Ịmaakị 14

A mẹmẹ gẹ eyi Ijeesu

(Imt 26.1-5; Irk 22.1-2; Ịjọ 11.47-53)

1 # Kụra 12.1-27 Ọ sị vọ ẹkụhị ẹẹva, dị à rị eche ana aā hị́ Eche Ọyịparahu, ọnịrị eche ana a rẹ sịị̄ rị Ịbụrẹẹdị ọnị ọza ọ̀ yị mā sị òwù tụ́. Dị ohirẹsụ ẹbanyị irehi Ohomorihi beri ọzwọzọda nịnị ee sì oze ka ẹ́nị mẹ̀ vaa mẹ vene Ijeesuu za, dị ẹnị ẹ̀ na wụ ọọ nị. 2Dị ẹ ka asị a mẹẹ ịnị akakana eche, agụvị ka ịrazị va sị chị yị aza nị.

Ọnẹẹ ọnya ộ sị ụbanyị yị Ijeesu

(Imt 26.6-13; Ịjọ 12.1-8)

3 # Irk 7.37,38 Íjeesu mẹ̀ yà ịnị ẹkụra Ịbẹtanị, ini eehi Ịsayịmọnị ana vị ọnịkụ ọbanyị, dị aa rị ịsa, dị ọnẹẹ ọnya aanị vẹ nị. Ộ nyị eturare tụ́ ini ijogo ọnya aanị. Eturare ọnọọ ộ nị, dị ọ katarihi nị. Dị ọ dà ijogo ọnọọ irenu, dị aa và eturare ọnọọ hi Ijeesu ịrẹsụ nị. 4Dị aza ẹnyị yà ịzọọ, dị ẹyaa kụ́ ayị nị. Dị ẹyaa kà a yị ẹngụ ka, “Sị ẹ vẹ di ee du eturare ọnọnịị ha aanị? 5Ho! A yaanị nyẹngụ ná eturare ọnọnị ẹhụụ achuchu ẹẹta, dị a sị yị onosiye nịnị.” Dị ẹyaa tụ́ ọnẹẹ ọnọọ ohuvọ nị. 6Dị Ijeesu ka, “Naavọ hẹẹ nịnị! Sị ẹ vẹ dị ụ waa kụ́ ọọ kata a ẹngụ nịnị aanị? Ịsa ozoza ọ mẹ mị aanị nị. 7#Ọda 15.11Onosiye vị oni u wee re nịnị eyinị-eyinị; ịhị wèe sì nịnị, wa zụ mẹ wa ẹyịza nịnị. Ama ẹma rẹẹ̀ yị vaa yàa pe wu nịnị pooro nị. 8Ịsị ọ zụ mẹ, ọ mẹ avọọ nị. Ộ va sị eturare sisi mi ẹngụ tịtẹ, di è ve ne mi. 9Ịzẹyịza m maa kà a wụ nịnị nị, aha tụra aha ana àa yà aa kà enube ọyịza ọnọnị ịnị avaba ẹhẹ, a rẹ vaa kà ịsa ọnọọ mẹ aanị nị, dị aa sịị tamayị anị.”

Ijudasi ô sì iruvo Ijeesu

(Imt 26.14-16; Irk 22.3-6)

10Ijudasi Isikarịyọtị ana vị ọnya ini ezirẹma ẹwụrẹva, ộ nọ ịdị ohirẹsụ ẹbanyị irehi Ohomorihi. Ee sì ka ọnị ọ̀ sị Ijeesu chire wa ụvọ. 11Ịjị ẹnịnị maanị wụ́, dị ẹyaa jẹ nị, dị ẹ ka ẹnị vaa sị ẹkẹhịị yị Ijudasi nị. Di o kuku ee sì oze ọnị ọ vaa zịị sị Ijeesuu chire wa ụvọ nị.

