Paka-so 16

KỊNỊNYANAḄỌ Ḅe Mana Nwẹn-sịn Fịye Na Kuweli Nwẹn-sịn Afeni Na Kẹ Tomi Ma Fịrịmam.

1Ini Ẹlimu ḅụ saakị pakam, tẹ Izirẹlịapụ ma tomina-ogbo mẹmgba ḅo in Si kẹ koro ịkpa mẹ tẹ Ẹlimu na Sayịnayị na ogboku emi ye mẹ lam, ini Ijiputi ama mẹ koroma-so tẹ maaịn karama akalụ mẹ ḅẹ jei aḍin karama eneḅaka ḅụ. 2Tẹ bebe Izirẹlịapụ ma tomina-ogbo mẹ ịkpa mẹ ḅio mbụrụmbụrụ Mozizi na Erọnị na pịrịm, 3tẹ ịn ḅẹẹm, “Mimgbe wa kọkọ Ijiputi ama mẹ ḅụ sime tẹ KỊNỊNYANAḄỌ ḅe ḅara ḅẹ fịị kọn tẹ, wa iḅi afịaị ma akaka lẹgị-sime tẹ fị-fị furo ḅinmarị sakị mẹ, ọ́ gbala wa pakama mị ịkpa mẹ ḅio ḅo tẹ ḅuru-pọkọtarị kẹ mị bebe inweni-ogbo mẹ ḅaa ḅẹm.”

4 # Jọn 6.31 Anịtẹso KỊNỊNYANAḄỌ ḅe nwẹnị Mozizi ḅẹẹ, “Ḍikii, So-ḅio à fịye kẹ eene sara ḅara sara ọ́ pịrị ḅa, anịsakị tomi ma paka-mu ene mẹ ḅụ ịn fị ḅarị kiri kobiri ọkị ḅa ene-ḅaaene-ḅaaene, tẹ arị ịn sime-ḅara-ḅara ḍọkị nimi ḅa, ini ì oloko ḍiki mẹnjị ḅẹ na, ịn mẹnjị ḅịa na, 5Sonio aḍin karama ene ḅụ, ini ini ọkị-ḅo ye tẹlẹma ḅẹ sakị, anị ini ene-ene ḅụ kobiriarị ye mẹ ḅe maa akiri sọ ḅa.”

6Mie ḅụ Mozizi na, Erọnị na nwẹnị Izirẹlịapụ mamgba ḅẹẹ, “Ḅoḅiri-so ḅụ ó nimi ḅa mịnẹ KỊNỊNYANAḄỌ ḅe mie Ijiputi ama mẹ ḅio ọ́ pakama-ḅo ḅọọ, 7anịsakị dede-ḅio ḅụ ọ́ KỊNỊNYANAḄỌ ḅe ebube mẹ ẹrị ḅa, gbala ọ́ kọn KỊNỊNYANAḄỌ ḅe pịrịarị mbụrụmbụrụ ma ori arị naa tẹ. Kẹ gotẹ ọkọ ḅẹẹarị, wamịnị ḅọrọ tiye mịẹ apụ tẹ ọmịnị mbụrụmbụrụ wa pịrị ḅẹ?” 8Anịtẹso Mozizi nwẹnị ḅẹẹ, “KỊNỊNYANAḄỌ ḅe ḅoḅiri-so ḅụ ọ́ pẹị ḅẹ nama kẹ ọ́ pịrị sakị, dede-ḅio ori ọ́ fị furo ḅinma ḅẹ fịye kẹ ọ́ pịrị ḅa, gbala KỊNỊNYANAḄỌ ḅe ọmịna mbụrụmbụrụ ma tẹ ọ́ kọn ọ̀ pịrị aị ma naa tẹ ẹrẹsị wamịnị ma anie tiye mịẹ apụ? Ọmịna mbụrụmbụrụ ma ọ́ kọn wa pịrị-a, KỊNỊNYANAḄỌ ḅe mie ọmịnị mbụrụmbụrụ pịrịarị ḅọ.”

