Luka 1

Maliji atangu

1Mukwetu Teofilu:

Unanyingika chize atu anji haanalihana ni kusoneka yikuma yize hiyinamanunuka hakachi ketu. 2Haanasoneka chize atulwezele yela waze ayimwene ku kabutu, waze te akulongesa maliji a Zambi. 3Ni yami nawa hingunanyongo ngwami, chinalite kukusonekena yena, mwanangana, yikuma yize ngwe chinalite. Mumu hingunalisela pundu ku yuma yize yasolokele chize ku kabutu. 4Chino ngunachilingi hanga uhase kunyingika yuma yamwenemwene yize akulongesele.

Kanganda ka mwilu yambulula kusemuka cha Yoano Chipapachisa

5Muze te Herode#1:5 Herode: Herode Munene, mwanangana wa chifuchi cheswe cha Israele. akuyula mu chifuchi cha Yudea, yikubwa hako lia Zambi, jina lienyi te Zakaria, wa ku mbunga ya mahako ja Abija. Pwo lienyi, Isabele (Elisabete), wa ku vungu lia Arone, mwata wa mahako ja Zambi. 6No eswe aali yaabwa akwa ululi ku meso ja Zambi, yaafunga Shimbi jeswe ni ndako jeswe ja Zambi, te keeshi kapalia. 7Alioze kaabwile ko ni mwana, mumu Isabele (Elisabete) te mumba. No eswe aali yaabwa tushinakaji.

8Limwe tangwa, Zakaria te kanalingi uvumbiko wa kuhakwila ku meso ja Zambi, mumu e matangwa a mbunga yenyi a kuchilinga. 9Nikulita ni ndako ya mahako, yamutongola, ha kuta chela, ha kunjila mu zuwo lia Mwene Zambi ni kwocha milambu ya vumba libema. 10Atu eswe te kaanalembe haze ha ola ya kwocha milambu yize. 11Kanganda ka mwilu yasolokela Zakaria, yamana ku chindume cha chilumbilo cha kwochela milambu ya vumba libema. 12Zakaria, ha kumumona, yatungumuka, yevwa woma. 13Alioze kangunga ka mwilu yamwamba ngwenyi: “Kanda wivwa woma, Zakaria! Zambi hevwa kuliumba che. Pwo lie, Isabele (Elisabete), kumakasema mwana wa lunga, ukamuluke jina ngwe, Yoano. 14Muukevwa chiseke chinji, ni atu anji kumaakawahilila ha kusemuka chenyi. 15Mumu makabwa mutu munene ku meso ja Mwene Zambi. Kechi kanwa vinyu, chibwe Chuma chikwo cha kuzengewesa mutu. Makazala ni Mwiku wa Linanga chize ku jimo lia naye. 16Makahilwisa atu anji hakachi ka Israele kuli Mwene Zambi yo. 17Makatetekela ku meso ja Zambi mu tachi ni ndundo ja mukwa munanyi a Zambi, Eliya. Makawanyisa atato ni ana jo. Makalumuna yihulia akabwe ni manyonga a ululi. Makalulikila Mwene Zambi atu jenyi.”

18Zakaria yahula kanganda ka mwilu ngwenyi: “Ngwe kuchi mungunyingika ngwami, chino chili chamwenemwene? Mumu hinabwa kashinakaji, ni pwo liami nawa habwa kashinakaji.” 19Kanganda ngwenyi: “Yami nguli Gabriel. Nakumana ku meso ja Zambi ni kumuvumbika. Neye hangutuma kuhanjika ne ni kukwambulwila sango jino jibema. 20Alioze kuwafulielele maliji jami waze maakamanunuka ha tangwa lize alakenyene. Kashika, muubwa kanaye, kuuchi kuhasa kuhanjika ndoo ku tangwa lize yuma yino muyikamanunuka.”

21Atu te kaanatwaminyina Zakaria nikulishimwoka ha kushimbwila chenyi mu zuwo lia Zambi. 22Muze Zakaria hatuhuka kahashile ko kuhanjika no. Mba atu yaanyingika ngwo, Usolwelo amona mu zuwo lia Zambi. Zakaria yaalweza ni minwe, mumu te habwa kanaye.

