Ịmaakị 12

Ụhịrẹyị aza edivi ana a dà ẹtẹ yị

(Imt 21.33-46; Irk 20.9-19)

1 # Ayị 5.1,2 Dị Ijeesu nyima aa sị ụhịrẹyịị kà ịrẹyịị yị wa nị; dị ọ ka, “Â nyị ọza ịnya aanị ana dà ụbazị, dị ọ hị́ ọchị ana aā hị́ ịvayịnị tụ́ ịnị anị nị. Dị ọ rẹ họ̀ kara a nị. Ộ jị ụkọ ịzị a vaa yàa kwọrọ ẹtụtụ ọchị ẹnẹẹ, dị ọ re hi ụta oserẹtẹ tụ́ ọọ nị. Ộ sị ụbazị ọnọọ rere aza ẹnyị aanị ka ọnị ọ̀ọ dọ wa ọtụrọsarẹsụ anị. Di o si hu aa hụrẹ eehi nị. 2Ịjị ụmẹ anị si tù, dị ọ tụ́ ozi ahụ anị ọnya ne tù aza ẹnẹẹ ọnọọ dà ẹtẹ yị, ka ọ̀ na dọ ẹtụtụ ana vị áanị va yị ọnị nị. 3Dị aza ẹnẹẹ za ozi ahụ ọnọọ, di e tụ́ ọọ, dị ẹ dụ ọọ avosusu na jịnẹ nị. 4Dị ọza ana nyị ụbazị ọnọọ rẹ tụ́ ozi ahụ anị ọsa na nị. Di e hú ọọ ọsẹ ịnị ịrẹsụ, dị ẹ ha ịrẹsụ, dị ẹ mẹ̀ ụhị nyị ọọ nị. 5Dị ọ rẹ tụ́ ọza ẹnẹsa na nị; dị aza ẹnẹẹ kụkụ za a, dị ẹ wụ ọọ nị. Avọọ ẹ mẹ̀ yị mẹ, ịsa edivi hi aza ọrụrụ-ọrụrụ nị: Ê tụ́ aza ẹnyị, dị ẹ wụ̀ aza ẹnyị nị. 6Ọza ana nyị ụbazị ọnọnị ộ nyị ozi ọnya chọchọchọ̀ ọnọrụ oni o sì ịrẹyị anị ẹtẹẹtẹrẹ. Ọnị ọ tụ́ na ọdịrẹma nị, dị ọ ka: ‘Ẹ vaa nyị ịrẹsụ ọkahii yị ozi emi.’ 7Dị aza ẹnẹẹ ana a dà ẹtẹ yị, kụkụ gẹ eyi nị, dị ẹ ka: ‘Ozi ọnọnị ọ vaa kụ́ ogu ada anị nị; à vẹ ya wụ ọọ nịnị, di ogu anị ọ̀ kụkụ vị áayị!’ 8Dị ẹ za a, dị ẹ wụ ọọ nị; dị ẹ sị ọọ ne ngụ ịrẹma ụbazị nị. 9Si u ro ka ọza ana nyị ụbazị ọnọọ vaa mẹ? Vị aa vẹ, dị ọ va wụ̀ aza ẹnẹẹ nị; dị ọ sị ụbazị ọnọọ yị aza ẹnẹsa. 10#Ahẹ 118.22,23Aanịka wẹ yị kà Iwe Ohomorihi ana kà a ka: ‘Ịrẹta ọnọ ọtụrarehi nịnị yi tịtẹ, ọnị ọ vana vị ọọnyị ịnị ịrẹta anaa sịị̄ dà irehi nị. 11Ananyị yị ọ maanị mẹ nị; ô hí yi irenu!’ ” 12Ọdọvịdị Aniju nịnị ê sì oze ka ẹnị ẹ̀ za a, ama angwa aza ee hí wa. Ệ yẹ ka eni ee che ụhịrẹyị ọnọọ yị nị. Dị ẹnịnị na a vọ, di e si hu aa na nị.

Ịrẹyị ẹkẹhị irehi

(Imt 22.15-22; Irk 20.20-26)

13Â tụ́ Anihwarisi nịnị ẹnyị ọnịrị aza Ịhẹrọdị nịnị nọ ịdị Ijeesu ka ẹ̀ na sị ịrẹyị za a. 14Dị ẹ vẹ nị, dị ẹ kà a yọ ka, “Nda, yâ yẹ ka ọnịrẹyịzẹyịza ụ vị nị. Wẹ yị yẹ ọzọbanyị, agụvị ka we mē re eyi aza. Ama ịzẹyịza oze Ohomorihi kẹnẹ, ụ sịị̄ zụ̀ aza nị. Ọ́ọ́ vọrọ ka yaa tụ́ ẹkẹhị irehi yị ohinọyị Aniroomi, à vị ọ yị vọrọ? 15Yáá tụ́ ọọ, à vị asị ị rẹ̀ tụ́ ọọ?” Ama Ijeesu ộ yẹ ka ọbọ ẹyaa mẹ nị. Dị ọ kà a yị wa ka, “Sị ẹ vẹ dị ụ waa zama mịị re nịnị? Sị ẹkẹhị enyusẹ ọnyaa mị di a re di me re e!” 16Dị ẹ sị ẹkẹhị ọnyaa yọ nị. Dị ọ ka, “Ẹnị uhwoto anị ọnịrị ịrẹha anị yà ịnị anị aanị?” Dị ẹ ka óohinọnyị Aniroomi yọ nị. 17Dị Ijeesu kà a yị wa ka, “Ẹ̀hẹẹ, sị ịsa ana àa vị óohinọyị Aniroomi, yị ohinọyị ọnọọ nịnị; dị ụ wa rẹ sị ịsa ana àa vị ịsa Ohomorihi, yị Ohomorihi nịnị!” Ịrẹyị Ijeesu o si hí wa irenu.

