Suku-saakị 26

Ayịzịkị Mu Gira Ḅụ Angam

1Ịnụ mẹ tẹ Ebira-amụ ene ma ḅụ paka ḅọrọ tẹ ye mẹ sikima, mị sakị mẹ ḅụ ịnụ pakam, tẹ Ayịzịkị so Gira mu tẹ Abimẹlẹkị, Filisiteniapụ ma amadaḅọ ḅe ḍọkụma-mum. 2KỊNỊNYANAḄỌ ḅe nwẹnị ḅụụ pakama ò ḍie tẹ ḅẹẹ, “Ideri Ijiputi mu ma, ama mẹ tẹ à ḍuko ị́ pịrị ḅarị ama mẹ ḅio angaa, 3#Suk 22.16-18Igoni mẹ kẹ mị ama mẹ bịan, anịsakị arị ị́ na sime ḅa, tẹ í boma ḅa, kẹ gotẹ ọkọ ḅẹẹarị, mịna ama mamgba à kẹ ị́yẹrị na, í furo-ḅẹ-apụ na pịrị ḅa, anịsakị à ye karị ḅara kẹ minini ị́ ḍa Ebira-amụ pịrị ye mẹ à nwẹn mịẹ ḅa. 4À mịẹtẹ í furo-ḅẹ-apụ kama tẹ So-tọrụ ḅẹ alolia ma ḅin ḅara ḅin ḅa; tẹ mịna ama mamgba kẹ í furo-ḅẹ-apụ pịrị ḅa; anịsakị í furo-ḅẹ-apụ ḅụụ ḅụ tomikiri mẹ ḅẹ opu asịẹ mamgba ḅọrọ tẹ boma nyana ḅa, 5gbala Ebira-amụ ị̀ ḅịḅị poki tẹ à tọn koroma aị ma na, à ḅẹẹm mịẹ nwẹn ḅẹẹ aị ma na mịẹ, tẹ pịkị à sụa wararị kẹẹtẹ oloko na, kẹẹ-a aị na kokom ẹrẹsị.”

6Mie ḅụ Ayịzịkị Gira ḅụ koro angam. 7#Suk 12.13; 20.2Ama mẹ ḅẹ owiapụ ma ọ̀ ta gbolomaye kẹ ò gbela tẹso, ọ̀ nwẹnị ḅẹẹ, “Árị anie ị̀ ịyịmbara” “Árị anie ị̀ ta,” ḅẹẹ mẹ ọ̀ ḅalafamam, ò kuromarị ama mẹ ḅẹ owiapụ ma Ribeka sịḅị gotẹ ḅofa ọ̀ ḅaa ḅarị ḅoto; gbala ḍiki-tọrụ ḅụ árị iḅi lama wararị ẹrẹsị. 8Ayịzịkị anịanga kẹlẹ sime tẹso, Abimẹlẹkị, Filisiteniapụ ma amadaḅọ ḅe nwẹnị ikiḅa-ḅọkọ ḅụ toluma ḍiki tẹ Ayịzịkị ọ̀ ta Ribeka na ḅụụ-loloma-ti kọn-arị ye ẹrị. 9Mie ḅụ Abimẹlẹkị nwẹnị Ayịzịkị sịn, tẹ ḅẹẹ, “Ḍikii, árị ma anie ị́ ta; ndẹẹ í inetẹ ḅẹẹ ḅẹ ḅara, árị anie ị̀ ịyịmbara?” Ayịzịkị nwẹnị ọ̀ pakịrị, “Gbala à kuromam, à ḅofa á sịḅị gotẹ fịị ḅarị ḅoto.” 10Abimẹlẹkị nwẹnị ḅẹẹ, “Miemẹ tẹ ị́ kẹ wa mịẹ ye mẹ ḅọrọ tiye? Mimgbe tomi ma ḅẹ gbọrụḅọ sarasara ḅara ḅụ ị́ ta na mono gboloma tẹ, tẹ ị́ ḅẹrẹ-ḅarasii dogi ḅo wa pịrị tẹ.” 11Mie ḅụ Abimẹlẹkị tomi mamgba ḅeri nụnụm, tẹ ḅẹẹm, “Ḅẹḅọ-ḅẹḅọ, tẹ ḅara kẹ ḅị owiḅọ ḅe, anịanịa ọ̀ ta lama ḅọ, lama ḅọ ini mḅọ ḅaa ḅa.”

