Ubutukilo 44

Musenge wa Josefe mu tuku ya Benjamine

1Josefe yambila mwata wa tuvumbi twenyi ngwenyi: “Yako uzalise yakulia mu tuku ja atu nikulita ni kuhasa cha kumbata cho, mba mu tuku jeswe Usamo mbongo jo. 2Mba mu tuku ya kanuke Usamo musenge wami wa prata, hamwe ni mbongo jenyi.” Mwe mwata wa tuvumbi yalinga ngwe chize amwambile kuli mwene wenyi. 3Ha chichamene cheswe yashika ayayo ja Josefe hanga aye kwo ni yimbulu jo. 4Muze haahichika limbo lia Josefe kachipinji, Josefe yatambika mwata wa tuvumbi twenyi, yamwamba ngwenyi: “Tambuka, kaula atu waze nikawashi. Nyi wawana mu jila, alweze ngwe: ‘Ngunakanulinga chibema, kuchi mba yenu nwangulinga yibi? 5Kuchi mba nweya musenge wa mwene wami uze akunwina ni kunyingika nawo yize muyiza kulutwe? Nwalinga Chuma chibi chahiana!’ ”

6Muze mwata wa tuvumbi haawana mu jila, yaamba chize amulwezele kuli Josefe. 7No yaamukumbulula ngwo: “Mwata, yuma yika ayo unatwambe? Kutwahashile kulinga Chuma ngwe chocho nihakepe. 8Muze twahetele ku chifuchi chetu cha Kanana, mbongo jize twamwene mu tuku jetu, nunakamona chize tunakajihilwisa ku moko jenu. Mba kuchi mutuhasa kwiya yuma ya ndando yinji ya mwene wenu? 9Mwata, nyi ngwe musenge uze wasolokela kuli umwe hakachi ketu, mutu yoze chamutamba kufwa, ni yetu akwo mutubwa ndungo jenu.”

10Mwe mwata wa tuvumbi ngwenyi: “Kuheshi Chuma, ngunatayiza. Alioze shina yoze handa musenge mabwa ndungo yami, mba yenu akwo munuhasa kuya kwenu.” 11No yaasa tuku hashi nikawashi, mba mutu ni mutu yakasulula tuku yenyi. 12Mutu yoze yabutuka kufupa musenge hakepe hakepe. Yabutuka ku tuku ya mukulwana ndoo ni muze auwanyine mu tuku ya kanuke Benjamine. 13Ha kuchimona, ayayo yaachanuna mahina jo mumu ha yinyengo. Yaakashila yuma hali yimbulu, yaahiluka mu limbo.

14Josefe te mu zuwo lienyi ali muze Yuda ni anakwo anahiluka. Yaafulamana hashi. 15Josefe yamba ngwenyi: “Kuchi nwalinganga? Kunwanyingikine kwenu ngwenu, mutu ngwe yami, ku munanyi wami ngunahase kunyingika yize muyiza kulutwe, nyi?”

16Yuda ngwenyi: “Mwanangana, kuchi mutwamba nawa? Kutushi nawa ni liji likwo. Ubi wetu Zambi hausolola. Mwanangana, hi yoze wika ko awananga ni musenge wenu mabwa ndungo yenu, alioze yetu eswe tuli ndungo jenu.”

17Josefe ngwenyi: “Haa, mala! Alioze ka! Chahashile kulinga chino. Ndungo kali lume yoze akwatanga ni musenge, alioze yenu munuhasa kuya ni sambukila maha tatenu.”

Yuda yahakwila Benjamine

18Yuda yakundama kuli Josefe, yamba ngwenyi: “Vulie mwanangana! Nyi nunatayiza, nguli ni maliji akuhanjika ni yenu. Kanda nutenuka mwanangana, yenu nuli ngwe mwe mwanangana. 19Mwanangana, nwatuhulile ngwenu: ‘Nuli ni tatenu hanji mwanakwenu mukwo, nyi?’ 20Yetu yitukumbulula ngwetu: ‘Ewa, tuli ni tata, habwa kwenyi kashinakaji. Tuli nawa ni kanuke yoze tata asemene mu ushinakaji wenyi. Yayo hanafu kulu, mba iye hanasala lume ukawenyi mu jimo lia naye. Tata kakumuzanga kuhiana.’ 21Mwanangana, yenu nwambile ngwenu: ‘Nukeza nenyi kuno hanga ngukamumone.’ 22Yetu yitunulweza ngwetu: ‘Kanuka yoze kahashile kwiza kuno. Nyi ka, tata kumafwa.’ 23Mwanangana, yinwamba nawa ngwenu: ‘Nyi kunwejile ni mwanakwenu kunuchi kangumona nawa.’

24“Muze twahilukila maha tata, kavumbi kenu, yitumulweza maliji eswe waze nwahanjikile. 25Mba tata yamba ngwenyi: ‘Hilukenu, nukalande kama yimwe yakulia.’ 26Yitukumbulula ngwetu: ‘Kutuchi kuya. Nyi kutwayile ni mukweze yono, lunga yoze kechi katutambula kwenyi. Mutuhasa kuya nyi twaya hamwe ni mukweze yono.’ 27Tata yatwamba ngwenyi: ‘Mukwetu pwo kanguselele ana aali wika a malunga. 28Mwana mukwo hanatoko. Yingunyonga ngwami, kota ngongo hanamupapujola yihanda yihanda, mumu chize ku tangwa lize Chishi kumumona nawa. 29Alioze haliabwila, nyi nwanguchiza nawa mwana yono, hanji Chuma chibi muchimuwana, mungubwa ni yinyengo yinji, mungufwa, mumu hinabwa kulu kashinakaji.’

30-31“Mwanangana, nyi nahiluka lume mokomoko kuli tata, mwana yono wakuhi, muze makangumona, makafwa kwenyi, mumu mbunge yenyi yeswe yili hali mwanenyi. Mwanangana, tata kechi kawaha, mumu habwa kulu kashinakaji, kumakafwa. 32Mwanangana, yingutayiza kufunga mwe mwana ni kumuhilwisa kuli tata. Yingulweza nawa tata ngwami: ‘Nyi chahilukile ni mwana yono, muukabwa uhiso wami ndoo ku miaka yeswe.’ 33Haliabwila mwanangana, nalemba, echa mwana yono hanga ahiluke ni ayayo. Yami mungusala, ngubwe kwami ndungo ye ha kumusalakana. 34Ngwe kuchi munguhasa kuhiluka kuli tata mokomoko? Chichi kahasa kulihumikiza ha kumona lamba lia tata.”

Currently Selected:

Ubutukilo 44: CHK1970

Highlight

Copy