Ijeesu ọnịrị ezirẹma anị ệ rị Eche Ọyịparahu

(Imt 26.17-25; Irk 22.7-14,21-23; Ịjọ 13.21-30)

12O si tù ẹkụhị ịpaapa ini Eche Ịbụrẹẹdị ẹnẹ ẹ̀ yị nyị òwù. Ịhị ọnọọ a rẹ sịị̄ wụ ozi ịdẹba Eche Ọyịparahu nị. Dị ezirẹma Ijeesu va họ̀ ọ ka, “Ịzị u wee sì ka ye ne tenyi tịtẹ yị wụ, dị ụ wa na yà rị Eche Ọyịparahu?” 13Dị ọ tụ́ ezirẹma anị ẹẹva ụtụ dị ọ kà, “Nọ ịnị ẹkụra ọsọọ, ka ụ vaa gẹrị ọnọrụ ọnya ana sị ụnọkọ dà enyi, dụ ọọ na. 14Irehi ọnị ọ̀ọ na ngụ, kà a yị adarehi ọnọọ nịnị ka: ‘Ọga kà: Ịzị aha oyichi ọzọga yà, ịzị ọnịrị ezirẹma anị vaa rị ịsọyịrị Eche Ọyịparahu?’ 15Ọza ọnọọ vaa zụ̀ wụ nịnị atapa ọbanyị ọnya ẹ́bẹẹba, enee si tenyi, dị ụ wa kụ avaba ịsa oni yee sì hi ịzọọ yị nịnị.” 16Dị ezirẹma anị ẹnẹẹ si hu, dị ẹ na ngụ ịnị ẹkụra ọnọọ nị. Ẹnịnị ee re e íjeesu mẹ̀ yị kà a yị wa gẹdẹ-gẹdẹ. Di e tenyi ịzọọ tịtẹ yị Eche Ọyịparahu nị. 17Ịjị oruva si tù, dị Ijeesu ọnịrị ezirẹma anị ẹwụrẹva vẹ nị. 18#Ahẹ 41.9Ẹ mẹ̀ yaayịtẹ, dị ẹyaa rị ịsa, dị Ijeesu ka, “Ịzẹyịza m maa kà a wụ nịnị nị, ọza ịnyara ịnị awụ nịnị ẹnẹ ẹmịrịị aa rị ịsa, vaa sị mịị chire ọnịvị amị ụvọ.” 19Ayị ẹnịnị ọ sị vazi, dị ẹyaa sị ọnya-ọnya họ̀ ọ ka, “Ẹmị wáá yọ?” 20Dị Ijeesu tụ́ ohi, dị ọ ka, “Ọnyara ịnị ẹngụ ẹwụ nịnị ẹwụrẹva ẹnẹ ẹmịrịị aa jị ụvọọ ngụ ẹnya ọnya aanịị yọ nị. 21Ẹmị Ozi ọza onigirima ve nee sú anka Íwe Ohomorihi mẹ̀ kà a. Ama ọ vaa daa divi yị ọza ana àa sị mị chire ọnịvị amị ụvọ; ọ yaanị dahi ka asị a vana ma ọza ọnọọ vụrụ-vụrụ.”

Ịsa oruva ọdịrẹma

(Imt 26.26-30; Irk 22.14-20; 1 Ịkọ 11.23-25)

22Ẹ́nịnị màa rị ịsa, dị Ijeesu sị Ịbụrẹẹdị, dị ọ mẹ̀ aduwa tụ́ ọọ nị. Ộ dà a, dị ọ sị yị ezirẹma anị nị. Dị ọ ka, “Dọ, dị ụ wa rị ọọ nịnị, ọsọnị ọ vị ẹngụ amị nị.” 23Dị ọ rẹ sị ako anaa sị ká eche tịtẹ nị; ịjị ọ sị Ohomorihi kụ́ avọ, dị ọ sị yị wa, dị avaba ẹnịnị hú ịnị anị nị. 24#Kụra 24.8; Ijer 31.31-34Dị Ijeesu kà a yị wa ka, “Ọsọnị ọ vị anya amị nị, ana vị oto ọwọọwa, oni mi vee chee sẹ́ ẹtẹ yị aza ọrụrụ-ọrụrụ. 25Ịzẹyịza m maa kà a wụ nịnị nị, me mē vene hú eche ọnọnị pooro ne tù ẹkụhị oni mi vee hú ọọ ọwọọwa ịzị Ohomorihi yà aa mẹ ịjọva.” 26Dị ẹ jị ahẹ ọnya, dị ẹ hụụ ịzọọ, dị ẹyaa nọ ịnị Ataba Orivi nị.

