Luk 4
4
Jizọs Ḅe La Telima Mị
(Mat 4.1-11; Mak 1.12-13)
1Jizọs Ḅe Fịafịa Tẹmẹ Ḅe na ḅein se Jọdan ḅụ vinpịkị ḅomẹ, se Tẹmẹ ḅe Ọ̀ ḅọrọma piri-ele mị mun mẹ, 2Oru ḅe Ò telima nyọ mị, ḍin-a mesi na gbasịye ḅụ. Anịsịkị mị mgba Ò yefịkẹ, anị gose anị ḅo ḅọrọ sịkị ḅuru Ọ̀ tarịmẹ.
3Oru ḅe nwọse Ọ̀ ḅẹmẹ, “Ị́rị́ Tamụnọ Tọkụ-ẹ ḅẹḅẹ, tọn mị ḍụparị mị pịrị anị pịkị fịturu sọ.”
4Jizọs Ḅe pẹkẹrẹmẹ, “Fịafịa Ḍiri mị nwọ ḅẹmẹ, ‘Tomoniḅọ ineda fịye kẹngẹ ḅụ wẹrị ḍumo ẹkẹ?’”
5Anịsịkị Oru ḅe Ori ọkị se boka sịkị ḅụ bebe tomonikiri sime amanyanakiri mamgba se Ò ḍiemẹ. 6“À ma kụrọ mamgba nwọse ị́ pịrịḅịa pịkị ma ngọ mamgba na,” Oru ḅe nwọse Ọ̀ ḅẹmẹ. “Ini àrịmgba saḅama ị̀ ḅara chụasam, à pịkị ineda anị se ị̀ ḅụḅẹlẹḅọ ḅẹlẹḅọ nwọ pịrịḅịa. 7Ma mamgba ị́yaye-ẹ, ị́ nemikase ị̀ tọrọkọ kpẹrẹkị ị̀ tẹkẹmẹ ḅẹḅẹ.”
8Jizọs Ḅe pẹkẹrẹmẹ, “Fịafịa Ḍiri mị nwọ ḅẹmẹ, ‘Kpẹrẹkị ị́ Nyana Tamụnọ Ḅe tẹkẹ, pịkị fịrịnwẹngị ori kẹngẹ pịrị!’”
9Anịsịkị Oru ḅe Ori ọkị Jerusalẹm mun mẹ se Ori ọkị Oputẹkẹwarị mị ọgọnọ geletẹịn nyọ chịẹmamẹ, se nwọse Ọ̀ ḅẹmẹ, “Ị́rị́ Tamụnọ Tọkụ-ẹ ḅẹḅẹ, mị anga wẹrị ḍosi koro. 10Anịatịḅị fịafịa ḍiri mị nwọ ḅẹmẹ, ‘Tamụnọ Ḅe Ọ̀ tọn oria enjẹlapụma pịrịḅịa, ini ḅereni ẹkẹ ye ị́ ḅụọ la.’ 11Anị pịkị nwọ ḅẹmẹ, ‘Ini inia ḅarama se ịkaịnḅịa, mịẹse ḍụparịma ye se ị́ ḅụọma lama ẹka ḅara.’”
12Se Jizọs Ḅe ọ̀ pẹkẹrẹmẹ, “Fịafịa ḍiri mị nwọ ḅẹmẹ, ‘Ị́rị́ ị́ Nyana Tamụnọ Ḅe ḍaḍikima.’”
13Oru ḅe ḅọkọ kịrịkịrị ḅụ Jizọs Ḅe telima so sịkị ọ̀ kala sịkị nwọse Ọ̀ wẹrịsomẹ.
Jizọs Ḅe Galili Ḅie Oria Fịrị Nwọ Sakịmẹ
(Mat 4.12-17; Mak 1.14-15)
14Anịsịkị Jizọs Ḅe vinpịkị Galili mun mẹ, se Tamụnọ Tẹmẹ Ḅe kụrọ mị Ori na omi-ẹ. Ò gboloma ḅẹrẹ mị wasama anịnyọ mị mgba kelemamẹ. 15Ori inia tẹkẹwarịma ḅie yeḍiemẹ se tomoni mamgba Ò tokonimẹ.
