Suku-saakị 30

1Resẹlị ẹrịm mịnẹ arị awọ iyi Jekọbụ pịrị-a tẹso, á nwẹnị afana kẹ arị mbịra ḍọkị tẹ Jekọbụ ḅẹẹ, “Awọ kẹ ị̀ pịrịị, anieofori, à fịị ḅa!”

2Jekọbụ nwẹnị kpọma ịganị Ribeka pịrị, tẹ ọ̀ nwẹnị ḅẹẹ, “Yẹrị ḅọrọ Tamụnọ tẹ ị́ ḅụụ ḅụ furo mẹ ḅẹ mgbọlụ mẹ ọlọ-sịẹma ḅọ ḅe kiri ḅụ emi?”

3Anịtẹso á nwẹnị ḅẹẹ, “Mie ị̀ fịrịmẹnjị-ẹrẹḅọtụḅọ Biliya mịanga; sọ á ḍọkụma-muu, mịẹtẹ arị inetẹ gbọrụ tụḅọ iyi ị̀ pịrị ḅarị ḅara, mịẹtẹ yẹrị sọ á ḅụụ ḅụ ḅọrọ tẹ awọ nyana ḅẹ ḅara.” 4Mie ḅụ á taḅọ ḅara kẹ á fịrịmẹnjị-ẹrẹḅọtụḅọ Biliya kẹ ọ̀ pịrịm; tẹ Jekọbụ sọ á ḍọkụma-mum. 5Biliya nwẹnị sime-kọn tẹ gbọrụ owiḅọtụḅọ iyi Jekọbụ pịrị. 6Anịtẹso Resẹlị nwẹnị ḅẹẹ, “Tamụnọ ị̀ kọn tẹ pịkị ị̀ pọkọ sọ naa tẹ gbọrụ owiḅọtụḅọ kẹ ị̀ pịrị tẹẹ.” Anịẹrẹsị árị ẹrẹ kẹ ọ̀ sịnm Danị#30.6 Danị fiearị ye, Ori Ḅẹrẹ Mẹ Kọnm. 7Resẹlị fịrịmẹnjị-ẹrẹḅọtụḅọ Biliya pịkị sin sime kọn tẹ maaịn karama gbọrụ owiḅọtụḅọ iyi Jekọbụ pịrịm. 8Anịtẹso Resẹlị nwẹnị ḅẹẹ, “Kụrọtẹ opu owu à nwẹn kẹ ị̀ ịyịmbara ma na sọm, tẹ owu ị̀ ḅara iḅi tẹẹ.” Mie ḅụ árị ẹrẹ kẹ ọ̀ sịnm Nafutali#30.8 Nafutali fiearị ye, Owu.

9Liya ẹrịm mịnẹ arị iyi dasịẹma tẹ, tẹso, á nwẹnị á fịrịmẹnjị-ẹrẹḅọtụḅọ Zilipa ọkị tẹ kẹ taḅọ ḅara ḅụ Jekọbụ pịrị. 10Anịtẹso Liya fịrịmẹnjị-ẹrẹḅọtụḅọ Zilipa gbọrụ owiḅọtụḅọ iyi Jekọbụ pịrịm. 11Tẹ Liya nwẹnị ḅẹẹ, “Iḅi fụḅara!” Mie ḅụ árị ẹrẹ kẹ ọ̀ sịnm Gadi#30.11 Gadi fiearị ye, Iḅi Fụḅara. 12Liya fịrịmẹnjị-ẹrẹḅọtụḅọ Zilipa maaịn karama owiḅọtụḅọ iyi Jekọbụ pịrịm. 13Tẹ Liya nwẹnị ḅẹẹ, “Ì ḅioḅẹlẹarị!” Ereme kẹ gbala ị̀ sịn ḅarị ye, Ḅioḅẹlẹ. Mie ḅụ árị ẹrẹ kẹ ọ̀ sịnm Asa#30.13 Asa fiearị ye, Ḅioḅẹlẹ.

