Paka-so 2
2
In Mozizi Iyim
1Izirẹlịapụ ma mị ḅara kẹ Ijiputi ḅụ tọrụsierịmarị sakị, Livayị ḅẹ gbọrụ owiḅọ Livayị ẹrẹḅọtụḅọ ọkị simem; 2#Fịr 7.20; Hib 11.23Ẹrẹḅọ ma nwẹnị sime kọn tẹ gbọrụ owiḅọtụḅọ iyi, á tụḅọ ḅe iḅi lama wararị ḅara ẹrị tẹso, á tẹra akalụ kẹ ọ̀ kẹ ḅọịm. 3Kụma á ḅarị inetẹ ọ̀ kẹ ḅọị ọkọ nẹngịma ḅịa ḅẹ sakị, á nwẹnị asịra kẹ ḍori kana ọkị tẹ kpootẹ agba kẹ anị oḅolo, tẹ á nwẹnị tụḅọ ḅe kẹ anị ḅio sụa tẹ kẹ sịẹ gele-geletẹ asịra ma ḅio koroma tọrụ mẹ akaka ḅụ. 4Tụḅọ ḅe ịyịmbara nwẹnị ḅele tẹ sịẹsime tẹ ọ̀ la ḅẹ ye nimi ḅẹ ḅara.
5Mịọkụ Fero ẹrẹḅọtụḅọ Nayịlị tọrụ mẹ ḅụ minji ḅiri ḅẹ ideri-ḅom, tẹ arị afịrịmẹnjị-eremịna-awọmẹ tọrụ mẹ akaka mẹnjịma ḅọrọarị ogbo, arị nwẹnị asịra ma ogbo-ḅio ḅụ kana mẹ ẹrị, tẹ á fịrịmẹnjị-ẹrẹḅọ fịrịma mu anị saakị ḅo. 6Árị anị finji tẹso, á nwẹnị tụḅọ ḅe ẹrị. Ori owuarị, á nwẹnị tụḅọ ḅe ḍiki sịḅị-kanakana tẹ ḅẹẹ, “Ḅieḅe anie Hiburu ḅẹ ḍọkọḍọkọ-awọmẹ ma ḅẹ gbọrụḅọ.”
7Anịtẹso ori mbịra ma nwẹnị Fero ẹrẹḅọtụḅọ ma gbela, “À mu Hiburu ḅẹ ereme ma ḅụ ḅẹ tụḅọ ḍikiḍiki gbọrụḅọ sịn ḅo ị́ pịrị tẹ mḅọ tụḅọ ḅe ḍikiḍiki ị́ pịrị?”
8Fero ẹrẹḅọtụḅọ ma nwẹnị á ḅẹẹ, “Muu,” Mie ḅụ ẹrẹḅọtụḅọ ma nwẹnị mu tụḅọ ḅe iyingiḅọ ma sịn ḅo. 9Fero ẹrẹḅọtụḅọ ma nwẹnị ẹrẹḅọ ma ḅẹẹ, “Ḅị tụḅọ ḅe ọkị soo, tẹ ò ḍikiḍiki ị̀ pịrịị, anịsakị arị ị́ gbẹẹ-ye kẹ ị́ pịrị ḅa.” Mie ḅụ ẹrẹḅọ ma tụḅọ ḅe ọkị so tẹ mu ò ḍikiḍikim. 10#Fịr 7.21Tụḅọ ḅe ḍụḅa tẹso, á nwẹnị ori ọkị-ḅo Fero ẹrẹḅọtụḅọ ma pịrị, tẹ ori arị owiḅọtụḅọ sọm; tẹ árị ẹrẹ kẹ ò korom Mozizi, arị mẹẹ, “Gbala minji ḅio arị ọ̀ nụnụ pakama-ḅom.”
Mozizi Mangị-so Midiyanị Mum
11 #
Fịr 7.23-28
#
Hib 11.24
Mozizi ḍụḅa tẹ sakị mẹ ḅẹ gbọrụ ene ḅụ, ọ̀ mẹnjị paka ori atomi ẹrị ḅẹ mu, tẹ ịna iku aị ma ḍikim; tẹ ọ̀ nwẹnị Ijiputi ḅẹ gbọrụḅọ ori atomi Hiburu ḅẹ ḅọ fomuarị ye ẹrị. 12Ọ̀ nwẹnị tọrụ pịkị mịanga na, anịanga na ḍiki, tẹ ọ̀ gbọrụḅọ-sọ ẹrị-a, mie ori Ijiputi-ḅẹ-ḅọ ḅe ḅaa tẹ ọ̀ kẹ onwin mẹ ḅio ḍiḅi ye.
