Luka 14

Yesu yawuka mukwa musongo wa ndondo

1Limwe tangwa lia kuhwima Yesu yaya maha umwe mwata wa Afariseu ni kulia. Waze abwile ko yaalaa Yesu. 2Umwe mutu yoze te wayiza musongo wa ndondo yamana ku meso jenyi. 3Yesu yahula alongeshi a Shimbi ni Afariseu ngwenyi: “Chinalite ni Shimbi jetu kuwuka ha tangwa lia kuhwima, nyi ka?” 4Alioze yaaholame kuluu. Yesu yakwata mwe mweji, yamuwuka, yamwecha aye kwenyi. 5Mba Yesu yaamba ngwenyi: “Nyi umwe hakachi kenu mabwa ni mwana lunga hanji ngombe yoze maholokela mu wina, kuuchi kumutuhwisa mo hazehene, chibwe ha tangwa lia kuhwima, nyi?” 6Alioze kaahashile kumukumbulula ha chikuma chize.

Kutambula atu ni kulilelesa

7Yesu yamona chize waze alakenyene te anatongola mihela ya ulemu. Mba yaatela eswe chishima chino ngwenyi: 8“Muze umwe mutu makulakenya ku umbachiso, kanda utwama ha chitwamo cha ulemu. Hanji halakenya umwe mulemu Wahiana yena, 9ni yoze wanulakenyene eswe aali meza nikukwamba ngwenyi: ‘Musele chitwamo chino.’ Mba sonyi muwivwa ha kuya ni kutwama ha chitwamo cha ku songo. 10Shinoho, muze hakulakenya, yako Ukatwame ha chitwamo cha ku songo, hanga muze yoze wakulakenyene meza, makwamba ngwenyi: ‘Mukwetu, tweya ku chitwamo cha ulemu.’ Mba muubwa ni vumbi ku meso ja waze eswe unatwama no ku mesa. 11Mumu mweswe malilemesa, Zambi makamulelesa, ni yoze malilelesa, Zambi neye makamulemesa.”

12Mba Yesu yambila yoze wamulakenyene ngwenyi: “Muze muulinga yakulia chichamene hanji chingoloshi, kanda utambika masepa je, chibwe ana akwenu, chibwe usoko we, hanji enyembo je pichi, kuchina no maakakulakenya nawa hanga akakukundulule. 13Alioze muze muulinga chiteleka, lakenya yiswale, ni yitonji, ni yilema, ni tupuputa. 14Mba muukawaha, mumu keechi kuhasa kukuhilwishila yo. Zambi makakukundulula ha uhindukilo wa akwa ululi ku kufwa.”

Chishima cha chiteleka chinene

(Tala nawa Mat 22:1-10)

15Muze hevwa maliji wano, umwe wa kuli waze atwamine hamwe nenyi ku mesa yambila Yesu ngwenyi: “Kawaha yoze makalia mu Wanangana wa Zambi!” 16Yesu yamwamba ngwenyi: “Umwe mutu walulikile chiteleka chinene, yalakenya atu anji. 17Ha ola ya chiteleka yatuma kavumbi kenyi kuli waze alakenyene, ngwenyi: ‘Tweyenu, mumu yuma yeswe hiyahwa!’ 18Alioze eswe, yaabutuka tuliongelo. Mutangu yambila mwe kavumbi ngwenyi: ‘Munda ngunakalanda. Changutamba kuya ni kuutala. Ngunakulembe mwane, ungutayize kama.’ 19Mukwo ngwenyi: ‘Ngunakalanda makanga atano a ngombe. Ngunayi ni kweeseka. Ngunakulembe mwane, ungutayize kama.’ 20Mukwo ngwenyi: ‘Hinambata pwo, kashika chahashile kwiza.’ 21Mwe kavumbi yahiluka kuli mata wenyi ni makumbululo wano. Mweneya zuwo yatenuka, yambila kavumbi kenyi ngwenyi: ‘Tuhuka nikawashi uye mu majila anene anene ni mu mikala ya mu limbo; unehe yiswale, ni yilema, ni tupuputa, ni yitonji.’ 22Ha shimbu likepe mwe kavumbi yeza nikwamba ngwenyi: ‘Mwata, chize wambanga hinachilinga, alioze hindu mihela kuyili.’ 23Mba mwe mwata yambila kavumbi ngwenyi: ‘Tuhuka, uye mu majila ni ku yipanga, ushinjile atu kunjila hanga zuwo liami lizale. 24Ngunanwambe ngwami, malunga waze alakenyene, niumwe kechi kalia chiteleka chami!’ ”

Ndako jize jinalite ha kubwa kambaji

(Tala nawa Mat 10:37-38)

25Mbunga jinene ayile hamwe ni Yesu. Neye yatewuluka nikwamba ngwenyi: 26“Yoze meza kuli yami kahashile kubwa kambaji kami, nyi keshi kuvutwokela tato, ni naye, ni pwo lienyi, ni ana jenyi, ni ana akwo, ni mandumbu jenyi, chibwe ni we mwono wenyi. 27Yoze keshi kumbata kulusu yenyi ni kungukaula kahashile kubwa kambaji kami. 28Nyi umwe wa kuli yenu mazanga kutunga zuwo lisuku, hatangu matwama ni kwalula mbongo jingahi chatamba kubwa najo. Mba matala nyi mbongo jenyi jinazuku ha kumanununa milimo. 29Nyi kujazukile, kechi kuhasa kumanununa zuwo lisuku muze hasa kulu fundamentu, ni eswe waze maachimona maabutuka kumuseha, 30ngwo: ‘Mutu yono wabutukile kutunga, alioze kahashile kumanununa.’ 31Chizechene nawa, nyi umwe mwanangana mazanga kwasa jita ni mwanangana mukwo, hatangu matwama hashi hanga amone nyi mahasa kwasa jita ni tununu kumi a malunga ni kukumba mukwa kole yenyi yoze uli ni tununu makumi aali. 32Nyi kechi kuhasa, matuma tunganda kuli mwanangana mukwo, shimbu achili kusuku, ni kumwita uwanyino.” 33Yesu yawezaho ngwenyi: “Chimuwika nawa, niumwe wa kuli yenu mahasa kubwa kambaji kami shina mehuka yize yeswe ali nayo.”

Mungwa uze hiwasamuka

(Tala nawa Mat 5:13; Mar 9:50)

34“Mungwa Chuma chibema, alioze nyi hiwasamuka, neka mauyemesa nawa? 35Kuwatelele nichimwe, chibwe hashi, chibwe pinga, shina kuumwangina haze. Banjikenu kanawa, nyi nuli ni matwi!”

Currently Selected:

Luka 14: CHK1970

Highlight

Copy