23Muze Zakaria hamanununa matangwa a uvumbiko wenyi mu zuwo lia Zambi, yahiluka ku mahienyi. 24Muze amwe matangwa haabalika, pwo lienyi Isabele (Elisabete) yaseseka ufumba, yaswama tukweji atano mu zuwo, yalihanjikisa ngwenyi: 25“Chenacho Mwene Zambi hangukwasa. Haliabwila hanguchiza sonyi ku meso ja atu eswe.”

Kanganda ka mwilu yambulula kusemuka cha Yesu

26Ha kakweji wa muchisambano wa ufumba wa Isabele (Elisabete), Zambi yatuma kanganda ka mwilu, Gabriel, ku limbo lia Nazare#1:26 Nazare: limwe limbo kilometro 26 ku chitokelo cha songo lia sude ya chitende cha Galilea. mu Galilea#1:26 Galilea: ku norde mu Israele.. 27Te kali ni liji lia kulweza mwana pwo, jina lienyi Maria, yoze te kanda achilimona ni lunga. Te hanamwambisa kuli Josefe, wa ku vungu lia mwanangana David. 28Kanganda ka mwilu yamuheta nikwamba ngwenyi: “Vulie! Mwene Zambi kali hamwe ni yena, hanakuwahisa!” 29Maria yalibikala kuhiana ha maliji wano, yalihula ulumbumwiso wa kumeneka chenyi. 30Kanganda ngwenyi: “Kanda wivwa woma, Maria, mumu Zambi hakulweza utu. 31Muuseseka ufumba muukasema mwana wa lunga, muukamuluka jina ngwe, Yesu.#1:31 YESU: jina lino mu hebreu linalumbununa ngwo, “kanalamwina,” hanji ngwo, “Mwene kali chilamwina.” 32Makabwa mwanangana munene, atu maakamuvuluka ngwo: ‘Mwana wa Mukwa Mwilu Mwahiana.’ Mwene Zambi makamwaha chitwamo cha kashakulu kenyi David. 33Makayula vungu lia Yakoba ku miaka yeswe. Wanangana wenyi kuuchi kahwa!”

34Maria yakumbulula kanganda ka mwilu ngwenyi: “Mamee! Ngwe kuchi chino muchihasa kubwa, mumu kanda nguchilimona ni lunga?”

35Kanganda ngwenyi: “Mwiku wa Linanga muukuhulumukina, ndundo ja Zambi, Mukwa Mwilu Mwahiana, mujikuzulamina ngwe chizulie. Kashika, mwana yoze munangi maakamuvuluka ngwo, mwe Mwana Zambi. 36Isabele (Elisabete), usoko we yoze te akuvuluka ngwo, mumba, habwa ni ufumba wa tukweji asambano. Makasema mwana wa lunga, chibwe habwa kulu kashinakaji. 37Mumu Zambi nichimwe machisa kenu.”

38Mba Maria yamba ngwenyi: “Nguli kavumbi ka Mwene. Chikabwe kuli yami ngwe chize hiwamba.” Mba kanganda yamuhichika.

Maria yanangisa Isabele (Elisabete)

39Ha matangwa waze ene, Maria yakatuka, yaya nikawashi ku chihunda chimwe cha mu chifuchi cha milundu ya mu Yudea, 40yanjila mu zuwo lia Zakaria, yameneka Isabele (Elisabete). 41Ha shimbu lize Isabele (Elisabete) hevwa kumeneka cha Maria, mwana kemba yatumbuka mu jimo. Isabele (Elisabete) yazala ni Mwiku wa Linanga, 42yakololoka ngwenyi: “Ewa tatee! Zambi hakuwahisa kuhiana mapwo eswe. Zambi hawahisa mwana yoze muukasema! 43Yami iya mba naye ya Mwene wami meza kuli yami? 44Mumu, tala, ha shimbu lize nevwa kumeneka che, mwana kemba katumbuka ni chiseke mu jimo liami. 45Kuwawaha yena Wafulielele ngwe, yize akulwezele Mwene muyikamanunuka!”

Mwaso wa uhaliso wa Maria

46Mba Maria yamba ngwenyi:

“Mbunge yami yinalemesa Mwene Zambi,

47yinawahilila mumu hali Zambi, Chilamwina chami,

48mumu hatala ulelu wami, yami ndungo yenyi.

Chize ku haliabwila yisemuko yeswe maakanguvuluka ngwo, Kawaha,

49mumu Zambi, Mukwa Ndundo Jeswe,

hangulingila yuma yinene.

