Suku-saakị 31

Jekọbụ Lebanị Ḅụ Ḍumo-mangị Kọnm

1Mị sakị mẹ Jekọbụ naa tẹ mịnẹ Lebanị owiapụ-awọmẹ ḍukoarị, “Jekọbụ sime wamịna ḍaḅọ pịrị aị mamgba ọkị fama tẹ; anịsakị wamịna ḍaḅọ nyana aị ḅụ mie ori ọ̀ nyana ngọ mamgba nyana ye.” 2Jekọbụ nwẹnị ẹrị mịnẹ Lebanị ḅarị tarị ori ọ̀ kẹ ye-sịn tẹ ọ̀ ḅẹlẹma ḅara kẹ ọ̀ ḅẹlẹma-a. 3Anịtẹso KỊNỊNYANAḄỌ ḅe nwẹnị Jekọbụ ḅẹẹ, “Pịkịma-so ị́ aḍapụ ma ama mẹ na, ị́ amịnapụ na ḍọkụma-muu, anịsakị àrị ị́ na sime ḅa.”

4Mie ḅụ Jekọbụ fịrịma Resẹlị na, Liya na sịn ò piri mẹ ḅio anana ogbo mẹ na sime-sime anga ḅo, 5tẹ ịn ḅẹẹm, “Àrị ẹrịm mịnẹ ọmịna ḍaḅọ ḅarị tarị ori ị̀ kẹ ye-sịn tẹ ị̀ ḅẹlẹma ḅara kẹ ị̀ ḅẹlẹma-a. Kụma ị̀ aḍapụ ma Tamụnọ ḅe sakị mẹmgba ị̀ na emi. 6Ó nimi wararị mịnẹ àrị ị̀ ịnyọ mẹmgba kẹ fịrịmẹnjị ọmịna ḍaḅọ pịrịm; 7kụma anịsọ ọmịna ḍaḅọ ị̀ inoma tẹ oyi asakị kẹ sime ị̀ pịrị gbẹẹ-ye ḍima tẹ, kụma Tamụnọ minini ọ̀ pịrị tẹ ò ye kẹ ị̀ lama-a. 8Ọ̀ nwẹnị ḅẹẹm, ‘Gbọọn-gbọntẹ aị ị́ gbẹẹ-ye sọ ḅa ḅẹḅẹ,’ anị sakị mẹ anana ogbo mẹmgba gbọọn-gbọntẹ aị iyim; ọ̀ nwẹnị pịkị ḅẹẹm, ‘ḅuruma-ḅala ḅọrọtẹ aị ị́ gbẹẹ-ye sọ ḅa ḅẹḅẹ,’ anịsakị mẹ anana ogbo mẹmgba pịkị ḅuruma-ḅala ḅọrọtẹ aị iyim. 9Mị-ḅara ḅụ Tamụnọ ọmịna ḍaḅọ ḅara ḅụ opu anama ma ọkị tẹ arị kẹ ị̀ pịrị tẹ. 10Owi anama ịyọrọ ma kpọlị-kpọlị sakị mẹ ḅụ, à ḍawọ tẹ ị̀ tọrụ saakị ḍiki tẹ ẹrịm mịnẹ ekpe oḅori ma tẹ ịyọrọ ma kpọlịarị aị ma ḅuruma-ḅala ḅọrọ ḅọrọtẹ oju na, gbọọn-gbọntẹ oju na, gẹnịma-gẹnịmatẹ oju na sụa wararị. 11Anịtẹso Tamụnọ enjẹlị nwẹnị ḍawọ-jụ ḅụ ẹkwẹn ị̀ pịrị tẹ ḅẹẹ, ‘Jekọbụ,’ À nwẹnị pakịrị, ‘Mie yẹrịị mịanga!’ 12Tẹ ọ̀ nwẹnị ḅẹẹ, ‘Ị́ tọrụ saakị tẹ ẹrịị, ekpe-oḅori ma tẹ ịyọrọ ma kpọlịarị aị mamgba oju ḅuruma-ḅala ḅọrọ ḅọrọtẹ aị na, gbọọn-gbọntẹ aị na, gẹnịma-gẹnịmatẹ aị famam; à gbala Lebanị kẹ ị́ mịẹarị aị mamgba ẹrị fama tẹ ẹrẹsị. 13#Suk 28.18-22Yẹrị anie Bẹtẹlị ḅẹ Tamụnọ ḅee, anị yọ mẹ tẹ í ḅeriye saakị sịẹma tẹ pulo kẹ anị sịḅị sara, tẹ ịlọ minini pịrị ḅọ ḅee. Mịọkụ saakịị, mị ama mẹ ḅụ soo, tẹ pịkịma ị́ iyi ama mẹ muu.’ ”