Oku nịnị waa vanaa haa hụụnị isu?

(Imt 22.23-33; Irk 20.27-40)

18 # Ụkọ 23.8 Aza ẹnyị aanị ana aā hị́ Anisadusi nịnị, ệ ká Ijeesu vẹ. Ẹnịnị ẹẹ̄ kà a ka oku ẹ yị vaa haa hụụnị isu nị. Ệ họ̀ Ijeesu use ka: 19#Ọda 25.5“Nda, Imosiisi ộ chẹrẹẹ tịtẹ yị ka, ọza òo sú, dị ọ navọ ose anị tịtẹ nị, dị ọ̀ yị ma ozi nị, ọyịnyara anị ọ̀ kụ́ ọnẹẹ ọnọọ ogu, dị ọ̀ ma ozi yị ẹnẹbẹnị anị ene sú. 20A va nyị ẹyịnyara ịhịmba. Ị́ịpaapa ộ nyị ọnẹẹ, ọnọrụ ọnọọ ô wusu, ọ yị ma ozi. 21Ọhụva anị ọ rẹ kụ́ ọnẹẹ ọnọọ ogu, ọ yị ma ozi yọ, di oni re sú. Avọọ ọ́nọhụta ọnị mẹ̀ rẹ yà nị. 22Avaba ẹnị ịhịmba ệ nyị ọọ, ọ yị ma ozi yị wa, di e sú. Ọdịrẹma anị dị ọnẹẹ ọnọọ oni re sú nị. 23Ịnị ụmẹ oni oku nịnị vaa sị haa hụụnị isu, ẹ̀ẹ vaa haa hụụnị isu, ẹnẹ ọnẹẹ ọnọọ kụkụ vaa vị ose anị agụvị ka ẹnị ịhịmba ẹ vịdị nyị ọọ nị.” 24Dị Ijeesu ka, “Wáá yẹ ka we si nyeeyi nịnị? Agụvị ka wẹ yị yẹ Iwe Ohomorihi, wẹ yị rẹ yẹ ụkata Ohomorihi nịnị. 25Ịjị aza ẹ̀ẹ sị ha hụụnị isu, ẹ yị kụkụ vaa nyị ọnẹẹ, ọza ọ yị rẹ va sị ọnẹẹ yị ọva anị. Vị ẹ vaa sị mẹẹ anka anggẹẹrị ẹ́bẹẹba nịnị mẹ̀ yà avọọ nị. 26#Kụra 3.6Àa vị ka áá vaa ha oku nịnị hụụnị isu yọ, aanị ka wẹẹ̀ yị kà iwe Imosiisi nịnị da, Óhomorihi mẹ̀ kà a yị Imosiisi ịzị ọchị yà aa rị ịra ka: ‘Ẹma vị Ohomorihi Abụrahamị nị, dị mị rẹ vị Ohomorihi Ayiziiki nị, dị mị rẹ vị Ohomorihi Ijekọvụ nị.’ 27Ohomorihi ọ yị vị Ohomorihi aza ana ta, ama Ohomorihi aza ana yàra. Wee re ka we si nyeeyi nịnị ẹtẹẹtẹrẹ aanị.”

Ye re ọda ene hu keekere

(Imt 22.34-40; Irk 10.25-28)

