Suku-saakị 50

1Anịtẹso Josẹfụ nwẹnị ḅụụ sịẹma ọ̀ ḍa ọgọnọ gbin tẹ tẹmẹ-la ḅara kẹ owu-owu tẹ ọ̀ tọrụkuḅu nọnjị. 2Tẹ Josẹfụ tọn ori afịrịmẹnjịapụ ḅịrịapụ ma pịrịm, ini ọ̀ ḍa oju-akpakpa mẹ ḅụrụ ḅịa ḅara kẹ anị tẹlẹma-a. Anie ḅụ ḅịrịapụ ma Izirẹlị oju-akpakpa mẹ tẹlẹmam. 3Ḍin amesi anị tẹlẹma kpaịnma nwẹn ọkịm, gbala anị tẹlẹma tẹ anị kpaịn mẹ ye ḅụ ḅẹ tọnwa aị nwẹn ḅiim ẹrẹsị. Tẹ Ijiputi-ḅẹ-apụ ma ḍin tesi oyi finji (70) kẹ tẹmẹ-la ḅara kẹ ori owum.

4Ịn kẹ ò ḍuu ene ma ḅọrọ tẹso, Josẹfụ ẹkwẹn Fero warị-kpo mẹ pịrịm, tẹ ḅẹẹm, “Ọmịna atọrụḅio ḅụ à nwẹnị mịọkụ ḅẹlẹma ḍọkị-ẹrị-ẹrị, arị ọ́ tẹkẹm, ọmịnị ẹkwẹn Fero ḅeri ḅio suu ị̀ pịrịị, tẹ ḅẹẹm, 5#Suk 47.29-31ị̀ ḍa ị̀ mịẹtẹ à ye karị ḅara kẹ mininim, tẹ ḅẹẹm, ‘À fịị ḅẹ-yearị. Ì ḍuḅu tẹ Kenanị ama mẹ ḅụ à pẹlẹ pakama ị̀ ḅụụ pịrị wararị ḍuḅu mẹ ḅio mie ị́ ị̀ ḍiḅi ḅarị ye.’ Anịẹrẹsị, yee à mịọkụ mu ị̀ ḍa ḅe ḍiḅi, arị ị́ tẹkẹm anịtẹrẹmẹ à pịkịma-ḅo ḅa.”

6Fero nwẹnị pakịrị, “Ori ị́ mịẹtẹ í ye karị ḅara kẹ minini ḅara ḅụ muu, tẹ ị́ ḍa ḍiḅii.”

7Mie ḅụ Josẹfụ ọ̀ ḍa ḍiḅi ḅẹ mum, tẹ Fero afịrịmẹnjịapụ mamgba na, ọ̀ warị-kpo ḅẹ omongiapụ mamgba na, Ijiputi ama mẹ ḅẹ omongiapụ mamgba na, 8Josẹfụ warị-kpo mẹ na, ori owiapụ-amịnapụ ma na, ọ̀ ḍa warị-kpo mẹ na ọ̀ ḅụụ sọ tẹ mum; ịna awọmẹ na, ịna anana na oḅori na ogbo-ogbo ma na, ịna opu anama ogbo-ogbo ma na kịngẹ mie Gosẹnị ama mẹ ḅụ kirikọn yee. 9Kirimẹnjị-arụ na, asụ-dọkụapụ na sọ ọ̀ ḅụụ sọ tẹ mum; ori na mu inweni-ogbo mẹ gburo-gburo lamam.

10Ịn ḅo Etadi mgbọlị-afịaị sẹlẹ kiri mẹ tẹ Jodanị ọgọnọ-jụ simearị ye mẹ la tẹso, ịn kpọma oloku-oloku owu, tẹ kururu ḅara kẹ gburo-gburo owu kọnm, tẹ Josẹfụ sọnọma aḍin kẹ ḍụẹịn ḍuu amịẹaị mịẹ ọ̀ ḍa pịrịm. 11Ama mẹ ḅio angarị apụ ma, Kenanị ḅẹ apụ ma, Etadi mgbọlị-afịaị sẹlẹ kiri ḅụ ḍụẹịn ḍuu ḅara mẹ ẹrị tẹso, in nwẹnị ḅẹẹ, “Miemẹ anie Ijiputi-ḅẹ-apụ ma ḅioḅu ḍụẹịn ḍuu ḅara.” Anịẹrẹsị in ye-yọ mẹ sịnm Ebẹlị-mizirehimụ; anị Jodanị mẹ ọgọnọ-jụ ḅụ emi. 12Mị-ḅara mie ori owiapụ-awọmẹ ma mịẹ ọ̀ pịrị ḅara, ọ̀ tọn ịn pịrị ḅara ḅụ; 13#Fịr 7.16kẹ gotẹ ọkọ ḅẹẹarị, ori owiapụ-awọmẹ ma ò dogi so. Kenanị ama mẹ mum, tẹ ọ̀ kẹ Makịpẹla piri mẹ ḅụ ḅẹ fukuru mẹ ḅio ḍiḅim, Mamụrẹ ḅụ ịrụa-saakịarị-anga mẹ ḅụ, aniemẹ tẹ Ebira-amụ nyana tẹ kẹ ḍụẹịn ḍiḅi ḅẹ ẹrẹsị Ẹfụrọnị Itayịti pụmbụ ḅẹ ḅọ ḅe ḅara ḅụ kẹ piri mẹ na sụa fẹẹ ye mẹ. 14Josẹfụ ọ̀ ḍa ḅe ḍiḅi fama tẹso, ori ori owiapụ-amịnapụ ma na, inweni-mgba tẹ ori na ọ̀ ḍa ḍiḅi ḅẹ mu apụ ma na pịkịma Ijiputi mum.