14Ini ịn kẹ witi sịn mgbọlị-fịye kịka fịye mẹ pẹlẹarị ene ma ḅụ Rubẹnị mu ịn kẹ manidirekịsị nwẹn-sịn eremịna furo tẹlẹmarị ịnyịnya ḍọkị-ẹrịm piri-ḅio, tẹ anị sin ḅo ò iyingi Liya pịrịm. Anịtẹso Resẹlị nwẹnị Liya ḅẹẹ, “Paa-sisi àrị ị́ tẹkẹm, í owiḅọtụḅọ manidirekịsị mẹ kẹlẹ kẹ ị̀ pịrịị.”

15Kụma Liya nwẹnị á pakịrị, “Ị́ kẹ kala ḅẹrẹ sịn, mịnẹ ị́ ị̀ ḅara ḅụ ì di pụkọ-ọkị tẹ ye mẹ? Ị́ pịkị ì owiḅọtụḅọ manidirekịsị sọ pụkọ-ọkị ḅẹ tẹ?” Resẹlị nwẹnị pakịrị, “Nwẹnị ọkọ ḅẹḅẹ í owiḅọtụḅọ manidirekịsị mẹ gotẹ ori inetẹ ị́ na ḅọlọlọ ḅa mị ḍin.”

16Jekọbụ ḅoḅiri-so ḅụ ḍụọ ḅio sime tẹ ḅo tẹso, liya nwẹnị mẹnjị paka ori na bịama ḅẹ mu, tẹ nwẹnị, ḅẹẹ, “Ị́ sọ ị̀ ḍọkụma-ḅo nyanam, gbala arị ì owiḅọtụḅọ manidirekịsị kẹ ị́ ọkọ tẹ ẹrẹsị.” Anie ḅụ anị ḍin mẹ ori árị na ḅọlọlọm.

17Tamụnọ nwẹnị Liya tẹkẹ naa, tẹ á sime kọn tẹ sọnọ karama owiḅọtụḅọ iyi Jekọbụ pịrịm. 18Liya nwẹnị ḅẹẹ, “Tamụnọ ọkọ ḅụ iḅi fụḅara kẹ ị̀ pịrị tẹẹ, gbala àrị ị̀ fịrịmẹnjị-ẹrẹḅọtụḅọ kẹ ì di pịrịm ẹrẹsị.” Anie ḅụ árị ẹrẹ kẹ ọ̀ sịnm Ịsaka#30.18 Ịsaka fiearị ye, Gbẹẹ Ye. 19Liya pịkị sime kọnm, tẹ á sonio karama owiḅọtụḅọ iyi Jekọbụ pịrịm. 20Anịtẹso Liya nwẹnị ḅẹẹ, “Tamụnọ ḅụụ ḅụ ye la iḅi ḍiepịrịye kẹ ị̀ pịrị tẹ, ì di kụn kẹ ị̀ pịrị ḅa mị sakị, gbala à sonio owiapụ-awọmẹ iyi ọ̀ pịrị tẹ ẹrẹsị.” Anie ḅụ árị ẹrẹ kẹ ọ̀ sịnm Zẹbulọnị#30.20 Zẹbulọnị fiearị ye, Kụn. 21Sakị kẹlẹ ḅọrọ tẹso, á nwẹnị gbọrụ ẹrẹḅọtụḅọ iyi tẹ ẹrẹ kẹ á sịn Dayịna.

22Anịtẹso Tamụnọ Resẹlị kẹ ḅiokoromam, tẹ Tamụnọ á tẹkẹ naa tẹ á furo finjim. 23Á nwẹnị sime kọn, tẹ gbọrụ owiḅọtụḅọ iyi, tẹ ḅẹẹ, “Tamụnọ ị̀ ḅụụ-jịrị mẹ saakị sin tẹẹ.” 24Á nwẹnị ẹrẹ kẹ ọ̀ sịn Josẹfụ#30.24 Josẹfụ fiearị ye, Jen Kẹ Sụa . Á nwẹnị ḅẹẹ, “Yee KỊNỊNYANAḄỌ ḅe jen owiḅọtụḅọ kẹ sụa ị̀ pịrị.”

