Mateu 4

Sakwonga yeseka Yesu hanga amuvulumwise

(Tala nawa Mar 1:12-13; Luk 4:1-13)

1Hohene Mwiku wa Linanga yiushinjika Yesu mu puya, hanga Sakwonga amweseke. 2Muze matangwa makumi awana haabalika Yesu kalile nichimwe, yevwa zala. 3Sakwonga yamukundama, yamwamba ngwenyi: “Nyi mwe Mwana Zambi yena, amba mawe wano alumuke mbolo.”

4Yesu ngwenyi: “Hichinasonewa mu Mukanda wa Zambi ngwo: ‘Mutu kahashile kubwa ni mwono ku mbolo wika, alioze ku maliji eswe waze akuhanjika Zambi.’ ”

5Hohene Sakwonga yamutwala ku Limbo lia Chijila yamutumbika ha kasonga ka zuwo lia Zambi lia Ayuda, 6yamwamba ngwenyi: “Nyi mwe Mwana Zambi yena, liechelele, uholoke hashi, mumu hichinasonewa mu Mukanda wa Zambi ngwo:

‘Zambi makambila tunganda twenyi a mwilu hakutwala kuli yena ngwenyi:

Maakakuzundula ha moko jo,

Hanga kuuchi kuhukana ku liwe.’ ”

7Yesu ngwenyi: “Hichinasonewa nawa mu Mukanda wa Zambi ngwo: ‘Kanda ukeseka Mwene Zambi ye.’ ”

8Mba Sakwonga yamutwala helu lia mulundu usuku chikolo, yamulweza mawanangana eswe a hashi ni uhenya wo. 9Yamwamba ngwenyi: “Yeswe ayize mungukwaha yo nyi muufukama ku meso jami ha makungunwa unguwayile.”

10Yesu ngwenyi: “Katuka Sakwonga! Mumu hichinasonewa mu Mukanda wa Zambi ngwo: ‘Ukawayile Mwene Zambi ye, ukamulingile iye waka!’ ”

11Hohene Sakwonga yamuhichika. Mba tunganda a mwilu yeeza ni kulingila Yesu.

Yesu yabutuka milimo yenyi

(Tala nawa Mar 1:14-15; Luk 4:14-15)

12Muze Yesu hevwa ngwo, Yoano haamusa mu zuwo lia lamba, yaya ku chifuchi cha Galilea. 13Katwamine ko ku limbo lia Nazare matangwa anji, alioze yaya ni kutwama ku Kafarnaume, limbo lia ku mbumbulu ya chitende cha Galilea mu yifuchi ya Zabulone ni Naftali. 14Chino chabwile hanga chikamanunune liji lize Zambi ahanjikile kuli mukwa munanyi wenyi Izaya ngwenyi:

15“Chifuchi cha Zabulone ni chifuchi cha Naftali,

hehi ni kalunga lwiji, musali lia Yordau,

kali Galilea wa atu waze hi Ayuda ko!

16Atu a ku yifuchi yize, te atwama mu milima,

haanamono pangu linene!

Waze te atwama mu chifuchi cha kufwa,

Pangu hilinaapangulwisa!”

17Chize ku mwaka uze, Yesu yabutuka kwambujola. Yamba ngwenyi: “Alumukenu ku mbunge, mumu Wanangana wa mwilu hiwakundama!”

Yesu yatambika akwa kutela yishi

(Tala nawa Mar 1:16-20; Luk 5:1-11)

18Muze Yesu te anende ku mbumbulu ya chitende cha Galilea,#4:18 chitende cha Galilea: kusuhwa chacho kilometro 21, unene wacho kilometro 13. Chili ni meya abema. yamona asongo ni mutu, akwa kutela yishi, Simone (jina likwo, Petulu) ni mwanakwo; Andre, te kaanatela Wanda mu chitende. 19Yesu yaamba ngwenyi: “Ngukaulenu yami, mba mungunupwisa akwa kutela atu.” 20Hazehene, yaahichika manda jo, yaamukaula.

21Yasenya kulutwe, yamona asongo ni mutu akwo aali, Tiangu (Jake) ni Yoano, ana ja Zebedeu. Te mu wato ali hamwe ni tato nikululieka manda jo. Yesu yaatambika. 22Hazehene, yaahichika wato ni tato, yaakaula Yesu.

Yesu yalongesa, yambujola, yawuka

(Tala nawa Luk 6:17-19)

23Yesu yendangana mu chifuchi cheswe cha Galilea, yalongesa mu mazuwo jo a kuwayila, yambujola Sango Jibema ja Wanangana, yawuka milali yeswe ya misongo ni weji hakachi ka atu. 24Lufuma wenyi yafumana mu chifuchi cheswe cha Siria.#4:24 Siria: ha matangwa waze, chifuchi cha Israele te chili Chipinji cha chifuchi cha Siria mu wanangana wa Aroma. Kashika, yaamunehena eswe waze ayijile misongo yeka ni yeka, ni waze amwene lamba lieka ni lieka, ni waze abwile ni mwiku wa luchisa, ni akwa chikonya, ni akwa kusosewa. Yesu yaawuka eswe. 25Mbunga jinene yaamukaula, waze akatukile ku chifuchi cha Galilea, ni ku Membo Kumi,#4:25 membo kumi: membo ja mavungu waze hi Ayuda ko, ku sude ku chivumbuko cha chitende cha Galilea. ni ku limbo lia Yerusaleme, ni ku chifuchi cha Yudea, ni ku chifuchi cha musali lia Yordau.

Currently Selected:

Mateu 4: CHK1970

Highlight

Copy