Ubutukilo 33
33
Yakoba yalitakana ni Esau
1Yakoba yahetuka, yamona Esau kaneza ni malunga kulakaji jiwana. Mba Yakoba yahandununa ana jenyi kuli Leya, ni Rashele, ni ndungo aali a mapwo. 2Yasa ndungo ni ana jo kulutwe lia mukana, yikusula Leya ni ana jenyi, mba yikusula Rashele ni Josefe. 3Iye mwene yaya kulutwe lia eswe, yafulamana yisuho shimbiali, yaheta haze te anamana yayo Esau. 4Alioze Esau te kanazomboka fuji ni kulitakana ni mwanakwo. Yamusambilila, yamushisa, no eswe aali yaabutuka kulila. 5Esau yahetuka, yamona mapwo ni ana, yahula ngwenyi: “Wano eswe uneza no, aya?”
Yakoba ngwenyi: “Mwene, wano e ana waze Zambi, mu vumbi lienyi, hangwaha yami kavumbi kenu.” 6Mba ndungo ja mapwo yeeza ni ana jo, yaafulamana. 7Leya neye yeza ni ana jenyi, yaafulamana, mba Josefe ni Rashele yeeza, no yaafulamana.
8Esau yahula ngwenyi: “Mba yendo yize natakananga nayo, kuchi yinalumbunuka?”
Yakoba ngwenyi: “Mwene, hanga nunguvwile kama keke.”
9Alioze Esau ngwenyi: “Mwanakwetu, anji nguli no. Mbata kwe.”
10Yakoba ngwenyi: “Nalemba mwane, nyi hinwanguvwila keke, tambulenu kama mulambu uze hinanwaha. Muze hinanumona, chili ngwe Zambi namona, mumu hinwangutambula kanawa. 11Nalemba, tambulenu kama yuma yino nanunehena. Mumu Zambi hananguwahisa, hanangwehe yuma yeswe yize nguli nayo.” Yakoba yashinjila Esau kuhiana mba yayilambula.
12Esau ngwenyi: “Tukatukenu tuyenu. Yami ngunatetekela.”
13Yakoba ngwenyi: “Mwene wami, nunanyingika ana kanda akola. Mba Changutamba kunyongena nawa mapanga ni ngombe waze anamwisa ana jo. Nyi ngwe tweendesa fuji fuji, chibwe tangwa limuwika, yimuna yeswe kumuyifwa. 14Nalemba mwane tetekelenu, mba yetu mutukaula hakepe hakepe ni yimuna ni ana, ndoo mutunuwana mu chifuchi cha Seire.”
15Esau ngwenyi: “Kuheshi Chuma, alioze mungukuhichika ni atu jami akwo.”
Yakoba ngwenyi: “Ka, mwene wami, ngunasakwila.” 16Mba Esau yahiluka ni kuya ku Seire. 17Yakoba yaya ku limbo lia Sukote. Yatunga ko zuwo lienyi ni matanga a yimuna. Kashika yaaluka ho jina ngwo, Sukote#33:17 sukote mu hebreu linalumbunuka ngwo, “yikulika.”.
18Chenacho Yakoba ahetele kanawa ku limbo lia Shekeme mu chifuchi cha Kanana muze akatukile mu chifuchi cha Mesopotamia. Yajika musumba wenyi mu munda hehi ni limbo. 19Yalanda munda uze kuli akwa vungu lia Hamore, tato ya Shekeme. Yafweta mbongo ja prata kulakaji yimuwika. 20Yatunga ho chilumbilo, yachiluka jina ngwenyi, Zambi kali Zambi ya Israele.
Currently Selected:
Ubutukilo 33: CHK1970
Highlight
Share
Copy
Want to have your highlights saved across all your devices? Sign up or sign in
The Bible in Chokwe © Bible Society of the Democratic Republic of Congo and Bible Society of Zambia, 1970, 1991.
