Suku-saakị 27
27
Ayịzịkị Jekọbụ Bomam
1Ayịzịkị omongi, tẹ ori atọrụngbọ ḅutuḅutu tẹ ọ̀ ḅarịye ẹrị-a tẹso, ori owiḅọtụḅọ Ịsọ omongiḅọ ḅe sịn, tẹ ò ḅẹẹ, “Ì owiḅọtụḅọ,” tẹ ọ̀ nwẹnị pakịrị, “Mie yẹrịị mịanga.” 2Ọ̀ nwẹnị ọ̀ ḅẹẹ, “Ḍikii àrị omongi tẹ, àrị à fịị ḅẹ ene nimi-a. 3Anịẹrẹsị mịọkụ ị́ kẹ nama ḅaarị í ḍịẹịn-sụaye na, ị́ iboli na ọkị, tẹ paka piri sọ tẹ nama ḅaa ḅo ị̀ pịrịị, 4tẹ kẹ à ḅẹlẹma tẹ fị-fị ḅẹlẹ fịye ḅara sọ, tẹ anị tẹlẹma tẹ dogiḅọ ị̀ pịrịị, mịẹtẹ àrị anị fị tẹ í boma tẹrẹmẹ à fịị ḅẹ ḅara.”
5Mịọkụ Ayịzịkị ẹkwẹn ori owiḅọtụḅọ Ịsọ pịrịarị sakị Ribeka pokiarị. Mie ḅụ Ịsọ piri sọ tẹ nama ḍọkị tẹ anị ḅaa ḅo ḅẹ mu tẹso, 6Ribeka nwẹnị arị owiḅọtụḅọ Jekọbụ ḅẹẹ, “Ị́ ḍa ẹkwẹn í iyimbere Ịsọ pịrịarị sakị à naam, 7‘Nama ḅaa ḅo ị̀ pịrị tẹ kẹ ḅẹlẹ fịye sọ tẹ tẹlẹma ḅo ị̀ pịrịị, mịẹtẹ arị anị fị tẹ KỊNỊNYANAḄỌ ḅe tọrọkọ í boma tẹrẹmẹ à fịị ḅẹ ḅara.’ 8Anịẹrẹsị ì owiḅọtụḅọ mịọkụ ị̀ ẹkwẹn-ḅịḅị poki tẹ à tọn ị́ pịrị ḅara mịẹ. 9Nama ogbo mẹ mu, tẹ ḅẹlẹkị sụatẹ maa oḅori awọmẹ kun-ḅo ị̀ pịrịị, mịẹtẹ arị ịn kẹ ị́ ḍa ḅẹlẹma tẹ fị-fị ḅẹlẹ fịye ḅara sọ tẹ tẹlẹma; 10tẹ ị́ anị dogi-ḅo ị́ ḍa pịrị fị, mịẹtẹ ori í boma tẹrẹmẹ ọ̀ fịị ḅẹ ḅara.”
11Kụma Jekọbụ nwẹnị ò iyingi Ribeka ḅẹẹ, “Ḍikii, ì iyimbere Ịsọ anie mpọrị sụa owiḅọ, anịsakị yẹrị anie minimini oju sụa owiḅọ. 12Ẹbịsịya ị̀ ḍa ḅara kẹ ì oju lama ḍiki ḅa, tẹ à ḅo gbala ò komboarị ḅọ sọ tẹ boma nakara, wori-nume ọkị-ḅo ị̀ ọgọnọ gbana ḅa.”
13Ò iyingi nwẹnị pakịrị tẹ ọ̀ ḅẹẹ, “Ì owiḅọtụḅọ, wori-nume mẹ ị̀ ọgọnọ gbanaa; paa ị̀ ẹkwẹn-ḅịḅị mẹ ngẹrị poki, tẹ mu ịn kun-ḅo ị̀ pịrịị.” 14Mie ḅụ ò mu in kun tẹ ini ọkị-ḅo ò iyingi pịrịm; tẹ ò iyingi anị sọ tẹlẹma ọ̀ ḍa fị-fị ḅẹlẹ fịye ḅara wẹrịm. 15Anịtẹso Ribeka nwẹnị arị owiḅọtụḅọ Ịsọ omongiḅọ ḅe akapa tẹ warị-ḅio arị na emi aị ḅụ iḅitẹịn akapa kẹ Jekọbụ arị owiḅọtụḅọ kalatụḅọ ḅe sụa; 16á nwẹnị oḅori awọmẹ ma oju apara mẹ kẹ ori aḅara na, ọ̀ kọngọ minimini wararị anga ma na oḅolo; 17á nwẹnị ḅẹlẹ fịye mẹ na fịturu tẹ arị ḅarana mịẹ tẹlẹma wararị fịturu na saakị arị owiḅọtụḅọ Jekọbụ ḅara-ḅio sụa.