14Anịtẹso Resẹlị na, Liya na nwẹnị ọ̀ pakịrị, “Wamịna ḍaḅọ warị-ḅio ḍiekiri, anịanịa ḍuu tẹ kọn tẹ wa ọkị tẹ fị ḅẹ ye emi? 15Amụ wa ọ̀ ḅụụ ḅụ igoniapụ so-a? Kẹ gotẹ ọkọ ḅẹẹarị, ọ̀ wa dẹrị tẹ, tẹ Anịngẹ-kụraḅio wamịna sịḅị ḅẹ igbigi fịarị. 16Wamịna ḍaḅọ nyana tẹ Tamụnọ ọ̀ ḅara ọkị aị mamgba sime wamịnị na, wamịna awọmẹ na pịrịm anịẹrẹsị mịọkụ Tamụnọ ị́ ḅẹẹm mịẹ nwẹn ḅẹẹ ye goyegoye mịẹ.”

17Mie ḅụ Jekọbụ saakịm, tẹ ori owiapụ-awọmẹ na, ori ereme na kẹ ike-sụa-anama ọgọnọ gbanam, 18tẹ ọ̀ nwẹnị ọ̀ nyanatẹ opu anama mamgba na, nama tẹ sọye ḅara ḅụ ọ̀ nyana ḍumo wararị aị mamgba na, ọ̀ ḅara ḅụ simearị opu anama tẹ Padani-aramụ ḅụ ọ̀ nyana ngọ mamgba na kẹ tarị ọ̀ ḍa Ayịzịkị fịrịma tẹ arị so Kenanị ama mẹ mum. 19Lebanị so ori anana oju ḅẹ isuke kịrị ḅẹ mum, tẹ Resẹlị nwẹnị ori ofori ogbo á ḍa warị-kpo ḅẹ atamụnọ furu ọkị. 20Jekọbụ oḅori kẹ Lebanị Aremịya ḅẹ ḅọ ḅe siinm, mịnẹ ori ọ̀ mangị-so ḅẹ ye mẹ ḍuko ọ̀ pịrị-a. 21Ọ̀ nyana aị mamgba ọ̀ kẹ mangị-so famam, tẹ saakị mu Yuferetisi Tọrụ mẹ saḅam, tẹ tọrụ kẹ Gilẹdị, tụndụ ọgọnọ ḅẹ opu sịẹ mẹ da-mum.

Lebanị Jekọbụ Ḍukam

22Jekọbụ mangị-so tẹ tẹra aḍin karama ene ḅụ ini anị ḍuko Lebanị pịrị tẹso, 23ọ̀ nwẹnị ori amịnapụ owiapụ ọkị ọ̀ ḅụụ sụa tẹ sọnọma aḍin kẹ ò ḍuka tẹ ò pono mu Gilẹdị tụndụ ọgọnọ ḅẹ opu sịẹ mẹ ḅio sọ.

24Kụma ḍin ḅụ Tamụnọ nwẹnị ḍawọ-jụ ḅụ Lebanị Aremịya ḅẹ ḅọ ḅe dama-ḅo tẹ ọ̀ ḅẹẹ, “Ị́ ḅụụ ẹbị mịnẹ ị́ gbọrụ ẹkwẹn-ḅịḅị sọ kọn Jekọbụ pịrị-a, ḅọrọ siye, anịanịa iḅiye sọ.”

