Paka-so 3

Tamụnọ Mozizi Sịnm

1Gbọrụ ene ḅụ, Mozizi ò fụanḅọ Jetiro, anie Midiyanị ḅẹ agbamịẹḅọ ḅe anana ogbo ḍikiḍikiarị, tẹ ọ̀ nwẹnị ori anana ogbo mẹ kẹ ịkpa mẹ ḅẹ ịrụa-ideriarị-anga mu tẹ ḅo Orẹbụ (anịanịa Sayịnayị) Tamụnọ ḅe Tụndụ mẹ la. 2#Fịr 7.30-34KỊNỊNYANAḄỌ ḅe enjẹlị nwẹnị kọrịarị piri kịkama ḅara kẹ ḅụụ pakama ò ḍie, tẹ ò bio-bioma anị ḍikim. Ori ẹrịm piri mẹ kọrịarị kụma anị dọkị-a. 3Tẹ Mozizi nwẹnị ḅẹẹ, “À pịkị ḅụụ kẹ gbọrụ akaka pịrị ḅa, tẹ mị opu ḍikiye mẹ ḍiki ḅa, piri mẹ gotẹ dọkị-a ye.”

4KỊNỊNYANAḄỌ ḅe ẹrịm mịnẹ ọ̀ ḅụụ kẹ gbọrụ akaka pịrị tẹ ḍiki ḅẹ tẹso, Tamụnọ nwẹnị piri mẹ ḅio sime tẹ ọ̀ sịn, “Mozizi, Mozizi!”

Ọ̀ nwẹnị pakịrị, “Mie yẹrịị mịanga.”

5Anịtẹso Tamụnọ nwẹnị ḅẹẹ, “Sọma ḅo kpeki ma! ị́ aḅụọ ḅụ simearị okuro ma sin, kẹ gotẹ ọkọ ḅẹẹarị, yọ mẹ tẹ ị́ sịẹsime wararị yọ mẹ anie fịafịa kiri.” 6Tẹ ọ̀ nwẹnị ḅẹẹ, “Yẹrị anie ị́ atẹngịapụ ma sịḅị-tuu pịrị Tamụnọ ḅee; Ebira-amụ na Ayịzịkị na pịkị Jekọbụ na sịḅị-tuu pịrị Tamụnọ ḅee.” Tẹ Mozizi nwẹnị amịna tọrụ ḅọị gbala Tamụnọ ḍiki ọ̀ ḅalafama lamam ẹrẹsị.

7Anịtẹso KỊNỊNYANAḄỌ ḅe nwẹnị ḅẹẹ, “Ị̀ atomi ma tẹ Ijiputi ḅụ simearị apụ ma tọrụsiẹrị mẹ arị ẹrị tẹ, pịkị ịna owu na naa tẹẹ, kụrọ kọrịnama tọn-tọn ịn pịrịarị ịna sịḅịdapụ ma gotẹ; arị ịna ḅụụ-fụka ma nimi wararị. 8Miemẹ gotẹ à kuro ḅo Ijiputi-ḅẹ-apụ ma aḅara ḅio ịn ḍụa pakama ḅa ḅo tẹẹ. Àrị in sakị pakama iḅitẹ wulala wararị sịẹ ḅo ḅa, anie ḅụụ-ḅẹlẹmatẹ iḅiọkụma fịye so-pakamarị amakiri mẹ. Anị sịẹ mẹ anie Kenanị apụ ma na, Itayịti apụ ma na, Amọrayịtị apụ ma na, Pẹrịzayịtị apụ ma na, Hivayịtị apụ ma na, Jebusayịtị apụ ma na angarị sịẹ. 9Anịsakị mịọkụ, ḍikii, Izirẹlịapụ ma owu mẹ à naa tẹ, tẹ à pịkị ponoma mẹ tẹ Ijiputi-ḅẹ-apụ ma kẹ ịn ponoma la ḅara sọ ẹrị tẹ. 10Anịẹrẹsị ḅoo, àrị ị́ kẹ Fero fịrịma ḅa, mịẹtẹ ị́ Ijiputi ḅụ ị̀ atomi Izirẹlịapụ ma pakama-ḅo.”

11Kụma Mozizi nwẹnị Tamụnọ ḅẹẹ, “Yẹrị tụḅọ, tẹ à Fero ḍọkụma-mu tẹ Ijiputi ḅụ Izirẹlị owiapụ-awọmẹ ma ọkị-ḅo ḅẹ?”

12Tamụnọ nwẹnị pakịrị, “Àrị ị́nịna sime ḅa, anịsakị miemẹ elekima sọ ị́ pịrị ḅa, mịnẹ yẹrị ị́ fịrịmam; ị́ Ijiputi ḅụ tomi ma pakama-ḅo tẹ ini ọkị-ḅo sakị, ọ́ mị tụndụ mẹ ọgọnọ ḅụ fịrịmẹnjị Tamụnọ pịrị ḅa.”

13 # Pks 6.2,3 Anịtẹso Mozizi nwẹnị Tamụnọ gbela, “À ḅo Izirẹlịapụ ma la tẹ ịn ḅẹẹm, ‘Ọmịna aḍapụ ma tẹkẹarị Tamụnọ ḅe ị̀ kẹ ọ́ fịrịmam,’ tẹ ini, ‘Ori ẹrẹ tiye?’ gbela ọkụma, à tiye ḍuko ịn pịrị ḅẹ?”

