Kịẹn-aḅịḅị 11

In Tabera Kẹ Sịn Anga Mẹ

1Tomi ma ḅo ịna si-afụḅara gbolomaye ḍuko-sụa KỊNỊNYANAḄỌ ḅe pịrị tẹ ọ̀ naa tẹso, ọ̀ nwẹnị ịganị ịn pịrị, tẹ fịnị ịna ogbo-ḅio kọrị tẹ kobiri-ogbo mẹ ḅẹ gbọrụ pakịrị anga dọkịma. 2Anịtẹso tomi ma owu Mozizi pịrịm, tẹ Mozizi KỊNỊNYANAḄỌ ḅe tẹkẹm, tẹ fịnị mẹ biinm. 3Anie ḅụ ịn kẹ anịanga mẹ sịn ẹrẹ, Tabera — anị fiearị ye, Kọrịarị — gbala KỊNỊNYANAḄỌ ḅe fịnị mẹ ịna ogbo-ḅio kọrịm ẹrẹsị.

Mozizi Tesi Oyia Sịḅịdapụ Finji Tọnm

4Mịọkụ kịrị-kịrị anga ḅẹ atomi ogbo tẹ ịna ogbo-ḅio simearị apụ ma kụrọ ye ḅii lamam tẹ Izirẹlịapụ ma sọ pịkị siin tẹmẹ-la ḅara kẹ owu tẹ ḅẹẹm, “yei, mimgbe wa nama nyana tẹ pẹị ḅẹ namịna! 5Wa Ijiputi ḅụ yela-a ḅara kẹ wa pẹị-pẹị inji ma na, fị-fị ndu ma na, mḅam ma na, taḅa ayo ma na, ayo kịkarị ịn kẹ galiki na, liya na sịn-sịn afịaị ma na kẹ ḅiokoromam. 6Kụma mịọkụ ịnyọ sọ wa ḅarị nyana-a, gbala-gbala gberie-sọ ḅarị ofori, kụma mịẹ mana mẹ ngẹrị ene goyegoye” 7#Pks 16.31Mịọkụ mana mẹ kịkarị ye anie Koriyanda nwẹn-sịn fịye-ḅẹlẹmarị sịnmgbọlị mẹ, pịna-pịnarị odo tọrụ. 8#Pks 16.13-15Tomi ma mẹnjị-mẹnjị ikelema tẹ anị tanm, tẹ ye gbẹẹ-ye ḅụ anị gbẹẹm, anịanịa pụmbụ ḅio anị temim, tẹ anị sọọ, tẹ kẹ kịkị mịẹm, anịsakị anị ḅẹlẹarị ḅara gbala olivu pulo kẹ fọị kịkị ḅẹlẹ ḅara. 9Igirigi mẹ ḍin ḅụ in kobiri wararị anga mẹ ḅụ sararị sakị mẹ mịẹ mana ma anị na sararị sakị. 10Mozizi nwẹnị tomi ma naa, ịna afuro ma ikelema-koro ọrụḅọ-ọrụḅọ amịna akpụrụ-warị ḅọkọ ḅụ sime tẹ tẹmẹ-la ḅara kẹ owuarị tẹ KỊNỊNYANAḄỌ ḅe ịganị nwẹnị fịnị kọrị tẹ ọfịrị ḅara ọfịrị tẹ anị Mozizi ḅụụ ḅẹlẹ-a ḅara simem, 11Mozizi nwẹnị KỊNỊNYANAḄỌ ḅe ḅẹẹ, “Í tiegotẹ si ḅara kẹ í fịrịmẹnjịḅọ ḅe na mịẹ? Anịsakị tiye ẹrẹsị àrị í ḍiki-tọrụ ḅụ tọrụ-ḅẹlẹ nyana-a, tẹ í mịna atomi mamgba ikuye kẹ ị̀ ọgọnọ gbana? 12Yẹrị mịna atomi mamgba fura kọn? Yẹrị ini iyi, tẹ í ḅẹẹ mịnẹ, ‘ndo-ndoarị tụḅọ dogi ḅara kẹ í ekpe ọgọnọ ḅụ in dogii’ tẹ ama mẹ tẹ ị́ kẹ ịna aḍapụ pịrị ḅẹ tẹ ye karị ḅara kẹ ḍuko ama mẹ mu ḅẹ? 13Tọ anga ḅụ à mu nama nyana ḅo mịna atomi mamgba pịrị pẹị ḅẹ? Kẹ gotẹ ọkọ ḅẹẹarị, ini ì tọrọkọ owu-owu tẹ ḅẹẹm, ‘Nama kẹ wa pịrịị, mịẹ tẹ wa nama pẹị ḅẹ ḅara.’ 14Àrị inetẹ ngẹrị mịna atomi mamgba ikuye dogi ḅịa, ì ḅụụ ḅụ iku ḅaka ḅa. 15Í nwẹnị mị-ḅara kẹ ị̀ na mịẹ ḅarị ḅẹḅẹ, gbọrsịḅị ì ḅaa, à fị tẹ soo, í ḍiki-tọrụ ḅụụ àrị í ḅụụ ḅẹlẹm ḅẹḅẹ, mịẹtẹ à tọrụngbọ kẹ ì paụ ẹrị ḅịa ḅara.” 16KỊNỊNYANAḄỌ ḅe nwẹnị Mozizi ḅẹẹ, “Izirẹlị ḅẹ omongiapụ ma ḅụ kịnị atesi oyi finji kobiri ḅo ì pịrịị, inima tẹ í nimim omongiapụ tẹ ḅẹrẹtọn in pịrịarị opu fịrịmẹnjịapụ nwẹn ḅẹẹ apụ; tẹ ịn kẹ kobiri Akpụrụ-warị mẹ ḅoo, tẹ yee ini na, na anịanga simee. 