Jọnị 21
21
Jizọsị Ọ̀ Ḅụụ Pakama Ò Ḍukamẹnjị Sọnọma Apụ Ḍiem
1Miemẹ ḅọrọ tẹso, Jizọsị pịkị jen kẹ amịna ḅụụ pakama ò ḍukamẹnjịapụ ma ḍiem Tayịberiyasị tọrụ ḅụ. Mie anị paka ḅara. 2Sayịmọnị Pita na, Tọmọsị (ịn kẹ Maa apụ awọmẹ sịn ḅọ ḅe) na, Natanịyẹlị (Galili ḅẹ Kena ḅụ sime tẹ ḅo ḅọ ḅe) na, Zẹbidi owiapụ-awọmẹ ma na, ja Jizọsị ḍukamẹnjị ja maa apụ na, gbọrụ anga simearị ogbo, 3#Luk 5.5Sayịmọnị Pita nwẹnị osi apụ ma ḅẹẹ, “Àrị ịgbọ muarị.”
Ịn nwẹnị ḍuko ọ̀ pịrị, “Wa ị́ na mu ḅa.” Mie ḅụ ịn nwẹnị arụ ḅụkụlọ tẹ mu (ḍin ye mie in mu ye), kụma bebe ḍin mẹ inji gbọrụ mgbọ sọ ịn kun-a. 4Ḅo ịrụa puu paka-ḅo, ḅo sakị la tẹso, Jizọsị nwẹnị pọkụ-ḅọkọ sịẹsime, kụma ò ḍukamẹnjịapụ ma lekiri-a Jizọsị ḅara. 5Anịtẹso ọ̀ nwẹnị ịn gbela, “Asawọ amẹẹ, ó kuntẹ gbọrụ inji sọ amụ ofori?” Ịn nwẹnị pakịrị, “Gberie-sọ ofori.”
6 #
Luk 5.6
Ọ̀ nwẹnị ịn ḅẹẹ, “Ọmịnị ịgbọ mẹ kẹ arụ mẹ ḅẹ ama-ḅara anga sara-a, ọmịnị inji kun ḅa.” Mie ḅụ ịn nwẹnị ịgbọ mẹ sara pakama, tẹ ḅarị inetẹ anị fọnọ ọkị-a, ịn tọnwa inji kun tẹ ẹrẹsị.
7Ò ḍukamẹnjị tẹ Jizọsị ḅẹlẹma ḅọ ḅe nwẹnị Pita ḅẹẹ, “KỊNỊNYANAḄỌ ḅe orii!” Pita ḅo naa tẹ mịnẹ KỊNỊNYANAḄỌ ḅe ḅẹ sakị, ọ̀ paụ wararị gotẹ, ori ori ọgọnọ ḅẹ kapa ọkị ịnwaịn tẹ ḍosi minji korom. 8Jizọsị ḍukamẹnjị osi apụ ma nwẹnị arụ mẹ kẹ ḅo kiri ḅụ sọma, ịn paa inji sọ ḅintẹ ịgbọ mẹ nụnụarị. Arụ mẹ sime anga mẹ kiri ḅụ ḅele ḅaka-a, kuḅu amesi oyi finji pembe ye anie anị kẹ kiri mẹ ḅụ ḅele ye. 9In koro kiri sịẹ sakị ini ẹrị ye ku-ku-kuma kọrịarị anyịmgbọ fịnị, tẹ anị ọgọnọ ini inji fọịarị; tẹ fịturu sọ anịanga simem. 10Anịtẹso Jizọsị nwẹnị ịn ḅẹẹ, “Mịọkụ ó kun ḅo inji mẹ ḅụ ọ́ jaị kẹ ḅoo.”
11Sayịmọnị Pita nwẹnị arụ mẹ ḅụkụlọ tẹ inji ḅin wararị ịgbọ mẹ fọnọ kiri ḅo, arịmgba inji sọnọma si oyi finji na inji tẹra amgbọ na; inji ma ḅaka la ḅara mamgba sọ ịgbọ mẹ kan-a. 12Jizọsị nwẹnị ịn ḅẹẹ, “Ó ḅo ye fịị.” Ò ḍukamẹnjịapụ ma ḅụ gbọrụḅọ-sọ ḅiokpọ tẹ ò gbela-a, “Ị́yẹrị tụḅọ?” in nimim KỊNỊNYANAḄỌ ḅe ori ẹrẹsị. 13Mie ḅụ Jizọsị nwẹnị saḅa mu fịturu mẹ saakị ọkị tẹ kẹ ịn pịrị; anie ọ̀ pịkị kẹ inji mẹ mịẹ ḅara.
14Miemẹ anie tẹra sakị karama sakị tẹ Jizọsị amịna ḅụụ pakama ò ḍukamẹnjịapụ ma pịrị tẹ ye, ọ̀ fị-ḅụ-saakị tẹso.
Jizọsị Pita Ọ̀ Ḅẹlẹma Mọ Kẹ Ò Gbelam
15In ye mẹ fị fama tẹso, Jizọsị nwẹnị Sayịmọnị Pita gbela, “Sayịmọnị, Jọnị tụḅọ, ị́ ị̀ ḅẹlẹma mịna osi apụ ma nẹngị?”