25Lebanị nwẹnị ḅo Jekọbụ la. Mị sakị mẹ, Jekọbụ tụndụ ọgọnọ ḅẹ opu sịẹ mẹ ḅụ ori akpụrụ-warị pike sịẹma tẹ, tẹ Lebanị na, ọ̀ ḅụụ Sọ owiapụ-amịnapụ ma na pịkị Gilẹdị tụndụ ọgọnọ ḅẹ opu sịẹ mẹ ḅụ akpụrụ-warị pike sịẹma tẹ kobiri simem.

26Lebanị nwẹnị Jekọbụ ḅẹẹ, “Ị́ nwẹn mịẹ ye mẹ ḅọrọ tiye, mịnẹ ị́ ì inoma tẹ okologie kẹ kun-soapụ dogi so ḅara kẹ ị̀ eremịna-awọmẹ ma dogi so ye mẹ? 27Í tiegotẹ ḅọị ḅara kẹ mangị-so, tẹ oḅori kẹ ị̀ sịn tẹ ḍuko ị̀ pịrị-a, mimgbe tọrụ-ḅẹlẹ ḅụ nume-su na, akwa farị na, ofuro-ofuro-aị ofuro na ḅụ mie à kọkọ ị́ ḅọrọma-so tẹ ye? 28Anịsakị tiye mịẹtẹ ị́ ḍụkụ tẹ àrị ì owiapụ-awọmẹ ma na, ị̀ eremịna-awọmẹ ma na fịnama tẹ ḅaaḅaa kẹ ịn ḅẹẹ-a? Mịọkụ í oḅori ḅara kẹ ye mie tẹ. 29À kụrọ nyana wararị kẹ ye kẹ ị́ lama kụma ị́ ḍa ḅe Tamụnọ ḅe ḅịẹịn ḍin ẹkwẹn ị̀ pịrịm, tẹ ḅẹẹm, ‘Ị́ ḅụụ ẹbị, mịnẹ ị́ si ẹkwẹn, anịanịa iḅi ẹkwẹn kọn Jekọbụ pịrị-a.’ 30Anịsakị mịọkụ í so tẹ, gbala ị́ kpọma so ị́ ḍa ama mu ḅe ḅii lamam ẹrẹsị, kụma í tiegotẹ ị̀ atamụnọ furu ọkị?”

31Jekọbụ nwẹnị Lebanị pakịrị, “À gbala ḅalafaam ẹrẹsị, kẹ gotẹ ọkọ ḅẹẹarị, à ḅiotọnm mịnẹ í ḅo kụrọ ḅara kẹ ị̀ ḅara í eremịna-awọmẹ ma pụkọ-ọkị ḅa. 32Ḅẹḅọ-ḅẹḅọ tẹ ị́ ḅara ḅụ ị́ atamụnọ ma ḍọkị-ẹrị ḅọ, ẹrị ḅọ mḅọ ḅarị ḍumo ḅịa. Wamịna amịnapụ owiapụ ma tọrọkọ, ḅara kẹ à nyana aị ma ḅụ í nye tẹ àrị ọkị ye tọkịma tẹ anị ọkịị.” Mịọkụ Jekọbụ nimi-a mịnẹ Resẹlị arị furu ọkị tẹ.

33Mie ḅụ Lebanị mẹnjị Jekọbụ akpụrụ-warị ḅio na, Liya akpụrụ-warị ḅio na, maa fịrịmẹnjị-eremịna-awọmẹ ma akpụrụ-warị na ḅio sọ-mum, kụma ori arị ḍọkị-ẹrịa, tẹ ò Liya akpụrụ-warị ḅio mẹnjị paka mu Resẹlị akpụrụ-warị ḅio sọm. 34Mị sakị mẹ Resẹlị mie warị-kpo mẹ atamụnọ ma ọkị tẹ kẹ árị ike-sụa-nama ḅe dẹẹ tẹ lẹgị ye mẹ suku-ḅio suu tẹ arị ọgọnọ lẹgị-sime ye. Lebanị ḅara kẹ akpụrụ-warị anga mẹmgba sọ lama famam, kụma ori arị ḍọkị-ẹrịa. 35Tẹ á nwẹnị á ḍa ḅẹẹ, “Yee ị̀ nyanaḅọ ḅe arị ị́ tọrọkọ inetẹ saakị sịẹ-a ye mẹ ḅẹ ịganị nyana ị̀ pịrị ma, gbala à pile wararị ẹrẹsị.” Mie ḅụ ori akpụrụ-warị mẹ ḅio ḍọkị famam, kụma warị-kpo mẹ atamụnọ ma ori arị ḍọkị-ẹrịa.

