Chukusakị 17
17
Ḅụpẹlẹ, Ọḅọkụ Mị Ḅe Elekima
1Ebram ḅe ngei fa kụra sọnọasi nwọ lasịkị, Nyanaḅọ Ḅe ọ̀ ḅụ se ò ḍiese nwọḅẹmẹ, “Ị̀rị̀ anị Kụrọmamgba Nyana Tamụnọ Ḅe-ẹ. Ị̀ ḅịpị poki se pịkịna sịkịmamgba karakaraye mị nwọ mịẹ. 2Àrị ị́rị́ na ị̀ya ọḅọkụ mị fịḅịa, à pịkịna ḅakama ị́ furoḅie pakaḅoḅịa awọ seni ị́ pịrịḅịa.” 3Ebram ḅe tịḅịtu seni ọ̀ tọrụ se kiri lamamẹ, anịsịkị Tamụnọ Ḅe nwọḅẹmẹ, 4“À mị ọḅọkụ se ị́rị́ na fịḅịa; à ḅereni ị́ pịrịmẹ na ị́ tọn tọn à sẹ ḅe opuḍaḅọ sọḅịa. 5Ebram ḅarị ị́ya ẹrẹ sọ ẹkẹ, ọkụma Ebraham, anịatịḅị àrị ị́ mịẹḅịa ị́ opuḍaḅọ sọ ḅaka sẹ pịrịḅịa. 6À ḅakama ị́ furo ḅie pakaḅoḅịa awọ se ị́ pịrịḅịa se inia ḅie dapụ amanyanapụ sọḅịa. Ị́ furo ḅie pakaḅoḅịa apụ opuma ḅakaḅịa, se iniḅo sẹsẹ sọḅịa.
7“À ḅereni ị́ pịrịye àrị anị mịẹ ḅeinma ḅịa, anị pịkị ọkịmun ị́ furo ḅie pakaḅoḅịa awọma ḅụ ḅụọḅụọ laḅịa, kuluma nyanaka ọḅọkụ-ẹ. Àrị ị́ Tamụnọ sọḅịa, pịkị ị́ furo ḅie pakaḅoḅịa awọma Tamụnọ sọḅịa. 8Mịọkụ ị́ nwọ anga àrị igoni ama mị, à seni ị́rị́ na ị́ furo ḅie awọma na pịrịḅịa. Bebe Kenan ama mị mgba sime ị́ furo ḅie awọma pịrị gbasoḅịa, se à pịkịna inia Tamụnọ sọḅịa.”
9Tamụnọ Ḅe nwọse Ebraham ḅe ḅẹmẹ, “Ị́rị́ sọnị ḍọkịḅo ọrị na ị́ ị̀rị̀ na fị ọḅọkụ mị ị́ kokomẹ, ị́rị́ na ḅụọḅụọ ḅụ ị́ furo ḅie pakaḅoḅịa awọma na. 10Ị́rị́ na ị́ furo ḅie ḅoḅịa awọ mamgba na ḅereni ọkị na ọ́mịna ḅie pakaḅoḅịa owutọkụ goyegoye ḅụ ọ́ pẹlẹḅịa. 11-12Mịọkụ ọkị tọrọkọmun ó yi seni nine-a ḍin lasa owutọkụ goyegoye ḅụ ọ́ pẹlẹḅịa, ọ́mịna omoni yi owuapụ awọ sọnị pịkị jịn a sẹ ḅie ọ́ fẹḅo omoni owuapụ awọ sọnị. Mịn mị ḍiepakụmaḅịa na ị́rị́ na ị̀rị̀ na ogboku ọḅọkụ omi-ẹ. 13Owutọkụ goyegoye ḅụ ọ́ pẹlẹḅịa, mịn mị ọ́mịna ojuḅụ ḍiepakụmaḅịa na à seni ị́rị́ na fị ọḅọkụ mị kuluma nyanakẹ. 14Ḅụpẹlẹka owuḅọ goyegoye ḅarị ị̀ya tomoniḅọ sọ ẹkẹ, anịatịḅị mị ị́rị́ na fị ọḅọkụ mị iniḅọ kokokẹ.”
