Kịẹn-aḅịḅị 6

Tẹmẹ La Ḅara Kẹ Sime Tamụnọ Pịrị Minini Apụ Oloko

1KỊNỊNYANAḄỌ ḅe nwẹnị Mozizi ḅẹẹ: 2Izirẹlịapụ ma ḅẹẹ, “Owiḅọ, anịanịa, ẹrẹḅọ karakara ḅara kẹ ịlọ minini Tamụnọ pịrịm, tẹ tẹmẹ-la ḅara ḅụ sime Tamụnọ pịrị ḅẹ ịlọ ịn kẹ Nazarayịtị sịn ḅọ ḅara kẹ amịna ḅụụ sikima wẹrị KỊNỊNYANAḄỌ ḅe pịrị ḅarị ḅẹḅẹ, 3#Luk 1.15mḅọ amịna ḅụụ ḅelema ḅa wayịnị nwẹn-sịn iru na, kụrọtẹ iru na ḅuu ḅụ; mḅọ pịkị wayịnị ḅụ ịn mịẹ pakama-ḅo viniga nwẹn-sịn ye, anịanịa kụrọtẹ iru ḅuu ma; anịsakị girepu nwẹn-sịn sịnmgbọlụ mẹ ḅụ ḅẹ minji tẹ paka-ḅo minji goyegoye mḅọ ḅuu ma, anịanịa ịwọma girepu nwẹn sịn sịnmgbọlụ mẹ fị; anị samụnọtẹ sọ mḅọ fị ma. 4Mḅọ amịna ḅụụ ḅelema, sikima wẹrị Tamụnọ pịrị ene mamgba ḅụ, mḅọ girepu nwẹn-sịn sịnmgbọlụ sụarị sịn mẹ ḅụ paka-ḅo gberie-sọ fị ḅịa, anị ḅẹ sịnmgbọlụ, anịanịa anị ḅẹ apara sọ.”

5“Mḅọ ịlọ mẹ minini tẹ amịna ḅụụ ḅelema sikima wẹrị Tamụnọ pịrị ene mamgba ḅụ gbọrụ sịḅị-sẹịn ogie sọ mḅọ sịḅị la ḅịa; nwẹnị sakị mẹ tẹ mḅọ amịna ḅụụ ḅelema sikima wẹrị KỊNỊNYANAḄỌ ḅe pịrị sakị mẹ kịra ḅa, mḅọ fịafịa sime ḅa; mḅọ amịna sịḅị-ḅẹ-inume mẹ wẹrịso tẹ anị nangwọ tẹ pukatẹ sime ḅa.”

6“Ene mamgba tẹ mḅọ amịna ḅụụ mịẹ fịafịa ma sikima KỊNỊNYANAḄỌ ḅe pịrị sakị mẹ mḅọ ḅụụ kẹ ḍụẹịn kpekima ḅịa. 7Fịtẹ ḅọ mẹ nwẹnị mḅọ ḍaḅọ, anịanịa, mḅọ iyingiḅọ, anịanịa mḅọ iyimbere, anịanịa ịyịmbara sọ ịn fịịm ḅẹḅẹ mḅọ amịna ḅụụ kẹ fịafịa ḅara wẹrị ḅa gbala mḅọ ḅụụ ḅelema sikima Tamụnọ pịrị ye mẹ mḅọ sịḅị-ogbo mie anị simearị ye ẹrẹsị. 8Mḅọ amịna ḅụụ ḅelema sikima wararị ene mamgba ḅụ, mḅọ fịafịatẹ sime KỊNỊNYANAḄỌ ḅe pịrị wararị.”