Jina lienyi lia linanga.

50Kakuvwila keke waze akumuvwila woma

ku yisemuko yeswe.

51Halinga ni kwoko lienyi lia ndundo.

Hamwanga akwa kulitohesa mu manyonga jo.

52Hasunwisa mianangana ha yitwamo yo ya wanangana,

halemesa akwa kulikehesa.

53Hakuchisa akwa zala ni yuma yibema,

hakatwisa pichi mokomoko.

54Hakwasa kavumbi kenyi, Israele.

Kavulamine ko kusolola keke yenyi

55kuli Abrahama ni vungu lienyi ku miaka yeswe,

ngwe chize hanachilakenya kuli tushakulu twetu!”

56Maria yatwama ni Isabele (Elisabete) ngwe tukweji atatu, mba yahiluka ku mahienyi.

Kusemuka cha Yoano Chipapachisa

57Tangwa lia Isabele (Elisabete) lia kusema yiliheta, mba yasema mwana lunga. 58Enyembo ja Isabele (Elisabete) ni usoko wenyi yeevwa ngwo, Mwene Zambi hamwokesela keke. No yaawahilila hamwe nenyi.

59Muze mwana habwa ni matangwa nake, yisemi yeeza akamupwise ngalami. Atu yaazanga kumuluka jina lia tato Zakaria, 60alioze naye yakumbulula ngwenyi: “Hi chocho ko! Jina lienyi Yoano.” 61No yaamwamba ngwo: “Niumwe hakachi ka usoko we ukwete jina lino.” 62Mba yaahula tato ni minwe hanga anyingike jina lize azangile kuluka mwana. 63Zakaria yeta hausonekene. Yasoneka ho maliji wano ngwenyi: “Jina lienyi Yoano.” No eswe yaalishimwoka. 64Hazehene limi lia Zakaria yilitusuka, yabutuka kuchichimieka Zambi. 65Mba enyembo eswe yeevwa woma. Sango jino yaajambulula mu chifuchi cheswe cha milundu ya mu Yudea. 66Waze eswe achivwile yaanyonga ni kulihula ngwo: “Mwana yono kuchi makabwa?” Chamwenemwene kuma te kali ni tachi ja Mwene Zambi.

Zakaria yambulula yuma yize muyiza ho

67Zakaria, tato ya mwana, yazala ni Mwiku wa Linanga, mba yahanjika maliji wano ngwenyi:

68“Chichimiekenu Mwene Zambi,

Zambi ya Aisraele!

Mumu heza ni kulamwina atu jenyi ni kwakula.

69Hatusolwela mbinga ya ulamwino

wa ku vungu lia mwanangana David, kavumbi kenyi.

70Chenacho hanahanjika kulu kuli akwa munanyi jenyi a kulinanga.

71Hanalakenya ngwenyi, makatupulula ku tachi ja akwa kole jetu,

ku tachi ja waze akutuvutwokela.

72Nawa ngwenyi, makasolwela tushakulu twenu keke yenyi

ni kwiwuluka Usendo wenyi wa linanga.

73Zambi hanalishingi kulu kuli Abrahama, kashakulu ketu,

74mu kutukula ku tachi ja akwa kole jetu,

ni kututayiza mu kumuvumbika woma wakuhi,

75hanga tubwe akwa kulinanga ni akwa ululi ku meso jenyi

matangwa eswe a mwono wetu.

76“Ni yena, mwanami, maakakuvuluka ngwo,

mukwa munanyi wa Zambi Mwilu Mwahiana.

Muukatetekela kulutwe lia Mwene.

Muukumululikila jila yenyi,

77ni kunyingikisa atu jenyi ngwe,

makaalamwina ha kwakonekena milonga yo.

78Zambi yetu kali mukwa ululi kanda mukwa keke.

Makatutemwina pangu lia mwilu ngwe chize liakuvumbuka tangwa,

79ha kutemwina waze ali mu milima ni mu chizulie cha kufwa,

ha kutondekeza molu jetu mu jila ya uhwimino.”

80Mwana yatatuka, yakola mu mujimba ni mu mbunge. Yatwama mu puya#1:80 puya: ku chitokelo cha lwiji Yordau ku norde ya chitende cha Kufwa. ndoo ku tangwa lia kusoloka chenyi ku meso ja Aisraele.

Currently Selected:

Luka 1: CHK1970

Highlight

Copy