Ijeesu ka Ipita vaa navọ ọnị

(Imt 26.31-35; Irk 22.31-34; Ịjọ 13.36-38)

27 # Iza 13.7 Ijeesu ộ kà a yị wa ka, “Avaba awụ nịnị vee zwee hụrẹ mị ẹngụ, agụvị ka Iwe Ohomorihi ộ kà a ka: ‘Mi vee tụ́ Oseratẹmẹ, dị atẹmẹ nịnị gara hi.’ 28#Imt 28.16Ama Ịjị Ohomorihi ọ̀ọ sị mị ha hụụnị isu, mị vaa dọ ọvịdị awụ nịnị na ngụ Igariri.” 29Dị Ipita kà a yọ ka, “Avaba aza ẹ̀ẹ daka zwe hụrẹ wụ ẹngụ, emi e yi vee zwe!” 30Dị Ijeesu kà a yọ ka, “Ịzẹyịza m maa kà a wụ nị, ịnị ịrahụ ana aa vẹ aanị, dị ụkọrọ ò ve nowu gụ ụpẹ ẹẹva, ụ vaa kà a tù ụpẹ ẹẹta ka wẹ yị yẹ mị.” 31Dị Ipita sị ahụ kà aba baaba nị, dị ọ ka, “Àa daka aa wụ mịị beri ewu, mẹ yị vaa kà a ka mẹ yị yẹ wụ.” Dị ezirẹma ana vọ ẹnị rẹ vavọọ sị irenu tọ̀ ọnya nị.

Ijeesu ộ mẹ̀ aduwa ịnị ụbazị Ịgẹtịsẹmanị

(Imt 26.36-46; Irk 22.39-46; Ịjọ 18.1)

32Ẹnịnị e ve tù ịzị aā hị́ Ịgẹtịsẹmanị. Dị Ijeesu kà a yị ezirẹma anị ka, “Yaayịtẹ ịzẹnị nịnị, ka maa naa mẹ̀ aduwa!” 33Dị ọ sị Ipita ọnịrị Ijemiisi beri Ịjọọnụ aa na nị. Ẹngụ ô nyima aa jị Ijeesu obe, dị ẹngụ anị aa vaa hi nị. 34Dị ọ kà a yị wa ka, “Ayị oyidu aa vaa wụ̀ mị. Jẹẹ ịzẹnị nịnị, dị ụ wa sị eyi pe ẹtẹ nịnị!” 35Dị ọ kà nọ ọvịdị chee, dị ọ và ku ẹtẹ, dị aa mẹ̀ aduwa nị. Dị ọ ka ọ̀ọ yaanị wụra mẹ, ụmẹ ụyọrị ọnọnị ọ̀ ha hụrẹ ọnị ịrẹsụ. 36Dị ọ rẹ ka, “Ada amị, ada amị, ẹ yị nyị ịsụ wẹ̀ yị zụ mẹ. Sị ako ụyọrị ọnọnị kwooze mi! Ama ẹ yị vị ịsị mi sì, ẹ̀ yị vị isu wèe sì.” 37Dị ọ varẹma ve tù ezirẹma anị, di o ve tù ka ẹyaa sụ ara nị. Dị ọ kà a yị Ipita ka, “Ho! Ịsayịmọnị, ụ waa sụ ara nịị? Wẹ yị nyẹngụ sị eyi pe ẹtẹ ụmẹ cheee? 38Sị eyi pe ẹtẹ, dị ụ waa mẹ̀ aduwa, agụvị asị ụ ngụ ịnị ọyịzamare nịnị. Ịzẹyịza, ayị awụ nịnị ee sì ka ọnị ọ̀ mẹ̀ ịsa ozoza, ama ọchẹngụ awụ nịnị vị ọkụmị.” 39Dị ọ rẹ varẹma na mẹ̀ aduwa, dị ọ rẹ kà ịrẹyị ọnị ọ vịdị kà nị. 40Íjeesu mẹ̀ rẹ vẹ, di o re ve tù ka ẹ rẹ yaa sụ ara nị, agụvị ka ara ee hine wa ẹtẹẹtẹrẹ. Ẹnịnị ẹ yị yẹ ịsị a vọrọ ka ẹ̀ kà yọ. 41Ijeesu ộ vavẹ ụpẹ ọhụta, dị ọ ka, “Ụ waa yịị sụ ara nịnị, dị ụ raa tụ́ ụhwọ́ nịnị nịị? Ô ze! Ụmẹ o si tù; re, aa vaa sị ẹmị Ozi ọza onigirimaa chire ọnịvị amị nịnị ụvọ. 42Kwẹẹtẹ, ya na nịnị! Ọza ana aa sị mịị chire ọnịvị amị ụvọ, aa vaa ngụ ịzẹnị.”

