Ịmaakị 13

Apọtẹrẹwa ẹzẹtẹ ẹhẹ

(Imt 24.1-35; Irk 21.5-33)

1Íjeesu màa jịnẹ hụụnị irehi Ohomorihi vẹ, dị ozirẹma anị ọnya ka, “Nda, aa! Wee re ịrẹta ẹnẹnị ọnịrị irehi ozoza ẹnẹnị!” 2Dị Ijeesu tụ́ ohi ka, “Wee re irehi ẹbanyị ẹnẹnị? Ẹ yị nyị ịrẹta ikonya ana a vaa navọ tụ́ ịrẹsụ ọsa. Vị e vee wú wa ha saka-saka nị.” 3Ijeesu ộ nọ ịrẹsụ Ataba Orivi, dị ọ yaayịtẹ, dị ọ và eyi ká irehi Ohomorihi nị. Dị Ipita ọnịrị Ijemiisi ne beri Ịjọọnụ ọnịrị Andụrụ tangwa họ̀ ọ use, dị ẹ ka: 4“Kà ẹ yị ụmẹ ọnị ịsa ẹnẹnị vaa sị mẹ. Sị ẹ vị apọtẹrẹwa ana vaa sị zụ̀ ka ịsa ẹnẹnị aa vaa mẹ?” 5Dị Ijeesu nyima nị, dị ọ ka, “Sị eyi pe ẹngụ awụ nịnị, oo! Asị ụ zẹẹ ka è vene wu nịnị! 6Aza ẹnyị vaa rị ịrẹha amị, dị ẹ vẹ dị ẹ ka ẹnị ẹ vị Ọdọzaha nị, dị ẹ sị aza ọrụrụ-ọrụrụ vene. 7Ịjị ụ wàa wụ́ ekuku ịrẹkụ nịnị ọnịrị ụha ịrẹkụ, asị ụ zẹẹ ka ayị awụ nịnị ọ̀ vazi. Ẹ yị zụ nyị ka ọyị vavọọ yà; ama ẹzẹtẹ ẹhẹ ọọ̀ yị vẹ. 8Anẹkụra ẹnyị vaa kwẹẹtẹ tù ọsa, dị ẹkụra ohinọyị ẹnyị rẹ kwẹẹtẹ tù ọsa. Ẹtẹ vee henyi jigi-jigi aha ọrụrụ-ọrụrụ, ụngwẹ vaa kụ̀. Avaba ẹsẹnị aa sịị zụ̀ ka vị ụyọrị sẹsẹ nyima avọọ nị. 9#Imt 10.17-20; Irk 12.11,12Sị eyi pe ẹngụ awụ nịnị! A vaa za wụ nịnị nọ ini ikootu, di e re tụ́ wu nịnị ini irehi ahẹkẹ Aniju nịnị. A rẹ vaa za wụ nịnị naa jẹẹ ọvịdị ohirẹsụ ọnịrị ohinọyị nịnị agụvị amị, agụvị dị ụ wa dọ ivenu amị yị wa nịnị. 10Â nyị ka à kà enube ọyịza yị avaba anẹhẹ dị ọdịrẹma ẹhẹ ọ̀ vavẹ. 11Ịjị àa za wụ nịnị nọ ini ikootu, asị u ro ịrẹyị ọnị ụ vaa kà tịtẹ nịnị! Ịjị ụmẹ òo si tù gẹdẹ-gẹdẹ, ịsị Ohomorihi ọ̀ọ sị tụ́ wụ nịnị irenu, ụ kà a nịnị; agụvị ka ẹ yị vị ẹwụ nịnị ụvọta aa kà ịrẹyị, Ụhwẹ Ọnịnịị yọ nị. 12Ẹyịnyara ẹnyị vee sì iruvo ọsa, dị a wụ ọọ. Ada vee sì iruvo ozi anị. Di ezi kwẹẹtẹ tù aza ana ma wa, dị ẹ wụ̀ wa. 13#Imt 10.22Dị avaba aza aa nyị ịhyẹrẹ awụ nịnị kẹnẹ agụvị amị. Ama, ọza ana àa zụ sị ẹngụ dọ ọ pooro ne tù ọdịrẹma, ọnị a vaa dọ ọ há nị. 14#Ịda 9.27; 11.31; 12.11U vee re ‘Ịsa Odivi eneē chire ọza angwa’ (ọnị Ịdanịyẹrị ọnịsẹ kà ịrẹyị anị) ka ọ yà ịzị ẹ̀ yị vọrọ ka ọ̀ yà. (Ọza ana aa kà iwe ọnọnị, ò re ka ọnị ộ yẹ ịrẹyị ọnọnị!) Ịjọnọọ aza ana àa yà Ijudiya è zwe nọ ịrẹsụ ataba. 15#Irk 17.31Ọza ana àa yà ịrẹsụ irehi, asị o chí nọ ini eehi na sị ịsọnyị-ịsọnyị! 16Ọza ana àa rẹ yà ịnị aarẹ, asị ọ varẹma nọ ini eehi na sị awuru anị! 17Ọ vaa daa divi yị ọnịrẹẹ nịnị ọnịrị aza ana sị ozi rị ụvọ ịhị ọnọọ. 18Waa mẹ̀ aduwa nịnị, ka asị ịrẹyị ẹnẹẹ mẹ ịnị ụmẹ ọgụ, 19#Ịda 12.1; Ẹtẹ 7.14agụvị ka ịhị ọnọọ, ụya ene vee chí hi ẹtẹ, ẹ̀ yị vịdị vavọọ nyị ụya da, Óhomorihi mẹ̀ hụrẹ mẹ ẹhẹ pooro ve tù ọyaanị; a mā rẹ vana vavọọ nyị ị́rẹma anị. 20Ẹ̀ yị vị Ananyị yị nyị hụụnị ẹkụhị ẹnẹẹ, ẹ yị hyakụ nyị ọza ikonya ana aa há. Ama agụvị aza ọnọọ sị nyị, ộ nyị hụụnị ẹkụhị ẹnẹẹ. 21Ụmẹ ọnọọ, ọza ọ̀ọ ka a wụ nịnị ka: ‘Re, Ikirisiti yọ’ à vị ka: ‘Re, ọnị ọ yà ịzọsọọ avọọ nọ’, asị ụ dọ ọ wụ́, 22agụvị ka onireche nịnị ana ka ẹnị vị Ikirisiti, ọnịrị ọnịsẹ ireche nịnị vaa kwẹẹtẹ, dị ẹyaa mẹ̀ ụkọrọ ohyozirenu ẹbanyị-ẹbanyị, agụvị di è si vene aza. Ẹ hyakụ vaa sịị vụrị ka eni è vene aza oni Ohomorihi sị nyị bẹẹ. 23Ama sị eyi pe ẹngụ awụ nịnị, oo, agụvị ka mê vịdị juntu sị ọọ kà a wụ nịnị! 24#Ayị 13.10; Ijow 2.10,31; 3.15; Ẹtẹ 6.12; Ayị 13.10; Ezk 32.7Ama ịjị ụmẹ ụya ẹnẹnị ọ̀ọ ta, ọyị vee hozi, ụhwẹ ọ yị kụkụ vaa vwẹtẹ, 25#Ayị 34.4; Ẹtẹ 6.13; Ijow 2.10dị ụzọmị nịnị jị hụụnị ihinẹba, dị ụkata ẹbẹẹba re henyi. 26#Ịda 7.13; Ẹtẹ 1.7Di e vene re ka ẹmị Ozi ọza onigirima aa vẹ ini eguhi beri ụkata ọnịrị igirima. 27Dị mị tụ́ anggẹẹrị nịnị ka ẹ̀ nọ avaba ẹhẹ, dị ẹ̀ na kụ́ avaba aza amị ọnị mị nyị gụ hụrẹ avaba aha ịzị ẹhẹ ọnịrị ẹbẹẹba na ta hi. 28Agụvị avọọ, sị ọchị ezu zama ịrẹyị ọnọnị re nịnị; Ịjị àa ha avọ, di ee nyị avị nị, wâ yẹ nịnị ka ị̀rẹ̀sụ̀ aa vẹ. 29Avọọ gẹdẹ-gẹdẹ wèe re ka ịsa ẹnẹnị aa mẹ nịnị, yẹ nịnị ka maa vaa vẹ, mâ hyakụ va sị ngụ enoze bẹẹ. 30Ịzẹyịza m maa kà a wụ nịnị nị, aza ene hi ẹhẹ booro aanị, ẹ yị vaa taa hụụnị ẹhẹ dị avaba ịsa ẹnẹnị ẹ̀ mẹ. 31Ihinẹba ọnịrị ẹhẹ vaa ta, ama àa vị ịrẹyị amịị yọ, o yi vee vú.”

