Imatiwu 20

Ụhịrẹyị anụkọrọ anaa dọ tụ́ ịnị ụbazị

1“Oze ana Ada ayị ẹbẹẹba aa zịị mẹ ịjọva vị ana sị mẹẹ anka adarehi ọnya aanị, ana kwẹẹtẹ ẹnẹnẹ viri-viri ka ọnị ọ̀ na dọ anụkọrọ, dị ẹ̀ va mẹ̀ ụkọrọ yị ọnị ịnị ụbazị anị. 2Ộ dọ yị anụkọrọ ẹnẹẹ ka ọnị vaa sị Ịnayịra ẹẹva yị wa ịnị ụkọrọ ẹkụhị-ẹkụhị. Ịjị ẹ sị dọ, dị ọ kụ́ wa nọ ịnị ụbazị anị nị. 3Ịjị ọ rẹ naa mẹ ẹhụụ ụmẹ agogo ịhịna, dị ọ jịnẹ nọ ẹhẹ, di o ne tù ka aza ẹnyị jẹẹ kẹnẹ-kẹnẹ ini ohu nị. 4Dị ọ kà a yị wa ka: ‘Nọ ịnị ụbazị amị nịnị, ka mị vaa sị ịsa ana àa vọrọọ wụ nịnị.’ Di e si hu aa nọ ịzọọ nị. 5Dị ọnọrụ ọnọọ rẹ jịnẹ nọ ẹhẹ ịnị ẹhụụ ụmẹ agogo ẹwụrẹva ọnịrị ẹhụụ ụmẹ agogo ẹẹta, dị ahịka avọọ ọ mẹ̀ rẹ mẹ nị. 6Ịnị ẹhụụ ụmẹ agogo ẹẹhị oruva, dị ọ rẹ jịnẹ nọ ẹhẹ, di o re ne tù aza ẹnyị ana jẹẹ kẹnẹ-kẹnẹ nị. Dị ọ rẹ kà a yị wa ka: ‘Sị ẹ vẹ dị ụ jẹẹ kẹnẹ-kẹnẹ hụrẹ ẹnẹnẹ nịnị?’ 7Dị ẹ kà a yọ ka agụvị ka ẹ yị nyị ọza ana hị́ ẹnị ụkọrọ yọ nị. Dị ọ kà a yị wa ka: ‘Nọ ịnị ụbazị amị nịnị ka ịsị ẹ̀ẹ vọrọ, mị vaa sịị yị wụ nịnị.’ 8#Ire 19.13; Ọda 24.15Ịjị oruva si tù, dị ọza ana nyị ụbazị kà a yị ozi ahụ anị ka: ‘Hị́ anụkọrọ ẹnẹẹ, dụ wa sị ẹkẹhị ụkọrọ ẹnịnị yị wa! Nyima hụụnị ana vẹ ọdịrẹma ne tù ọnịpaapa.’ 9Ịjị aza anaa dọ ịnị ụmẹ agogo ẹẹhị vẹ, dị a sị Ịnayịra ẹvẹẹva yị wa nị. 10Ama ịjị ọnịpaapa vẹ, ê ro o ka ẹnị vaa dọ ọ hu aza ana vọ. Dị ahịka Ịnayịra ẹvẹẹva a rẹ sị yị ẹnị nị. 11Ịjị ẹ sị ọọ dọ, dị ẹyaa rị ihuhuu hi adarehi ọnọọ nị, 12di ẹ ka: ‘Ọdịrẹma ẹnẹnị vị ana mẹ̀ ụkọrọ agogo ọnya kẹnẹ, dị ụ mẹ ka ẹyị ana sị ịrẹma tụ́ ịnị ọyị hụrẹ ẹnẹnẹ, ẹyịrị wa ẹ̀ vị ẹbẹẹbẹ nị.’ 13Dị adarehi ọnọọ tụ́ ọza ịnya ẹnịnị ohi, dị ọ ka: ‘Ọta amị, wáá yẹ ka mẹ yị mẹ wụ ịsa odivi?’ Aanịka ẹ yị vị ụkọrọ Ịnayịra ẹẹva ẹkụhị ẹ́mịrị ẹwụ vịdị kà a tụ́? 14Sị ẹkẹhị awụ, dị ụ waa nọ eehi awụ! Ọpa ọnị mị sị wụ aanị, mị raa sịị yị ọdịrẹma ọnọnị nị. Avọọ m mè sì ọọ nị. 15Aanịka me yi re oze sị ẹkẹhị amị mẹ̀ ịsa ene zé mi eyi? A vị agụvị ka mâ mẹ ẹyịza, áyị aa sịị kụ́ wụụ? 16#Imt 19.30; Ịmk 10.31; Irk 13.30Avọọ ọ́dịrẹma mẹ̀ vaa vị ọdọvịdị, dị ọdọvịdị vị ọdịrẹma nị.”

