Luka 10

Yesu yatuma tumbaji makumi shimbiali ni aali

1Mwabwamuze Mwene Yesu yatongola atu akwo makumi shimbiali ni aali.#10:1 makumi shimbiali Ni AALI: yisoneko yikwo ngwo, makumi shimbiali. Yatuma aali aali kulutwe lienyi mu membo eswe ni kuma kweswe kuze iye mwene ambile kuya. 2Yamba ngwenyi: “Mihuko yili yinji, alioze akwa milimo akepe. Kashika, liumbenu kuli mwenya minda hanga atume akwa milimo ni kuhela mihuko yenyi. 3Yeenu kwenu! Ngunanutumu ngwe ana mapanga hakachi ka tungunga. 4Kanda nwanda chibwe ngonga, chibwe chibakumuna, chibwe sapato. Kanda numanamana mu jila ni kumeneka umwe. 5Muze munukanjila mu limwe zuwo, nukalianga kwameneka ngwenu: ‘Akwa zuwo lino tambulenu uhwimino.’ 6Nyi umwe matela kutambula uhwimino, kumeneka chenu cha uhwimino chikabwe mu zuwo lize. Nyi ka, chikanuhilukile. 7Twamenu mu zuwo lizeliene, lienu ni nwenu yize maanusela mo, mumu mukwa milimo katela fweto yenyi. Kanda nututujoka mu zuwo ni zuwo. 8Muze munukanjila mu limwe limbo, nyi maakanutambula, lienu yize yeswe maakanwaha. 9Wukenu mieji a mu limbo lize. Ambilenu atu jamo ngwenu: ‘Wanangana wa Zambi hiwakundama.’ 10Alioze muze munukanjila mu limwe limbo nyi keechi kanutambula, tuhukenu mu zuwo, endenu mu majila nikwamba ngwenu: 11‘Tunakukumuna fufuta ya mu limbo lienu yize yinalalaminya ku yiliato yetu. Alioze nyingikenu kanawa ngwenu, Wanangana wa Zambi hiwakundama!’ 12Ngunanwambe ngwami, ha tangwa lia ubatwilo lamba mulikabwa likalu ha limbo lize kuhiana lia Sodome!”#10:12 Sodome: limwe limbo hehi ni chitende cha Kufwa lize Zambi ochele ni kahia mumu ha yitanga yibi ya atu jalio.

Akwa membo waze te keeshi kufuliela

(Tala nawa Mat 11:20-24)

13“Lamba lienu akwa Korazine! Lamba lienu akwa Betsaida! Mumu, nyi yipupu yize alingile muli yenu, ayilingile nawa mu Tiru ni Sidone,#10:13 TIRU ni SIDONE: tala 6:17. kachi atu jamo haanatwama kulu hashi ni kuzala mwanji ni kulikwita uto ha kulweza ngwo, haanalumuka ku mbunge. 14Ha Tangwa lia Ubatwilo lamba lienu mulikabwa likalu, kuhiana lize lia akwa Tiru ni akwa Sidone. 15Ni yenu akwa Kafarnaume, nunanyongo ngwenu, maakanuzundula ndoo kwilu, nyi? Kumaakanuhulumuna ndoo mu kahia!”

16Yambila tumbaji twenyi ngwenyi: “Yoze manwivwa, mangwivwa yami. Yoze malituna yenu, malituna yami. Ni yoze malituna yami, malituna yoze wangutumine.”

Kuhiluka cha tumbaji makumi shimbiali ni aali

17Tumbaji waze makumi shimbiali ni aali#10:17 makumi shimbiali ni aali: yisoneko yikwo ngwo, makumi shimbiali, tala 10:1. yaahiluka ni chiseke. Ngwo: “Mwene, chibwe mwiku wa luchisa unatwononokena, muze tunawambila mu jina lie!” 18Yesu ngwenyi: “Namwene Sakwonga yaholoka kwilu ngwe muhenyo. 19Achivwenu! Hingunanwehe chiyulo cha kuliata tupela ni tuvwanda, ni chiyulo cha kukumba tachi jeswe ja Mukwa Kole. Nichimwe muchihasa kunulinga chibi. 20Alioze kanda nuwahilila ha chize mwiku wa luchisa unanwononokena. Shinoho wahililenu mumu majina jenu haanasonewa mwilu.”

Yesu yawahilila

(Tala nawa Mat 11:25-27; 13:16-17)

21Ha ola yizeyene Yesu yawahilila kuhiana ni uwahililo wa Mwiku wa Linanga, yamba ngwenyi: “A Tata, Mwenya lilu ni hashi! Ngunakusakwila mumu hiwasolwela waze kaalilongesele yuma yize waswekelele akwa mana ni waze haanalilongesa. Ewa Tata, Chenacho wazangile yena mwene.