13Anị ḅẹ ene ḅaa ḅụ ọ̀ paka-mu tẹso, ori ẹrịm Hiburu ḅe maa apụ owu sọarị, tẹ ọ̀ nwẹnị ḅẹrẹ-gbo ḅọ ḅe ḅẹẹ, “Í tiegotẹ í pembema Hiburu ḅẹ ḅọ fomuarị?”
14Ọ̀ nwẹnị pakịrị “Tụḅọ ị́ kẹ ḅẹrẹtọnḅọ na ḅẹrẹkọnḅọ na mịẹ wa pịrị? Í Ijiputi-ḅẹ-ḅọ ḅe ḅaa ḅara kẹ ị̀ ḅaa ḅẹ tẹ?” Anịtẹso Mozizi nwẹnị ḅalafa lama tẹ kuroma, “Tụkụma ḅara ḅụ tomi nimi tẹ ḅa.” 15#Fịr 7.29; Hib 11.27Fero anị ḅẹ ye naa tẹso, ò Mozizi ḅaa ḅẹ ḍọkịm.
Kụma Mozizi Fero ḅụ ḍumo-mangị kọn tẹ mu Midiyanị ḅẹ sịẹ ḅụ angam; tẹ ọ̀ gbọrụ suḅe suku lẹgị-simem. 16Anị sakị mẹ ḅụ Midiyanị ḅẹ agbamịẹḅọ sọnọma eremịna-awọmẹ nyanam; tẹ minji kẹ ịna ḍaḅọ anana ogbo pịrị ḅuu ḅẹ ḅara kẹ minji ḍuu nama minji-ḅuuye mẹ ḅio sụa ḅinma ḅẹ tẹ in ḅom. 17Ja anana ḍikiḍikiapụ nwẹnị ḅo tẹ ịn dee-siin, kụma Mozizi saakị-sịẹ tẹ ḅarasụa ịn pịrị tẹ ịn minji kẹ ịna anana ogbo ma pịrị buum. 18Ịn ḅo ịna ḍaḅọ Ruwẹlị (anịanịa Jetiro) la tẹso, ọ̀ nwẹnị ịn gbela, “Ndẹẹ ọmịnị ala-a tẹ ḅo ḅara mịmgba?”
19Ịn nwẹnị pakịrị, “Ijiputi ḅẹ gbọrụḅọ anana ḍikiḍikiapụ ma ḅara-ḅio wa ḍụa pakama ḅom, tẹ minji sọ ḍuu-ḍuu wa pịrịm tẹ anana ogbo ma ḅuum.”
20Ọ̀ nwẹn ori eremịna-awọmẹ ma gbela, “Tẹ ọ̀ tọ-anga emi? Ó tiegotẹ owiḅọ ḅe koroma-so? Ó mu ọ̀ sịn, mịẹtẹ ò ḅo fịye fị ḅe ḅara.”
21Mie ḅụ tomḅọ ḅe na anga mẹ nwẹnị Mozizi ḅụụ-ḅẹlẹ, tẹ ori ori ẹrẹḅọtụḅọ Zipora saakị Mozizi pịrị simem. 22Á gbọrụ owiḅọtụḅọ iyim, tẹ ọ̀ nwẹnị Gasọmụ kẹ ẹrẹ kẹ tụḅọ ḅe koro, anie ori mẹẹ, “À bịanḅọ sọ tẹ igoni ama ḅụ.”
23Sakị kẹlẹ ḅọrọ tẹso, Ijiputi ḅẹ amadaḅọ ḅe fịịm. Izirẹlịapụ ma ịna suku-ḅio omoni ḅara mẹ sime tẹ iningi tẹ ḅarasụa gotẹ owum, tẹ omoni ḅara mẹ suku-ḅio ịn kọn owu mẹ nwẹnị iwo ḅo Tamụnọ la. 24#Suk 15.13,14Tamụnọ nwẹnị ịn kọn-arị iningi mẹ naa, tẹ ori Ebira-amụ na, Ayịzịkị na, Jekọbụ na, fị ọḅọkụ mẹ kẹ ḅiokoroma. 25Tamụnọ Izirẹlịapụ ma ḅụụ-fụka ẹrịm, tẹ ḅarasụa ịn pịrị ḅara ḍọkị.
Currently Selected:
Paka-so 2: KBTP
Highlight
Share
Copy
Want to have your highlights saved across all your devices? Sign up or sign in
(C) The Bible Society of Nigeria