18Ọ̀ nwẹnị sọ ọ̀ ḍa dama-mu, tẹ ḅẹẹ, “Ị̀ ḍa!” Ọ̀ nwẹnị pakịrị, “Mie yẹrịị mịanga; ì owiḅọtụḅọ, ị́yẹrị tụḅọ?”
19Jekọbụ nwẹnị ọ̀ ḍa pakịrị, “Yẹrị ị́ tarị owiḅọtụḅọ Ịsọ, arị í ḍuko ị̀ pịrị ḅara mịẹ tẹ, mịọkụ saakị tẹ lẹgị-sime, tẹ à ḅaa nama mẹ ḅụ ye ọkị pẹị, mịẹtẹ ị́ ì boma ḅẹ ḅara.”
20Kụma Ayịzịkị nwẹnị ori owiḅọtụḅọ ḅe ḅẹẹ, “Anị tọ-ḅara sime tẹ ị́ nwẹn sime sarasara ḅara kẹ anị ḍọkị-ẹrị, ị̀ owiḅọtụḅọ?”
Ọ̀ nwẹnị pakịrị, “Gbala KỊNỊNYANAḄỌ ị́ Tamụnọ ḅe ḅarasụa ị̀ pịrịm ẹrẹsị.”
21Anịtẹso Ayịzịkị nwẹnị Jekọbụ ḅẹẹ, “Sọma ì kpekii, ì owiḅọtụḅọ, mịẹtẹ à ḅara kẹ í oju lama ḍiki tẹ nimi ị́yẹrị karakara-ḅara-ḅụ ì owiḅọtụḅọ Ịsọ ḅe, anịanịa ori-a.” 22Mie ḅụ Jekọbụ sọma ọ̀ ḍa Ayịzịkị kpekim, oriḅe tẹ ḅara kẹ ori oju mọnị-mọnị ḍiki ḅọ ḅe, tẹ nwẹnị ḅẹẹ, “Pọkọ mẹ kụma Jekọbụ pịkọ, kụma ḅara ma Ịsọ aḅara.” 23Ori ò lekiri-a gbala ori aḅara ma ḅụ mpọrị emi anị ori iyimbere Ịsọ aḅara sime-ḅara; anie ḅụ ori ò bomam. 24Ọ̀ nwẹnị pịkị sin ò gbela, “Karakara-ḅara-ḅụ ị́yẹrị ì owiḅọtụḅọ Ịsọ ḅe ị́yẹrị?”
Ọ̀ nwẹnị pakịrị, “Yẹrịị”.
25Anịtẹrẹmẹ ọ̀ nwẹnị ḅẹẹ, “Fịye mẹ ọkị-ḅo ị̀ pịrịị, mịẹtẹ arị ì owiḅọtụḅọ ḅaa nama ḅụ kẹlẹ pẹị tẹ í boma.” Mie ḅụ ori anị ọkị-ḅo ọ̀ pịrị, tẹ ọ̀ fịm, tẹ ọ̀ pịkị iru ọkị-ḅo ọ̀ pịrịm, tẹ ò ḅuum. 26Anịtẹso ọ̀ ḍa Ayịzịkị nwẹnị ọ̀ ḅẹẹ, “Sọma kpeki tẹ ḅo ị̀ ḅịḅị nọnjịị, ì owiḅọtụḅọ.” 27#Hib 11.20Mie ḅụ ọ̀ sọma ḅo kpeki tẹ ọ̀ ḅịḅị nọnjịm; tẹ ori akapa ma ḅẹ onu nwẹnị ọ̀ nini la, tẹ ò nwẹnị ò boma tẹ ḅẹẹ, “Ì owiḅọtụḅọ ḅe onu kụnụarị ḅara ẹrịị, gbala piri tẹ KỊNỊNYANAḄỌ ḅe boma tẹ piri kụnụ ḅara!
