Luku 24
24
Jizọsị Fị-ḅụ-saakịm
(Mat 28.1-10; Mak 16.1-8; Jọn 20.1-10)
1Sọndị dede-funfun ḅụ ereme ma ịn kẹ oju mẹ tẹlẹma ḅẹ kụnụaị ma ọkị tẹ mu ḍuḅu mẹ suku lam. 2Ịn nwẹnị ẹrị ḍuḅu mẹ ḅịḅị gbaịn sime ḍụḅarị mẹ mbelembele sikima tẹ. 3Mie ḅụ in sọ-mum, kụma KỊNỊNYANAḄỌ Jizọsị ḅe oju mẹ ini ẹrị-a. 4Tẹ in sịẹsime tẹ ọkọ kẹ anị kẹ kpọma kuromarị ogbo, ḅiotọn-a ḅara ḅụ, pịna-fa kapa sụa maa owiapụ ḅo ịna akaka sịẹm. 5Opu ḅalafa ḅụ ereme ma nwẹnị iḅo, owiapụ ma ịn ḅẹẹarị sakị, “Ó tiegotẹ fịtẹ-apụ ma ogboku ḍumo wararị ḅọ ḍọkịarị? 6#Mat 16.21; 17.22,23; 20.18,19; Mak 8.31; 9.31; 10.33,34; Luk 9.22; 18.31-33Ọ̀ mịanga ofori, Tamụnọ ọ̀ saakịma tẹ. Ò Galili ḅụ simearị sakị ò ḍuko ọ́ pịrị ye mẹ ọ́ nwẹn kẹ ḅiokoromaa: 7‘In Tomḅọ Tụḅọ ḅe saḅama si-mịẹapụ pịrị ḅa, ini ọ̀ kẹ ẹngbẹsẹ-sịn ḅụ ḅakụ ḅa, tẹ tẹra aḍin sakị ḅụ ọ̀ saakị tẹ ḍumo ḅa.’ ”
8Anịtẹso ereme ma nwẹnị ori ẹkwẹn ma kẹ ḅiokoroma, 9tẹ ḍuḅu mẹ suku pịkịma-so, tẹ mu mịna aị ma ḍuko oyi gbọrụḅọ finji ma na kirikọn-apụ ma na pịrị. 10Ereme ma anie Meri Magidalini na, Johana na, pịkị Jemusị iyingi Meri na; ini na sime osi ereme ma na mie ma ma ḅẹlẹma fịrịmẹnjịapụ ma pịrị ye. 11Kụma fịrịmẹnjịapụ ma ọkịm ereme ma papaaye ḍukoarị ẹrẹsị ini ịn minini-a. 12Kụma Pita nwẹnị saakị tẹ mangị mu ḍuḅu mẹ la; ó tuu tẹ ḍiki sakị ḍụẹịn ḅirima aḅịtẹ ma ngẹrị mie ori ẹrị ye, ò jen ẹrị-a. Anịtẹso ọ̀ nwẹnị pịkị so warị mu, tẹ paa ḅụụ-buarị tiye ḅọrọ paka tẹ ḅoto.
Jizọsị Ḍukamẹnjị Maa Apụ Ẹmaọsị Etela Ḅụ Ori Na Bịamam
(Mak 16.12-13)
13Anị gbọrụ ene mẹ ḅụ Jizọsị ḍukamẹnjịapụ ma ḅẹ maa apụ so Ẹmaọsị nwẹn-sịn kala-ama mum, sọnọma atombi pembe ye anị nwẹn kẹ Jeruselemu ḅụ ḅelem, 14tẹ in muarị sakị ịn paka aị ma kẹ ẹkwẹn jụmọ-jụmọ pịrịarị. 15Ini ọkọ kẹ ẹkwẹn ma muarị ḅẹ sakị Jizọsị ḅioju mẹnjị mu ịna ḅụ sọ tẹ mẹnjị tẹ, 16ini ori ẹrịm, kụma ini ò lekiri-a. 17Jizọsị nwẹnị in gbela, “Ọ́ ḅọrọ mẹnjị-mẹnjị tẹ tọ aị ẹkwẹn-arị?”
Ịn nwẹnị sịẹsime, ini ịna tọrụ-fụrụma fama wararị. 18Ini ḅẹ gbọrụḅọ, ori ẹrẹ Kilopasị, nwẹnị ò gbela, “Mị bebe Jeruselemu mẹ ḅụ ị́yẹrị ngẹrị ḅọrọ igoniḅọ mụnọọ, tẹ mịna boowa aḍin ḅụ paka aị ma nimi-a?”
