Paka-so 17

Minji Ịkụ Ḅio Sịra Paka-ḅom

(Kịẹ 20.1-13)

1 # Kịẹ 20.2-13 Izirẹlịapụ ma tomina-ogbo mẹmgba ịn Si kẹ koro ịkpa mẹ ḅụ KỊNỊNYANAḄỌ ḅe tọn ḅara ḅụ mẹnjị ma-mum, tẹ agbama-agbama ma mu Rẹfidimụ ḅụ akpụrụ-warị pike tẹ simem, kụma tomi ma nyana tẹ ḅuu, ḅuu minji kalịye sọ ofori. 2Anịẹrẹsị tomi ma nwẹnị Mozizi ḅụụ si ḍọkị, tẹ ḅẹẹ, “Minji kẹ wa pịrịị, wa ḅuu.”

Mozizi nwẹnị pakịrị tẹ ịn ḅẹẹ, “Ó tiegotẹ ị̀ ḅụụ si ḍọkịarị? Ó tiegotẹ KỊNỊNYANAḄỌ ḅe daaḍikiarị.”

3Kụma anịjụ minji ḅuu tomi ma pọkọ tarị lamam, tẹ tomi ma nwẹnị mbụrụmbụrụ Mozizi pịrị tẹ ḅẹẹ, “Í tiegotẹ Ijiputi ḅụ wa pakama-ḅo. Minji ḅuu pọkọ tarị kẹ wamịnị na, wamịna awọmẹ na, wamịna opu anama na ḅaama gotẹ mụnọọ?”

4Mie ḅụ Mozizi owu KỊNỊNYANAḄỌ ḅe pịrịm, “Ndẹẹ à kẹ mịna atomi ma mịẹ ḅẹ ḅara? Kẹlẹ kọnm ịn tẹlẹma tẹ ḍụḅarị kẹ ì gbin ḅa.”

5KỊNỊNYANAḄỌ ḅe nwẹnị Mozizi ḅẹẹ, “Mkpara mẹ tẹ ị́ kẹ Nayịlị tọrụ mẹ fomu mkpara mẹ ọkịị, Izirẹlị ḅẹ omongiapụ ma ḅẹ ja apụ ọkị ị́ ḅụụ sụa, tẹ mẹnjị tomi ma tọrọkọ ḅọrọ, tẹ mẹnjịma muu. 6Ḍikii, ị́ tọrọkọ ḅụ à gbọrụ ịkụ ọgọnọ ḅụ sịẹsime ḅa Orẹbụ ḅụ; anịsakị ị́ ịkụ mẹ fomu ḅa, tẹ minji anị ḅụ paka-ḅo ḅa mịẹtẹ tomi ma ḅuu ḅarị ḅara.” Mozizi ọkọ mịẹm Izirẹlị ḅẹ omongiapụ ma tọrụ-ogbo ḅụ.

7Mozizi nwẹnị ẹrẹ kẹ anị yọ mẹ koro Masa na Mẹrịba#17.7 Hiburu ḅịḅị ḅụ Masa fiearị ye, Daaḍiki; Mẹrịba fiearị ye, Kịnị ḅụụ si ḍọkị na, gbala Izirẹlị ḅẹ awọmẹ ma kịnị ḅụụ ḍọkịarị si mẹ na ịn pịkị KỊNỊNYANAḄỌ ḅe daaḍiki tẹ gbelam, “KỊNỊNYANAḄỌ ḅe ò gbeke wamịna ogboku emi, mụnọọ ori ofori?” mẹ na ẹrẹsị.

Amalẹkị Ḅẹ Apụ Ma Na Gbin Ọmụ Mẹ

8Anịtẹso Amalẹkị ḅẹ apụ ḅo Rẹfidimụ ḅụ Izirẹlịapụ na owu sọm. 9Mozizi nwẹnị Jọsụwa ḅẹẹ, “Owiapụ sẹlẹ wa pịrịị, tẹ paka-mu Amalẹkị ḅẹ apụ ma na owu sọọ ḅaa. Àrị ị̀ ḅara-ḅio Tamụnọ mkpara mẹ ọlọ tẹ anị na mu tụndụ mẹ ọgọnọ sịẹsime ḅa.” 10Anie ḅụ Jọsụwa Mozizi ḍuko ọ̀ pịrị ḅara mịẹm, tẹ Amalẹkị ḅẹ apụ ma na owu sọm; Mozizi na, Erọnị na Họ na kpọlị tụndụ mẹ sịḅị ọgọnọ mum. 11Mozizi ọ̀ ḅara saakị-gelema sakị, gelema sakị Izirẹlịapụ ịn nẹngịmam; kụma ọ̀ ḅara ideri sakị, ideri sakị Amalẹkị ḅẹ apụ Izirẹlịapụ nẹngịmam. 12Kụma Mozizi aḅara kọrị-kọrịm; mie ḅụ ịn gbọrụ ḍụḅarị saakị ḅo ò suku-ḅio koromam, tẹ ori anị ọgọnọ lẹgị-simem, tẹ Erọnị na, Họ na ḅarasụa tẹ ori aḅara ma saakị-gelemam, gbọrụḅọ gbọrụ pakịrị simem, osi-ḅọ pịkị osi pakịrị simem; mie ḅụ ori aḅara ma gbene-sime nwenii ịrụa mẹ tuuideri sakị lam. 13Tẹ Jọsụwa asịra pẹlẹ ḅara kẹ okologie kẹ Amalẹkị na ori atomi na pẹlẹ-ḅaa famam.

14 # Dit 25.17-19; 1 Sam 15.2-9 KỊNỊNYANAḄỌ ḅe nwẹnị Mozizi ḅẹẹ, “Mie mẹ kẹ ye kẹ ḅiokoroma ḅara ḅụ ḍiri ḅio kẹẹ tẹ anị gotẹ, gotẹ Jọsụwa aḅeri ḅio suu, mịnẹ arị ịkatakirikọn-a-ḅara kẹ ẹrị tẹ Amalẹkị kẹ ḅiokoroma ḅẹ ye saakị-siin ḅa so mẹ suku-ḅio ḅụ,” 15Tẹ Mozizi nwẹnị gbọrụ agbamịẹ-anga nama, tẹ ẹrẹ kẹ anị koro, “KỊNỊNYANAḄỌ ḅe anie ị̀ arụ-pike-ḅịtẹ.” 16Ọ̀ nwẹnị ḅẹẹ, “KỊNỊNYANAḄỌ ḅe arụ-pike-ḅịtẹ mẹ ọlọ saakị-gelemaa! KỊNỊNYANAḄỌ ḅe Amalẹkị na ọmụgbin ḅa ḅụọ-fa-ḅụọ-paka ḅụ.”

Currently Selected:

Paka-so 17: KBTP

Highlight

Copy