Ubutukilo 20
20
Abrahama ni Abimeleke
1Abrahama yakatuka ku chihunda cha mutu yoze Mamre, yatalikisa ku sude mu chifuchi cha Kanana. Yatunga hakachi ka membo ja Shure ni Kadeshe. Yatwama amwe matangwa mu limbo lia Gerare#20:1 LIMBO LIA GERARE ku sali lia sude ni lia chitokelo mu Yuda, hehi ni njiza ya Afilistia, kilometro 80 ku chitokelo cha chitende cha Kufwa.. 2Yalweza atu ngwenyi: “Sara kali ndumbwami.” Kashika Abimeleke, mwanangana wa Gerare, yatuma asake Sara. 3Ha ufuku Zambi yalisolola kuli Abimeleke mu chilota. Yamulweza ngwenyi: “Kumuufwa mumu hiwatambula pwo lia mbala.”
4Alioze Abimeleke te kanda chilimona ni Sara. Yamba ngwenyi: “Mwene, unazange kungushiha hamwe ni atu jami, nyi? Kutwalingile kwetu chibi nichimwe! 5Abrahama iye mwene hamba ngwenyi: ‘Kali ndumbwami,’ ni Sara mwene ngwenyi: ‘Kali ndumbwami.’ Kashika nachilinga ni mbunge yibema. Kanda nguchilinga kwami nenyi chibi nichimwe.”
6Mwene Zambi yamukumbulula mu chilota ngwenyi: “Ewa, ngunanyingika ngwami, wachilinga ni mbunge yibema. Yami chakutayijile ngwami, ulinge yibi ku meso jami, kashika chakuhele jila ha kumukwata. 7Haliabwila hilwisa pwo yono kuli mukwo lunga. Kali mukwa munanyi, makulembela Zambi, ha chino kuuchi kufwa. Alioze, nyi kuuchi kumuhilwisa nyingika kwe ngwe, kumuufwa, yena ni vungu lie lieswe.”
8Abimeleke yalimeneka ha chichamene cheswe, yatambika akwa kuyula eswe, yaalumbunwina maliji waze. No yeevwa woma unji. 9Mba Abimeleke yatambika Abrahama, yamuhula ngwenyi: “Kuchi watulinga Chuma ngwe chino? Chibi chika ngunakakulinga kama, kashika wangukokela lamba libwa haha ni atu jami eswe? Wangulinga Chuma chize kuchatambile kulinga. 10Mumu yika wachilinga?”
11Abrahama ngwenyi: “Mumu ngunakanyonga ngwami, kuno kukushi niumwe wakwivwila Zambi woma. Nyi nahola kuluu, mangushiha hanga atambule mukwetu pwo. 12Chamwenemwene Sara kali ndumbwami. Tuli ana ja tata umuwika alioze amama aali. Yami yingumumbata. 13Kashika muze Zambi hananguchiza mu zuwo lia tata ngukendangane, yingulweza Sara ngwami: ‘Ukambe chino mba ngukanyingike ngwami, kuma wakunguzanga. Ukambamba ngwe: Kali ndumbwami.’ ”
14Hohene Abimeleke yahilwisa Sara kuli Abrahama. Ha tangwa lizeliene Abimeleke yamwaha Abrahama mapanga, ni ngombe, ni ndungo a mapwo ni a malunga. 15Mba yambila Abrahama ngwenyi: “Chino cheswe unamono chili chifuchi chami, yako utunge kweswako unazange.” 16Abimeleke yambila Sara ngwenyi: “Hinahana kanunu ka mbongo ja prata kuli ndumbwe ha kulweza atu eswe waze uli no ngwami, kuushi kwe ni uhiso niumwe. Mutu mweswe manyingika ngwenyi, kuwalingile chibi nichimwe.”
17-18Mapwo eswe waze abwile mu zuwo lia Abimeleke, Mwene Zambi yaapwisa miumba mumu ha Chuma chize chabwile hali Sara, pwo lia Abrahama. Kashika Abrahama yalembela Abimeleke Zambi. Zambi yawuka Abimeleke, yawuka nawa pwo lienyi ni ndungo jenyi a mapwo. Mba yaabutula nawa kusema ana.
Currently Selected:
Ubutukilo 20: CHK1970
Highlight
Share
Copy
Want to have your highlights saved across all your devices? Sign up or sign in
The Bible in Chokwe © Bible Society of the Democratic Republic of Congo and Bible Society of Zambia, 1970, 1991.