19Ori nwẹnị gbela, “Tọ aị?”
Ini mẹẹ, “Nazarẹtị ḅẹ Jizọsị ḅụụ paka aị ma. Ḅị tomḅọ ḅe ịkịankoroḅọọ, tẹ Tamụnọ na tomi mamgba na ọkịm ọ̀ kụrọ nyanam, ori ẹkwẹn na ọ̀ kọrịnama na ḅụ. 20Wamịna agbamịẹapụ ma na ama ḅẹrẹtọn-apụ ma na mẹẹ ini ọ̀ kẹ mu ḅaa ḅẹ tẹ ini ọ̀ kẹ ẹngbẹsẹ-sịn ḅụ ḅakụm. 21Wa ḅiokpọm mịnẹ ori anie Izirẹlị ḅọrọma ḅẹ ḅọ! Anịngẹ-kụraḅio mie tẹra aḍin tẹ miemẹ mịẹ tẹ. 22Wamịnị na gbọrụ ḅụụ mẹnjịarị ereme ma ḅụ ḅẹ ja apụ pịkị ḅo wamịna ḅụụ-gbiripuma tẹ, mịnẹ in dede-funfun kẹ mu ḍuḅu mẹ lam, 23kụma ini inetẹ ori oju mẹ ẹrị-a. Ịn pịkịma ḅo ḍuko wa pịrịm mịnẹ ini enjẹlị apụ ẹrịm, tẹ ini ịn ḅẹẹm ò ḍumo wararị. 24Wamịna ḅụụ ḅẹ ja apụ mu ḍuḅu mẹ la tẹ ereme ma ḍuko ḅara kẹ ye ẹrịm, kụma ini ori ẹrị-a.”
25Anịtẹso Jizọsị nwẹnị ịn ḅẹẹ, “Ọmịnị kụma ọ́ kpọma oḅori-sọ ḍinm! Ịkịankoroapụ ma ḍuko aị ma ḅẹ gberie sọ ọmịnị inetẹ sarasarama minini-a. 26Anị mịẹ na-iḅi ye-a, mịnẹ Mẹsaya ḅe mịna ḅụụ-fụka ma da-tolu-ḅọrọ ḅo ori ebube ḅio sọ?” 27Tẹ Jizọsị nwẹnị saakị Mozizi ḅụ ọkị mu ịkịankoroapụ mamgba la ḅụ, Fịafịa Ḍiri mẹ ḅio ọ̀ ḅụụ kẹẹ wararị aị ma ḍuko finji ịn pịrị.
28In ḅo in muarị kala-ama mẹ kpeki sakị Jizọsị mịẹ ḅara gbala ọ̀ ḅọrọ so ala anga mu ḅẹm; 29kụma ini ọ̀ dasịẹmam; ini mẹẹ, “Wamịnị na sime; ene gbaịn ḅẹ tẹ, ala-a anị furu ḅa.” Mie ḅụ ọ̀ nwẹnị ini na sime ḅẹ mu. 30Ọ̀ lẹgị sime tẹ ini na ye fị ḅẹ tẹso, ori nwẹnị fịturu mẹ ọkị, tẹ anị boma tẹ paịn tẹ kẹ ịn pịrị. 31Anịtẹso ịna atọrụngbọ finji tẹ ini ò lekirim, kụma ọ̀ nwẹnị ịna tọrọkọ ịmaịn-faa so. 32Tẹ ịn nwẹnị jụmọ-jụmọ ḅẹẹ, “Etela wa nwẹn mẹnjịma ḅoarị tẹ ọ̀ Fịafịa Ḍiri mẹ puu-finji wa pịrịarị sakị wamịna ḅioḅẹngbọ koko ḅẹlẹ ḅụra?”
33Anị gbọrụ sakị ḅụ ịn saakị tẹ pịkịma Jeruselemu mum. In mu la sakị oyi gbọrụḅọ finji ma na osi apụ ma na kobiri wararị, 34tẹ in ḍukoarị, “Karakara ye KỊNỊNYANAḄỌ ḅe ọ̀ saakị tẹẹ! Ọ̀ pịkị ḅụụ kẹ Sayịmọnị ḍie tẹẹ!”
35Arị maa apụ ma nwẹnị saakị etela ye paka ḅara, paka ḅara ḍuko, mu ọ̀ fịturu paịn tẹ ini anị kẹ KỊNỊNYANAḄỌ ḅe lekiri anga la.