28Yee Tamụnọ So-ḅio ḅẹ igirigi mẹ ḅụ ye kẹ ị́ pịrị,
pịkị kiri mẹ ḅẹ ḅẹlẹkị mẹ na ḅụ,
tẹ tọnwa ḅara kẹ mgbọlụ na, iru na kẹ ị́ pịrịị.
29 #
Suk 12.3
Yee tomi-kụlọkụlọ fịrịmẹnjị ị́ pịrị,
tẹ sịẹ-sịẹ sịḅị-tuu ị́ pịrị.
Ḅẹrẹtọn í owiapụ-amịnapụ pịrịị,
tẹ yee í iyingi owiapụ-awọmẹ sịḅị-tuu ị́ pịrị.
Wori-nume sime kẹ ḅẹḅọ-ḅẹḅọ tẹ í woriḅọ-woriḅọ pịrịị,
anịsakị boma sime kẹ ḅẹḅọ-ḅẹḅọ tẹ í bomaḅọ-bomaḅọ pịrịị!”
Ịsọ Ayịzịkị Boma Ịgbanịm
30Ayịzịkị paa Jekọbụ boma fama, tẹ Jekọbụ ọ̀ ḍa ḅe tọrọkọ ḅụọ sin gbọrụ sakị, mie ori iyimbere Ịsọ nama tẹịn ḅụ sọ-ḅo yee. 31Ori sọ ḅẹlẹ fịye sọ tẹ tẹlẹma tẹ ọkị-ḅo ọ̀ ḍa pịrịm. Tẹ ọ̀ nwẹnị ọ̀ ḍa ḅẹẹ, “Yee ị̀ ḍa saakị, tẹ ori owiḅọtụḅọ ḅe ḅaa nama mẹ ḅẹ ye pẹị, mịẹtẹ ị́ boma ḅẹ ḅara.”
32Ọ̀ ḍa Ayịzịkị nwẹnị ò gbela, “Ị́yẹrị tụḅọ?” Ọ̀ nwẹnị pakịrị, “Yẹrị ị́ tarị owiḅọtụḅọ Ịsọ.” 33Anịtẹso Ayịzịkị oju si ḅara kẹ sẹkịm, tẹ ọ̀ nwẹnị gbela, “Anị-a kụma anị ḅọ mẹ ḅọrọ tụḅọ tẹ mu nama ḅaa tẹ anị ọkị-ḅo ị̀ pịrị, tẹ arị arịmgba pẹị fama tẹrẹmẹ í ḅo? Anịsakị à pịkị ò boma tẹ, inn, boma mẹ ọkọ sime ḅa.”
34Ịsọ ọ̀ ḍa kọn ẹkwẹn-aḅịḅị ma naa fama tẹso, ọ̀ kpọma oloku pakama tẹ gburo-gburoma ye ḅụụ ḅụ akụ owu kọnm, tẹ nwẹnị ọ̀ ḍa ḅẹẹ, “Ì bomaa, yẹrị sọ bomaa, yei ị̀ ḍa!”
35Kụma Ayịzịkị nwẹnị ọ̀ ḅẹẹ, “Í iyimbere epele ḅara kẹ mịanga ḅom, tẹ ori í boma mẹ ọkị tẹẹ.”
36 #
Suk 25.29-34
Ịsọ nwẹnị gbela, “Ịn kura ḅara kẹ Jekọbụ#27.36 Jekọbụ fiearị ye, Mingirima kẹ sịn ḅọ ḅe ori-a? Kẹ gotẹ ọkọ ḅẹẹarị, mịna maa asakị ma ọ̀ nwẹn kẹ oḅori kẹ ị̀ sịn tẹ. Ori ì omongi-kiri ọkịm anịsakị ḍikii, mịọkụ ọ̀ pịkị ị̀ boma ọkị so tẹẹ.” Anịtẹso ọ̀ nwẹnị ḅẹẹ, “Gbọrụ boma kịngẹ sọ ị́ wẹrị ị̀ pịrị-a mọ?”