36Anịtẹso Jekọbụ nwẹnị ịganị nyana tẹ ịganị Lebanị pịrị; Jekọbụ nwẹnị Lebanị gbela, “À tiye kẹ ị́ ịganịma? À tọ si mịẹ tẹ í ḅio-fụkụfụkụ kẹ ì ḍuka? 37Yẹrị nyana aị mamgba ḅio sọ ị́ sọsọlị ḍọkị ḍiki fama tẹ, ị́ warị-kpo nyana aị mamgba ḅụ ị́ tiye ḍọkị-ẹrị? Anị kẹ í owiapụ-amịnapụ ma na, ì owiapụ-amịnapụ ma na tọrọkọ koromaa, mịẹtẹ ini anị kọn wamịnị maa apụ ma pịrị ḅẹ ḅara. 38Mịna si akụra ma tẹ àrị ị́ na anga sakị mẹ fura amụ ị́ anana na, ị́ ịyọrọ oḅori na ḅụụ so-a, amụ à pịkị ị́ anana ogbo ma ḅẹ gbọrụ ejimina sọ pẹị-a. 39Anie mẹ tẹ piri-ḅio-ḅẹ nama ḅaa ye sọ, arị ọkị-ḅo ị́ pịrị-a, yẹrị anị ḅẹ fa mẹ ọkị kọnm ini eneḅaka furu ye-o, ịn ḍin ḅụ furu ye-o, ị̀ ḅara ḅụ í ḅii tẹ à kẹ gbẹẹm. 40Mị-ḅara mie à simetẹ eneḅaka ḅụ ịrụa ọfịrị mẹ da, tẹ pịkị ḍin ḅụ oḅoku mẹ da ḅara. À kọn ḅẹ mono mẹ nwẹnị ị̀ atọrụngbọ ḅụ mangị-so. 41Mịna si akụra ma à nwẹn kẹ ị́ warị ḅio simem arị ngei akụra fa jei kẹ ị́ maa eremịna-awọmẹ gotẹ fịrị mẹnjị ị́ pịrịm; tẹ sonio akụra kẹ ị́ anana ogbo ma ḅụ kọrịnama kọrịm, anịsọ ị́ oyi asakị kẹ ị̀ gbẹẹ-ye ḍimam. 42Ị̀ aḍapụ sịḅị-tuu pịrị Tamụnọ ḅe, anie Ebira-amụ na Ayịzịkị na sịḅị-tuu pịrị Tamụnọ ḅe ị̀nịna ofori namịna, mimgbe tụkụma ḅara ḅụ mịọkụ ị́ papaa ḅara kẹ ị̀ fịrịma pịkị tẹẹ. Tamụnọ ị̀ tọrụsiẹrị mẹ na, à kọrị kọrịnama mẹ na ẹrị tẹ ḅịẹịn ḍin í ḍiki-ịganịm.”

Jekọbụ Na Lebanị Na Ọḅọkụ Fịm

43Anịtẹso Lebanị nwẹnị Jekọbụ pakịrị tẹ ḅẹẹ, “Eremịna-awọmẹ ma anie ì eremịna-awọmẹ, awọmẹ ma anie ị̀ awọmẹ, anana ogbo-ogbo ma anie ị̀ anana ogbo, anịsakị ḅẹẹye-ḅẹẹye tẹ ị́ mịanga ẹrị aị mamgba ì nye. Kụma mịmgba arị inetẹ tiye kẹ mịna ì eremịna-awọmẹ ma, anịanịa awọmẹ ma tẹ ini iyi tẹ apụ ma mịẹ ḅẹ? 44Mịọkụ ḅoo, yee ị́yẹrị na, yẹrị na ọḅọkụ fị anịsakị yee anị ogbo-sịẹ ye sọ ị́yẹrị na, ị̀ na ogboku.”