Josẹfụ Siin Ori Owiapụ-Amịnapụ Ma Ḅiokpọmam

15Josẹfụ owiapụ-amịnapụ ma ịna ḍaḅọ fịị tẹ mẹ ẹrị tẹso, ịn nwẹnị ḅẹẹ, “Anị inetẹ mịẹ ḅa mịnẹ Josẹfụ wa ḍiki-ḅioḅu ḅa, tẹ si tẹ wa kẹ ọ̀ mịẹ aị mamgba kẹ pịkị wa gbẹẹ ḅa.” 16Mie ḅụ ịn nwẹnị oku kẹ Josẹfụ fịrịma, tẹ ḅẹẹm, “Ị́ ḍa miemẹ tọn tẹrẹmẹ ọ̀ fịịm, 17‘Ó Josẹfụ ḅẹẹ, àrị ị́ tẹkẹm ị́ owiapụ-amịnapụ mịẹ-irima mẹ na, ịna si mẹ na wẹrịsoo, gbala ịn siye kẹ ị́ mịẹm ẹrẹsị.’ Anịsakị mịọkụ wa ị́ tẹkẹm, ị́ aḍapụ ma Tamụnọ ḅe afịrịmẹnjịapụ ma mịẹ-irima mẹ wẹrịsoo.” Ịn ḍuko ọ̀ pịrị tẹso, Josẹfụ nwẹnị tẹmẹ-la ḅara kẹ owu.

18Ori owiapụ-amịnapụ ma sọ anịtẹrẹmẹ ḅom, tẹ ọ̀ tọrọkọ ḅịkị-koro, tẹ ḅẹẹm, “Ḍikii wamịnị anie í omoniapụ.”

19Kụma Josẹfụ nwẹnị ịn ḅẹẹ, “Ọ́ ḅalafa ma, kẹ gotẹ ọkọ ḅẹẹarị, à ḅọrọ Tamụnọ kiri ḅụ emi? 20Ọmịnị kụma, ó siye tọn ị̀ pịrịm, kụma Tamụnọ anị kẹ iḅiye sọmam, mịẹtẹ anị ḍumo wararị tọnwa atomi ḍumoma ḅẹ ḅara, ịn wẹrịtẹ mịmgba ḅụ sime-ḅara. 21Anie ḅụ ọ́ ḅalafa ma, arị ọmịnị na, ọmịna ḍọkọḍọkọ-awọmẹ na ḍikiḍiki ḅa.” Ọ̀ mị-ḅara kẹ ịn ḅiokpọma tẹ ịn dedemam.

Josẹfụ Fịịm Tẹ In Ori Oju Amanam

22Mị-ḅara ḅụ Josẹfụ na ọ̀ ḍa warị-kpo mẹ na Ijiputi ḅụ angam; tẹ Josẹfụ kụra sọnọa si oyi finji (110) kẹ ḍumo-simem. 23Josẹfụ ḍumo mu Iferemu awọmẹ ḅụ tẹrẹị karama ḅụọ (anie taa na, ile na, ọsịkịsịkị na) ẹrịm. Manasẹ owiḅọtụḅọ Mekiya awọmẹ sọ Josẹfụ in ẹrịm. 24Josẹfụ nwẹnị ori amịnapụ ma ḅẹẹ, “À fịị ḅẹ-yearị, kụma Tamụnọ ḅo ḅarasụa ọ́ pịrị ḅa, tẹ mị ama mẹ ḅio ọ́ pakama ama mẹ tẹ ò ye karị ḅara kẹ minini Ebira-amụ na, Ayịzịkị na, Jekọbụ na pịrị ama mẹ mu ḅa.” 25#Pks 13.19; Jọs 24.32; Hib 11.22Anịtẹso Josẹfụ Izirẹlịapụ ma na ọḅọkụ fịm, tẹ ḅẹẹm, Tamụnọ ḅo ḅarasụa ọ́ pịrị ḅa, anịsakị ọ́ mịanga ḅụ ị̀ mgbe ma dogi so ḅa. 26Mie ḅụ Josẹfụ fịịm, kụra sọnọa si oyi finji ọ̀ sịḅị ḅọrọ tẹso, tẹ ini ori oju-akpakpa mẹ ḅụrụ ḅịa ḅara kẹ anị tẹlẹma kpaịnma tẹ kẹ Ijiputi ḅụ ḍụẹịn igbe ḅio sụa wẹrịm.

Currently Selected:

Suku-saakị 50: KBTP

Highlight

Copy