37Ayịzịkị nwẹnị Ịsọ pakịrị, “Ḍikii àrị ọ̀ kẹ ị́ nyanaḅọ mịẹ tẹẹ, anịsakị ori owiapụ-amịnapụ mamgba àrị ịn kẹ fịrịmẹnjịapụ mịẹ ọ̀ pịrị tẹẹ. À pịkị mgbọlụ na iru na kẹ ḅụụ ḍikiḍiki ḅụ ọ̀ pịrị tẹẹ. Anịtẹrẹmẹ à pịkị inetẹ tiye mịẹ ị́ pịrị ḅẹ, ì owiḅọtụḅọ?”
38 #
Hib 12.17
Ịsọ nwẹnị ọ̀ ḍa ḅẹẹ, “Gbọrụ boma kịngẹ sọ í nyana-a mọ, ị̀ ḍa? Ì bomaa, yẹrị sọ bomaa, yei ị̀ ḍa,” Tẹ Ịsọ nwẹnị ọ̀ pọkọ saakị tẹ tẹmẹ-la ḅara kẹ owu.
39 #
Hib 11.20
Anịtẹso ọ̀ ḍa Ayịzịkị nwẹnị ọ̀ pakịrị,
“Ḍikii ị́ kẹ anga ḅẹ ye, kiri mẹ ḅẹ ḅẹlẹkị ḅụ ḅo ḅịa,
pịkị So-ḅio gele yọ ḅụ ḅo igirigi sọ ḅịa.”
40 #
Suk 36.8; 2 Ama 8.20 “Í okologie ḅụ mie í ḍumo ḅarị ye,
anịsakị ị́ fịrịmẹnjị í iyimbere pịrị ḅa;
kụma ị́ ‘à ḅarị ḍụkụ ḅịa’ ḅẹẹ sakị,
ọ̀ kẹ ị́ kọngọ sụa ikuye mẹ,
ị́ anị anyịma siin ḅa.”
41Anịsakị mẹ ḅụ boma mẹ tẹ ọ̀ ḍa kẹ Jekọbụ boma ye mẹ gotẹ Ịsọ ò ḍiki-ḅioḅum, tẹ Ịsọ nwẹnị ọ̀ ḅụụ ḅẹẹ, “Ị̀ ḍa ḍuu ḅẹ ene ma kpekiarị, anị sakị mẹ ḅụ arị ị̀ iyimbere Jekọbụ ḅaa ḅa.”
42Kụma ini Ịsọ arị owiḅọtụḅọ omongiḅọ ḅe kọn ẹkwẹn ma ḍuko Ribeka pịrịm; anie ḅụ á fịrịma tẹ arị owiḅọtụḅọ Jekọbụ kalatụḅọ ḅe sịn, tẹ ọ̀ ḅẹẹm, “Ḍikii, í iyimbere Ịsọ kẹ ọ̀ ḅụụ dedema ḅara ḅụ ị́ ḅaa ḅẹ tọn-arị. 43Anị ẹrẹsị ì owiḅọtụḅọ, mịọkụ ị̀ ḅịḅị pokii; saakịị, ḍumo mangị kọn Eranị ḅụ ì iyimbere Lebanị ḍọkụma-muu, 44tẹ ori na kẹlẹ sime nwenii í iyimbere ịganị dein koro, 45tẹ ori ị́ kẹ ọ̀ mịẹ ye mẹ kẹ ḅioḅọrọma sakị la; anịtẹrẹmẹ à ḅịḅị kẹ ị́ fịrịma tẹ anịjụ í ọkị-ḅo ḅa. Tiegotẹ gbọrụ ene ḅụ ọmịnị maa apụ ma ḍumo ị̀ ḅụụ ḅụ fịị so ḅẹ?”
Ayịzịkị Jekọbụ Kẹ Lebanị Fịrịmam
46Anịtẹso Ribeka nwẹnị Ayịzịkị ḅẹẹ, “Itayịti ḅẹ ereme ma gotẹ ì ḍumo mẹ ịnyọ kẹ ị̀ tama tẹ. Jekọbụ nwẹnị mịna Itayịti ḅẹ ereme ma sime ọkụ sime Itayịti ḅẹ ẹrẹḅọ, ama mẹ ḅẹ gbọrụḅọ sime kụma, ì ḍumo mẹ tọ iḅi ḅara sime ị̀ pịrị ḅẹ?”
Currently Selected:
Suku-saakị 27: KBTP
Highlight
Share
Copy
Want to have your highlights saved across all your devices? Sign up or sign in
(C) The Bible Society of Nigeria