Jekọbụ Lebanị Na Tuḅo Pẹlẹm

25Resẹlị Josẹfụ iyi tẹso, Jekọbụ nwẹnị Lebanị ḅẹẹ, “Ị̀ ḅẹẹ à so, mịẹtẹ à so ị̀ ama na, ì opu sịẹ na mu ḅarị ḅara. 26Ì ereme na, ị̀ awọmẹ na inima tẹ à gotẹ fịrị mẹnjị ị́ pịrị apụ ma kẹ ị̀ pịrị, tẹ yee à so kẹ gotẹ ọkọ ḅẹẹarị, fịrị tẹ à mẹnjị ị́ pịrị ye la ḅara í nimi wararị.”

27Kụma lebanị nwẹnị ọ̀ ḅẹẹ, “Í minini ị̀ pịrị tẹ arị ọkọ ḅẹẹ ḅa kụma, à ye ḅii tẹ nimim mịnẹ KỊNỊNYANAḄỌ ḅe í gotẹ ì boma tẹ, 28à kẹ ị́ gbẹẹ ḅẹ aị ḍukoo, anịsakị àrị arị kẹ ị́ pịrị ḅa.”

29Jekọbụ nwẹnị ọ̀ ḅẹẹ, “ị́yẹrị ḅioju sọ à fịrịmẹnjị ị́ pịrị la ḅara na, í opu anama ị̀ na mẹnjị ḅara na sọ nimim. 30Kẹ gotẹ ọkọ ḅẹẹarị, tẹrẹmẹ à ḅo laa, boowa anama mie ị́ nyana yee, tẹ arị kama sara tẹ, anịsakị à tọrụ pịkị da tẹ mu anga, mu anga ḅụ KỊNỊNYANAḄỌ ḅe ì bomam. Kụma mịọkụ tọ-sakị yẹrị sọ ḍọkị ḍọkị, ị̀ warị-kpo mẹ pịrị ḅẹ?”

31Lebanị nwẹnị gbela, “À tiye kẹ ị́ pịrị ḅẹ?” Jekọbụ nwẹnị pakịrị, “Í gberie-sọ kẹ ị̀ pịrị ḅịa ị́ nwẹnị miemẹ mịẹ ị̀ pịrị ḅẹ kụma, à pịkị sin ị́ anana ogbo mẹ koko tẹ anị ḍikiḍiki ḅa. 32Yee à mịmgba mẹnjị-mẹnjị ị́ anana ogbo-ogbo ma ogbo-ḅio tolu-tolu-ḅọrọ, tẹ gẹnịma-gẹnịma wararị aị na, gbọọn-gbọn wararị aị na, kurukurutẹ asambịrịma anana awọmẹ na goyegoye sikima, pịkị ọkọ kẹ oḅori ma ogbo-ḅio gbọọn-gbọn wararị aị na, gẹnịma-gẹnịma wararị aị na sikima; ọkọ sime aị ma ị̀ gbẹẹ-ye sọ ḅa. 33Sakị kẹlẹ ḅọrọ tẹ í ḅo ị́ ḅara à nyana gbẹẹ-ye mẹ ḍiki ḅẹ sakị, oḅori ma ogbo-ḅio gẹnịma-a, pịkị gbọọn-gbọn-a, anịsakị asambịrịma anana awọmẹ ma ogbo-ḅio kurukuru-a ye goyegoye, ị̀ ḅara ḅụ ị́ ọkọsime ye ẹrị-ẹrị, kẹ furu ọkị ye kịẹn. Mie ḅụ à furu, furu-a mẹ ḅịḅị pakịrị ị̀ pịrị ḅa.”