28Ọza ịnya ịnị ọzwọzọda nịnị yà ịzọọ. Ộ wụ́ ịrẹyị ẹnẹ ẹyaa kụ́; o re re, Íjeesu mẹmẹ tụ́ wa ohi ẹtẹẹtẹrẹ. Agụvị avọọ dị ọ ká Ijeesu vẹ, dị ọ họ̀ ọ ka, “Ye re ọda ene hu keekere ịnị avaba ọda?” 29#Ọda 6.4,5Dị Ijeesu tụ́ ọọ ohi ka, “Ọda ene hu yị: ‘Sị ụtọ pe ẹtẹ oo, ẹwụ nịnị Anisirẹrị! Ananyị yị ọ vị Ohomorihi ayị nị. Ọnịnya ọ vị Ohomorihi nị. 30Sị avaba ayị awụ sì ịrẹyị Ohomorihi Ananyị yị, beri avaba ivehu awụ ọnịrị avaba ịrẹyọyẹ awụ ne beri avaba ụkata awụ!’ 31#Ire 19.18Ọhụva yị: ‘Sị ịrẹyị ọnọhụva awụ anka ẹngụ awụ!’ Ẹ yị nyị ọda ọsa ene huna ẹsẹnị.” 32#Ọda 4.35Dị ọzwọzọda ọnọọ ka, “Nda, avọọ yịị yọ! Ịzẹyịza, Ohomorihi vị ọnya. Ẹ yị nyị Ohomorihi ọsa, ẹ̀ yị vị ọnịnya. 33#Iho 6.6A rẹ vọrọ ka ọza ọ̀ sị avaba ayị anị sì ịrẹyị anị, beri avaba ịrẹyọyẹ anị ọnịrị avaba ụkata anị, di ò re sì ịrẹyị ọnọhụva anị anka ẹngụ anị. Ọda ẹẹva ẹnẹnị e huna avaba ịsọvọ ana aā rị ịra ọnịrị ịsọvọ ana vọ bemi-bemi nị.” 34#Irk 10.25-28Íjeesu mè re ka ộ sị ịrẹyọyẹ tụ́ ohi, dị ọ kà a yọ ka, “We yi noze rịrị ịzị Ohomorihi yà aa mẹ ịjọva.” Ịrẹma ọsọnị, ẹ yị nyị ọza ana vana nyayịnẹ họ̀ ọ use ịrẹyị ọnyọọnyị.

Ẹnị Ikirisiti vị ozi anị?

(Imt 22.41-46; Irk 20.41-44)

35Íjeesu màa zụ̀ aza ịsa ini irehi Ohomorihi, dị ọ ka, “Sị ẹ vẹ dị ọzwọzọda nịnị kà a ka Ikirisiti vị ozi Idevidi? 36#Ahẹ 110.1Idevidi ọnị nyẹmba ộ sị ụkata Ụhwẹ Ọnịnị kà a ka: ‘Ohomorihi ộ kà a yị Ananyị mị ka: Yaayịtẹ éyi ụvọrị amị pooro dị ma sị ọnịvị awụ tụ́ ịzị ụ waa kụ́ ahụụ hi!’ 37Idevidi ọnị ụvọta ộ hị́ ọọ Ananyị mị. Íkirisiti mẹmẹ rẹ va mẹ vị ozi anị?”

Ijeesu ộ kà ọ̀nọ̀ agụvị ọzwọzọda nịnị

(Imt 23.1-36; Irk 20.45-47)

Ọkọnị aza ee sì ka ẹnị ẹ̀ wụ́ ịrẹyị anị. 38Íjeesu màa zụ̀ wa ịsa, dị ọ ka, “Sị eyi pe ẹngụ awụ nịnị ịnị ụvọ ọzwọzọda nịnị. Eē sì ka eni èe chire awuru ọgọdọọ zịịzị, dị aza ẹ̀ẹ kụ́ ẹnị ini ohu. 39E reē sì ka ẹnị ẹ̀ẹ yaayịtẹ aha ene hu keekere ini irehi Ohomorihi ọnịrị ịzị aa kụ́ gụ aa rị eche. 40Ẹnị ẹẹ̄ sị irikichii dọ osoku nịnị irehi nị; ama dị ẹyaa mẹ apẹẹ mẹ̀ aduwa ọgọdọ. Ẹnị ẹ vaa rị ụya hu nị.”

Ẹyịza oni osoku ọnya sị yị Ohomorihi

(Irk 21.1-4)

41Ijeesu ộ yaayịtẹ ini irehi Ohomorihi, ộ và eyi ká ịzị aā sị ẹkẹhịị tụ́. Di ee re, aza mẹmẹ aa sị ẹkẹhịị tụ́ ịzọọ nị. Opisa ọrụrụ-ọrụrụ ệ sị ẹkẹhị ọbanyịị tụ́ ịzọọ. 42Osoku onosiye ọnya aanị ộ vẹ, dị ọ sị anini ẹẹva tụ́ ịzọọ nị. Anini ẹẹva vị eepeni. 43Dị Ijeesu hị́ ezirẹma anị, dị ọ ka, “Ịzẹyịza m maa kà a wụ nịnị nị, osoku onosiye ọnọnị ọ mẹ huna avaba aza ana vọ nị; 44agụvị ka avaba aza ana vọ ệ nyị ẹkẹhị, dị ẹ sị hụụnị anị va tụ́ ịzọọ nị. Ama àa vị ọnẹẹ ọnọnịị yọ, ọ mẹ̀ yị vị onosiye, avaba ịsa ọnị ọ nyị, ọ sị tụ́ ịzọọ avọọ nị, avaba ịsa ana vọrọ ka ọ̀ yaanị sị hị́ ịsa rị.”

Currently Selected:

Ịmaakị 12: EBTP

Highlight

Copy