Luka 9

Yesu yatuma tumbaji kumi ni aali

(Tala nawa Mat 10:5-15; Mar 6:7-13)

1Yesu yakungulula tumbaji kumi ni aali, yaaha chiyulo ni tachi ja kutuhwisa najo mwiku weswe wa luchisa, ni kuwuka misongo. 2Mba yaatuma ni kwambujola sango ja Wanangana wa Zambi, ni kuwuka mieji. 3Yaamba ngwenyi: “Kanda numbata Chuma nichimwe mu wenyi: chibwe lukanda, hanji tuku, chibwe mbolo, hanji mbongo, kanda nubwa ni yikuto yaali. 4Kweswako maakanuzumbula, twamenu mu zuwo lizeliene ndoo muze munukakatuka mu limbo lize. 5Kweswako keechi kanutambula, katukenu mu limbo lio. Kukumunenu fufuta ya ku molu jenu ha kwatoweza. Chikabwe shindakenyo kuli ayo.” 6Tumbaji yaaya kwo, yaabalika mu membo eswe, yaambujola Sango Jibema, yaawuka mieji kweswe.

Kuyambashana cha Herode

(Tala nawa Mat 14:1-12; Mar 6:14-29)

7Muze Herode#9:7 HERODE: Herode Antipase, tala 3:1. mukwa kuyula hevwa yize yeswe yabalikile, yayambashana, mumu amwe atu yaambamba ngwo: “Yoano Chipapachisa hahinduka ku kufwa!” 8Akwo ngwo: “Eliya hasoloka.” Akwo nawa ngwo: “Umwe wa kuli akwa munanyi a Zambi a shakulu hahinduka ku kufwa.” 9Herode ngwenyi: “Yoano hingunamutape, alioze yono iya, kashika ngunevu yuma yibwa haha?” Mba yafupa kumona Yesu.

Yesu yalisa atu tununu atano

(Tala nawa Mat 14:13-21; Mar 6:30-44; Yoa 6:1-14)

10Tunganda twa Yesu yaahiluka, yaamwambulwila yize yeswe alingile. Yesu yaatwala kuma kwa ukawo ku limwe limbo, jina lialio Betsaida.#9:10 Betsaida: limwe limbo ku mbumbulu ya chitende cha Galilea ku norde ku chivumbuko. 11Alioze mbunga yaachivwa, yaamukaula. Yesu yaatambula, yaalongesa ha chikuma cha Wanangana wa Zambi, yawuka mieji.

12Muze te tangwa hiliendala chikolo, tumbaji kumi ni aali yaakundama kuli Yesu, yaamwamba ngwo: “Shikenu mbunga hanga aye ku yihunda ni ku minda yakusulangana akawane yakulia ni homa ha kubomba, mumu kuma kuno tuli kwa ukawetu.” 13Alioze Yesu yaamba ngwenyi: “Ahenu yenwene yakulia.” No yaakumbulula ngwo: “Tuli lume ni mbolo jitano ni yishi aali. Tuye tulande mbolo ya kulisa atu wano eswe, nyi?” 14(Mumu yikubwa ngwe tununu atano a malunga.) Yesu yambila tumbaji twenyi ngwenyi: “Atwamisenu ngango ni ngango ya makumi atano atano.” 15Tumbaji yoononoka, yatwamisa eswe. 16Yesu yanda mbolo jitano ni yishi aali, yatala kwilu, yasakwila ha yakulia yize, yayibalula, mba yayaha tumbaji hanga ayanyine ye mbunga. 17Eswe yaalia, yaakuta. Mba yaazalisa tupaya kumi ni aali a yibalubalu yize yalisalile ho.

Petulu yashindakenya ngwenyi: “Yesu mwe Chilamwina yoze Zambi alakenyene.”

(Tala nawa Mat 16:13-19; Mar 8:27-29)

18Limwe tangwa muze te Yesu analembe ukawenyi, tumbaji yaabwa hamwe nenyi. Yesu yaahula ngwenyi: “Mbunga kuchi akunguvuluka ngwo, nguli iya?” 19yaakumbulula ngwo: “Amwe kaakwamba ngwo: ‘Yoano Chipapachisa,’ akwo ngwo: ‘Eliya,’ akwo nawa ngwo: ‘Umwe wa kuli akwa munanyi a Zambi a shakulu hahinduka ku kufwa.’ ” 20Yesu yaahula ngwenyi: “Alioze yenu, kuchi nwakunguvuluka ngwenu, nguli iya?” Petulu yakumbulula ngwenyi: “Yena mwe Chilamwina yoze Zambi alakenyene!”