34Lebanị nwẹnị pakịrị, “Iḅim! Yee anị ị́ ḅẹẹ ḅara sime.”

35Kụma anị ene mẹ ḅụ, Lebanị ekpe oḅori ma tẹ ḅuruma-ḅala oju ḅụ ḅọrọ, ḅọrọ wararị aị ma na, gbọọn-gbọn wararị aị ma na, pịkị ịyọrọ oḅori mamgba ḅụ gẹnịma-gẹnịmatẹ aị ma na, gbọọn-gbọntẹ aị ma na, pịkị pịna-pịna ye oju ḅụ emi ye goyegoye na, kurukuru wararị asambịrịma anana awọmẹ goyegoye na sikima tẹ kẹ ori owiapụ-awọmẹ pịrị ḍikiḍikim. 36Ọ̀ nwẹnị Jekọbụ ḅụ ḅele ḅẹ ḅara kẹ ala-jụ tẹra aḍin ḅẹ igoni mu, tẹ Jekọbụ Lebanị anana ogbo ma ḅụ kirikọn-aị ma kokom.

37Anịtẹso Jekọbụ nwẹnị ịwọ pọpụla na alịmọnịdị na pileni nwẹn-sịn sịn-aḅara ọkị, tẹ kẹ nwẹnị apara mẹ ja anga pịnị siin, arị nwẹnị pịna-pịna ye gbọọn-gbọn wararị ḅara sime, 38Ọ̀ nwẹnị mịna sịn aḅara ma tẹ ọ̀ pịnị aị ma kẹ anana ogbo-ogbo ma minji ḅuuarị anga ḅụ ịna tọrọkọ koroma ịn minji kẹ sụa ịn pịrị ḅuu-ḅuu ye mẹ ḅụ, ịn ḅo minji ḅuuarị sakị owi-na-ịyọrọ-na kpọlị kpọlịm nwẹn ḅẹẹ sakị. 39Sịn aḅara ma tọrọkọ anana ogbo-ogbo ma sime-sime tẹ iyim anie ḅụ ịn ḅuruma-ḅala oju ḅụ ḅọrọtẹ aị na, gẹnịma-gẹnịmatẹ aị na gbọọn-gbọntẹ aị na iyim. 40Jekọbụ nwẹnị asambịrịma anana awọmẹ ma sikima koroma, tẹ mịẹtẹ anana ogbo-ogbo ma tọrụ kẹ Lebanị anana ogbo ma ḅụ ḅuruma-ḅala ḅọrọ wararị aị ma na, kurukurutẹ aị mamgba na da; tẹ ori ò soku-ḅẹ anana ma sikimam tẹ ịn kẹ Lebanị anana ogbo na koroma gboloma-a. 41Anana ogbo mẹ ḅụ ịnyọ nyana tẹịn aị ma nama minji ḅuuarị anga mẹ ḅụ ịyọrọ kpọlịarị sakị goyegoye Jekọbụ sịn aḅara ma kẹ ini ẹrịarị ḅara koromam ịna tọrọkọ, mịẹtẹ owi ma sịn aḅara ma ogboku ịyọrọ ma kpọlị tẹ iyi ḅarị ḅara, 42kụma anana-ogbo mẹ ḅụ ịnyọ nyana-a aị ma tọrọkọ ori arị kẹ koroma, koroma-a, mie ḅụ ịnyọ nyana-a aị ma anie Lebanị aị, anịsakị ịnyọ nyana osi-aị ma nẹngị aị ma anie Jekọbụ aị. 43Mị-ḅara ḅụ Jekọbụ tọnwa ḅara kẹ ngọ-kọn lama tẹ ḍụḅa ḍụḅatẹ anana ogbo-ogbo na, fịrịmẹnjị-eremịna-awọmẹ na, fịrịmẹnjị-owiapụ na, ike-sụa-anama na, yedogi-anama na nyana saram.

Currently Selected:

Suku-saakị 30: KBTP

Highlight

Copy