12Tẹ Ayịzịkị anị ama mẹ ḅụ sime tẹ fịaị ḍiḅim tẹ anị gbọrụ kụra mẹ ḅụ ò ḍiḅi aị ma ḅẹ kiri sọnọa si nwẹn sokum. KỊNỊNYANAḄỌ ḅe ò bomam. 13Owiḅọ ḅe nwẹnị ḅo ngọ kọn, tẹ sọye mie tọrọkọ, tọrọkọ mu nwenii ò ḅo ngọ-kọn lama ḅọ sọm. 14Ọ̀ tọnwa oḅori na anana ogbo-ogbo na, opu anama ogbo-ogbo na, tọnwa afịrịmẹnjịapụ nyana tẹ opu warị-kpo nyanam, anị mịẹtẹ Filisiteniapụ ma afana kẹ ọ̀ ḍọkịm. 15Mịọkụ ọ̀ ḍa Ebira-amụ ḍumo wararị ene ma ḅụ suḅe tẹ ori afịrịmẹnjịapụ soku asuḅe mamgba Filisiteniapụ ma arị kiki tẹ lịka kẹ arị pụnma famam.

16Anịtẹso Abimẹlẹkị nwẹnị Ayịzịkị ḅẹẹ, “Wamịna ḅụ soo; kẹ gotẹ ọkọ ḅẹẹarị, ị́ ḅẹlẹma kụrọ nyana wa nẹngị tẹ.”

17Mie ḅụ Ayịzịkị anịanga som, tẹ mu Gira tụndụ ogboku ḅụ akpụrụ-warị pike tẹ, anịanga angam. 18Ayịzịkị nwẹnị pịkị sin minji ḍuu asuḅe ma tẹ ọ̀ ḍa Ebira-amụ ḍumo wararị ene ma ḅụ ịn soku aị ma soku; gbala Filisiteniapụ ma Ebira-amụ fịị tẹso, arị ḍuu kikim; tẹ ọ̀ nwẹnị ẹrẹ mẹ tẹ ḍaḅọ ḅe kẹ arị koro ẹrẹ ma kẹ arị sịn. 19Kụma Ayịzịkị afịrịmẹnjịapụ tụndụ ogboku mẹ ḅụ suḅe mẹ soku tẹ anịjụ minji mẹnjịarị ḅuu minji suḅe ḍọkị-ẹrị tẹso, 20Gira ḅẹ nama ogbo-ogbo ḍikiḍikiarị apụ ma nwẹnị Ayịzịkị nama ḍikiḍikiapụ na kamụ-sọ, tẹ ḅẹẹm, “Minji mẹ wamịna nye.” Mie ḅụ ọ̀ nwẹnị ẹrẹ kẹ suḅe mẹ kuro Ẹsẹkị#26.20 Ẹsẹkị fiearị ye, Kamụ, gbala ini ori na ịgbanịyam ẹrẹsị.

21Anịtẹso ịn nwẹnị pịkị jen suḅe soku, tẹ ịn pịkị aniemẹ sọ gotẹ kamụ-sọm; mie ḅụ ori ẹrẹ kẹ anị kurom, Sitina#26.21 Sitina fiearị ye, Fịya-a 22Ọ̀ nwẹnị anịjụ ḅụ mẹnjị ḅele tẹ jen suḅe soku, tẹ ịn ḅarị aniemẹ gotẹ kamụ-sọ-a. Mie ḅụ ori ẹrẹ kẹ anị kurom, Rehoboti#26.22 Rehoboti fiearị ye, Finjimatẹ Ḅarana Sịḅị Nyana Anga. Ọ̀ nwẹnị ḅẹẹ, “Mịọkụ KỊNỊNYANAḄỌ ḅe kiri pakama wa pịrị tẹẹ, anịsakị wa ama mẹ ḅio sime tẹ lolo-kama ḅa.”

