Chukusakị 16
16
Hega Ma Na Ishmẹl Ḅe Na
1Ebram ḅe tarọ Seraị ma, ma àrị awọ yi ọ̀ pịrịkẹ. Ọkụma Ijipt gbọrị omoni eremeni tọkụ á nwọ nyanamẹ, árịa ẹrẹ anị Hega, 2á nwọse Ebram ḅe ḅẹmẹ, “Nyanaḅọ Ḅe ò ḅereni ị̀ pịrịkẹ àrị awọ yi. Cheye gose ị́ ị̀ya omoni tọkụ ma na gboloma ẹka? Sosi á gbọrị tọkụ yi ị̀ pịrịḅịa.” Ebram ḅe Seraị ma ḍukoye mị ḅerenimẹ. 3Anịẹrẹchị árị á seni ọ̀ pịrịmẹ ịgwa eremeniḅọ ḅaraḅụ. (Mịn mị mịẹ sịkị Ebram ḅe Kenan ḅie oyi-a kụra ọ̀ nwọ angasam.) 4Ebram ḅe ori Hega ma na gbolomamẹ, seni á furamẹ. Á furasam á nwọ ọrị sịkị, á ḅo ḅụdekichịẹma pịkị Seraị ma ḍikisimamẹ.
5Anị Seraị ma nwọse Ebram ḅe ḅẹye-ẹ, “Hega ma gose ị̀ ḍikisimarịye mị ị́ ḅara ḅomẹ. Ị̀rị̀ ḅarana á seni ị́ pịrịmẹ, á ḅo ọrịmẹ na á furasam nwọḅẹye gose árị ị̀ ḍikisimasam. Ye Nyanaḅọ Ḅe karakaraye mị kọn mine mama apụma pịrị, ị́ ḅaraḅo na ị̀ ḅaraḅo na!”
6Ebram ḅe nwọse á pẹkẹrẹmẹ, “Iḅimẹ, árị ị́ya omoniḅọ-ẹ, ị́ chukuḅie á pịkị omi-ẹ nwọḅẹ sịkị, ị́ ḅụḅẹlẹḅara nwọse árị na anga.” Anịḅụ Seraị ma opuma siḅara seni árị na angaye gose á mangịsomẹ.
7Nyanaḅọ Ḅe enjẹlḅọ, ḅọrọ Shọ mị mun-arị ateli ḅụ sime onwun ele mị ḅie ḅụ kiriḅie pakaḅoarị mengi mị nyọ ḅụ Hega ma na ịrịamẹ 8se nwọḅẹmẹ, “Hega Seraị omoniḅọ, ndeju ị́ ḅo, se mịọkụ ndeju ị́ nwọ mun-ao?”
Á nwọ pẹkẹrẹmẹ, “Ị̀ nyanaḅọ ma ḅụ à mangịsoaḅẹ.”
9Ọ̀ nwọḅẹmẹ, “Vinpịkị so á damamun se árịa omoniḅọ sọ.” 10Se ọ̀ nwọḅẹmẹ, “Tọn-awọ ị́ furoḅie pakaḅoḅịa, tomoni ineda ini kịẹn ẹka ḅara. 11Ị́ gbọrị owutọkụ yiḅịa se Ishmẹl ị́ nwọse ọ̀ chịnḅịa, anịatịḅị Nyanaḅọ Ḅe ị́ kọn àrị tịḅịfoinma owu mị nwọ naasam. 12Ọkụma ị́ya tọkụ ḅe piriḅie-owoi yepụra asụn ḍumo ọ̀ nwọ kọnḅịa; ọ̀ taraka se nweni mamgba wẹrịma ḅịa, nweni mamgba pịkịna taraka se ọ̀ wẹrịma ḅịa. Oria mịnapụ mamgba ḅụ ò sikima anga ḅịa.”
13Hega ma nwọse á ḅụgbelamẹ, “À kọkọma Tamụnọ Ḅe ọrị se ḍumo se pịkị anị ḍukoḅịa nọ?” Anịẹrẹchị Nyanaḅọ ọkwẹịn á pịrịḅọ ḅe á nwọse ọ̀ chịnmẹ, “Ye Ọrịrị Tamụnọ.” 14Anịẹrẹchị tomoni nwọse Kedẹsh na Birẹd na ogboku ḅụ sime olulu mị chịnmẹ, “Ị̀ Ọrị Ḍumoḅọ Ḅe oria Olulu.”
15Hega ma gbọrị owutọkụ nwọ yi Ebram ḅe pịrịmẹ, se ọ̀ nwọse ọ̀ chịnmẹ Ishmẹl. 16Ebram ḅe anịsịkịḅụ ineinfa kụra iniasi oyi fịnjị ọ̀ nwọ lasam.
Currently Selected:
Chukusakị 16: OBTP
Highlight
Share
Copy
Want to have your highlights saved across all your devices? Sign up or sign in
The Bible Society of Nigeria
