Mateu 7

Kanda nuhisa akwenu

(Tala nawa Luk 6:37-38, 41-42)

1“Kanda nuhisa akwenu. Nyi ka, Zambi makanuhisa. 2Mumu Zambi makanuhisa nikulita ni chize nwakuhasa akwenu. Makanwesekela yeseko yize nunesekela akwenu. 3Kuchi unatale koma kaze kali mu liso lia mukwenu, alioze kuushi kwalula mukambo uze uli mu liso lie? 4Ngwe kuchi muuhasa kwambila mukwenu ngwe: ‘Ngweche nguchize koma mu liso lie,’ alioze yena mwene uli ni mukambo mu liso lie? 5Chilembekese! Chiza hatangu mukambo mu liso lie, mba muumona zwalala ha kuchiza koma mu liso lia mukwenu.

6“Kanda nuhana yize ya chijila kuli tuwa. Nyi ka, maanutewulukila, maanuzamwona ni mazo. Kanda numbila kakanga kenu ku meso ja ngulu. Nyi ka, maakaliata.”

Etenu, fupenu, ngongwelenu

(Tala nawa Luk 11:9-13)

7“Etenu, mba kumunutambula; fupenu, mba kumunuwana; ngongwelenu, mba kumanwazulwila. 8Mumu mutu mweswe wakwita, kakutambula; yoze Wakufupa, kakuwana; yoze wakungongwela, kakumwazulwila. 9Mutu muka hakachi kenu, nyi mwanenyi mamwita mbolo, mamwaha liwe? 10Hanji, nyi meta yishi, mamwaha lunoka? 11Nyi yenu abi, nunanyingika kwaha ana jenu yuma yibema, kuma Tatenu wa mwilu kechi kaaha waze maamwita yuma yibema, nyi?

12“Lingilenu atu akwo yibema, ngwe chize nunazange ayo anulingile. Yenayo Shimbi ja Mose ni longeso lia akwa munanyi a Zambi.”

Chikolo chikepe

(Tala nawa Luk 13:24)

13“Njililenu ku chikolo chikepe. Mumu chikolo chize chakutwala ku kwonona chili chinene, ni jila yili yashi, ni waze akunjila mo kaali anji. 14Alioze chikolo chize chakutwala ku mwono chili chikepe, ni ye jila yikalu, ni waze akuyiwana kaali akepe.”

Mutondo ni mihuko yawo

(Tala nawa Luk 6:43-44)

15“Nukanyama mumu hali akwa munanyi a kupiangula. Kaakunusolokela ngwe mapanga, alioze muchima kaali tungunga asasu. 16Muunwanyingikina ku yitanga yo. Atu kaakuhela mihuko ya vinyu ku yibuta ya mingonga, nyi? Hanji makuyu (figu) ku mikalale, nyi? 17Mutondo Ubema wakwima mihuko yibema, alioze mutondo ubi wakwima mihuko yibi. 18Mutondo Ubema kuwahashile kwima mihuko yibi, ni mutondo ubi kuwahashile kwima mihuko yibema. 19Mutondo weswe uze kuushi kwima mihuko yibema, maakaubatula, maakaumbila mu kahia. 20Chenacho nawa, mununyingika akwa munanyi a kupiangula ku yitanga yo.”

Chanunyingikine nilimwe tangwa

(Tala nawa Luk 13:25-27)

21“Hi eswe ko waze akunguvuluka ngwo: ‘Mwene, Mwene!’, maakanjila mu Wanangana wa mwilu, alioze shina waze akulinga upale wa Tata wa mwilu. 22Ha tangwa lize anji maakanguhula ngwo: ‘Mwene, Mwene! Hi yetu ko te twakwambujola mu jina lie, nyi? Hi yetu ko te twakutuhwisa mwiku wa luchisa mu jina lie, nyi? Hi yetu ko te twakulinga yilayi yinji mu jina lie, nyi?’ 23Mba mungukaakumbulula ngwami: ‘Chanunyingikine nilimwe tangwa. Ngukatukenu yenu nwakulinga yibi!’ ”

Tungi aali

(Tala nawa Luk 6:47-49)

24“Kashika, mutu yoze wakwivwa maliji jami ni kwalinga, kalifwa ni mukwa kukanyama yoze watungile zuwo lienyi ha luliwe. 25Vula yanoka, mihuji yiiyiza, fuji yiihuhwa ha zuwo lize. Alioze kuliabuzukile, mumu yalitunga ha luliwe, 26Mutu yoze Unevu maliji jami, alioze keshi kwalinga, kalifwa ni chihepuke yoze watungile zuwo lienyi ha masekeseke. 27Vula yanoka, mihuji yiiyiza, fuji yiihuhwa ha zuwo lize, mba yilibuzuka chikolo lume!”

Chiyulo cha Yesu

28Muze Yesu hamanununa maliji wano, mbunga yaalishimwoka kuhiana ha longeso lienyi. 29Mumu kabwile ko ngwe alongeshi jo a Shimbi, alioze yalongesa ni chiyulo.

Currently Selected:

Mateu 7: CHK1970

Highlight

Copy