Imatiwu 8

Ijeesu ộ mẹ̀ ọnịkụ ọbanyị ọnya ụkụ anị

(Ịmk 1.40-45; Irk 5.12-16)

1Ijeesu ô chí hụrẹ ịrẹsụ ataba aa vẹ, dị ọkọnị aza aa dụ ọ ịrẹma nị. 2Ịjọnọọ dị ọnịkụ ọbanyị ọnya aanị ká a vẹ, dị ọ va ku ẹtẹ ọ́vịdị anị, dị ọ ka, “Ananyị yị, wèe sì, wa nyẹngụ mẹ ụkụ amịị mị.” 3Dị Ijeesu tana ụvọ anị, dị ọ sị kanyị ọ nị, dị ọ ka, “Mee sì de, ụkụ awụ ọ̀ ta!” Obooboro ọnọọ, dị ụkụ ọbanyị anị ta nị. 4#Ire 14.1-32Dị Ijeesu kà a yọ ka, “Re, asị ụ kà a yị ọza ọnyọọnyị! Ama na sị ẹngụ awụ zụ̀ ohirẹsụ irehi ahẹkẹ Aniju; dị ụ wa na mẹ̀ ịsọvọ oni Imosiisi mẹ ọda anị, dị ọ̀ vị ivenu yị wa ka ẹngụ awụ ộ ta!”

Ọga isoja Aniroomi ana sị ayị tụra Ijeesu

(Irk 7.1-10)

5Íjeesu mẹ̀ va ngụ Ikapanawumi, ọza ịnya aanị ana vị ọga isoja ẹchẹhị ộ kà vẹ, dị aa dá ịpẹẹ yọ nị, 6dị ọ ka, “Ananyị yị, ozi ahụ amị hụtụ ini eehi, ẹngụ anị ô wusu, aa sị ụyaa rị ọọ.” 7Dị Ijeesu kà a yọ ka: ọnị aa vaa mẹ̀ ẹ ụkụ nị. 8Dị ọga isoja nịnị ọnọọ tụ́ ohi, dị ọ ka, “Mẹ yị yà ọza anaa vọrọ ka wa ngụ ini eehi anị. Mị mẹ ọda kẹnẹ, ka ẹngụ ozi ahụ amị vaa ta. 9Ẹma rẹ nyị ọza ana nyị ọda amị, dị mị rẹ nyị isoja nịnị hi akẹtẹ amị nị. Màa mẹ ọda yị ọnya ka ọ̀ na, dị aa na; màa kà a yị ọsa ka ọ̀ vẹ, dị aa vẹ. Màa kà a yị ozi ahụ amị ka ọ̀ maanị mẹ, avọọ ọ màa mẹ nị.” 10Ịjị Ijeesu maanị wụ́, ô hí ọ irenu, dị ọ kà a yị aza ana aa dụ ọ ịrẹma, dị ọ ka, “Ịzẹyịza, mị kà a wụ nị, mẹ yị maanị re ọza ana sị ayị tụra mị da; mẹ yị hyakụ ree ịnị Anisirẹrị nịnị. 11#Irk 13.29[Ẹma kà a wụ nịnị nị ka aza ọrụrụ-ọrụrụ vaa hụrẹ ịzị ọyịị̄ zịị hụrẹ ọnịrị ịzị ọyịị̄ zịị ngụ ẹtẹẹ vẹ, dị ẹ yaayịtẹ pe Abụrahamị ọnịrị Ayiziiki ne beri Ijekọvụ ịzị Ada ayị ẹbẹẹba yà aa mẹ ịjọva ka ẹnị ẹ̀ rị ịsa.] 12#Imt 22.13; 25.30; Irk 13.28Ama dị a dụ ezi anaa vọrọ ka ẹ̀ yà ịnị ịjọva ọnọọ obooro jịnẹ và hi ẹhẹ ịnị ịrahụ. Dị ẹ yà ịzọọ aa jị òrèrè, dị ẹyaa rị anyị.” 13Dị Ijeesu kà a yị ọga isoja nịnị ọnọọ ka, “Waa na, ọ̀ yà yị wụ, anka ụ mẹ̀ dọ wụ́.” Dị ẹngụ ozi ahụ anị ta ịnị ụmẹ ọnọọ gẹdẹ-gẹdẹ nị.