9Mozizi nwẹnị Erọnị ḅẹẹ, “Izirẹlịapụ ma bebe tomina-ogbo mẹ ḅẹẹ ịn sọma-ḅo KỊNỊNYANAḄỌ ḅe tọrọkọ kpekii, kẹ gotẹ ọkọ ḅẹẹarị, ori ịna mbụrụmbụrụ ma naa tẹ.” 10Erọnị ẹkwẹn Izirẹlịapụ ma bebe tomina-ogbo mẹ pịrịarị ogbo, ịn nwẹnị tọrụ kẹ ịkpa mẹ da pakịrị ḍiki, tẹ KỊNỊNYANAḄỌ ḅe ebube mẹ nwẹnị kirikiri oḅuto mẹ ḅio ḅịya. 11Tẹ KỊNỊNYANAḄỌ ḅe nwẹnị Mozizi ḅẹẹ, 12“Àrị Izirẹlịapụ ma mbụrụmbụrụ ma naa tẹẹ. Ịn ḅẹẹ Lekirisi ḅụ ịn nama pẹị ḅa, anịsakị dede mẹ ḅio, ịn fịye fị ịna afuro ḅinma ḅa. Anịsakị ịn nimi ḅa mịnẹ yẹrị anie KỊNỊNYANAḄỌ ịna Tamụnọ ḅee.”

13Ḅoḅiri-so mẹ ḅụ kuweli nwẹn-sịn ḍọkọḍọkọ afeni nwẹnị ḅo akpụrụ-warị mẹ gbaịn-koro; tẹ dede mẹ ḅio igirigi sara akpụrụ-warị mẹ ikelema-korom. 14Igirigi mẹ samụnọ tẹso, ịkpa mẹ tọrụkuḅu ḅụ, kiri mẹ ọgọnọ ḍọkọḍọkọtẹ ịnyịnya kịka kpọ-a ḅara sime oḅoku kpootẹ igirigi yori-yori ḅara yori-yoriarị aị vooma sara tẹ. 15#1 Kọr 10.3Izirẹlịapụ ma anị ẹrị tẹso, ịn nwẹnị jụmọ-jụmọ gbela, “Mie tiye?” Ịn kẹ gotẹ ọkọ gbelarị, anị ḅọrọ tiye-o, tiye-o ịn nimi-a.

Tẹ Mozizi nwẹnị ịn ḅẹẹ, “Miemẹ anie fịye mẹ tẹ KỊNỊNYANAḄỌ ḅe kẹ ọ́ pịrị fị ḅẹ fịye mẹ. 16Mie KỊNỊNYANAḄỌ ḅe tọn tẹ ḅara: ‘Ọmịna ḅụ sime owiḅọ goḅọ-goḅọ mu anị ḅụ ori inetẹ fị ḅẹ ye la ḅara, la ḅara kobirii, ọrụḅọ-ọrụḅọ mḅọ akpụrụ-warị ḅio simearị atomi kịẹn-ḅịḅị la ḅara ọkịị, gbọrụḅọ-gbọrụḅọ gbọrụ ọkpụrụbịa ọkị ḅa.’ ”

17Izirẹlịapụ ma ọkọ mịẹm, ini ḅẹ jen-apụ kobiri ọkọ nẹngịmam, ja apụ la-a ḅara kobirim. 18#2 Kọr 8.15Kụma ini ọkpụrụbịa kẹ anị tọn sakị, ori ḅe tẹ ḅaka ḅara kobiri ḅọ ḅe, gbana ọ̀ pịrị ye ofori, anịsakị kalịye kobiri ḅọ ḅe sọ fa nyana-a. Ọrụḅọ-ọrụḅọ mḅọ inetẹ fị ḅẹ ḅara kobirim. 19Mozizi nwẹnị ịn ḅẹẹ, “Gbọrụḅọ-sọ anị ḅụ ye kọnma ene ḅaa-ma ma.” 20Kụma Mozizi ḍuko ye mẹ ịn poki-a; ja apụ anị ḅẹ ye fị kọnma ene-ḅaamam, tẹ anị nwẹnị si tẹ angule pakama-ḅo; tẹ Mozizi ịganị ịn pịrịm. 21Dede goyegoye ịn mu, mu anị kobirim ọrụḅọ-ọrụḅọ mḅọ inetẹ fị ḅẹ ye la ḅara, la ḅara tanm kụma ịrụa mẹ paka tẹ ọfịrị gbọrụ sakị anị sanị tẹ.

