Yoano 21
21
Yesu yasolokela tumbaji shimbiali
1Kulutwe lia yuma yino, Yesu yasolokela nawa tumbaji twenyi ku mbumbulu ya chitende cha Tiberiade.#21:1 chitende cha tiberiade: jina likwo lia chitende cha Galilea. Yalisolola ngwe chino. 2Simone Petulu, ni Tomase (yoze akuvuluka ngwo, Pasa), ni Natanele (wa ku Kana#21:2 KANA: tala 2:1. mu chifuchi cha Galilea), ni ana malunga aali a Zebedeu, ni tumbaji aali akwo a Yesu, enoo eswe yaabwa hamuwika. 3Simone Petulu yaamba ngwenyi: “Ngunayi ni kutela yishi.” Akwo ngwo: “Ni yetu nawa, tunayi hamwe ni yena.” Yaaya kwo, yaanjila mu wato, hindu kaakwachile nichimwe ufuku uze weswe. 4Muze hikwacha Yesu yaasolokela ku mbumbulu ya meya. Alioze tumbaji kaanyingikine ko ngwo, auze Yesu. 5Yesu yaahula ngwenyi: “Yenu akweze, kunushi nichimwe cha kwelela nacho, nyi?” Ayo ngwo: “Ewa.” 6Yaamba ngwenyi: “Telenu Wanda ku sali lia chindume, kumunwoza.” Mba yaatela Wanda, alioze kaahashile kuukoka, mumu ha kwoka cha yishi. 7Kambaji yoze te azanga Yesu, yambila Petulu ngwenyi: “Auze mwe Mwene.”
Muze Simone Petulu hevwa ngwo: “Auze mwe Mwene,” yazala mazalo jenyi (mumu te hazula mahina jenyi akwo), mba yalimbila mu chitende. 8Tumbaji akwo yeeza mu wato nikukoka Wanda unazala ni yishi. Te keeshi kusuku ni ku tunda, ngwe kulakaji lia metro. 9Muze haatutuka ha tunda, yaamona ko kahia ka makala, ni yishi helu, ni mbolo. 10Yesu yaamba ngwenyi: “Nehenu yishi akwo waze hinwoza.” 11Simone Petulu yanjila mu wato, yakoka Wanda ku tunda, te unazala ni yishi anene anene, kwoka cho kulakaji ni makumi atano ni yishi atatu. Chibwe te anji kuhiana, hindu Wanda kuwatanukine. 12Yesu yaamba ngwenyi: “Tweyenu nulie.” Niumwe wa kuli tumbaji wesekele kumuhula ngwenyi: “Yena iya?” Mumu anyingikine ngwo, awu mwe Mwene. 13Yesu yaakundama, yanda mbolo, yaaha yo, yaaha nawa yishi.
14Chino che chisuho cha muchitatu Yesu asolokelele tumbaji twenyi, chize kuze ahindukile ku kufwa.
Yesu ni Petulu
15Muze te haalia, Yesu yahula Simone Petulu ngwenyi: “Simone, mwana wa Yoano, unanguzange kuhiana chize ananguzange wano, nyi?” Petulu ngwenyi: “Ewa, Mwene, Unanyingika ngwe, ngunakuzange.” Yesu yamwamba ngwenyi: “Lisa ana mapanga jami.” 16Yamwamba chisuho cha muchaali ngwenyi: “Simone, mwana wa Yoano, unanguzange kuhiana, nyi?” Yakumbulula ngwenyi: “Ewa, Mwene, Unanyingika ngwe, ngunakuzange.” Yesu yamwamba ngwenyi: “Funga mapanga jami.” 17Yesu yamuhula chisuho cha muchitatu ngwenyi: “Simone mwana wa Yoano, unanguzange, nyi?” Petulu yevwa chinyengo ha chize Yesu amuhulile chisuho cha muchitatu ngwenyi: “Unanguzange, nyi?” Mba yamukumbulula ngwenyi: “Mwene, yena Unanyingika yuma yeswe. Unanyingika ngwe, ngunakuzange!” Yesu yamwamba ngwenyi: “Lisa mapanga jami. 18Chamwenemwene ngunakwambulwila ngwami, muze wabwile mukweze, walijichikile muya we, te wakuya kuze wakuzanga. Alioze muze muukabwa kashinakaji, makakutwala kuze kuuchi kuzanga kuya.” 19(Ha maliji wano, Yesu yalweza Petulu kufwa chize makafwa ha kuchichimieka nacho Zambi.) Mba Yesu yamwamba ngwenyi: “Ngukaule.”
Yesu ni kambaji yoze te akuzanga
20Petulu yatewuluka, yamona kambaji yoze Yesu te akuzanga, kaneza. Mwenawo washachilile ha tulo ya Yesu muze te anali nikuhula ngwenyi: “Mwene, iya kevwe yoze makukunjika kuli akwa kole je?” 21Petulu yamumona, yahula Yesu ngwenyi: “Mwene, mba kuchi hali yono?” 22Yesu ngwenyi: “Nyi ngunazange ngwami, atwame ni mwono ndoo mungukeza nawa, yinakutale, nyi? Ngukaule.” 23Sango jino yiijimwangana mukachi ka akwetu akwa Kristu ngwo: “Kambaji yoze kechi kafwa.” Alioze Yesu yamba ngwenyi: “Nyi ngunazange ngwami, atwame ni mwono ndoo mungukeza nawa, yinakutale, nyi?”
24Kambaji yoze, mwenawo washindakenyene yuma yino nikuyisoneka. Tunanyingika ngwetu, shindakenyo yenyi yamwenemwene.
Maliji akusula
25Yesu yalinga nawa yuma yikwo yinji. Yenayo, nyi maayisoneka chimuwika chimuwika, ngunanyongo hashi heswe kuhechi kulita ni mikanda yize maasoneka.
Currently Selected:
Yoano 21: CHK1970
Highlight
Share
Copy
Want to have your highlights saved across all your devices? Sign up or sign in
The Bible in Chokwe © Bible Society of the Democratic Republic of Congo and Bible Society of Zambia, 1970, 1991.
