Ubutukilo 40

Josefe yaula yilota ya funge a mu zuwo lia lamba

1Limwe tangwa mwata wa akwa kukela vinyu ni mwata wa akwa kwocha mbolo ya mwanangana wa mu chifuchi cha Egiptu, yaamuvulumuna. 2Mwe mwanangana yaavutwokela, 3mba yaasa mu zuwo lia lamba lia mwata wa tujita, muze abwile Josefe. 4Mwe mwata wa zuwo lia lamba yaakunjika mu moko ja Josefe ha kwafunga. No yaabwa funge matangwa anji.

5Limwe tangwa, mu zuwo lia lamba, mwata wa akwa kukela vinyu ni mwata wa akwa kwocha mbolo yaalota yilota. 6Chichamene muze Josefe heza ni kwameneka, yamona ngwenyi, kaali ni yinyengo. 7Josefe yaahula ngwenyi: “Kuchi nuli ni yinyengo chichize musono?”

8Ayo ngwo: “Twalotanga yilota, alioze mukwa kutulumbunwina yo wakuhi.”

Josefe ngwenyi: “Zambi mwe wakulumbununa yilota. Ngwawilenu ye yilota yenu, nyi nunazange.”

9-10Mba mwata wa akwa kukela vinyu yamwawila chilota chenyi ngwenyi: “Mu chilota nalotanga kulutwe liami kuli mutondo wa vinyu, uli ni mitango yitatu. Yikusokoloka mafwo, yikutemuka yitemo, yikwima vinyu. 11Te ngunakwata musenge wa mwanangana mu moko, yingwanda vinyu, yinguyikamina mu musenge, mba yingumwaha wo mwanangana.”

12Josefe yamukumbulula ngwenyi: “Chilota che, ulumbunwiso wacho uno, mitango yize yitatu yili ngwe matangwa atatu. 13Kwasala matangwa atatu hanga mwanangana akutuhwise mu zuwo lia lamba ni kukuhilwisa ku milimo ye. Mba muumwaha mwanangana musenge wa vinyu ngwe chize te wakumwaha hatangu, muze wabwile mwata wa akwa kukela vinyu. 14Ungwiwuluka kama muze milonga ye muyiwaha. Unguvwile keke ungwambulule kuli mwanangana ha kungutuhwisa mu zuwo lino lia lamba. 15Haanangwiyi mu chifuchi cha Ahebreu. Chibwe muno mu Egiptu, mu zuwo lino nguli mwe mwashili malaa, chalingile kwami chibi nichimwe.”

16Mwata wa akwa kwocha mbolo, muze hamona ngwenyi, Josefe kalumbununa kanawa chilota chize, yamwamba ngwenyi: “Ni yami nawa chilota nalotanga. Te nguli ni mitonga yitatu ya mbolo ha mutwe. 17Mwe mu mitonga mwabwanga mbolo jeka ni jeka ja mwanangana. Tujila yeeza ni kujilia.”

18Josefe ngwenyi: “Chilota che ulumbunwiso wacho uno, mitonga yize yitatu yili ngwe matangwa atatu. 19Kwasala matangwa atatu hanga mwanangana akutuhwise mu zuwo lia lamba ni kukusukika ha mutondo. Mba tujila meeza ni kukulia.”

20Ha tangwa lia muchitatu te lie tangwa lia kwiwuluka kusemuka cha mwanangana. Mwanangana yalinga chiteleka chinene, yatambika akwa lutwe eswe a mu wanangana wenyi. Yatuhwisa mwata wa akwa kukela vinyu ni mwata wa akwa kwocha mbolo mu zuwo lia lamba, yaatumbika ku meso ja akwa lutwe a mu wanangana wenyi. 21Mba yahilwisa mwata wa akwa kukela vinyu ku mulimo wenyi utangu, 22alioze yasukika mwata wa akwa kwocha mbolo. Yino yeswe yiilita ngwe chize alumbunwine Josefe. 23Alioze mwe mwata wa akwa kukela vinyu kewulukile ko Josefe, yamuvulama lume.

Currently Selected:

Ubutukilo 40: CHK1970

Highlight

Copy