Yoano 20

Fuka liawashi

(Tala nawa Mat 28:1-8; Mar 16:1-8; Luk 24:1-12)

1Mu lumingu, chichamene cheswe, shimbu te kuchili milima, Maria Kamandala yeza ku fuka, yawana liwe haalilangumuna ko, 2yazomboka fuji kuli Simone Petulu ni kuli kambaji mukwo yoze te akuzanga Yesu, yaamba ngwenyi: “Hachiza Mwene ku fuka, kutwanyingikine kuze amusanga.” 3Petulu ni kambaji yoze yaakatuka, yaaya ku fuka. 4Eswe aali yaazomboka hamuwika, alioze kambaji yoze mukwo yazomboka kuhiana, yahanga kuheta ku fuka, 5yahetama nikutala, yamona mahina atoma akunangika hashi, alioze kanjilile mo. 6Simone Petulu yaheta kasula, yanjila mu fuka, yamona mahina atoma akunangika hashi, 7ni hina lize ajingile ku mutwe wa Yesu. Kuliabwile ko hamuwika ni mahina akwo, alioze te liakuvunga ha ukawalio. 8Hohene, kambaji yoze waliangile kuheta ku fuka, neye yanjila, yamona yuma yize yeswe, mba yafuliela. 9(Te tumbaji kanda achinyingika yuma yize yasonewene mu Mukanda wa Zambi ngwo, Yesu chamutamba kuhinduka ku kufwa.) 10Hazehene tumbaji waze aali yaahiluka ku mahio.

Yesu yasolokela Maria Kamandala

(Tala nawa Mat 28:9-10; Mar 16:9-11)

11Maria te kanamana haze, nikulila hehi ni fuka. Muze te analili, yahetama, yatala mu fuka, 12yamona tunganda a mwilu aali, te kaanazala mahina atoma, nikutwama kuze asele Yesu, umuwika ku mutwe, mukwo ku molu. 13Tunganda twa mwilu yaamuhula ngwo: “Mama, yika unalilila?” Neye ngwenyi: “Hachiza Mwene wami, Chanyingikine kuze amutwala.” 14Muze hamba maliji wano, yatewuluka, yamona Yesu te kanamana, alioze kanyingikine ngwenyi, awu Yesu. 15Yesu yamuhula ngwenyi: “Mama, yika unalilila? Iya unafupu?” Maria yanyonga ngwenyi, yono mwe njimi. Ha chino, yamwamba ngwenyi: “Mwata, nyi yena wamutwalanga kweka, ngulweze kuze wamusanga. Mba munguya ni kumwanda.” 16Yesu ngwenyi: “Maria!” Maria yatewulukila kuli Yesu, yamwamba mu liji lia hebreu ngwenyi: “Raboni!” (Kulumbunuka ngwo: “Longeshi.”) 17Yesu yamwamba ngwenyi: “Kanda ungukwata, mumu kanda nguchizezuka kuli Tata. Alioze yako wambulwile akwetu ngwe: ‘Ngunazezuka kuli Tata kanda Tatenu, kuli Zambi yami kanda Zambi yenu.’ ” 18Mba Maria Kamandala yaya ni kwambulwila tumbaji twenyi ngwenyi: “Hinamona Mwene.” Yaambulwila yuma yeswe yize amwambile Yesu.

Yesu yasolokela tumbaji twenyi

(Tala nawa Mat 28:16-20; Mar 16:14-18; Luk 24:36-49)

19Chingoloshi cha lumingo yoze, tumbaji te kaanalikungulula mu limwe zuwo. Yajilo yeswe te yakukasa ni sapi, mumu yeevwila Ayuda woma. Yesu yeza, yamana mukachi ko, yamba ngwenyi: “Uhwimino kuli yenu!” 20Muze te hamba maliji wano, yaalweza moko jenyi ni lumbu lienyi: Tumbaji yaawahilila ha kumona Mwene. 21Yesu yaamba nawa ngwenyi: “Uhwimino kuli yenu! Ngwe chize Tata wangutumine ni yami nawa ngunanutumu.” 22Muze te hamba maliji wano, yaahwimina mwiku ngwenyi: “Tambulenu Mwiku wa Linanga. 23Atu waze munukakonekena milonga yo, Zambi neye haakonekena yo kulu. Waze kunuchi kakonekena, Zambi neye kechi kwakonekena.”

Yesu ni Tomase

24Kambaji umuwika hakachi ka kumi ni aali, Tomase (yoze te akuvuluka ngwo, Pasa), kabwile ko hamwe no muze Yesu ejile. 25Tumbaji akwo yaamwambulwila ngwo: “Hitwamona Mwene.” Alioze Tomase yaakumbulula ngwenyi: “Nyi Chamwene chimbandwa mu moko jenyi, nyi chasele munwe wami mu chimbandwa cha mbambo, hanji nyi chasele kwoko liami mu lumbu lienyi, chichi kufuliela.”

26Lumingu umuwika kulutwe, tumbaji twa Yesu yaalikungulula nawa mu zuwo. Tomase yabwa hamwe no. Yajilo te yakukasa ni sapi. Alioze Yesu yeza, yamana mukachi ko, yamba ngwenyi: “Uhwimino kuli yenu!” 27Mba yambila Tomase ngwenyi: “Njisa munwe we hano. Tala moko jami. Sako kwoko lie mu lumbu liami. Kanda uyambashana, alioze fuliela lume!” 28Tomase ngwenyi: “Mwene wami, Zambi yami!” 29Yesu ngwenyi: “Mumu hiwangumona kashika hiwafuliela, nyi? Kawaha waze anafuliela chibwe kangumwene!”

Chikuma cha mukanda uno wa Yoano

30Yesu yalinga yilayi yinji yikwo ku meso ja tumbaji twenyi, hindu kuyasonewene mu mukanda uno. 31Alioze yino yasonewene hanga nufuliele ngwenu, Yesu mwe Chilamwina yoze Zambi alakenyene, mwe Mwana Zambi, ni hanga, ku ufulielo uno, munuhasa kubwa ni mwono mumu ha jina lienyi.

Currently Selected:

Yoano 20: CHK1970

Highlight

Copy