23Anịjụ ḅụ ori iwo so Biyasẹba mum. 24Anị gbọrụ ḍin mẹ ḅụ KỊNỊNYANAḄỌ ḅe ḅụụ pakama ò ḍie tẹ ḅẹẹm, “Yẹrị anie ị́ ḍa Ebira-amụ Tamụnọ ḅee. Ḅalafa ma; kẹ gotẹ ọkọ ḅẹẹarị, ị̀ fịrịmẹnjịḅọ Ebira-amụ gotẹ arị ị́ na emi, tẹ í boma ḅa, tẹ mịẹtẹ í furo-ḅẹ-apụ lolo-kama ḅa.” 25Anie ḅụ ori anịanga gbọrụ agbamịẹ-anga nama tẹ sunsin KỊNỊNYANAḄỌ ḅe pịrịm, tẹ anịanga ori akpụrụ-warị pikem. Tẹ anịjụ ḅụ Ayịzịkị afịrịmẹnjịapụ gbọrụ suḅe sokum.

Ayịzịkị Na Abimẹlẹkị Na Ọḅọkụ Fịm

26 # Suk 21.22 Anịtẹso Abimẹlẹkị nwẹnị Ahuzatị, datụkụma ẹkwẹn kọn ọ̀ pịrịarị ḅọ ḅe na, Fịkọlị, ori ọmụ-ogbo ḅẹ sịḅịdaḅọ ḅe na kẹ ọ̀ ḅụụ sụa tẹ Gira ḅụ sime tẹ Ayịzịkị dama-mu. 27Ayịzịkị nwẹnị ịn gbela, “Ó tiegotẹ ị̀ dama-ḅo, ọmịnị sọ ẹrịarị mịnẹ ọmịnị ị̀ ḍiki-ḅioḅuarị tẹ ọmịna ḅụ ị̀ fịrịma ḅelema tẹ?”

28Ịn nwẹnị pakịrị, “Wa giregire ḅara kẹ ẹrịm mịnẹ KỊNỊNYANAḄỌ ḅe ị́ na emi; anie ḅụ wa ḅẹẹm, yee ị́yẹrị na, wamịnị na ogboku wa ye karị koroma, tẹ yee wa ị́ na ọḅọkụ fị, 29mịnẹ iḅiye sikima, wa ḅara kẹ ị́ lama-a, pịkị gberie-sọ kẹ ị́ lama-a tẹ dein ḅụ ị́ fịrịma ḅelema ḅara mẹ ị́yẹrị sọ ye kẹ kịnị lama ye kẹ wa mịẹ ḅịa.” 30Mie ḅụ ò kopini afịaị sọ ịn pịrịm, tẹ ịn fịm, pịkị ḅuum. 31Dede-ḅio ịn nwẹnị ḅaaso kẹ saakị tẹ ye mẹ karị jụmọ-jụmọ pịrị; tẹ Ayịzịkị ịn ḅọrọma pakama tẹ ini ịna etela dam, anịsakị dein ḅụ ini ò koroma-som.

32Anị gbọrụ ene mẹ ḅụ Ayịzịkị afịrịmẹnjịapụ ḅo suḅe mẹ tẹ ịn soku ye mẹ gbolomaye ḍuko ọ̀ pịrịm tẹ ọ̀ ḅẹẹm, “Wa minji ẹrị tẹẹ.” 33Ọ̀ nwẹnị anị sịn Sẹba#26.33 Sẹba fiearị ye, Karị anịanịa Ịlọ. Anịẹrẹsị ọkị-ḅo mịmgba la opu ama mẹ ẹrẹ, Biyasẹba.

Ịsọ Jen Sịẹ Ḅẹ Ereme Simem

34Ịsọ sịḅị kụra amesi ḅọrọ tẹso, ọ̀ nwẹnị Itayịti ḅẹ Beheri ẹrẹḅọtụḅọ Juditị na sime, pịkị Itayịti ḅẹ Ẹlọnị ẹrẹḅọtụḅọ Basẹmatị na sime. 35Tẹ ịn nwẹnị mịẹtẹ ḍumo akụ Ayịzịkị na, Ribeka na pịrị.

Currently Selected:

Suku-saakị 26: KBTP

Highlight

Copy