Ubutukilo 28

1Isake yatambika Yakoba, yamuwahisa, mba yamwamba ngwenyi: “Mwanami, kanda umbata pwo wa mu chifuchi chino cha Kanana. 2Lilulike uye ku chifuchi cha Mesopotamia, ku limbo lia kakenu Betuele, kwenako muukambachila pwo, umwe pwo wa kuli nokotu Labane. 3Zambi Mukwa Ndundo Jeswe akakuwahise, akakwehe ana, akakwokese ukabwe tato ya mavungu anji hano hashi. 4Akakuwahise yena ni vungu lie ngwe chize awahishile Abrahama. Akakwehe chifuchi chino cha ungeji we chize ahele Abrahama, ukatwame mo.” 5Isake yatuma Yakoba ku chifuchi cha Mesopotamia, maha Labane, mwana wa Betuele. Mwe Betuele te wa ku vungu lia Arame. Labane mwe ndumbwa Rebeka, naye ya Esau ni Yakoba.

Esau yambata pwo mukwo

6Esau yevwa ngwo, Isake hawahisa Yakoba ni hamutuma ni kumbata pwo ku chifuchi cha Mesopotamia. Yevwa nawa ngwo, muze Isake te anawahisa Yakoba, yamulweza ngwenyi kanda ambata pwo wa mu chifuchi cha Kanana. 7Esau yevwa nawa ngwo, Yakoba hononokena naye ni tato, haya ku Mesopotamia. 8Mba Esau yanyingika ngwenyi, tato kuma keshi kuzanga mapwo ja mu chifuchi cha Kanana. 9Ha chino yaya maha Ishmaele, mwana wa Abrahama, yambata pwo mukwo, jina lienyi Mahalate. Mwe Mahalate te mwana wa Ishmaele ni ndumbwa Nebayote.

Yakoba yalota chilota ku Betele

10Yakoba yakatuka ku chihunda cha Bersheba, yaya mu jila, yatalikisa ku limbo lia Harane. 11Yaheta hamwe homa hanga abombe ko, mumu te tangwa hiliatoka kulu. Yanda liwe yalitenga musau. 12Yalota chilota, yamona ndalo yinamana hashi, songo lialio ndoo mwilu. Yamona nawa tunganda twa mwilu kaananyina ni kusunuka ha ndalo yize. 13Yamona nawa Mwene Zambi kanamana hakamwihi nikwamba ngwenyi: “Nguli Mwene Zambi, Zambi ya Abrahama ni Isake. Chifuchi chino unabombo mungukakwaha cho yena ni vungu lie. 14Vungu lie maakabwa anji ngwe mavu. Maakalitanda ku chivumbuko ni ku chitokelo, ku norde ni ku sude. Mungukawahisa akwa hashi eswe mumu hali yena ni vungu lie. 15Nyingika ngwe, mungukabwa hamwe ni yena kweswako muuya, mungukakuhilwisa nawa ku chifuchi chino. Chichi kakwehuka ndoo mungukamanununa yilakenyo yeswe yino nakulakenya.”

16Yakoba yalaula, yamba ngwenyi: “Haa puu! Chamwenemwene Mwene Zambi hano hali. Te chachinyingikine!” 17Yevwa woma, yamba ngwenyi: “Homa hano hakole ni woma. Kuma he ha zuwo lia Zambi, ku chikolo cha mwilu.”

18Yakoba yalimeneka, yanda liwe lize atengele musau, yalimika ngwe chingina, yazujila ho maji. 19Yaluka ho ngwenyi, Betele#28:19 BETELE mu hebreu linalumbunuka ngwo: “zuwo lia Zambi.”. (Alioze jina lia chihunda hatangu Luze.) 20Mba Yakoba yalakenya ngwenyi: “Nyi Zambi makabwa hamwe ni yami ni kungufunga mu jila yino ngunende, nyi mangwaha yakulia ni mahina, 21nawa nyi makanguhilwisa kanawa maha tata, mba Mwene mabwa Zambi yami. 22Liwe lino namika ngwe chingina, mulikabwa zuwo lia Zambi. Ku yuma yeswe yize mangwaha, mungukahilwisa Chihanda chimuwika cha ku yihanda kumi.”

Currently Selected:

Ubutukilo 28: CHK1970

Highlight

Copy