22“Tata hanangukunjika yuma yeswe. Niumwe wanyingika mwe Mwana shina Tata, chibwe niumwe wanyingika Tata, shina Mwana ni waze Mwana akuzanga kumusolwela.”

23Mba Yesu yatewulukila kuli tumbaji twenyi, yaamba ku tenga ngwenyi: “Kunwawaha yenu nwakumona yuma yino! 24Mumu ngunanwambulwila ngwami, akwa munanyi a Zambi anji ni mianangana anji azangile kumona yuma yize nwakumona yenu, alioze kaa yimwene ko; ni kwivwa yize nwakwivwa, alioze kaayivwile ko.”

Chishima cha Kasamaria mubema

25Hohene umwe longeshi ya Shimbi yeza ni kutela Yesu muheto, yamuhula ngwenyi: “Longeshi, kuchi Changutamba kulinga hanga ngubwe ni mwono wa miaka yeswe?” 26Yesu yamukumbulula ngwenyi: “Kuchi chinasonewa mu Shimbi jetu? Kuchi unatange?” 27Mwe mutu yakumbulula ngwenyi: “ ‘Zanga Mwene Zambi ye ni mbunge ye yeswe, ni mwono we weswe, ni ngolo je jeswe, ni manyonga je eswe’; nawa: ‘Zanga mwenyembo we ngwe chize wakulizanga yena mwene.’ ” 28Yesu ngwenyi: “Wakumbulula kanawa. Linga Chenacho, mba ubwe ni mwono.”

29Alioze mwe longeshi ya Shimbi yazanga kulisambisa, mba yahula Yesu ngwenyi: “Mwe mwenyembo wami iya?” 30Yesu ngwenyi: “Umwe mutu wakatukile ku limbo lia Yerusaleme ni kuya ku limbo lia Yeriku.#10:30 YERIKU: limwe limbo ku chitokelo cha lwiji Yordau, ngwe kilometro 24 ku norde ku chivumbuko cha Yerusaleme. Mihuza yaamukwata, yaamuzula mahina jenyi, yaamulamba, yaamuhichika ni chonono, yaaya kwo. 31Mba umwe hako wa Zambi yeza mu jila yize. Muze hamona mwe mutu, yabalikila sali likwo. 32Chimuwika nawa, umwe Kalevi yaheta kuma kuze, yakundama, yamona mutu yoze, yabalikila sali likwo. 33Alioze umwe Kasamaria, yoze wabalikile jila yizeyene, yamuheta. Muze hamumona, yamuvwila keke kuhiana, 34yamukundama, yatehwina maji ni vinyu ha yilonda yenyi, yayikasa. Mba yamusa hali kashitu kenyi mwene, yamutwala ku zuwo lia ngeji, yamuwukila ko. 35Muze hikwacha, yanda mbongo jaali, yajaha mwe mukwa zuwo nikwamba ngwenyi: ‘Mutu yono umufunga kanawa. Muze mungukahiluka kuno, mungukakukundulula yize yeswe muukahwisa hali iye.’ ” 36Yesu yawezaho ngwenyi: “Iya wa kuli wano atatu unanyongo wabwile mwenyembo wa mutu yoze alambile mihuza?” 37Longeshi ya Shimbi yakumbulula ngwenyi: “Yoze wamuvwilile keke.” Mba Yesu yamwamba ngwenyi: “Ni yena yako ulinge chizechene.”

Yesu maha Marta ni Maria

38Muze Yesu ni tumbaji twenyi te ali mu jila, yaaheta mu chimwe chihunda. Umwe pwo yamuzumbula, jina lienyi Marta. 39Neye yabwa ni mwanakwo umuwika, jina lienyi Maria. Neye yatwama ku molu ja Mwene, yevwavwa yize te analongesa. 40Marta yalibikala ni milimo yinji ya yakulia. Kashika yakundama nikwamba ngwenyi: “Mwene, nichimwe kuli yena, nyi? Mwanakwetu hanguhichika ku milimo ya yakulia ukawami. Mwambe kama angukwase.” 41Mwene yamukumbulula ngwenyi: “Marta, Marta! Wakulibikala ni kulihapisa ha yuma yinji. 42Alioze Chuma chimuwika unahono. Maria hatongola Chihanda chibema, chize keechi kamuchiza cho.”

Currently Selected:

Luka 10: CHK1970

Highlight

Copy