Ubutukilo 22
22
Zambi yalweza Abrahama ha kulambula mwanenyi Isake
1Kulutwe lia amwe matangwa Zambi yeseka Abrahama. Yamutambika ngwenyi: “Abrahama!” Abrahama ngwenyi: “Ewa, mwane.”
2Zambi ngwenyi: “Anda mwana yono Isake, yoze wakuzanga kuhiana, yako nenyi ku chifuchi cha Moria, ukangula mbule ye ha mulundu uze mungukakulweza.”
3Abrahama yalimeneka, yachaya kunyi ja kwochela mulambu, yajikashila ha chimbulu, yabwila mu jila hamwe ni Isake ni ngamba jenyi aali. Yaaya kuma kuze amulwezele Zambi. 4Ha tangwa lia muchitatu Abrahama yahetuka, yamona kuma kuze kusuku. 5Mba yambila ngamba jenyi ngwenyi: “Salenu hano ni chimbulu, yami ni mwana tunayi akuze ni kuwayila Zambi, mba mutuhiluka.”
6Abrahama yatwika Isake kunyi ajimbate. Iye mwene yambata kahia ni poko. Yaaya hamuwika. 7Ha shimbu likepe Isake ngwenyi: “Aa tata!”
Abrahama ngwenyi: “Ewa mwanami.”
Isake ngwenyi: “Kunyi ni kahia tuli nayo, alioze mwana panga yoze mutulambula yolihi mba?”
8Abrahama ngwenyi: “Zambi mwene matwaha panga wa mulambu wa kwocha.” Mba yaaya.
9Muze haaheta homa haze Zambi amulwezele, Abrahama yatunga ko chilumbilo, yatengeka ho kunyi, yakasa mwanenyi Isake, yamusa ho. 10Mba yanda poko ha kushiha Isake. 11Alioze kanganda ka Mwene Zambi yatambika ngwenyi: “Abrahama, Abrahama!”
Iye ngwenyi: “Ewa mwane.”
12Kanganda ngwenyi: “Kanda umulemeka, kanda umulinga chibi. Haliabwila ngunanyingika ngwami, kuma wakulemesa Zambi, mumu kuwalitunyine kulambula mwane mulambu kuli Zambi, chibwe kali lume umuwika.”
13Abrahama yahetuka yamona kuji a panga kanasakaminya mbinga mu lutandulwila. Yaya ni kumukwata, yamulambula mulambu wa kwocha kuli Zambi ha kusalakana mwanenyi. 14Abrahama yaluka homa haze jina ngwenyi: “Mwene Zambi Kakuhana.” Kashika ndoo ni musono atu akwamba ngwo: “Ha mulundu wenyi Mwene Zambi kakuhana.”
15Kanganda ka Mwene Zambi yatambika Abrahama chisuho cha muchaali ngwenyi: 16“Mwene Zambi kanambe ngwenyi: ‘Hinalishinga mu jina lia yami mwene, mumu ha Chuma chino hiwalinga, kuwalitunyine kungulambula mwane, chibwe kali lume umuwika, 17mungukakuwahisa, mungukokesa vungu lie. Maakabwa ngwe matangonoshi a mwilu hanji ngwe masekeseke a ku mbumbulu ya kalunga lwiji. Maakakumbakumba akwa kole jo. 18Mba akwa hashi eswe maakazanga ngwawahise ngwe chize hinawahisa yena, mumu yena hiunononoka ku maliji jami.’ ” 19Abrahama yahiluka, yaya ni kuwana ngamba jenyi. Mba ayo eswe yaaya ku limbo lia Bersheba, kuze te atunga Abrahama.
Vungu lia Nahore
20Ha matangwa akepe, Abrahama yevwa ngwo, Milka hanaseme ana ni mwanakwenu Nahore. 21Majina jo wano: mwana mutangu Uze, ni mwanakwo Buze, ni Kemuele tato ya Arame, 22ni Chesede, ni Hazo, ni Pildashe, ni Jidlafe, ni Betuele 23tato ya Rebeka. Milka yasema ana a malunga wano nake ni lunga lienyi Nahore, yayo ya Abrahama. 24Reuma, temena ya Nahore, neye yasema ana wano: Teba, Gahame, ni Tahashe, ni Maka.
Currently Selected:
Ubutukilo 22: CHK1970
Highlight
Share
Copy
Want to have your highlights saved across all your devices? Sign up or sign in
The Bible in Chokwe © Bible Society of the Democratic Republic of Congo and Bible Society of Zambia, 1970, 1991.