Ó nwẹnị pakịrị, “Inn, KỊNỊNYANAḄỌ, í nimim àrị ị́ ḅẹlẹmarị.”
Jizọsị nwẹnị ọ̀ ḅẹẹ, “Tọrụ kẹ ị̀ anana awọmẹ ma ḅụụ wẹrịị.” 16Jizọsị nwẹnị maa asakị karama ye kẹ ò gbela, “Sayịmọnị, Jọnị tụḅọ ị́ ị̀ ḅẹlẹmarị, ọkọ-a?”
Ọ̀ nwẹnị pakịrị, “Inn, KỊNỊNYANAḄỌ, í nimim àrị ị́ ḅẹlẹmarị.” Jizọsị nwẹnị ọ̀ ḅẹẹ, “Tọrụ kẹ ị̀ anana ma ḅụụ wẹrịị.” 17Jizọsị tẹra sakị karama ye kẹ ḅẹẹm, “Sayịmọnị, Jọnị tụḅọ ị́ ị̀ ḅẹlẹmarị, ọkọ-a?”
Pita nwẹnị kururu. Jizọsị tẹra asakị karama ye kẹ ó gbela ye ẹrẹsị, “Ị́ ị̀ ḅẹlẹmarị, ọkọ-a?” Mie ḅụ ori ọ̀ ḅẹẹm, “KỊNỊNYANAḄỌ, í nimi kọnma ye ofori, í nimi wararị mịnẹ àrị ị́ ḅẹlẹmarị.”
Jizọsị nwẹnị ọ̀ ḅẹẹ, “Tọrụ kẹ ị̀ anana ma ḅụụ wẹrịị. 18À karakara mẹ ḍuko ị́ pịrịarị, ị́ asambịrịma sakị ḅarana ị́ ḅụụ tẹlẹma tẹ í ḅiotọn anga, tọn anga mu mum, kụma ị́ ḅo omongi sakị, ị́ ị́ aḅara sụn-pakama tẹ jụmọ ị́ fịna tẹ ị́ kẹ í ḅii-a anga mu ḅa.” 19(Jizọsị miemẹ ḍukoarị anie ọ̀ ḅara kẹ Pita kọn tẹ boma kẹ Tamụnọ pịrị ḅẹ fịị ḅara tọkịmarị.) Anịtẹso Jizọsị nwẹnị ọ̀ ḅẹẹ, “Ì ḍuka ḅoo.”
Jizọsị Na Osi Ò Ḍukamẹnjịḅọ Ḅe Na
20 #
Jọn 13.25
Pita tọrụ pịkị ori ọḅụ ḍiki ḅarị sakị ori anị Jizọsị ḍukamẹnjị tẹ ọ̀ pịkị ḅẹlẹma ḅọ ḅe ẹrị tẹ. Anị ḅọ ḅe anie kunoma fịye mẹ sakị ḅụ Jizọsị sịrẹrẹ tẹ ò gbela ḅọ ḅe, “KỊNỊNYANAḄỌ tụḅọ ḅọrọ ị́ kẹ tomina ḅara-ḅio dẹrịma ḅẹ ḍọkịarị?” 21Pita ori ẹrị sakị ò Jizọsị gbelam, “KỊNỊNYANAḄỌ, anịsakị ḅị ḅọ ḅe ḅụụ paka ḅẹ ye ḅọrọ tiye?”
22Jizọsị nwẹnị ọ̀ pakịrị, “À nwẹnị ḅii mịnẹ ó ḍumo sime nwenii à ḅo sakị la ḅẹẹ kụma, ị́ kẹ mịẹ ḅẹ ye tiye? Ì ḍuka ḅoo!”
23Mie ḅụ mị ẹkwẹn mẹ gboloma ye Jizọsị ḍukamẹnjịapụ ma ḅeri la famam, mịnẹ anị Jizọsị ḍukamẹnjịḅọ ḅe fịị ḅịa. Kụma Jizọsị ọ̀ fịị ḅịa ye ḍuko-a. Ọ̀ ḅẹẹm, “À nwẹnị ḅii mịnẹ ò ḍumo sime nwenii à ḅo sakị la ḅẹẹ kụma, ị́ kẹ mịẹ ḅẹ ye tiye?”
24Ori anie Jizọsị ḍukamẹnjịḅọ ḅe tẹ ma aị ma gboloma ye kẹ ẹkwẹn tẹ pịkị arị kẹ ḍiri kẹẹ koroma ḅọ ḅe; tẹ wa nimim mịnẹ ò ḍuko ye karakaraye.
Jizọsị Tọnwa Ja Ḅụụ-buama-aị Mịẹm
25Tọnwa ja ḅụụ-buama-aị sọ Jizọsị nwẹn mịẹm. Ịn nwẹnị arịmgba, gberie-gberie kẹ ḍiri ḅio kẹẹ koroma kụma, à sịn-arị bebe tomikiri mẹ sọ inetẹ arị dogi ḅịa.
Currently Selected:
Jọnị 21: KBTP
Highlight
Share
Copy
Want to have your highlights saved across all your devices? Sign up or sign in
(C) The Bible Society of Nigeria
