Ubutukilo 23
23
Sara yafwa, Abrahama yalanda mavu ha kumufunda mo
1Sara yatwama miaka 127, 2mba yafwila mu limbo lia Hebrone mu chifuchi cha Kanana. Abrahama yalinyenga ni kulila pwo lienyi.
3Mba Abrahama yakatuka kuli mufu wenyi, yambila Ahite ngwenyi: 4“Hano nguli chilambala, nguli ngeji hakachi kenu. Nyi nunazange ngulanjisenu hamwe homa hanga ngufunde kama mufu wami.”
5Ahite yaamukumbulula ngwo: 6“Twalemba mwane, ivwenu. Yenu nuli mwata munene mu chifuchi chetu, nunahase kufunda mukwenu pwo mu fuka lize munutongola. Niumwe hakachi ketu manumina homa lienyi.”
7Abrahama yahetama ku meso jo, 8yaamba ngwenyi: “Nyi hinwatayiza ngwenu ngufunde mufu wami hano, hulenu Efrone, mwana wa Zahore, 9nyi mazanga kungulanjisa chivwenge cha Makapela chize chili ku songo lia munda wenyi. Angulanjise cho ku meso jenu ni ndando yeswe yize mazanga, hanga chibwe chifuka cha kufunda afu jami.”
10Te ni mwe Efrone kali hakachi ka Ahite waze ali ku chikolo cho chipanga cha limbo, kuze kwakutakanyina atu. Mba yambila Abrahama ku meso ja atu eswe ngwenyi: 11“Hi chocho ko mwanangana, ngwivwenu. Hi chivwenge wika ko, alioze ni lie tungu Heswe ngunwehe lio ku meso ja atu eswe, hanga nufunde mo mufu wenu.”
12Abrahama yahetama, 13mba yambila Efrone ku meso ja akwa chifuchi eswe ngwenyi: “Banjikenu, ngunalande tungu lieswe. Tayizenu ngunufwete mbongo, mba hanga nguye ngufunde mo mufu wami.”
14Efrone ngwenyi: 15“Nalemba mwata, katungu kano kakufwika kulakaji jiwana ja mbongo ja prata. Yeenu nufunde mufu wenu.” 16Abrahama yatayiza, mba yalula mbongo 400 ja prata, ndando yenayo echile Efrone ku meso ja Ahite eswe.
17Chenacho tungu Ha Efrone ku Makapela, ku sali lia chivumbuko ku limbo lia Mamre, yilibwa tungu Ha Abrahama. Yuma yeswe yize yabwile mo: tungu, ni chivwenge, ni ye mitondo yeswe, yiibwa ya Abrahama. 18Ahite eswe waze abwile homa haze akutakanyina atu ku chikolo cha limbo, yaanyingika ngwo, chifuchi chino haliabwila kuma hichabwa cha mbala cha Abrahama.
19Mwabwamuze Abrahama yafunda mukwo pwo Sara mu chivwenge chize mu chifuchi cha Kanana. 20Chenacho tungu ni che chivwenge yize yabwile ya Ahite hatangu, yiibwa ya Abrahama ha kufunda mo afu jenyi.
Currently Selected:
Ubutukilo 23: CHK1970
Highlight
Share
Copy
Want to have your highlights saved across all your devices? Sign up or sign in
The Bible in Chokwe © Bible Society of the Democratic Republic of Congo and Bible Society of Zambia, 1970, 1991.
