Jọnị Suku-saakị Ẹkwẹn
Suku-saakị Ẹkwẹn
Jọnị Iḅi Oku mẹ Jizọsị ḍie-pakamarị mịnẹ ori anie Tamụnọ sime gbamaso Ẹkwẹn ḅe tẹ “ḅo tomḅọ sọ tẹ wamịna ogboku angam.” Ḍiri mẹ ḅioju sọ ḍukoarị ḅara ḅụ, ịn mị Iḅi Oku mẹ kẹẹm mịẹtẹ anị goarị apụ minini ḅẹ ḅara mịnẹ Jizọsị anie Tamụnọ minini ori atomi pịrị Ḅọrọmaḅọ ḅe, Tamụnọ Tụḅọ ḅe, tẹ ini ọ̀ ḅụụ ḅụ nyana minini ḅụ ịn ḅọrọ tẹ ḍumo nyana ḅẹ ḅara (20.31).
Suku-saakị mẹ tẹ Tamụnọ sime gbamaso Ẹkwẹn mẹ na Jizọsị na gberie ḍukoarị ye mẹ ḅọrọ tẹso, Iḅi Oku mẹ ḅẹ tarị pakịrị mẹ kẹ wa ḍiearị aị anie kịrị-kịrị ḅụụ-buama-aị tẹ ḍie-pakamarị mịnẹ Jizọsị anie Tamụnọ minini ori atomi pịrị Ḅọrọmaḅọ ḅe, Tamụnọ Tụḅọ ḅe. Ma ma ḍuka ma-ḅo aị anie ḍuko-aị tẹ kẹ ḅụụ-buama-aị ma ḍie-pakama tẹ aị ma puu-finjiarị aị. Ḍiri mẹ ḅẹ mị pakịrị anga mẹ ḍukoarị Ja atomi wẹrịtẹ Jizọsị minini tẹ ḅo ò ḍukamẹnjịapụ sọ ḅara, anie osi-apụ ori na tụḅụrụ tẹ ó minini ḍụkụ-a sakị. Ḅẹrẹ-sịḅị oyi tẹrẹị finji (13) ḅụ ọkị mu tẹrẹị fa si (17) la nangwọ ḅara kẹ kẹẹ koroma wararị Jizọsị na ò ḍukamẹnjịapụ ma na ogboku sime gbọrụ ḅụ sime ini ò kun ḍin mẹ ḅụ, na ḅụụ-tẹlẹma na ḅiokpọma na ẹkwẹn ma na tẹ ọ̀ kọn ịn pịrị aị ma, ene-ḅaa kụma ini ọ̀ kẹ ẹngbẹsẹ-sịn ḅụ ḅakụ ḅẹ ḅoḅiri-so mẹ ḅụ. Gbaịn aḅẹrẹ-sịḅị ma in Jizọsị kun tẹ ọ̀ kọn ye na, ini ọ̀ kẹ ẹngbẹsẹ-sịn ḅụ ḅakụ ye na fị-ḅụ-saakị na, ọ̀ ḅụụ-pakama ò ḍukamẹnjịapụ ḍie asakị ma na, ọ̀ fị-ḅụ-saakị tẹso ḍukoarị.
Sẹfị ḅụ in kun ẹrẹḅọ ma gboloma ịlụkụ mẹ (18.1-11) ini anị sụa ḅelema wararị tọnwa elemu tarị aḍiri ḅio na tarị-tarị pịkị ja asịẹ ḅẹ aḅịḅị ḅụ suu aḍiri na ḅio anị ofori ẹrẹsị, anịsakị ja apụ anị kẹ kịrị-kịrị ja anga ḅụ koromarị.
Jọnị ḍiri mẹ ḅio ịn Kịrayịsị ḅụ ḅọrọ ḅoarị sime gbamaso ḍumo mẹ ḅẹrẹ mẹ ḍuko kụrọmarị, anie mị ḍumo sakị ḅụ saakịarị ye mẹ, tẹ ḅo ini tẹ ḅụụ kẹ Jizọsị anie etela mẹ, karakara mẹ, pịkị ḍumo mẹ nwẹn ḅẹẹ tolumaye mẹ pịrịarị apụ ma pịrịarị ye mẹ. Jọnị ḍiri mẹ ḅio ḅụụ ḅụ koro lamarị ye anie Jọnị tọnma ḅara kẹ ene-ḅaaene-ḅaaene ḅẹ ḍumo ḅụ wa kẹ ye mịẹarị aị kẹ tẹmẹ ḅụ ḅẹ karakara aị kẹ kịnị ḍiearị ḅara mẹ, anie minji, fịturu, bele, anana-ḍikiḍikiḅọ ḅe na ori anana ma na, pịkị kụrọ sịn girepu na anị ḅẹ mgbọlụ na.
Ḍiri Mẹ Ḅio Simearị-aị
Suku-saakị ẹkwẹn 1.1-18
Minji-sara Jọnị na tarị Jizọsị ḍukamẹnjịapụ na 1.19-51
Jizọsị ama nimi ḅara kẹ kọrị kọrịnama 2.1—12.50
Kunoma ene ma Jeruselemu ḅio na anị kpeki ayọ na ḅụ 13.1—19.42
Fị-ḅụ-saakị mẹ na KỊNỊNYANAḄỌ ḅe ḅụụ-pakama asakị ma na 20.1-31
Kunoma ẹkwẹn: jen ḅụụ-pakama Galili ḅụ 21.1-25
Currently Selected:
Jọnị Suku-saakị Ẹkwẹn: KBTP
Highlight
Share
Copy
Want to have your highlights saved across all your devices? Sign up or sign in
(C) The Bible Society of Nigeria