Kịẹn-aḅịḅị 2

Furo Furo Ma Kobiri-ogbo Mẹ Ḅụ Sime Ọrụtọn Ḅara

1KỊNỊNYANAḄỌ ḅe nwẹnị Mozizi na, Erọnị na ḅẹẹ: 2Izirẹlịapụ ma ọrụḅọ-ọrụḅọ mḅọ soku ḅụ mḅọ la ḅara ḅụ kobiri tẹ sime ḅa, ịna aḍapụ awarị ḅẹ arụ pike aḅịtẹ na ini na; ịn kobiri sime pakịrị anga goyegoye ḅụ ịn tọrụ kẹ Kobiri Akpụrụ-warị mẹ da ḅa.

3Inima tẹ ịrụa-saakịarị-anga anga mẹ ḅụ ịrụa-saakịarị-anga mẹ da-mu ḅụ ịn la ḅara kẹ kpoo-kpo ḅụ akpụrụ-warị pike tẹ kobiri sime ḅarị apụ anie Juda. Juda atomi ma tọrọkọ-tarịḅọ anie Nasọnị, Amịnadabụ owiḅọtụḅọ ḅe. 4Ịn wẹrịtẹ kịẹn ḅara ḅụ ori ọmụ-ogbo mẹ ḅẹ kịẹn-ḅịḅị, kịnị eseni apuku, sonio ẹndẹ finji, na kịnị oyia asi na (74,600).

5Ọ̀ palị tẹ kobiri tẹ sime ḅarị apụ anie Ịsaka furo-ḅẹ-apụ Ịsaka furo-ḅẹ-apụ ma tọrọkọ-tarịḅọ anie Nẹtanẹlị, Zụha owiḅọtụḅọ ḅe. 6Ịn wẹrịtẹ kịẹn ḅara ḅụ ori ọmụ-ogbo mẹ ḅẹ kịẹn-ḅịḅị, kịnị sonio apuku, ini ẹndẹ fa si (54,400).

7Anịtẹso anị ḅo Zẹbulọnị furo lam: Zẹbulọnị furo-ḅẹ-apụ ma tọrọkọ-tarịḅọ anie Ẹlịyabụ, Ẹlọnị owiḅọtụḅọ ḅe. 8In wẹrịtẹ kịẹn ḅara ḅụ ori ọmụ-ogbo mẹ ḅẹ kịẹn-ḅịḅị, kịnị sọnọma apuku, tẹra ẹndẹ finji, na kịnị oyia asi na (57,400).

9Juda bebe ọmụ-ogbo mẹ ḅụ ịna kpoo, kpo mamgba ḅẹ kịẹn-ḅịḅị anie si tẹra puku finji na kịnị sonio ẹndẹ na, (186,400). Ini mie tọrọkọ ḅụ tarị mẹnjị paka ḅarịye.

10Suku-jụ da pakịrị anga ḅụ Rubẹnị furo ḅẹ apụ ma kpoo, kpo ḅụ in la ḅara ḅụ akpụrụ-warị pike tẹ kobiri tẹ sime ḅa; Rubẹnị furo mẹ ḅẹ tọrọkọ-tarịḅọ anie Elizọ, Sẹdiyọ owiḅọtụḅọ ḅe. 11Ịn wẹrịtẹ kịẹn ḅara ḅụ, ori ọmụ-ogbo mẹ ḅẹ kịẹn-ḅịḅị, kịnị sọnọ apuku, ini ẹndẹ fa si, na kịnị sọnọa si na (46.500).

12Ọ̀ palị tẹ kobiri tẹ sime ḅarị apụ anie Simiyọnị furo-ḅẹ-apụ. Simiyọnị furo-ḅẹ-apụ ma tọrọkọ-tarịḅọ anie Sẹlumẹlị, Zurisadayị owiḅọtụḅọ ḅe. 13In wẹrịtẹ kịẹn ḅara ḅụ ori ọmụ-ogbo mẹ ḅẹ kịẹn-ḅịḅị, kịnị sọnọma apuku, nine ẹndẹ finji, na kịnị sọnọa si na (59,300).

14Anịtẹso anị ḅo Gadi furo lam. Gadi atomi ma tọrọkọ-tarịḅọ anie Ẹlịyasafụ, Duhẹlị owiḅọtụḅọ ḅe. 15Ịn wẹrịtẹ kịẹn ḅara ḅụ ori ọmụ-ogbo mẹ ḅe kịẹn-ḅịḅị, kịnị sọnọ apuku na, ngei ẹndẹ fa jei, na kịnị amesi oyi finji na (45,650).

16Rubẹnị bebe ọmụ-ogbo mẹ ḅụ ịna kpoo, kpo mamgba ḅẹ kịẹn-ḅịḅị anie: ẹndẹ sọnọma si oyi finji ofori gbọrụ puku fa si (151,450). Ini mie maaịn karama mẹnjị-paka ḅarịye.

17Anịtẹso Kobiri Akpụrụ-warị mẹ na Livayị furo ḅẹ apụ ma kobiri-ogbo mẹ na kẹ sụa, kobiri-ogbo-ogbo ma ogboku mẹnjị-paka ḅa; ịn wẹrịtẹ kobiri, kobiritẹ sime-ḅara, mie ini ịn la ḅara, la ḅara ḅụ, ọrụḅọ-ọrụḅọ amịna sime kiri ḅụ mẹnjị-paka-ḅo ḅarị ḅara.

