Luka 13

Chatamba kwalumuka ku mbunge, nyi ka, muukafwa

1Ha ola yize, amwe atu yeeza nikwambulwila Yesu hakutwala kuli akwa Galilea waze Pilatu#13:1 PILATU: tala 3:1. ashihishile ha shimbu lize alambwile Zambi mulambu. 2Yesu yaakumbulula ngwenyi: “Nunanyongo ngwenu, muze Pilatu ashihishile akwa Galilea ngwe chize, kafwa ngwe, ayo abwile yivulumunyi kuhiana akwa Galilea eswe akwo, nyi? 3Ngwami, ka, alioze nyi kunwalumukine ku mbunge, yenu eswe munukafwa ngwe ayo. 4Hanji waze kumi ni nake afwile muze zuwo lisuku lia kutalila lia Silome liabuzukile hali ayo, nunanyongo ngwenu, ayo abwile yivulumunyi kuhiana akwa Yerusaleme eswe akwo, nyi? 5Ngwami, ka, alioze, nyi kunwalumukine ku mbunge, eswe munukafwa ngwe ayo.”

Chishima cha mukuyu (figu) uze kuwemine mihuko

6Mba Yesu yaatela chishima chino ngwenyi: “Umwe mutu watumbile mukuyu mu munda wenyi. Yeza ni kufupa mihuko, alioze kayiwanyine ko. 7Mba yambila njimi ngwenyi: ‘Tala miaka yitatu neza ni kufupa mihuko ku mukuyu uno, alioze chawanyine nichimwe. Upakule! Kuchi kevwe unasekesa mavu?’ 8Alioze njimi yamukumbulula ngwenyi: ‘Mwata, achi weche kama nawa mwaka uno. Mungufula wina mu sesa ni kusa mo pinga. 9Nyi muukema mihuko mwaka wa kulutwe, chibema. Nyi ka, mba muuhasa kuupakula.’ ”

Yesu yawuka umwe pwo wafumbama ha tangwa lia kuhwima

10Limwe tangwa lia kuhwima, Yesu te kanalongesa mu zuwo lia kuwayila. 11Kuma umwe pwo wabwile mo, te wayiza miaka kumi ni nake. Yabwa ni mwiku wa luchisa uze wamufumbamishine, kahashile nichimwe kuhetuka. 12Muze hamumona, Yesu yamutambika nikwamba ngwenyi: “Yena mama, unatusuka ku yikola ye!” 13Yamusa moko. Hazehene yoloka. Mba yabutuka kuchichimieka Zambi. 14Alioze mukwa kuyula zuwo lia kuwayila yevwa wuli ha chize Yesu awukile mutu ha tangwa lia kuhwima. Mba yambila mbunga ngwenyi: “Tukwete matangwa asambano a milimo. Tweyenu, kashika, ni kunuwuka ha matangwa waze, alioze hi ha tangwa lia kuhwima ko!” 15Mwene yamukumbulula ngwenyi: “Mhmm! Yenu yilembekese! Mutu mweswe hakachi kenu kakujitula ngombe yenyi hanji chimbulu chenyi ku chililo nikumutwala ku meya ha tangwa lia kuhwima, hi chocho ko? 16Pwo yono, wa ku vungu lia Abrahama, yoze Sakwonga akashile miaka kumi ni nake, kuchatambile kumujitula ku ngoji jenyi ha tangwa lia kuhwima, nyi?” 17Kumbululo lino lia Yesu yilivwisa akwa kole jenyi sonyi, alioze mbunga yeswe yaawahilila ha yitanga yeswe yakulishimwoka yize alingile Yesu.

Chishima cha lunona wa chibuta cha mostarde

(Tala nawa Mat 13:31-32; Mar 4:30-32)

18Yesu ngwenyi: “Wanangana wa Zambi walifwa ni Chuma chika? Ngwe Chuma chika munguutakenya? 19Kuwalifwa ni lunona wa chimwe chibuta cha mostarde, yoze anjile mutu nikumutumba mu munda wenyi. Mwenawo yasoka, yabwa chibuta. Tujila yaatunga yaswa ku mitango yacho.”