45Mie ḅụ Jekọbụ gbọrụ ḍụḅarị ọkị tẹ ḅeriye sịẹma ḅara kẹ anị saakị sịẹmam. 46Tẹ Jekọbụ nwẹnị ori owiapụ-amịnapụ ma ḅẹẹ, “Ọ́ ḍụḅarị tan kobirii,” tẹ ịn ḍụḅarị tan-tan kpolima tụndụ mịẹm, tẹ tụndụ mẹ akaka anị yọ ḅụ ịn sime tẹ fịye fịm. 47Lebanị nwẹnị tụndụ mẹ sịn, Jegasahaduta#31.47 Aramayịkị ḅịḅị ḅụ anị fiearị ye, Ogbo-sịẹ Tụndụ; kụma Jekọbụ anị sịnm, Galidi#31.47 Hiburu ḅịḅị anị fiearị ye, Ogbo-sịẹ tụndụ.. 48Lebanị nwẹnị ḅẹẹ, “Mị tụndụ mẹ anie mịmgba ogbo-sịẹ ị́yẹrị na yẹrị na pịrị yee.” Anịẹrẹsị ori ẹrẹ kẹ anị siinm Galidi. 49Ọ̀ nwẹnị ḅeriye mẹ sịn Mizipa#31.49 Mizipa fiearị ye, Ye Ḍiki Tawa, gbala ori mẹẹ, “KỊNỊNYANAḄỌ ḅe tọrụngbọ ị́yẹrị na yẹrị na ogboku simee, wa jụmọ-jụmọ ḅụụ ḅele wararị sakị ḅụ. 50Ị́ paa si ḅara kẹ ì eremịna-awọmẹ ma na mịẹ, anịanịa ì eremịna-awọmẹ ma sikima ja ereme sime-sime, jen-apụ na wamịnị na mịanga ofori ḅẹsọ, kẹ ḅiokoromaa, Tamụnọ anie ogbo-sịẹḅọọ, ị́yẹrị na yẹrị na ogboku ḅụ.”

51Anịtẹso Lebanị nwẹnị pịkị Jekọbụ ḅẹẹ, “Mị tụndụ mẹ na ḅeriye mẹ na tẹ àrị ị́yẹrị na yẹrị na ogboku sara kpolima tẹ saakị sịẹma ye mẹ na ḍikii. 52Mị tụndụ mẹ anie gbọrụ ogbo-sịẹ ye, anịsakị ḅeriye mẹ anie pịkị gbọrụ ogbo-sịẹ ye, mịnẹ à mị tụndụ mẹ saḅa-ḅọrọ tẹ ị́ ḍọkụma-ḅo ḅịa, anịsakị ị́yẹrị sọ mị tụndụ mẹ na, mị ḅeriye mẹ na saḅa-ḅọrọ tẹ ị̀ ḍọkụma-ḅo ḅịa ye kẹ ị̀ lama gotẹ. 53Ebira-amụ na Nahọ na sịḅị-tuu pịrị Tamụnọ ḅe — pịkị ịna ḍaḅọ sịḅị-tuu pịrị Tamụnọ ḅe — wamịna ogboku ḅẹrẹ mẹ kọọn.” Mie ḅụ Jekọbụ ọ̀ ḍa Ayịzịkị ḍiki-ḅalafa mẹ ḅụ ye karịm, 54tẹ Jekọbụ tụndụ mẹ ọgọnọ ḅụ agba mịẹm, tẹ ori owiapụ-amịnapụ sịnm ịn ḅo fịye fị ḅẹ ḅara, tẹ ịn fịye fị tẹ bebe ḍin mẹ kẹ tụndụ mẹ ọgọnọ simem.

55Ene ḅaa dede-funfun ḅụ Lebanị nwẹnị saakị tẹ ọ̀ taa-awọmẹ ma na, ori eremịna-awọmẹ ma na ḅịḅị nọnjị, tẹ ịn boma; anịtẹrẹmẹ ò so tẹ pịkịma ori ama ḅom.

Currently Selected:

Suku-saakị 31: KBTP

Highlight

Copy