Ubutukilo 34
34
Shekeme yalimona ni Dina ku tachi
1Dina, mwana wa Yakoba yoze asemene ni Leya, yaya ni kutala ana mapwo a mu chifuchi chize. 2Hamore, Kahive, te mwanangana wa chifuchi chize. Shekeme, mwana wa Hamore, hakumona Dina, yamukwata ni tachi mba yalimona nenyi. 3Alioze Shekeme yalalaminya Dina, yamuzanga kuhiana, yafupa kumulembejeka. 4Mba Shekeme yalweza tato Hamore ngwenyi: “Tata, yako ungumbachile mwana pwo auze Dina, ngunazange kumumbata.”
5Yakoba yevwa chize halumbula mwanenyi, alioze kalingile nichimwe mumu te anenyi a malunga haaya mu yambu ni ngombe. Yaashimbwila ndoo ku kuhiluka cho. 6Hamore, tato ya Shekeme, yeza ni kuta pande ni Yakoba. 7Tangwa lizeliene ana ja Yakoba yaahiluka ku chihunda. Ha kwivwa sango jize, yeevwa ufwatulo kuhiana, yaamba ngwo: “Shekeme kalinga Chuma cha sonyi kuhiana. Hatuka Aisraele eswe mumu halimona ni ndumbwetu ni tachi.” 8Hamore yaambila ngwenyi: “Mwanami Shekeme kanazange mwanenu wa pwo. Nalemba, tayizenu amumbate. 9Tukalimbachile ni yenu. Yenu munumbata ana jetu ni yetu mutumbata ana jenu. 10Mba munutwama ni yetu heswe haze nunazange. Chifuchi cheswe muchibwa nichenu. Twamenu mo ni kulanda ni kulanjishila mo, nukabichile mo.”
11Mwabwa muze Shekeme yambila tato ya Dina ni mandumbu jenyi ngwenyi: “Nalemba, nguvwilenu kama vumbi. Mungunwaha cheswe chize munwita. 12Ngwitenu cheswe chihako ni yawana yize nunazange. Mungunwaha cheswe Chuma munwita, alioze nalemba kuhiana, ngutayizenu ngumbate mwe mwana pwo.”
13Ana ja Yakoba yaafupa mana akwonga Hamore ni mwanenyi Shekeme, mumu Shekeme hakolesa ndumbwo sonyi. 14Ngwo: “Ndumbwetu kahashile kuya ulo kuli chilima. Kuli yetu sonyi jinji. 15Kutuchi kunutayiza Chuma chino shina munwononoka ku Shimbi yetu kupwisa malunga eswe ngalami. 16Mba mutunutayiza ha kumbata ana jetu a mapwo, ni yetu mutumbata ana jenu. Mututunga hakachi kenu, mutubwa vungu limuwika. 17Alioze nyi kunwatayijile maliji wano a Ungalami twanulweza, mututambula ndumbwetu, tuye nenyi.”
18Hamore ni mwanenyi Shekeme yatayiza yize yeswe. 19Mwe Shekeme kashimbwilile ko ha kulinga yize yeswe ambile ana ja Yakoba, mumu yazanga mwana wa Yakoba kuhiana. Shekeme te mulemu Wahiana hakachi ka akwa vungu lienyi.
20Chenacho Hamore ni mwanenyi Shekeme ayile ku chikolo cha chipanga cha limbo lio, kuze te akulikungulwila atu. Mba yaambila akwa limbo ngwo: 21“Atu wano kaali akwa sambukila. Twatayizenu hanga atwame mu chifuchi chetu, akalande lande ni kulanjishila mo. Chifuchi chili kwacho chinene. Mutumbata ana jo a mapwo, no mambata ana jetu a mapwo. 22Alioze Shimbi yimuwika yasala mba atayize kutwama ni yetu hanga tukabwe vungu limuwika. Shina malunga eswe a mu chifuchi chetu aapwise ngalami ngwe ayo. 23Yimuna ni yuma yo yeswe kuyichi kubwa ni yetu, nyi? Twatayizenu mba atwame ni yetu.” 24Atu eswe a mu limbo yaatayiza maliji waze aalwezele Hamore ni Shekeme. Mba malunga eswe yaapwisa ngalami.
25Ha tangwa lia muchitatu, shimbu te malunga achili ni yikola, ana aali a Yakoba, Simeone ni Levi, e mandumbu ja Dina, yanda mikwale yo, yaanjila mu limbo ni hamu lieswe, yaashiha malunga eswe. 26Yaashiha nawa Hamore ni mwanenyi Shekeme, mba yaatambula Dina mu zuwo lia Shekeme, yaaya kwo. 27Mabwa muze ana ja Yakoba akwo yaanjila mu limbo, yaabalieka hakachi ka afu, yaabuba yuma yeswe ya ndando yinji ku tachi, mumu akwa limbo lize akolesele ndumbwo Dina sonyi. 28Yaabuba mapanga, ni ngombe, ni yimbulu, ni yuma yize yeswe awanyine mu limbo ni mu minda. 29Yaabuba ubite weswe, yaakwata mapwo ni ana jo eswe, ni yaabuba yuma yeswe yize yabwile mu mazuwo, yaaya nayo.
30Yakoba yambila Simeone ni Levi ngwenyi: “Yitela nwangukokela, mungubwa ni lufuma mubi. Akanana ni Aperize kumanguvutwokela kwami. Chishi kwami ni atu anji. Nyi atu wano maalichinga ha kwiza ni kwasa jita ni yami, kumangushiha hamwe ni akwa zuwo liami eswe.”
31Alioze yaamukumbulula ngwo: “Te chamutamba kupwisa ndumbwetu ngwe chitanji, nyi?”
Currently Selected:
Ubutukilo 34: CHK1970
Highlight
Share
Copy
Want to have your highlights saved across all your devices? Sign up or sign in
The Bible in Chokwe © Bible Society of the Democratic Republic of Congo and Bible Society of Zambia, 1970, 1991.