18Ịrụa-ideriarị-anga anga ḅụ Iferemu furo ḅẹ apụ ma ịn la ḅara ḅụ ịna kpoo, kpo ḅụ akpụrụ-warị pike tẹ kobiri tẹ sime ḅa. Iferemu atomi ma tọrọkọ tarị ḅọ anie Ẹlịsama, Amihudu owiḅọtụḅọ ḅe. 19Ịn wẹrịtẹ kịẹn ḅara ḅụ, ori ọmụ-ogbo mẹ ḅẹ kịẹn-ḅịḅị, kịnị sọnọ apuku, na kịnị ẹndẹ, sọnọa si finji na (40, 500).

20Ọ̀ palị ḅarị apụ anie Manasẹ furo mẹ Manasẹ furo-ḅẹ-apụ ma tọrọkọ-tarịḅọ anie Gamalịyẹlị, Pedazọ owiḅọtụḅọ ḅe. 21Ịn wẹrịtẹ kịẹn ḅara ḅụ, ori ọmụ-ogbo mẹ ḅẹ kịẹn-ḅịḅị, kịnị ini apuku, na kịnị oyia asi na (32,200).

22Anịtẹso anị ḅo Benijamịnị furo mẹ lam. Benijamịnị atomi ma ḅẹ tọrọkọ-tarịḅọ anie Abidani, Gidehọni owiḅọtụḅọ ḅe. 23In wẹrịtẹ kịẹn ḅara ḅụ, ori ọmụ-ogbo mẹ ḅẹ kịẹn-ḅịḅị kịnị ini apuku, sonio ẹndẹ finji, na kịnị oyi si na. (35,400).

24Iferemu bebe ọmụ-ogbo mẹ ḅụ ịna kpoo, kpo mamgba ḅẹ kịẹn-ḅịḅị anie: Kịnị oyi tẹra puku finji, na kịnị oyi ẹndẹ sọnọa si finji na (108,100). Ini tẹrẹị karama ḅara kẹ mẹnjị-paka ḅa.

25Ọgọnọ-jụ da pakịrị anga ḅụ Danị furo-ḅẹ-apụ ịn la ḅara ḅụ ịna kpoo, kpo ḅụ akpụrụ-warị pike tẹ kobiri tẹ sime ḅa. Danị atomi ma tọrọkọ-tarịḅọ anie Ayiheze, Amisadayị owiḅọtụḅọ ḅe. 26Ịn wẹrịtẹ kịẹn ḅara ḅụ ori ọmụ-ogbo mẹ ḅẹ kịẹn-ḅịḅị kịnị sọnọma apuku, ini ẹndẹ fa si, na kịnị jeia si na (62,700).

27Inima tẹ ọ̀ palị tẹ kobiri tẹ sime ḅarị apụ anie Asa furo mẹ. Asa furo-ḅẹ-apụ ma tọrọkọ-tarịḅọ anie Pagiyẹlị, Ọkaranị owiḅọtụḅọ ḅe. 28Ịn wẹrịtẹ kịẹn ḅara ḅụ, ori ọmụ-ogbo mẹ ḅẹ kịẹn-ḅịḅị, kịnị sọnọ apuku, tẹra ẹndẹ finji, na kịnị jeia si na. (41,500).

29Anịtẹso anị ḅo Nafutali furo mẹ lam, Nafutali furo-ḅẹ-apụ ma tọrọkọ-tarịḅọ anie Ayira, Ẹnanị owiḅọtụḅọ ḅe. 30Ịn wẹrịtẹ kịẹn ḅara ḅụ, ori ọmụ-ogbo mẹ ḅẹ kịẹn-ḅịḅị, kịnị sonio apuku, oyi tẹra ẹndẹ finji, na kịnị oyia asi na (53, 400).

31Danị bebe ọmụ-ogbo mẹmgba kịẹn-ḅịḅị anie: kịnị gbọrụ puku fa si, na ngei ẹndẹ fa jei na. (157,600). Ini kunoma tẹ mẹnjị-paka ḅa, ọrụ kpoo kpo la ḅara ḅụ.

32Ịn wẹrịtẹ ịna aḍapụ awarị ḅụ ịn kịẹn ḅara, mịna apụ ma anie Izirẹlịapụ ma. Inimgba tẹ akpụrụ-awarị ma ḅio ịn kobiri wararị kpoo, kpo ma ḅụ ịn kịẹn apụ anie: sọnọ fa puku inia si, na kịnị amesi oyi finji ofori kịnị eseni ẹndẹ na. (603,550). 33Kụma Livayị furo-ḅẹ-apụ ma ini ịn kịẹn kirikọn Izirẹlịapụ ma ogbo-ḅio suu-a, KỊNỊNYANAḄỌ ḅe wẹrịtẹ tọn Mozizi pịrị ḅara ḅụ.

34Mị-ḅara mẹ mie Izirẹlịapụ ma mịẹ ḅara. Arịmgba tẹ KỊNỊNYANAḄỌ ḅe wẹrịtẹ tọn Mozizi pịrị ḅara, anị ḅara mie ini ịn la ḅara ḅụ kobiri, kobiri tẹ sime-ḅara, anịsakị anị ḅara mie ọrụḅọ-ọrụḅọ amịna furo ḅụ mḅọ ḍaḅọ warị sime-ḅara ḅụ mẹnjị-mẹnjị paka ḅara.

Currently Selected:

Kịẹn-aḅịḅị 2: KBTP

Highlight

Copy