22Sonio aḍin karama ene ḅụ ịn kobiri-kobiri ḅara mẹ la ḅara ḅẹ maa akiri ịn nwẹn tanm, gbọrụḅọ maa ọkpụrụbịa, ọkpụrụbịa; tẹ tomina-ogbo mẹ ḅẹ tọrọkọ tarị apụ mamgba ḅo tẹ ḍuko Mozizi pịrị tẹso, 23#Pks 20.8-11ọ̀ nwẹnị ịn ḅẹẹ, “Miemẹ anie KỊNỊNYANAḄỌ ḅe tọn tẹ ye: ḅaa mẹ anie tẹmẹ-la Ịnyọsara-Ene, sime KỊNỊNYANAḄỌ ḅe pịrị fịafịa Ịnyọsara-Ene ọmịnị ọ́ fọị ḅẹ aị fọị, pịkị ọ́ sọọ ḅẹ aị sọọ; tẹ kirikọnye-kọnye mẹmgba kẹ wẹrị nwenii mu dede mẹ laa.” 24Anie ḅụ ini anị kẹ koroma wẹrị nwenii ḅo dede-ḅio lam, Mozizi wẹrịtẹ tọn ịn pịrị ḅara; tẹ anị si-a, tẹ angule gbọrụmgbọ-sọ anị ḅio paka-a. 25Mozizi nwẹnị ḅẹẹ, “Mịmgba ọmịnị anị fị, kẹ gotẹ ọkọ ḅẹẹarị, mịmgba anie KỊNỊNYANAḄỌ ḅe Ịnyọsara-Ene; mịmgba mẹ etela-ogbo ḅụ ọmịnị anị ḍọkị-ẹrị ḅịa. 26Sonio aḍin ọ́ nwẹn kẹ anị tan ḅa, kụma sọnọma aḍin karama ene mẹ, anie Ịnyọsara-Ene mẹ ḅụ, gberie-sọ paka ḅịa.”

27Sọnọma aḍin karama ene mẹ ḅụ tomi ma ḅẹ ja apụ anị tan ḅẹ paka-mum; kụma gbọrụmgbọ-sọ ịn ḍọkị-ẹrịa. 28KỊNỊNYANAḄỌ ḅe nwẹnị Mozizi ḅẹẹ, “Ọmịnị à tọn aị ma na, ì Oloko ma na sịkị mu tọ sakị la ḅẹ? 29Ḍikii KỊNỊNYANAḄỌ ḅe ọmịnị ịnyọsara ḅarị gbọrụ ene kẹ ọ́ pịrị tẹ, ọkọẹrẹsị sonio aḍin karama ene mẹ ḅụ ọ̀ maa aḍin ḅẹ fịye kẹ ọ́ pịrịarị; ọrụḅọ-ọrụḅọ mḅọ sime-yọ ḅụ simee; yee gbọrụḅọ-sọ mḅọ sime-yọ ḅụ saakị paka-so jen anga mu ma sọnọma aḍin karama ene mẹ ḅụ.” 30Anie ḅụ tomi ma sọnọma aḍin karama ene mẹ ḅụ ịnyọsaram.

31 # Kịẹ 11.7,8 Mịọkụ Izirẹlị warị mẹ ẹrẹ kẹ anị kurom Mana#16.31 Mana fiearị ye, Mie Tiye?; ịn kẹ koriyanda sịn ḍọkọḍọkọtẹ asịnmgbọlị sime-ḅara anị nwẹn simem, pịna-pịna wararị, ḅẹm kẹ sụatẹ mịẹ ịkịka ḅẹlẹ ḅara anị nwẹn ḅẹlẹm. 32Mozizi nwẹnị ḅẹẹ, “Miemẹ anie KỊNỊNYANAḄỌ ḅe tọn tẹ ye: yee ọmịnị anị ḅẹ gbọrụ ọkpụrụbịa koko mu ọmịna ḅụụ ḅụọ-fa-ḅụọ-paka la; mịẹtẹ ịn fịye mẹ tẹ àrị Ijiputi ama mẹ ḅio ọ́ pakama-ḅo sakị, ịkpa mẹ ḅio à kẹ ó koko ye mẹ ẹrị ḅarị ḅara.” 33#Hib 9.4Mozizi nwẹnị Erọnị ḅẹẹ, “Gbọrụ jongo ọkịị, tẹ mana nwẹn-sịn fịye mẹ ḅẹ gbọrụ ọkpụrụbịa kẹ anị ḅio sụa, tẹ anị kẹ KỊNỊNYANAḄỌ ḅe tọrọkọ koromaa, anị sime mu ọmịna ḅụụ ḅụọ-fa-ḅụọ-paka la ḅarị ḅara.” 34KỊNỊNYANAḄỌ ḅe tọn Mozizi pịrị ḅara, mie Erọnị anị kẹ Iḅi ḍuko-pakama yọ mẹ tọrọkọ koroma ye, anị koko sime ḅarị ḅara. 35#Jọs 5.12Tẹ Izirẹlịapụ ma kụra amesi kẹ mana mẹ fịm; ịn mana mẹ fị nwenii ịn ḅo ini anga na-iḅi anga lam, nwenii in ḅo Kenanị ama mẹ ḅe agara lam. 36Gbọrụ ọkpụrụbịa anie ịn kẹ ẹfa nwẹn-sịn ye-tọnye mẹ kẹ oyia akiri ḍiya ḅẹ gbọrụ kiri.

Currently Selected:

Paka-so 16: KBTP

Highlight

Copy