9“Ḅẹẹ tomḅọ, tomḅọ mḅọ akaka ḅụ bẹkẹ-ḅara-kẹ fịị, tẹ mḅọ amịna fịafịatẹ sime Tamụnọ pịrị wararị sịḅị mẹ pile ma ḅẹḅẹ mḅọ amịna ḅụụ fịafịamarị ene ma ḅụ sọnọma aḍin karama ene mẹ ḅụ mḅọ amịna sịḅị sẹịn-siin ḅa. 10Nine aḍin karama ene ḅụ mḅọ nwẹẹrẹsị maa mgbọ, anịanịa asambịrịma olosịkịya maa mgbọ ọkị-ḅo agbamịẹḅọ ḅe pịrị ḅa Kobiri Akpụrụ-warị mẹ ḅẹ ḅọkọ mẹ ḅụ, 11tẹ agbamịẹḅọ ḅe gbọrụ ye kẹ si sin agba mịẹ, tẹ osi ye kẹ dọkịma-agba mịẹ, tẹ si-wẹrịso pịrị ḅẹrẹ fama mḅọ pịrị ḅa, gbala ḍụẹịn mẹ gotẹ mḅọ si mịẹm. Anịsakị anị gbọrụ ene mẹ ḅụ mḅọ amịna ḅụụ mịẹ fịafịama ḅa. 12Tẹ mḅọ ḅụụ ḅelema sikima wẹrịarị ene ma ḅụ amịna ḅụụ sikima ḅelema KỊNỊNYANAḄỌ ḅe pịrị ḅa, tẹ gbọrụ kụra sịḅị ḅụ ḅọrọtẹ asambịrịma ejimina ọkị-ḅo tẹ kẹ ḅẹrẹ-ḅarasii agba mịẹ ḅa; kụma mḅọ kẹ tarị ḅụụ sikima ḅelema sakị mẹ fa tẹ ḅarị kịẹn ḅụ sọ-a; gbala mḅọ ḅụụ sikima ḅelema mẹ pilemam ẹrẹsị.”

13 # Fịr 21.23,24 “Miemẹ anie sime ḅụụ sikima ḅelema wẹrị Tamụnọ pịrị tẹ ḅọ mẹ oloko mẹ; mḅọ ḅụụ sikima ḅelema wẹrị sakị mẹ kara tẹ ḅẹḅẹ, ini mḅọ kẹ Kobiri Akpụrụ-warị mẹ ḅẹ ḅọkọ mẹ ḅo ḅa, 14tẹ mḅọ amịna ḍiepịrịye kẹ KỊNỊNYANAḄỌ ḅe pịrị ḅa — ḅẹkụ ḅụụ ḅụ ofori gbọrụ kụra sịḅị ḅụ ḅọrọtẹ gbọrụ asambịrịma ejimina sime dọkịma-agba mịẹ pịrịm; na si sin agba mịẹ ḅẹkụ ḅụụ ḅụ ofori gbọrụ kụra sịḅị ḅụ ḅọrọtẹ asambịrịma gbọrụ anana na, dein-pịrị-agba mie ḅẹkụ ḅụụ ḅụ ofori gbọrụ ejimina na, 15sunmaye sọ-a fịturu gbọrụ kana na, olivu pulo kẹ pikiri tẹ iḅiọkụ gbẹẹtẹ iḅi fịlawa kẹ mịẹ kịkị na, sunmaye sọ-a ḍọkọḍọkọtẹ ịkịka tẹ olivu pulo kẹ arị ọgọnọ sara tẹ aị na, arịḅẹ mgbọlụ agba mịẹ ye na, iru agba mịẹ ye na.”

16Agbamịẹḅọ ḅe nwẹnị arị kẹ KỊNỊNYANAḄỌ ḅe tọrọkọ ḅo tẹ mḅọ si sin agba mẹ na, mḅọ dọkịma agba mẹ na mịẹ ḅa; 17tẹ ọ̀ nwẹnị ejimina ḅe na sunmaye sọ-a fịturu kana mẹ na kẹ sụa dein-pịrị-agba ḅara mịẹ KỊNỊNYANAḄỌ ḅe pịrị ḅa; agbamịẹḅọ ḅe pịkị anị ḅẹ mgbọlị agba mẹ na, anị ḅẹ iru agba mẹ na sọ mịẹ ḅa. 18Nazarayịtị nwẹn-sịn ḅọ mẹ nwẹnị mḅọ fịafịa sịḅị mẹ sẹịn-siin ḅa Kobiri Akpụrụ-warị mẹ ḅẹ ḅọkọ mẹ ḅụ, tẹ fịafịa sịḅị-ḅẹ-inume mẹ ọkị tẹ anị kẹ fịnị mẹ tẹ dein-pịrị-agba mẹ suku simearị ye mẹ ḅio sụa ḅa.