Jizọsị Ḅụụ Pakama Ò Ḍukamẹnjịapụ Ma Ḍiem
(Mat 28.16-20; Mak 16.14-18; Jọn 20.19-23; Fịr 1.6-8)
36Maa apụ ma paa miemẹ ḍuko ịn pịrịarị ogbo, ḅụụ-nimia ḅara ḅụ KỊNỊNYANAḄỌ ḅe ḅioju nwẹnị ḅo ịna ogboku sịẹ tẹ ịn ḅẹẹ, “Dein ọmịnị na simee.”
37Ịn ḅalafa lamam, ịn sịnm ịn ḍụẹịn ẹrị tẹ. 38Ori nwẹnị in ḅii, “Tiye ọmịna ḅụụ-gbiripumarị? Ọmịna ḅio tiegotẹ maaịn-maaịn tọn-arị? 39Ọmịnị ị̀ aḅara ma na ị̀ aḅụọ ma na ḍiki tẹ nimii mịnẹ yẹrị ḅioju. Ọ́ ḅara kẹ ị̀ lama ḍiki kụma ó nimi ḅa, ḍụẹịn nwẹn meni-oju sụa ḅara kẹ meni na mgbe na nyana nyana-a, ọmịnị inetẹ ẹrịarị ḅara ḅụ.”
40Ò mie ḍuko tẹso, ọ̀ nwẹnị ori aḅara na ori aḅụọ na kẹ in ḍie. 41Anịsọ ini inetẹ paa minini-a, ḅụụ-bua na ḅioḅẹlẹ na pịkị ịna ḅụ ḅinm; mie ḅụ ọ̀ nwẹnị in gbela, “Mịanga ọ́ fị-fị ye nyana?” 42Ịn nwẹnị sọọtẹ inji kẹ ọ̀ pịrị, 43tẹ ọ̀ nwẹnị ọkị tẹ ịna tọrọkọ pẹị.
44Anịtẹso ọ̀ nwẹnị ịn ḅẹẹ, “Ma ma anie àrị ọmịnị na simearị sakị à ḍuko ọ́ pịrị-pịrị aị ma, mịnẹ Mozizi Oloko mẹ na, ịkịankoroapụ ma na, Nume Ḍiri mẹ na, ị̀ ḅụụ ḅụ kẹẹ ye goyegoye paka fama ḅa.”
45Anịtẹso ọ̀ nwẹnị ịna aḅioḅẹngbọ ma finji, ịn Fịafịa Ḍiri mẹ fiearị ye naa ḅẹ ḅara, 46tẹ ịn ḅẹẹ, “Mie anị kẹẹ ḅara: Mẹsaya ḅe tọrụsiẹrị ḅa, tẹ tẹra aḍin karama ene ḅụ ọ̀ fị-ḅụ-saakị ḅa, 47tẹ ori ẹrẹ ḅụ in si ḅụ pịkị na, si-wẹrịso na oku mẹ ḍuko sịẹ mamgba pịrị ḅa, Jeruselemu ḅụ saakị. 48Ọmịnị anie mịna aị ma ḅẹ ḅẹrẹ-kiri sime apụụ. 49#Fịr 1.4Tẹ ị̀ Ḍa minini ọ́ pịrị ye mẹ yẹrị ḅarana anị kẹ ọ́ fịrịma ḅa. Kụma gbala-gbala opu ama mẹ ḅio ó so ma nwenii kụrọ So-ḅio koro ḅo ọmịna ọgọnọ gbana sakị la.”
Tamụnọ Jizọsị Ọkị Iwo So Mum
(Mak 16.19-20; Fịr 1.9-11)
50 #
Fịr 1.9-11
Anịtẹso ọ̀ nwẹnị tọrọkọ tarị tẹ ini na opu ama mẹ ḅio paka mu Bẹtani la, tẹ anịanga ḅụ ḅara saakị tẹ in boma. 51Ori in bomarị ogbo ori ịna ḅụ puu ḅele tẹ Tamụnọ ọ̀ kẹ iwo so mum. 52In sunsin ọ̀ pịrị tẹ opu ḅioḅẹlẹ na so Jeruselemu mum, 53tẹ ịna sakị mamgba kẹ Tamụnọ-warị mẹ ḅio mu, mu tẹ ịmịẹtẹ kẹ Tamụnọ ḅẹẹm.
Currently Selected:
Luku 24: KBTP
Highlight
Share
Copy
Want to have your highlights saved across all your devices? Sign up or sign in
(C) The Bible Society of Nigeria