Ẹ yị nyị ọza ana yẹ ẹkụhị ọnịrị ụmẹ ọ́yị vẹ Ijeesu

(Imt 24.36-44; Irk 12.38,40)

32 # Imt 24.36 “Ama ẹkụhị ọnọọ ọnịrị ụmẹ ọnọọ gẹdẹ-gẹdẹ, ẹ yị nyị ọza ana yẹ. Anggẹẹrị nịnị ene hi ẹbẹẹba ẹ yị hyakụ yẹ. Ozi Ohomorihi ọnị ụvọta ọ yị hyakụ rẹ yẹ bẹẹ, ẹ̀ yị vị Ada amị ọnịnya kẹnẹ. 33Sị eyi pe ẹtẹ nịnị, di u wee zí nịnị, agụvị ka wẹ yị yẹ ịjị ụmẹ ọnọọ vee tù nịnị. 34#Irk 12.36-38Vị ọ sị mẹẹ anka ọza ana aa hụrẹ eehi, dị ọ sị irehi anị chire ezi ahụ anị ụvọ, dị ọ ka è sị eyi pee nị. Dị ọ sị ụkọrọ yị ọzọza, dị ọ rẹ ka oserẹtẹ òo sere ẹtẹ nị. 35Agụvị avọọ sị eyi pe ẹtẹ nịnị, oo, agụvị ka wẹ yị yẹ ụmẹ ana adarehi aa sịị vẹ nịnị. Ọ zụ vẹ ụmẹ oruva, ọ rẹ zụ vẹ agẹvịrahụ, àa vị ụkọkọrọ ọ̀ọ maanị nowu kẹnẹ, ọ rẹ zụ vị ẹnẹnẹ viri-viri. 36Asị ahịka ụ waa sụ ara nịnị, dị ọ vana vẹ asigiri nị. 37Ịsị mị kà wụ nịnị aanị, mị rẹ kà yị avaba aza nị: Sị eyi pe ẹtẹ nịnị, oo!”

Currently Selected:

Ịmaakị 13: EBTP

Highlight

Copy