17Anịsakị, àrị ideri-ḅo tẹ anịanga ọmịnị na ẹkwẹn ḅa; tẹ tẹmẹ mẹ tẹ í ọgọnọ simearị tẹmẹ mẹ ḅụ kẹlẹ ọkị tẹ anị kẹ ini ọgọnọ gbana ḅa, tẹ ini í na tomi ma ḅẹ ikuye mẹ dogi ḅa, mịẹtẹ ngẹrị ḅarị anị dogi ḅịa ḅara. 18Anịsakị tomi ma ḅẹẹ, ‘ọmịnị ọmịna ḅụụ mịẹ fịafịama ḅaa ḅe ene mẹ pịrịị, anịsakị ọ́ nama pẹị ḅa, gbala ọ́ KỊNỊNYANAḄỌ ḅe naarị ḅara kẹ tẹmẹ-la owu kọn tẹ gbelam: Tụḅọ ḅọrọ nama kẹ wa pịrị pẹị ḅẹ? Kẹ gotẹ ọkọ ḅẹẹarị, Ijiputi ḅụ ye wamịnị na iḅim ẹrẹsị.’ Anị ẹrẹsị KỊNỊNYANAḄỌ ḅe gbarị-a ḅara ḅụ nama kẹ ó pịrị ḅa, tẹ ó pẹị ḅa. 19Ọ́ gbọrụ ene, anịanịa maa ene, anịanịa sọnọa ene, anịanịa oyia ene, anịanịa si aḍin ngẹrị kẹ pẹị ḅẹ nama-a; 20kụma bebe gbọrụ akalụ, nwenii anị ọmịna anini ḅio paka-ḅo tẹ ọmịna ḅụụ siye sọ ḅa, gbala ọ́ KỊNỊNYANAḄỌ ḅe tẹ ọmịna ogbo-ḅio simearị ḅọ ḅe sịkịm, tẹ ọ̀ tọrọkọ tẹmẹ-la ḅara kẹ owu tẹ, tẹ ḅẹẹm, ‘Tiye gotẹ wa Ijiputi ḅụ paka-ḅo?’ ” 21Mozizi nwẹnị KỊNỊNYANAḄỌ ḅe ḅẹẹ, “ḅụọ kẹ mẹnjịarị tomi ma tẹ yẹrị na emi apụ ma kịẹn-ḅịḅị anie puku atesi oyi finji na kịnị sọnọ apuku na (600,000), tẹ ị́ ḅẹẹm ị́ nama kẹ in pịrị ḅa, mịẹtẹ in bebe gbọrụ akalụ kẹ anị pẹị ḅarị ḅara! 22Ịna afuro ḅin ḅarị anana na oḅori ogbo na tọ-anga emi? Opu tọrụ mẹ ḅio simearị inji mamgba kobiri ḅo gboloma tẹ kẹ ịn pịrị pẹị ḅẹ inji emi?” 23KỊNỊNYANAḄỌ ḅe nwẹnị Mozizi gbela, “Ị̀ opu kụrọ inetẹ mịẹ ḅịa ye emi? Mịọkụ ị́ ẹrị ḅa, ị̀ ẹkwẹn-ḅịḅị mẹ karakaraye sọ ḅẹ na sọ ḅịa na.” 24Mịẹ ḅụ Mozizi paka mu KỊNỊNYANAḄỌ ḅe ẹkwẹn-ḅịḅị ma ḍuko tomi ma pịrịm; tẹ ò tomi ma ogboku tesi oyia sịḅịdapụ finji kobiri gbolomam, tẹ in koroma Akpụrụ-warị mẹ ikelema-korom. 25Anịtẹso, KỊNỊNYANAḄỌ ḅe oḅuto mẹ ḅio tuuideri-ḅo tẹ ẹkwẹn ọ̀ pịrịm, tẹ tẹmẹ mẹ tẹ ori ọgọnọ simearị tẹmẹ-ịnyọ mẹ ḅụ kẹlẹ ọkị tẹ anị kẹ tesi oyia sịḅịdapụ finji ma ọgọnọ gbanam; tẹ tẹmẹ-ịnyọ mẹ ịna ọgọnọ gbana tẹso, ini ịkịan korom, kụma ini ọkọ mịẹ alama-a. 26Mịọkụ, tesi oyia sịḅịdapụ finji ma ḅụ, maa apụ tomi ma ogbo-ḅio simem, tẹ paka Akpụrụ-warị mẹ mu-a. Gbọrụḅọ ẹrẹ Ẹlịdadị, osi-ḅọ ẹrẹ Midadi. Ini sọ tẹmẹ-ịnyọ mẹ ịna ọgọnọ gbanam, tẹ ịn ịkịan korom. 27Tẹ gbọrụ Asatụḅọ nwẹnị mangị mu ḍuko Mozizi pịrị, “Ẹlịdadị na Midadi na tomi ma ogbo-ḅio ịkịan koroarị.” 28Jọsụwa, Nọnị owiḅọtụḅọ ḅe tẹ Mozizi sẹlẹ-ọkị tẹ ḅarasụa ọ̀ pịrịarị owiapụ ma ḅẹ gbọrụḅọ nwẹnị ḅẹẹ, “Mozizi, ị̀ nyanaḅọ, in dasịẹmaa.” 29Kụma Mozizi nwẹnị ọ̀ ḅẹẹ, “ị̀ sịḅị gotẹ í ini afanarị mụnọọ? Kpọma ì ḅio ḅẹlẹma ye sọ ḅa, KỊNỊNYANAḄỌ ḅe nwẹnị ḅiim ori atomi mamgba ịkịankoroapụ sọọ, nwẹnị pịkị ọ̀ tẹmẹ-ịnyọ kẹ ịna ọgọnọ gbana ḅẹ kụma.” 30Anịtẹso, Mozizi na Izirẹlị ḅẹ tesi oyia sịḅịdapụ finji ma na pịkịma tomina-ogbo mẹ ḍọkụma-ḅom.