Yesu yambulula kufwa chenyi ni uhindukilo wenyi

(Tala nawa Mat 16:20-28; Mar 8:30—9:1)

21Yesu yaaha koki chikolo ngwenyi: “Kanda nwambulwila niumwe.” 22Yaamba nawa ngwenyi: “Chatamba Mwana Mutu#9:22 mwana mutu: tala 5:24. kumona lamba linji. Makulwana ja Ayuda, ni mahako a lutwe a Zambi, ni alongeshi a Shimbi maakalituna ye, maakamushiha. Mba ha tangwa lia muchitatu Zambi kumakamuhindwisa.”

23Mba yambila eswe ngwenyi: “Nyi umwe mazanga kungukaula, alitwamine kulinyonga iye mwene, azundule kulusu yenyi tangwa ha tangwa, angukaule. 24Mumu yoze mazanga kulamwina mwono wenyi, kumakautokesa. Alioze yoze matokesa mwono wenyi mumu hali yami, kumakaulamwina. 25Chika muchikwasa mutu, nyi mayuka hashi heswe, alioze malitokesa iye mwene? 26Nyi umwe manguvwila sonyi ni maliji jami, Mwana Mutu neye makamuvwila sonyi muze makeza mu uhenya wenyi, ni mu uhenya wa Tata, ni wa tunganda a mwilu a linanga. 27Chamwenemwene ngunanwambulwila ngwami, atu akwo anamana hano keechi kafwa ndoo maakamona Wanangana wa Zambi.”

Mujimba wa Yesu yiwalumuka

(Tala nawa Mat 17:1-8; Mar 9:2-8)

28Muze ngwe semane yimuwika hiyabalika, Yesu yatwala hamwe nenyi Petulu, ni Yoano, ni Tiangu (Jake), yaakanduka ha mulundu mu kulemba. 29Muze te analembe, meso jenyi yaalumuka, ni mahina jenyi yaatoma kuhiana. 30Susumuku, yikusoloka malunga aali, Mose ni Eliya te anate pande ni Yesu. 31No yaasoloka mu uhenya wa mwilu nikuhanjika ni Yesu ha chikuma cha kufwa chize makafwa ku Yerusaleme. 32Petulu ni masepa jenyi yaazembela tulo anji, alioze muze haalaula pundu, yaamona uhenya wa Yesu ni malunga waze aali te anamana nenyi. 33Shimbu malunga waze maachihichika Yesu, Petulu yamwamba ngwenyi: “Mwene, chinawaha tubwe kuno. Mututunga yikulika yitatu: cha yena, ni cha Mose, ni cha Eliya.” (Te kanyingikine chize anambe.) 34Muze te anahanjika chino, lelwa yilisoloka, yiliazulamina chizulie chalio. Tumbaji yeevwa woma ha kumona lelwa lize linaazulamina. 35Yeevwa liji mu lelwa ngwo: “Yono mwe Mwanami yoze natongwele, mwivwenu!” 36Muze liji hiliahanjika, yaamona lume Yesu ukawenyi. Tumbaji yaahola kuluu hakutwala ku chikuma chize. Ha tangwa lize kalwezele mutu niumwe yuma yize amwene.

Yesu yatuhwisa mwiku wa luchisa muli mwana

(Tala nawa Mat 17:14-18; Mar 9:14-27)

37Kwilu te hikwacha muze anapalumuka ha mulundu; mbunga yinene yaatakana ni Yesu. 38Umwe lunga wa mu mbunga yakololoka ngwenyi; “Longeshi, ngunakulembe tala kama mwanami, yomwene umuwika! 39Mwiku wa luchisa wakumukwata, ni kumutetesa, ni kumufwita. Mba mwana matutumuna fulufulu. Mwiku wakumukonyesa chikolo; kuusolo kumwecha! 40Naliumbanga kuli tumbaji twe atuhwise mwiku uze alioze kaahashile.” 41Yesu yakumbulula ngwenyi: “Mhmm! Ayenu akwa kuyambashana, atu abi! Ndoo mwiji muka Changutamba kulihumikiza ni yenu?” Mba yambila tato ngwenyi: “Neha mwane.” 42Muze mwana aneza, mwiku wa luchisa yiumulimbwisa hashi, yiumutunyisa chikolo. Yesu yakalukila mwiku, yawuka mwana, mba yamwahana kuli tato. 43Eswe yaalishimwoka ha ndundo jinji ja Zambi.