19Agbamịẹḅọ ḅẹ nwẹnị ini ejimina ḅe sọ tẹso ori apana mẹ na, kana mẹ ḅio ḅẹ sunmaye sọ-a kịkị mẹ ḅẹ gbọrụ ye na, sunmaye sọ-a ḍọkọḍọkọ ịkịka ma ḅẹ gbọrụ ye na ọkị tẹ kẹ Nazarayịtị nwẹn-sịn ḅọ mẹ aḅara-ḅio sụa ḅa, mḅọ amịna fịafịa sịḅị mẹ sẹịn-siin fama tẹso. 20Agbamịẹḅọ ḅe nwẹnị arị kẹ KỊNỊNYANAḄỌ ḅe tọrọkọ ḅụ karakara ịmịẹtẹ ḅẹẹ gotẹ arị sikima ḅa; arị aị ma na, ndo mẹ tẹ in sikima wẹrị ye mẹ na, ḅụọ-ẹtẹnẹ mẹ tẹ kẹ agba mẹ mịẹ ye ḅụ emi ye mẹ na anie sime agbamịẹḅọ ḅe pịrị fịafịa ḍiekiri; aniemẹ ḅọrọ tẹso, Nazarayịtị nwẹn-sịn ḅọ mẹ inetẹ iru ḅuu ḅa.

21Miemẹ anie sime Nazarayịtị nwẹn-sịn ḅọ mẹ tẹ ịlọ minini Tamụnọ pịrị ḅọ mẹ pịrị oloko mẹ. Mḅọ kẹ agba mịẹ KỊNỊNYANAḄỌ ḅe pịrị ḅarịye mẹ, Nazarayịtị nwẹn-sịn ḅọ ḅara ḅụ mḅọ tẹmẹ-la ḅara kẹ minini Tamụnọ pịrị ḅara mẹ sime ḅa, jen ye tẹ mḅọ inetẹ nyanatẹ ọkị-ḅo ḅarịye mẹ sikima; ịlọ mẹ tẹ mḅọ minini ye mẹ sime-ḅara mie mḅọ oloko mẹ sime-ḅara ḍiki mịẹ ḅarị ḅara. Nazarayịtị nwẹn-sịn ḅọ ḅara ḅụụ mḅọ ḅụụ sikima ḅelema wẹrị ye mẹ gotẹ.

Agbamịẹḅọ Kịnị Boma Ḅara Mẹ

22KỊNỊNYANAḄỌ ḅe nwẹnị Mozizi ḅẹẹ, 23Erọnị na, ori owiapụ-awọmẹ na ḅẹẹ: mị-ḅara mie ọ́ kẹ Izirẹlịapụ ma boma ḅarị ḅara; ọmịnị ịn ḅẹẹ ḅa: 24“KỊNỊNYANAḄỌ ḅe ó bomaa, pịkị ó kokoo; 25KỊNỊNYANAḄỌ ḅe mịẹtẹ ọ̀ tọrụkuḅu ọmịna ọgọnọ ḅịya paka tẹ ḍiki-ḅụụjịrị nyana ọ́ pịrịị. 26KỊNỊNYANAḄỌ ḅe ò ḅiokpọma, ḍima-a ḅẹlẹ tọrụkuḅu mẹ saakị-gelemaa ọmịna ọgọnọ, tẹ dein kẹ ọ́ pịrịị.” 27Mị-ḅara mie ini ị̀ ẹrẹ kẹ Izirẹlịapụ ma ọgọnọ sịn suu ḅarị ḅara, anịsakị arị in boma ḅa.

Currently Selected:

Kịẹn-aḅịḅị 6: KBTP

Highlight

Copy