KỊNỊNYANAḄỌ Ḅẹ Kuweli Nwẹn-sịn Pẹị-pẹị Afeni Kẹ Fịrịmam

31KỊNỊNYANAḄỌ nwẹnị bẹkẹma kụrọ fẹrụ kẹ fịrịma, tẹ opu tọrụ mẹ ḅụ kuweli sịn-arị pẹị-pẹị ḍọkọḍọkọ afeni ma dogi ḅo, tẹ in wẹrịso tẹ in kobiri-ogbo mẹ ikelema-koro akaka mamgba ḅụ vọịma sara ḅin, gbọrụ ene mẹnjị ḅarị anga ḅụ; tẹra aḅụọ-kuḅu (1 m) mie ịn kẹ kiri mẹ ḅụ kpoli saakị yee. 32Tẹ tomi ma anị bebe ene mẹmgba na, eneḅaka na, ḍin na, pịkị anị palị ene mẹ sọ kẹ saakị tẹ kuweli tanm; ịrụ tẹịn ḅara tan ḅo, fụn sụa akpa mẹ ḅẹ oyi pembe ye tanm, tẹ arị finjima sara iri amịna ḅụụ pịrịm, in kobiri sime anga mẹmgba ikelema-koro ḅụ. 33In paa nama mẹ pẹịarị, nama mẹ amụ fa-a ogbo, mịẹ KỊNỊNYANAḄỌ ḅe ịganị mẹ kẹngẹma tomi ma ọgọnọ sara yee, tẹ KỊNỊNYANAḄỌ ḅe nwẹnị gburo-gburotẹ opu obi fomu-ḅara kẹ in fomu ḅa lama. 34Anịẹrẹsị, ini ẹrẹ kẹ anịanga mẹ sịnm — Kibirọtị-hatava#11.34 Kibirọtị-hatava fiearị ye, Pọkọapụ Aḍuḅu, gbala anịjụ mịẹ in ye mẹ ḅii apụ ma ḍiḅi ye ẹrẹsị. 35Kibirọtị-hatava ḅụ tomi ma igoni mẹ kẹ mu Azirọtị nwẹn-sịn anga lam, tẹ ini Azirọtị ḅụ simem.

Currently Selected:

Kịẹn-aḅịḅị 11: KBTP

Highlight

Copy