Yesu yambulula nawa kufwa chenyi ni uhindukilo wenyi

(Tala nawa Mat 17:22-23; Mar 9:30-32)

Muze te atu analishimwoka ha yize yeswe alingile, Yesu yambila tumbaji twenyi ngwenyi: 44“Fungenu chize ngunambe haliabwila. Ngwami maakakunjika Mwana Mutu ku moko ja atu.” 45Alioze liji lize kaalivwile kanawa. Yilihengama kuli ayo, hanga keechi kumwivwa kanawa. No yeevwa woma kumuhula chikuma chize.

Iya munene Wahiana?

(Tala nawa Mat 18:1-5; Mar 9:33-37)

46Tumbaji yaalihangujola ha kunyingika ngwo, iya munene Wahiana. 47Yesu yanyingika manyonga jo, yanda kanuke, yamumika ku sali lienyi, 48yaamba ngwenyi: “Yoze matambula mwana yono mu jina liami, mangutambula yami. Ni yoze mangutambula, matambula nawa yoze wangutumine. Mumu yoze uli mukepe Wahiana mukachi ka yenu eswe, mwenawo mwe munene Wahiana.”

Yoze keshi kulimika ni yenu kali niwenu

(Tala nawa Mar 9:38-40)

49Yoano yamba ngwenyi: “Mwata, twamwene umwe mutu te kanatuhwisa mwiku wa luchisa mu jina lie. Twamukanjishile, mumu hi wa ku mbunga yetu ko.” 50Alioze Yesu yamukumbulula ngwenyi: “Kanda numukanjisa, mumu yoze keshi kulimika ni yenu kali niwenu.”

Limbo lia Asamaria yaalituna Yesu

51Muze matangwa haakundama ha kutambula Yesu mwilu, yatalikisa ku Yerusaleme. 52Yatuma tunganda twenyi kulutwe lienyi. No yaatuhuka, yaanjila mu limbo lia Asamaria ni kumululikila ha kumutambula. 53Alioze atu waze kaamutambwile ko, mumu te kanatalikisa ku Yerusaleme. 54Muze haachimona, tumbaji twenyi Tiangu (Jake) ni Yoano yaahula ngwo: “Mwene, unazange twite kahia kwilu#9:54 KWILU: Yisoneko yikwo yinawezela ngwo, “ngwe chize alingile mukwa munanyi Eliya.” kahulumuke ha kwonona, nyi?” 55Yesu yatewuluka kuli ayo, yaakumika. 56Mba yaaya ku limbo likwo.

Atu waze akuyambashana kukaula Yesu

(Tala nawa Mat 8:19-22)

57Muze te achili mu jila, umwe mutu yambila Yesu ngwenyi: “Mungukukaula kweswako mwoya.” 58Yesu yamukumbulula ngwenyi: “Mikuza mena akwete, ni tujila yaswa akwete, alioze Mwana Mutu#9:58 mwana mutu: tala 5:24. keshi homa haze mahasa kubomba.” 59Yambila mukwo ngwenyi: “Ngukaule.” Alioze mutu yoze yamba ngwenyi: “Mwene, achingutayize kama hatangu kuya ni kufunda tata.”#9:59 kufunda TATA: tangwa likwo maliji wano kaanalumbununa ngwo, “kufunga tata ndoo makafwa.” 60Yesu ngwenyi: “Echele afu afunde afu jo ene. Alioze yena yako ni kwambujola Wanangana wa Zambi.” 61Mukwo yamwamba ngwenyi: “Mwene n ungukukaula, alioze hatangu achingutayize kuya ni kushika akwa jiko liami.” 62Yesu yamwamba ngwenyi: “Yoze unase kwoko ha temo liakjulima nalio, ni kakutala kunyima, keshi kutela mu Wanangana wa Zambi!”

Currently Selected:

Luka 9: CHK1970

Highlight

Copy