Nazarẹt Ḅie Ini Jizọs Ḅe Sịkịmẹ
(Mat 13.53-58; Mak 6.1-6)
16Anịsịkị Jizọs Ḅe Nazarẹt mun mẹ, ini Ò ḍikiḍiki pakụmaḅo nyọ mị, se Ịnyọsara Ene ḅụ Ọ̀ mịẹmịẹ ḅara ḅụ Ọ̀ tẹkẹwarị mị mun mẹ. Ọ̀ sịsẹ chịẹmẹ Fịafịa Ḍiri mị goḅịa ẹrẹchị 17se ini ịkịankoro Aịzaya ḍiri mị nwọse Ọ̀ ḅara chụamẹ. Se Ọ̀ fangala ḍiri mị finjimẹ, se ini mịn mị gịẹịn nyọ mị finjimẹ,
18“Nyanaḅọ Ḅe Tẹmẹ Ḅe ị̀ ọgọnọ gbanamẹ,
anịatịḅị ori ị̀ sẹlẹsam, Iḅi Ḅẹrẹ mị ḍuko igwein apụma pịrịḅịa ye gose.
Ori ị̀ se fịrịmamẹ àrị ngẹrị tịḅị nyana nwọ ḍuko pakụma kun ḅara ḅie sime apụma pịrịḅịa ḅara,
tọrụmgbọlụ finji nwọ ḍuko tọrụmgbọlụpụn apụma pịrịḅịa ḅara,
ini pụnda apụma mịẹse ini inia ḅụḅarasinḅịa ḅara,
19se pịkị Nyanaḅọ Ḅe Oria tomonima
ḍụaḅọrọmaḅịa sịkị mị nwọ ḍukopakụma.”
20Jizọs Ḅe fangala ḍiri mị iko, se anị se nyọ koruarịḅọ ḅe pịrị, se kpọnjị simemẹ. Tẹkẹwarị mị ḅie sime apụ mamgba inia tọrụmgbọlụma nwọse Ọ̀ ḅụ gbanamẹ, 21Ọ̀ sakị ọkwẹịn ini pịrịmẹ, “Fịafịa ḍiri mị ḅie mị pẹkẹrẹ mị anị ḅo mịmgba kọkọmaye sọsam ini anị go se ọ́ naasa ḅara ḅụ.”
22Anị inimgba ḅụ okoromẹ, Ọ̀ kọn iḅiọkwẹịnma pịkị inia ḅụgbiripumamẹ. Ini nwọ ḅẹmẹ, “Ḅe Josẹf yaḅe orika?”
23Ọ̀ nwọse ini ḅẹmẹ, “À nemi kpaịnmamẹ na ọ́ mị kaḅo mị nwọ kọn ị̀ pịrịḅịa, ‘Ḅịrịḅọ, ị́ ḅụ gwọ.’ Ọ́ pịkị nwọse ị̀ ḅẹḅịa mịanga ị́ya ama mị ḅie, ini ḍuko wa pịrị Kapanịọm ḅie, mịẹmẹ nwọḅẹ ayema, nwọ mịẹ. 24Jizọs Ḅe pịkị nwọ ḅẹmẹ, À ḍuko ọ́ pịrịaḅẹ na,” “ịkịankoroḅọ ḅe ini ọ̀ paka ama ḅie iḅiọkụ se ori ọ̀ kịkịkẹ. 25Ómine ị̀ poki: kọkọmaye-ẹ na tọn-a deapụ fị eremeni Izrẹl ḅie simemẹ Ịlaịja sịkị mị ḅụ, ene tẹrẹ-a kụra na pẹkẹrẹ na se koroka sịkị, opu ḅuruḅaa sime bebe ama mị kelema sịkị mị. 26Anị sọnị ini Ịlaịja ḅe se Izrẹl ḅie fịrịma gbọrịḅọ sọnị ofori-ẹ, ọkụma Zarẹfat Saịdọn pẹkẹrẹ sime ama mị ḅie sime deḅọ fịsa eremeniḅọ ma kẹngẹ-ẹ. 27Tọn-a ḅụkan obi kọn apụ pịkị Izrẹl ḅie simemẹ, ịkịankoro Ịlaịsha sịkị mị ḅụ anị-ẹ ḅẹ sọnị, inia ḅie ini gwọ gbọrịḅọ sọnị ofori-ẹ, Neaman, Siria ḅọ ḅe sikima.”
28Tẹkẹwarị mị ḅie sime apụ mamgba mịn mị naa sịkị, anị ini ịganịmamẹ. 29Ini sịsẹ ama mị ḅie Jizọs Ḅe nwọ fọnọpakụmamẹ, se Ò se ini inia ama mị nama chịngị mị ọgọnọ mun mẹ. Ò suma tuma nyọ mị ḅie gbinḅịa ẹrẹchị, 30ọkụma Ò tomonikpo mị ḅie toluḅọrọ se nwẹngị somẹ.