Chishima cha yitumbo ya mbolo

(Tala nawa Mat 13:33)

20Yesu yamba nawa ngwenyi: “Ni Chuma chika mungutakenya Wanangana wa Zambi? 21Kuwalifwa ni yitumbo ya mbolo yize anjile umwe pwo, yayichinga ni njongo jitatu ja wunga, ndoo weswe yiufutunuka.”

Chikolo chikepe

(Tala nawa Mat 7:13-14, 21-23)

22Yesu yendangana mu membo ni mu yihunda nikulongesa muze te anayi ku Yerusaleme. 23Umwe mutu yamuhula ngwenyi: “Mwene, kukuli lume akepe waze makaalamwina, nyi?” Yesu ngwenyi: 24“Litachikenu kunjila ku chikolo chikepe, mumu ngunanwambe ngwami, anji maakazanga kunjila mo, alioze keechi kahasa.

25“Muze mwenya zuwo makakatuka ni kwajila ku zuwo, yenwene munukamana haze. Munukabutuka kungongwela ku chajilo nikwamba ngwenu: ‘Mwene, Mwene, twazulwile!’ Neye makanukumbulula ngwenyi: ‘Chanyingikine kuze nunakatuka.’ 26Mba munukamukumbulula ngwenu: ‘Twalile ni twanwine hamwe ni yena, ni yena walongesele mu mikala ya limbo lietu.’ 27Neye makanwamba nawa ngwenyi: ‘Chanyingikine kuze nunakatuka. Ngukatukenu yenu eswe nwakulinga uhenge!’ 28Kwenako munukalila nikulicheka ku mazo muze munukamona Abrahama, ni Isake, ni Yakoba, ni akwa munanyi eswe mu Wanangana wa Zambi, alioze yenu makanumbila haze! 29Atu maakakatuka ku chivumbuko, ni ku chitokelo, ni ku norde, ni ku sude, ni kutwama ku mesa mu Wanangana wa Zambi. 30Mba anji waze kaali asula haliabwila maakabwa atangu, ni akwo waze kaali atangu haliabwila maakabwa asula.”

Yesu yalilila Yerusaleme

(Tala nawa Mat 23:37-39)

31Shimbu lizeliene, amwe Afariseu#13:31 afariseu: tala 5:17. yaakundama kuli Yesu nikwamba ngwo: “Katuka kuno, yako kweka, mumu Herode#13:31 Herode: Herode Antipase, mukwa kuyula Galilea, tala 3:1. kanazange kukushiha.” 32Yesu ngwenyi: “Yeenu nwambile yoze mukuza, mukwa kushiha, ngwami: ‘Tala nakutuhwisa mwiku wa luchisa, nakuwuka musono ni hamene, mba ha tangwa lia muchitatu mungukamanununa milimo yami.’ 33Alioze Changutamba kuya mu jila yami musono, ni hamene, ni hamene alize, mumu kuchatambile mukwa munanyi wa Zambi kufwila kweka shina mu Yerusaleme.

34“Yerusaleme, Yerusaleme! Yena wakushiha akwa munanyi a Zambi, wakwasa mawe waze Zambi akukutumina! Yisuho yibwa haha nazangile kukungulula ana je, ngwe chize chali cha kasumbi akukungulula ana jenyi mu mapulwa, alioze kunwachitayijile! 35Talenu zuwo lienu haalihichika liahululu. Ngunanwambe ngwami, kunuchi kangumona nawa nichimwe ndoo munukamba ngwenu: ‘Zambi awahise yoze uneza mu jina lia Mwene.’ ”

Currently Selected:

Luka 13: CHK1970

Highlight

Copy