Â za Ijeesu

(Imt 26.47-56; Irk 22.47-53; Ịjọ 18.3-12)

43Íjeesu mẹ̀ yị yà ịnị ịrẹyị aa kà kẹnẹ, dị Ijudasi, ọnya ini ezirẹma ẹwụrẹva vẹ nị. Ộ wara aza saasa ẹngụ vẹ; aza ẹnẹẹ ệ kụ́ ụhwọ beri arubebe za. Ohirẹsụ ẹbanyị irehi Ohomorihi ọnịrị ọzwọzọda nịnị ẹ tụ́ wa vẹ nị. 44Ọza ana aa naa sị Ijeesu chire ọnịvị ụvọ, ộ vịdị raà sị apọtẹrẹwa ọnya yị wa, ọ ka, “Ọza ọnị mèe kú irenu, ọnịị yọ nị, za a nịnị, dị ụ wa sị ọọ wa na nịnị! Dị ụ sị eyi pe e nịnị!” 45Ịjị Ijudasi vẹ, dị ọ wụsẹ ne tù Ijeesu, dị ọ ka: Nda, di o kú ọọ irenu nị. 46Dị ụvọ aza ẹnẹẹ ngụ ọọ, dị ẹ za a nị. 47Dị ọza ọnya ana jẹẹ ịzọọ, tụ̀ ụhwọ anị, dị ọ sị jị ozi ahụ ohirẹsụ ọbanyị irehi Ohomorihi ụtọ nị. 48Dị Ijeesu kà a yị wa ka, “Ẹmị ụ kụ́ ụhwọ ọnịrị arubebe aa vaa za nịnị anka oyi avọọ nịnị? 49#Irk 19.47; 21.37Eyinị-eyinị ẹmịrị ẹwụ nịnị ộ yà ini irehi Ohomorihi, dị maa zụ̀ wụ nịnị ịsa nị, wẹ yị za mị nịnị. Ama ẹ yị zụ nyị ka Iwe Ohomorihi ọ yị sẹ.” 50Dị avaba ezirẹma anị na a vọ tịtẹ, di e si zwe nị. 51Â nyị ozwọọmụha ọnya aanị ana sị ịta kẹnẹ kú ẹngụ, dị aa dụ Ijeesuu na nị. Dị aza ẹnẹẹ ka ẹnị ẹ̀ za a nị. 52Ộ wụsẹ navọ ịta anị yị wa, di ee zwee na ịnị ahwaahụ nị.

Â za Ijeesu nọ ikootu

(Imt 26.57-68; Irk 22.54-55,63-71; Ịjọ 18.12-14,19-24)