Ijeesu ộ mẹ̀ aza ọrụrụ ụkụ

(Ịmk 1.29-34; Irk 4.38-41)

14Ịjị Ijeesu va ngụ ini eehi Ipita, ô re ka ọnyị ose Ipita ộ hụtụ, ọ́vanggoro mẹ̀ za a. 15Dị ọ sị ụvọ kanyị ọọ ụvọ nị; dị ọvanggoro anị ta nị. Dị ọ kwẹẹtẹ, dị ọ kụkụ ee sì wa ọzọga nị. 16Óruva mè si tù, dị ẹ kụ́ aza ọrụrụ-ọrụrụ ana nyị ụhwẹ echu ká a vẹ nị. Dị ọ sị ịrẹyị anị dụ ụhwẹ echu ẹnẹẹ jịnẹ nị, dị ọ mẹ avaba ọnịkụ nịnị ụkụ ẹnịnị nị. 17#Ayị 53.4Ộ maanị mẹ, agụvị ịrẹyị ana Ayịsaya ọnịsẹ vịdị kà, ọ̀ zụ sẹ ka, “Ọnị ụvọta ộ sị ụkụ ayị irenyi-renyi, dị ọ kụ́ ọọ kwooze nị.” 18Íjeesu mè re ọkọnị aza ana gụ kara a, dị ọ ka ezirẹma anị ẹ̀ vẹ, dị ẹnị ẹ̀ nọ akẹnẹ irehu nị. 19Dị ọzwọzọda ọnya aanị vẹ nị, dị ọ kà a yọ ka, “Ịnda, maa dụ wụ nọ aha tụra aha ọnị ụ wàa nọ.” 20Dị Ijeesu kà a yọ ka, “Ahaka nịnị ệ nyị ụsị; inomi nịnị ẹ rẹ nyị ịrẹngwẹ, ama ẹmị Ozi ọza onigirima ọ yị hyakụ nyị aha ana vọrọ ka ma yà tụ́ ụhwọ́.” 21Dị ọnya ịnị ezirẹma anị kà a yọ ka, “Ananyị yị, jẹẹ me vịdị ne ne ada amị da.” 22Ama dị Ijeesu kà a yọ ka, “Ẹwụ àa dụ mị ịrẹma, dụ wa navọ oku nịnị èe ne oku ẹnịnị!”

Ijeesu ộ za ahị jẹẹ

(Ịmk 4.35-41; Irk 8.22-25)

23Ijeesu ộ ngụ ịnị ẹpa, dị ezirẹma anị ẹnị raa dụ ọọ na nị. 24Kẹnẹ, dị opomi ọbanyị ọnya aa tụ́ nị, dị enyi aa dàa kú ẹpa nị, ama dị Ijeesu aa sụ ara ịnị ẹpa nị. 25Dị ezirẹma anị ve tù ọọ, dị ẹ haa nị, dị ẹ ka, “Ananyị yị, dọ yị tụ́, ka yee vee sú!” 26Dị ọ kà a yị wa, dị ọ ka, “Sị ẹ vẹ du wee hí angwa nịnị? Ẹdọwụ awụ nịnị ô weyi, oo!” Dị ọ kwẹẹtẹ, dị ọ tụ́ ahị ọnịrị irehu ohuvọ nị, dị ẹtẹ tịtẹ sii nị. 27O si hí aza ẹnẹẹ irenu, dị ẹ ka, “Ẹngụ ọza ịsị ẹ vị ọnọnị ana ahị ọnịrị irehu raa wụ́ chiree bẹẹ?”

Ijeesu ộ dụ ụhwẹ echu hụụnị ẹngụ aza ẹnị ẹẹva

(Ịmk 5.1-20; Irk 8.26-39)

28Ijeesu mẹ̀ va sị ngụ akẹnẹ ọsa ịnị ẹkụra Anịgadarene nịnị, aza ẹnị ẹẹva aanị ana nyị ụhwẹ echu ẹ va gẹrị ọọ. Ọgaanya ẹ hụrẹ aa vẹ nị. Ê divi ẹtẹẹtẹrẹ, ẹyị nyị ọza ana nyayịnẹ para hu óze ọnọọ. 29Di e nowu zẹtẹ, dị ẹ ka, “Sẹ jị gẹ ẹyịrị ẹwụ, ẹwụ Ijeesu Ozi Ohomorihi? Ụ wáá vẹ ịzẹnị ka wa va sị ụya rị yị, dị ụmẹ ò ve tù nị?” 30Â nyị ụ̀rá ẹnyị aanị ana aa rị ẹ́nẹẹnẹ ịzọọ. 31Dị ụhwẹ echu ẹnẹẹ dá ịpẹ yọ, dị ẹ ka, “Wàa dụ yị jịnẹ, navọ ya na ngụ ịnịnẹ ụra ẹnẹẹ!” 32Dị ọ kà a yị wa ka, “Wa na nịnị!” Ịjị ẹ jịnẹ vẹ, dị ẹ na ngụ ịnịnẹ ụ̀rá ẹnẹẹ nị. Dị avaba ụ̀rá ẹnẹẹ zwe putu-putu, di e ne zina hụrẹ aha ana nẹba và hí ini irehu, di e sú hi ini enyi nị. 33Dị aza ana aa kụ́ wa rị si zwe hụụ ịzọọ nị. Dị ẹ na kà a ịnị ẹkụra avaba ịsa ana mẹ aza ana nyị ụhwẹ echu aanị nị. 34Re, dị avaba anẹkụra ẹnẹẹ jịnẹ ve tù Ijeesu nị. E mè re e, dị ẹ dá ịpẹ yọ ka ọ̀ hụrẹ ẹkụra ẹnịnị nị.

Currently Selected:

Imatiwu 8: EBTP

Highlight

Copy