14 # Mịẹ 1.4,8 Tamụnọ nwẹnị Mozizi ḅẹẹ, “YẸRỊ Anie YẸRỊ.” Tẹ ọ̀ nwẹnị ḅẹẹ, “Miemẹ ḍuko Izirẹlịapụ ma pịrịị, ‘ịn kẹ YẸRỊ sịn ḅọ ḅe ị̀ kẹ ọ́ fịrịmam.’ ” 15Tamụnọ nwẹnị pịkị Mozizi ḅẹẹ, “Mie mẹ sọ ḍuko Izirẹlịapụ ma pịrịị, ‘KỊNỊNYANAḄỌ ḅe ọmịna atẹngịapụ ma sịḅị-tuu pịrị Tamụnọ ḅe, anie Ebira-amụ na Ayịzịkị na pịkị Jekọbụ na sịḅị-tuu pịrị Tamụnọ ḅe ị̀ kẹ ọ́ fịrịma tẹẹ.’ Miemẹ anie ị̀ ẹrẹ mu ḅẹẹ-sakị ḅẹẹ-sakị la, anịsakị mị-ḅara mie mu ḅụọ fa ḅụọ paka la, ḅụọ mamgba ị̀ kẹ ḅiokoroma ḅarị ḅara. 16Mu tẹ Izirẹlị ḅẹ omongiapụ mamgba kobiri ḅo gboloma, tẹ ịn ḅẹẹ, ‘KỊNỊNYANAḄỌ ḅe, ọmịna atẹngịapụ ma sịḅị-tuu pịrị Tamụnọ ḅe, anie Ebira-amụ na Ayịzịkị na pịkị Jekọbụ na sịḅị-tuu pịrị Tamụnọ ḅe amịna ḅụụ pakama ì ḍie tẹẹ,’ ḅẹẹarị, ‘àrị ọmịnị na, Ijiputi ḅụ ịn kẹ ọ́ mịẹ tẹ aị ma na kẹ elekima sụa tẹ. 17Anịsakị à mininim mịnẹ àrị Ijiputi ḅụ ọmịnị ẹrịarị tọrụsiẹrị mẹ ḅio ọ́ sakị pakama ḅụụ-ḅẹlẹmatẹ iḅiọkụma fịye so-pakamarị pịkị wulala wararị sịẹ ḅo ḅa, tọnwa fịaị simearị anga. Anị sịẹ mẹ anie Kenanị apụ ma na, Itayịti apụ ma na, Amọrayịtị apụ ma na, Pẹrịzayịtị apụ ma na, Hivayịtị apụ ma na, Jebusayịtị apụ ma na angarị sịẹ.’”

18“Anịsakị ini í ḍuko ịn pịrị ḅarịye mẹ poki ḅa; tẹ ị́yẹrị na, Izirẹlị ḅẹ omongiapụ ma na Ijiputi ḅẹ amadaḅọ ḅe dama-mu tẹ ọ̀ ḅẹẹ ḅa, ‘KỊNỊNYANAḄỌ ḅe, Hiburu ḅẹ apụ ma Tamụnọ ḅe ḅo wamịnị na bịama tẹẹ, anịsakị mịọkụ wa ị́ tẹkẹm, minini wa tẹra aḍin kẹ mẹnjị ịkpa mẹ ḅio sọ-mu, mịẹtẹ wa agba mịẹ KỊNỊNYANAḄỌ wamịna Tamụnọ ḅe pịrị ḅẹ ḅara.’ 19À nimi wararị mịnẹ Ijiputi ḅẹ amadaḅọ ḅe ọ̀ ḍụkụ tẹ ó so ḅịa, à kụrọ-ḅara kẹ ori na mịẹ sikima. 20Mie ḅụ àrị ị̀ kụrọ kẹ ḅụụ-buama-aị tẹ arị Ijiputi ḅio mịẹ ḅarị aị kẹ ịn fomu ḅa; aniemẹ ḅọrọ tẹrẹmẹ ọ̀ ḍụkụ tẹ ó so ḅa.”

21 # Pks 12.35,36 “Àrị Ijiputi-ḅẹ-apụ ma mịẹtẹ ḍiki-tọrụ ḅụ ịn ḅẹlẹma nyana mịna tomi ma pịrị ḅa, anịsakị ó so ḅarị sakị, ọ́ ḅarị papaa ḅara kẹ so ḅịa, 22kụma Izirẹlị ḅẹ ẹrẹḅọ goḅọ-goḅọ mḅọ na kpeki tẹ angarị Ijiputi ḅẹ ẹrẹḅọ na, mḅọ bịan tẹ angarị warị ḅẹ ẹrẹḅọ na ḅara ḅụ golu na, seleḅa na yela ḅụụ ḅirima aị na, kapa na, ḅịtẹ na ḅii ḅa. Anịsakị ọmịnị arị kẹ ọmịna owiapụ-awọmẹ na, ọmịna eremịna-awọmẹ na ḅirima ḅa. Mị ḅara mie ọ́ kẹ Ijiputi-ḅẹ-apụ ma ngọ dogi-so ḅarịye.”

Currently Selected:

Paka-so 3: KBTP

Highlight

Copy