53Ệ za Ijeesu nọ ịdị ohirẹsụ ọbanyị irehi Ohomorihi. Dị avaba ohirẹsụ ẹbanyị irehi Ohomorihi ọnịrị ọdọvịdị nịnị ne beri ọzwọzọda nịnị wara gụ ịzọọ nị. 54Ipita ộ saasa Ijeesu ẹ́nẹẹnẹ huuu na ngụ ini ohweje irehi ohirẹsụ ọbanyị irehi Ohomorihi. Dị ọnịrị ezi ahụ nịnị yà ịzọọ, dị aa wà ịra nị. 55Ohirẹsụ ẹbanyị irehi Ohomorihi beri avaba ọmọkarẹyị ee sì ịrẹyị ẹnẹ ẹ vaa kà a ka Ijeesu ộ mẹ̀, agụvị dị ẹ̀ zụ wụ ọọ. Ama ẹ yị nyị ịrẹyị ene e re. 56Onivenu ọrụrụ-ọrụrụ ê dọ ivenu ireche kú Ijeesu. Ama ivenu ẹnịnị ẹ yị jịrị ẹngụ. 57Dị aza ẹnyị kwẹẹtẹ, dị ẹ dọ ivenu ireche kú ọọ nị, dị ẹ ka, 58#Ịjọ 2.19“Yâ wụ́ ka ộ kà a ka oni vee wú irehi Ohomorihi ọnọnị ana a sị ụvọ dà aanị; ịnị ịhyẹgwẹta anị ọnị rẹ vaa dà ọsa ẹnẹ ẹ̀ yị vị ụvọ a sị dà a.” 59Ama ivenu ẹnịnị ẹ yị hyakụ jịrị ẹngụ. 60Di ohirẹsụ ọbanyị irehi Ohomorihi kwẹẹtẹ jẹẹ ọ́vịdị ẹnịnị, dị ọ họ̀ Ijeesu use ka, “We yi tụ́ ohii? Waa wụ́ ịsị aza ẹnẹnị ka waa mẹ aanị?” 61Dị Ijeesu kú irenu, di ò yi tụ́ ohi nị. Dị ohirẹsụ ọbanyị irehi Ohomorihi rẹ ka, “Ẹ wáá vị Ikirisiti, Ozi Ohomorihi nị?” 62#Ịda 7.13Dị Ijeesu ka, “Ẹ mịị yọ nị. U vee re ẹmị Ozi ọza onigirima ka mâ yaayịtẹ eyi ụvọrị Ohomorihi Ochẹtẹngụ. Mị vaa vẹ ịnị eguhi ẹ́bẹẹba.” 63Dị ohirẹsụ ọbanyị irehi Ohomorihi ọnọọ kụ́ ayị, dị ọ za awuru anị, dị ọ na a chaara nị. Dị ọ ka, “Si i kuku ee sì onivenu aa mẹ? 64#Ire 24.16Wáá wụ́, ọ màa kụ̀ Ohomorihi ụhụ nịnị? Si u ro nịnị?” Dị avaba ẹnịnị jị ịvị yị Ijeesu, ka ộ rị ịvị isu nị; 65Dị aza ẹnyị aa jị atẹẹ kú ọọ, dị ẹ sị ịsa kú ọọ eyi, di eyee hú ọ ọsẹ nị. Dị ẹ ka, “Kà ẹ yị di a re, ene ee tụ́ wu aanị!” Dị ezi ahụ aa nya a arụhwọtọ nị.

Ipita ka ọnị ọ yị yẹ Ijeesu

(Imt 26.69-75; Irk 22.56-62; Ịjọ 18.15-18,25-27)

66Ípita ọnị mẹ̀ yà ụvẹtẹ ini ohweje, dị ọnyara ini ezi ahụ anẹẹ ohirẹsụ ọbanyị irehi Ohomorihi vẹ nị. 67O mè re Ipita ka aa wà ịra, di o jị eyi ngwọ ọ nị, dị ọ ka, “Aa! Ẹwụ vị ana rẹẹ̄ dụ Ijeesu Anịnazarẹtị ọnọọ zị bẹẹ!” 68Dị Ipita aa kụ́ ka, “Mẹ yị yẹ ịsị waa kà aanị; mẹ yị hyakụ yẹ.” Di o si hu aa nọ enoze, dị ụkọkọrọ nowu nị. 69Dị ozi ahụ ọnẹẹ ọnọọ re ve re Ipita, dị aa kà a yị aza ana jẹẹ ịzọọ ka, “Ọza ịnya ịnị ẹnịnị yị.” 70Dị Ipita raa kụ́ nị. Ịjị ọ da kù chee, dị aza ana jẹẹ ịzọọ ka, “Ịzẹyịza yọ, ọza ịnyara ẹnịnị ụ vị nị, agụvị ka Anigariri ụ vị nị, ẹkụra awụ ộ sị zụ̀.” 71Dị Ipita kwẹẹtẹ, di ee chì hi ẹngụ anị nị, dị aa hyeku nị, dị ọ ka, “Mẹ yị yẹ ọza ọnị ụ waa kà nịnị aanị.” 72Kẹnẹ, dị ụkọkọrọ ụpẹ ọhụva nowu nị. Dị Ipita tamayị, Íjeesu mẹ̀ vịdị kà a ka, “Dị ụkọkọrọ ò nee nowu gụ ụpẹ ẹẹva, ụ vaa kà a tù ụpẹ ẹẹta, ka wẹ yị yẹ mị.” Ịjị o ro o, dị ọ mẹ orere kẹ nị.

Currently Selected:

Ịmaakị 14: EBTP

Highlight

Copy