Sitẹmẹ Ḅie Sime Gbọrị Owuḅọ
(Mak 1.21-28)
31Anịsịkị Jizọs Ḅe Kapanịọm nwọ mun mẹ, Galili ḅie sime gbọrị ama, Ori Ịnyọsara Ene ḅụ ye se tomonima ḍie nyọ mị. 32Ọ̀ wẹrị ye se ini ḍie ḅara mị anị ijira se inimgba ḅụ saramẹ, anịatịḅị kụrọnyanaḅọ ḅara Ọ̀ nwọse ọkwẹịnmẹ. 33Tẹkẹwarị mị ḅie sitẹmẹ ḅie sime gbọrị owuḅọ omi-ẹ, ò gele pụkọ nwọse kụrọma oloku pakụmamẹ, 34“Yia! Che mịẹgboloma wa ị́rị́ na nwọ nyana, Jizọs Nazarẹt ḅọ? Ị́ ḅo wa fama-ẹḅo? Àrị ị́ simeọkụ nemimẹ: Ị́rị́ Tamụnọ Ḅe oria fịafịa fịrịnwẹngị Tomoniḅọ Ḅe-ẹ!”
35Jizọs Ḅe tọn tẹmẹ ḅe pịrịmẹ, “Ị́ ḅịpị gbẹịn, se tomoniḅọ ḅe ḅie pakaḅo!” Sitẹmẹ ḅe tomoniḅọ ḅe suma inia tọrọkọ gbin koromamẹ, se gbọrịye sọnị se ọ̀ lamaka ḅụ ò ḅie pakaḅomẹ.
36Inimgba ḅụgbiripumẹ, se nwọse jịnḅọ jịnḅọ ḅẹmẹ, “Mà nde nde sime ọkwẹịn? Kụrọ na ịnyọ na nyana se ḅẹrẹtọn sitẹmẹma pịrị, se àrị pakaḅomẹ!” 37Se Jizọs Ḅe gboloma ḅẹrẹ mị wasamamẹ anị pẹkẹrẹ mị mgba.
Jizọs Ḅe Tọn-a Apụ Gwọmẹ
(Mat 8.14-17; Mak 1.29-34)
38Jizọs Ḅe tẹkẹwarị mị koromaso se Saịmọn ḅe warị mun mẹ. Owoi-akọm Saịmọn fuarọ ma ọlọ waraḅẹ, se ini á gbolomaye nwọ ḍuko Jizọs Ḅe pịrịmẹ. 39Ò mun árịa mọnọye anga chịẹ simemẹ, se ḅẹrẹtọn owoi-akọm mị pịrịmẹ. Owoi-akọm mị á ḅụḅarasinmẹ, anịkirikiri á sịsẹ se fịrịnwẹngị ini pịrịmẹ.
40Ịrụa mị sọ sịkị, ini inia ikiapụ obi tọrụkịrịkịrị ḅụ sime apụ mamgba ọkịḅo Jizọs Ḅe pịrịmẹ Ori Ọ̀ ḅarama se inia ḅụ ḅọḅọ ọgọnọ gbana se inimgba gwọmẹ. 41Sitẹmẹma, sọnị tọn apụ ḅie pakasomẹ, oloku se nwọ ḅẹmẹ, “Ị́rị́ Tamụnọ Tọkụ Ḅe-ẹ!”
Jizọs Ḅe ḅẹrẹtọn àrị pịrịmẹ se pịkị ḅerenikẹ àrị ọkwẹịn, anịatịḅị àrị nemimẹ na Ori anị Mẹsaya Ḅe-ẹ.
Jizọs Ḅe Tẹkẹwarị Ma Ḅie Tamụnọ Ḅẹrẹ Ḍukomẹ
(Mak 1.35-39)
42Eneḅa sịkị Jizọs Ḅe ama mị koromaso se sikima gbọrị gbọịn nyọ nwọ mun mẹ. Tomonima sakị Ọ̀ ḍọkị simemẹ, se ini Ori ọrị sịkị ini ḅarị ḅikẹ Ò so. 43Ọkụma ọ̀ nwọse ini ḅẹmẹ, “À Tamụnọ Amanyanakiri mị ḅe Iḅi Ḅẹrẹ mị nwọ ḍukoḅịa ísí amama ḅie sọnị, anịatịḅị anị Tamụnọ Ḅe ị̀ fịrịma na à mịẹ nwọḅẹ ọkụ-ẹ.”
44Se Judia sẹ mị ḅie sime tẹkẹwarịma ḅie mgba, Ọ̀ Tamụnọ ḅẹrẹ mị ḍuko kelemamẹ.
Currently Selected:
Luk 4: OBTP
Highlight
Share
Copy
Want to have your highlights saved across all your devices? Sign up or sign in
The Bible Society of Nigeria