15Tamụnọ Ḅe nwọse Ebraham ḅe ḅẹmẹ, “Ị́ ḅarị Seraị seni ị́ tama chịn ẹkẹ; mịọkụ ọkịmun árịa ẹrẹ anị Sera. 16Àrị á ḅẹlẹmaḅịa, à pịkịna á ḅụ ḅọrọ gbọrị owutọkụ seni ị́ pịrịḅịa, àrị á ḅẹlẹmaḅịa, seni á ḅo sẹsẹ ḅe nyengiḅọ sọḅịa, á furo ḅie pakaḅoḅịa awọma ḅie amanyanapụ sọnị pakaḅoḅịa.”
17Ebraham ḅe ọ̀ tọrụtu se ọ̀ tọrụ se kiri lamamẹ, ọkụma ọ̀ ḍẹrịse ò ḅieḅụ nwọ gbelamẹ, “Owuḅọ ineda tọkụ yiḅe nụḅọ ḅo kụra sọnọasi lasịkị? Sera ma sọnị kụra iniasi oyi fịnjị ḅụ á pa ineda tọkụ yiḅịa nọ?” 18Ọ̀ nwọse Tamụnọ Ḅe gbelamẹ, “Nde ị́ gose ḅereni Ishmẹl ḅe pịrị-ẹkaye ori ị̀ya tatarị owutọkụ sọ?”
19Ọkụma Tamụnọ Ḅe nwọḅẹmẹ, “Ẹn-ẹn. Ị́ ta Sera ma gbọrị owutọkụ á nwọ yi ị́ pịrịḅịa, se Aịzịk ị́ nwọse ọ̀ chịnḅịa. Àrị ori na ị̀ya ọḅọkụ mị koko gbasoḅịa pịkị ò furo ḅie pakaḅoḅịa awọma na. Kuluma nyanaka ọḅọkụ-ẹ. 20Ishmẹl ḅe ḅụ ị́ ḍukoye à naasam, anịẹrẹchị àrị ọ̀ ḅẹlẹmaḅịa, à pịkị ḅakama awọ na inia furo ḅie pakaḅoḅịapụ na nwọse ọ̀ pịrịḅịa. Ọ̀ ḍaḅọ sọ oyimaịn amanyanapụ fịnjị awọ pịrịḅịa, à mịẹḅịa ò furo ḅie pakaḅoḅịapụ ma opu sẹ sọḅịa. 21Ọkụma ị̀ya ọḅọkụ mị à se ị́ya owutọkụ Aịzịk ḅe na fịḅịa, Sera ma jịn kụra ḅụ nwọ pembe sịkị ḅụ yiḅịa tọkụ ḅe.” 22Tamụnọ Ḅe ori Ebraham ḅe na ọkwẹịnso sịkị ori ọ̀ wẹrịsomẹ.
23Anị gbọrị ene mị ḅụ, Ebraham ḅe ọ̀ Tamụnọ Ḅe ḅịpị poki se oria tọkụ Ishmẹl ḅe ḅụpẹlẹmẹ, pịkị oria warị ḅie sime ísí owuapụ mamgba na, pịkị oria warị ḅie ini yi owuapụ awọma na ọ̀ pịkị fẹḅo omoni owuapụ mamgba na. 24Ebraham ḅe ori ọ̀ ḅụpẹlẹ sịkị ngeifa kụra sọnọasi ọ̀ nwọ lasam, 25anịsịkị oria tọkụ Ishmẹl ḅe oyitẹrẹ-a kụra fịnjị ọ̀ nwọ lasam. 26Ini mama apụ mamgba gbọrị ene ini inia ḅụpẹlẹmẹ, 27Ebraham ḅe oria warị ḅie sime omoni owuapụ mamgba na.
Currently Selected:
Chukusakị 17: OBTP
Highlight
Share
Copy
Want to have your highlights saved across all your devices? Sign up or sign in
The Bible Society of Nigeria
