Ubutukilo 45

Josefe yalisolola kuli ayayo

1Josefe yamona ngwenyi, hi kahashile ko nawa kulihumikiza ku meso ja tuvumbi twenyi, kashika yaatuhwisa eswe. Kukwabwile nawa niumwe muze Josefe alisolwele kuli ayayo. 2Yabwozonoka kuhiana, mba akwa Egiptu yaamwivwa. Sango jize yijiheta ndoo maha mwanangana. 3Mba Josefe yambila ayayo ngwenyi: “Yami Josefe. Kuchi, tata kali ni mwono ndoo haliabwila nyi?” Alioze ayayo yeevwa kwo woma, kaahashile kumukumbulula liji nilimwe, yaahola lume yihole hole kuluu! 4Mba Josefe ngwenyi: “Ngukundamenu.” No yaamukundama. Yaamba nawa ngwenyi: “Yami Josefe, mwanakwenu yoze nwalanjishile kuno ku Egiptu. 5Kanda nwivwa chinyengo, hanji kulihisa yenwene, ha chize nwangulanjishile kuno. Zambi wangutumine kuno ha kulamwina atu. 6Uno we mwaka wa muchaali wa zala yinji. Kwasala nawa miaka yitano, yize atu keechi kulima chibwe keechi kubatula mbuto. 7Zambi wangutetekesele kuno ha kunulamwina mu yuma yino ya kulishimwoka, hanga yenu ni vungu lienu nukabwe ni mwono. 8Chamwenemwene Zambi wangutumine kuno, hi yenu ko. Yangusa ngwe tato ya mwanangana, mwata wa jiko lienyi lieswe, mukwa kuyula chifuchi cheswe cha Egiptu.

9“Haliabwila hilukenu nikawashi kuli tata, nukamulweze ngwenu, mwana Josefe hamba ngwenyi: ‘Zamba hanamupwisa mwanangana wa chifuchi cheswe cha Egiptu, tweyenu nikawashi kuli yami. 10Munutwama mu chifuchi cha Goshene#45:10 chifuchi cha Goshene ku sali lia chivumbuko ku mwanda wa lwiji Nile. mu Egiptu, hakamwihi ni yami, yenu ni ana jenu ni ajikulu jenu ni mapanga, ni pembe, ni ngombe, ni yeswe yize nuli nayo. 11Nyi nwabwa mu Goshene, mba munguhasa kunwaha yakulia. Kwasala nawa miaka yikwo yitano ya zala yinji, kashika Chazangile ngwami, yenu ni akwa zuwo lienu ni yimuna yenu yeswe, nufwe ni zala.’ ”

12Josefe yaweza ho nawa ngwenyi: “Haliabwila yenu eswe ni mwe mukweze wenu Benjamine, hinwanyingika ngwenu, chamwenemwene yami mwene Josefe ngunahanjika ni yenu. 13Nukalweza tata chize yami nguli ni chiyulo muno mu Egiptu, nukamulweza nawa yeswe yize hinwamona. Mba nukamunehe kuno nikawashi.”

14Mba Josefe yakakaminya mwanakwo Benjamine ni uwahililo, mba yabatuka kulila. Benjamine neye yalila muze te anamukakaminya. 15Mba Josefe yashisa ayayo eswe ni kulila lila, muze te anaakakaminya. Hazehene ayayo yaabutuka kuta pande ni Josefe.

16Sango yijiheta ku zuwo lia mwanangana ngwo: “Ayayo ja Josefe heeza.” Mba mwanangana ni atu jenyi yawahilila. 17Mwanangana yambila Josefe ngwenyi: “Lweza ayayenu akashile yuma yo hali tushitu two, ahiluke ku chifuchi cho cha Kanana 18ha kwanda tato ni akwa majiko jo, hanga akahiluke kuno. Mungwaha chifuchi chibema kuhiana muno mu Egiptu, akalialie yakulia yibema ya mu chifuchi chetu. 19Alioze aye ni matemba ja kuno akambachile ho mapwo jo ni ana jo, akeze nawa ni tato. 20Kanda anenganyana ha yuma yo yize maahichika mu chifuchi cho, mumu yuma yibema ya muno mu Egiptu, muyikabwa niyo.”

21Ana ja Israele yaalinga Chenacho. Josefe yaaha matemba ngwe chize ambile mwanangana, yaaha nawa yakulia ya kulila mu jila. 22Mutu ni mutu yamwaha nawa mahina, alioze Benjamine yamwaha mbongo ja prata kulakaji jitatu ni mahina atano. 23Tato yamutumina yimbulu kumi akalongeze ho yuma yibema ya ku Egiptu, ni yimbulu kumi akwo ni mbuto, ni mbolo, ni yakulia yeka ni yeka ya kulila mu jila. 24Josefe yalishika ni ayayo ngwenyi: “Kanda nuzwela mu jila.”

25No yaakatuka mu Egiptu, yeeza ku Kanana, kuze te atwama tato. 26Yaamulweza ngwo: “Tata! Josefe kali ni mwono! Kali mwata munene wa chifuchi cheswe cha Egiptu!” Yakoba yevwa mu moko ni mu molu nekee, mumu kaafulielele ko.

27Alioze muze ayayo haamulweza yeswe yize ambile Josefe, ni muze hamona matemba waze amutuminyine akamumbachile ho, mba Yakoba yakola mu moko. 28Yamba ngwenyi: “Kuma, mwanami Josefe uchili kwenyi ni mwono! Shimbu kanda nguchifwa Changutamba kuya ngukamumone.”

Currently Selected:

Ubutukilo 45: CHK1970

Highlight

Copy