shimbi jino jeswe hingunajifungu chize ku wanuke wami.” 21Yesu yamutala ni zango, yamwamba ngwenyi: “Hindu Chuma chimuwika unahono. Yako, ulanjise yeswe yize uli nayo, utetele yiswale mbongo jize, muukabwa ni ubite mwilu. Mba Wize ungukaule.” 22Alioze muze hachivwa, lunga yoze yahombola ku meso, yakatuka ni chinyengo chinji, mumu te pichi.
23Yesu yatala sali ni sali, mba yambila tumbaji twenyi ngwenyi: “Chikalu pichi kunjila mu wanangana wa Zambi!” 24Tumbaji yaalishimwoka kuhiana ha maliji jenyi. Alioze Yesu yaambila nawa ngwenyi: “Ana jami, chikalu kunjila mu Wanangana wa Zambi! 25Chikalu kashitu munene, kamelu, kubalika ndusu mu chituwa cha ndongo, alioze chikalu kuhiana pichi kunjila mu Wanangana wa Zambi.” 26Tumbaji yaalishimwoka kuhiana, yaalihula ngwo: “Nyi chocho, iya mba mahasa kulilamwina?” 27Yesu yaatala nee, yaamba ngwenyi: “Atu kenu machisa, alioze hi Zambi ko, mumu Zambi kakuhasa yuma yeswe.”
28Petulu yabutuka kumwamba ngwenyi: “Tala, yetu hitunahichika yize yeswe twabwile nayo, hitunakukaula.” 29Yesu yaamba ngwenyi, “Chamwenemwene ngunanwambulwila ngwami, nyi umwe mahichika zuwo lienyi chibwe ayayo, ni anakwo hanji mandumbu, Chipwe naye, hanji tato, Chipwe ana, hanji minda, mumu hali yami ni ha Sango Jibema, 30makatambula yisuho kulakaji haliabwila mu mwakono: mazuwo, ni ayayo, ni anakwo, ni mandumbu, ni anaye, ni ana, ni minda, hamwe ni yihungumiona. Mba ha mwaka uze muwizaho, mwono wa miaka yeswe makatambula. 31Alioze anji waze ali atangu haliabwila, kumakabwa asula. Chimuwika nawa anji waze ali asula haliabwila kumakabwa atangu.”
Yesu yambulula chisuho cha muchitatu kufwa chenyi ni uhindukilo wenyi
(Tala nawa Mat 20:17-19; Luk 18:31-34)
32Yesu ni tumbaji twenyi te mu jila ali ya kuya ku Yerusaleme. Yesu yaatetekela. No yaalishimwoka kuhiana. Akwo waze te anakaula, yeevwa woma. Yesu yatwala nawa tumbaji kumi ni aali ku tenga, yaambulwila yuma yize muyikanuwana kulutwe ngwenyi: 33“Banjikenu! Tunayi ku Yerusaleme. Kwanako maakakunjika Mwana Mutu#10:33 mwana mutu: tala 2:10. kuli mahako a lutwe a Zambi ni alongeshi a Shimbi. No maakamuhisa hanga akafwe, maakamukunjika kuli yilambala. 34No maakamukekuna, maakamufwila mate, maakamulamba ni fimbo (shikote), maakamushiha. Alioze ha tangwa lia muchitatu kumakahinduka.”
Chihula cha Tiangu (Jake) ni Yoano
(Tala nawa Mat 20:20-28)
35Hohene Tiangu (Jake) ni Yoano, ana ja Zebedeu, yaakundama, yaamwamba ngwo: “Longeshi, tunazange utulingile cheswacho mutukwita.” 36Neye yaahula ngwenyi: “Yika nunazange ngunulingile?” 37Ayo ngwo: “Tutayize kama, tukatwame umuwika ku chindume che, mukwo ku chimeso mu Wanangana we wa uhenya.” 38Alioze Yesu ngwenyi: “Kunwanyingikine chize nunechi. Munuhasa kunwa musenge wa lamba uze mungunwa yami, nyi? Munuhasa kutayiza upapachiso uze mangupapachisa nawo yami, nyi?” 39Ayo ngwo: “Mutuhasa.” Yesu ngwenyi: “Yenu chamwenemwene kumununwa musenge uze yami mungunwa. Maakanupapachisa ni upapachiso uze maangupapachisa nawo, 40alioze hi cha yami ko kubatula yoze makatwama ku chindume chami hanji chimeso. Mihela yize yili ya waze Tata hanaalulikila yo.”
41Muze tumbaji akwo kumi haachivwa, yaabutuka kuvwila Tiangu (Jake) ni Yoano wuli. 42Mba Yesu yaatambika eswe nikwamba ngwenyi: “Nunanyingika ngwenu, akwa kuyula ja atu kaakuyula ni tachi, ni anene jo kaakuyula ni chiyulo cheswe. 43Alioze hi chocho ko hakachi kenu. Nyi umwe hakachi kenu mazanga kubwa munene, chamutamba kubwa kavumbi kenu. 44Nyi umwe hakachi kenu mazanga kubwa mutangu, chamutamba kubwa ndungo ya eswe. 45Mumu chibwe Mwana Mutu#10:45 mwana mutu: tala 2:10. kejile ko hanga amulingile alioze alingile atu, ni kukunjika mwono wenyi ha kukula atu anji.”
Yesu yalawisa meso ja kapuputa Bartimeu
(Tala nawa Mat 20:29-34; Luk 18:35-43)
46No yaaheta ku limbo lia Yeriku.#10:46 YERIKU: limwe limbo ku chitokelo cha lwiji Yordau, ngwe kilometro 24 ku norde ku chivumbuko cha Yerusaleme. Shimbu te Yesu machituhuka mo, hamwe ni tumbaji twenyi ni mbunga yinene, Bartimeu, mwana wa Timeu, kapuputa, te kanatwama ku sesa lia jila ni kuunjila. 47Muze hevwa ngwo: “Auze Yesu Kanazare,” yabutuka kukololoka ngwenyi: “Yesu, Mwana wa David,#10:47 mwana WA David: jina likwo lia Chilamwina yoze Zambi alakenyene, yoze makahinga mwanangana David (mu hebreu te Mesiya). nguvwile kama keke!” 48Anji yaamukanjisa ngwo: “Hola!” Alioze yakololoka kuhiana ngwenyi: “Mwana wa David, nguvwile kama keke!” 49Yesu yamana, yamba ngwenyi: “Mutambikenu.” No yaatambika mwe kapuputa ngwo: “Hamuka, katuka, kanakutambika.” 50Bartimeu yambila chikuto chenyi, yanyangumuka, yeza kuli Yesu. 51Yesu yamuhula ngwenyi: “Yika unazange ngukulingile?” Mwe kapuputa ngwenyi: “Longeshi, ngulaule kama ku meso.” 52Yesu ngwenyi: “Yako kwe, ufulielo we hiwakuwuka.”
Hazehene kapuputa yalaula, yakaula Yesu mu jila.
Currently Selected:
Marku 10: CHK1970
Highlight
Share
Copy
Want to have your highlights saved across all your devices? Sign up or sign in
The Bible in Chokwe © Bible Society of the Democratic Republic of Congo and Bible Society of Zambia, 1970, 1991.