Ijeesu ọ rẹ kà ịrẹyị isu anị

(Ịmk 10.32-34; Irk 18.31-34)

17Íjeesu màa hịrẹẹ nọ Ijerusarẹmị, dị ọ hị́ ezirẹma anị ẹwụrẹva tụ́ oboka óze, dị ọ kà a yị wa ka: 18“Re, yaa hịrẹẹ nọ Ijerusarẹmị. A vaa sị ẹmị Ozi ọza onigirimaa chire ohirẹsụ ẹbanyị irehi Ohomorihi ụvọ, ọnịrị ọzwọzọda nịnị. Ẹ vaa mẹ̀ ọkarẹyị isuu mi; 19dị ẹ sị mị chire anarịmadọwụ nịnị ụvọ. Aza ẹnẹẹ vaa sị mịị mẹ̀ isiya, dị ẹ jị atẹ kú mi, dị ẹ rẹ kanyị mị za ọchị apavahị. Ama ịhyẹgwẹta anị, mị vaa haa hụụnị isu.”

Asị ụ mẹ ọga, waa mẹ ozi ahụ!

(Ịmk 10.35-45; Irk 22.24-27)

20Dị ọnyị ezi Izebedi kụ́ ezi anị ve tù Ijeesu nị; dị ọ va ku ẹtẹ yọ, dị ọ ka ọ̀ mẹ̀ ịsa ọnya yị ọnị nị. 21Dị ọ ka, “Si u wee sì ka ma mẹ yị wụ?” Dị ọ kà a yị Ijeesu ka, “Navọ, ịnị ụmẹ igirima awụ, ezi emi ẹyịva ẹnẹnị, ọnyara ọ̀ yaayịtẹ éyi ụvọrị awụ, dị ọsa ọ̀ yaayịtẹ éyi ụvọha awụ!” 22ị Ijeesu tụ́ ohi, dị ọ ka, “Wẹ yị yẹ ịsị u wee họ̀ use nịnị. Wáá va zụụ sị akoo hú ụyọrị oni mi vee hú nịnị?” Dị ẹ kà a yọ ka, “Ya zụ mẹ̀ ẹ.” 23Dị Ijeesu ka, “Ịzẹyịza yọ, ụ vaa sị akoo hú ụyọrị oni mi vee hú nịnị. Ama ẹmị ẹ yị nyị ọda ọyịkà a wụ nịnị ka aza ẹnyị ẹ̀ yaayịtẹ éyi ụvọrị amị, dị ọsa ọ̀ yaayịtẹ éyi ụvọha amị. Ada amị ọ vaa sịị yị aza ọnọọ sị ọọ tenyi tịtẹ yị nị.” 24Ịjị ezirẹma ẹẹwụ ana vọ maanị wụ́, dị ẹyaa kụ́ ayịị hi ẹyịnyara ẹẹva ẹnẹẹ nị. 25#Irk 22.25,26Dị Ijeesu hị́ wa pe ẹngụ, dị ọ kà a yị wa ka, “Wâ yẹ ka ohinọyị anẹhẹ vị anaā mẹ ehunaa yị aza, dị azẹbanyị ẹnịnị aa mẹ ẹchakaa yị wa. 26#Imt 23.11; Ịmk 9.35; Irk 22.26Ama ẹ yị vọrọ ka áawụ nịnị ọ̀ vavọọ yà. Ọza ene èe sì ka ọnị ọ̀ nyị ụbanyị ịnị awụ nịnị, ọ̀ vị ozi ahụ aza ana vọ. 27Ọza ene èe sì ka ọnị ọ̀ vị ọdọvịdị, â vọrọ ka ọ̀ vị ozi ahụ avaba aza. 28Agụvị ka ẹmị Ozi ọza onigirima mẹ yị vẹ ka à mẹ ozi ahụ yị mị, ama ka ma mẹ ozi ahụ yị aza, dị ma rẹ sị ụhwẹ amị hị́ aza ọrụrụ-ọrụrụ varẹma.”

Ijeesu ộ há ogweyi ẹẹva eyi

(Ịmk 10.46-52; Irk 18.35-43)

29Íjeesu ọnịrị ezirẹma anị màa hụrẹ Ijeriko, ọkọnị aza ệ saasa a. 30Ogweyi ẹẹva ẹnyị aanị ana yaayịtẹ ụtọ oze, ệ wụ́ ka Ijeesu aa parahu. Di e nyima ee nowu ka, “Ananyị yị, ẹwụ ozi Idevidi, vayị ayị de!” 31Dị ọkọnị aza ẹnẹẹ tụ́ wa ohuvọ ka è kú irenu ẹnịnị nị. Di e re nowu hu avọọ ka, “Ananyị yị, ẹwụ Ozi Idevidi, vayị ayị de!” 32Dị Ijeesu jẹẹ, dị ọ hị́ wa vẹ nị, dị ọ ka, “Si u wee sì ka ma mẹ yị wụ nịnị?” 33Dị ogweyi ẹnẹẹ kà a yọ ka, “Ananyị yị, ị ka ye re ẹtẹ nọ.” 34Ijeesu ộ vayị ẹnịnị, dị ọ sị ụvọ kanyị eyi ẹnịnị nị. Obooboro ọnọọ, di eyee re ẹtẹ nị. Dị ẹnịnị kụkụ saasa a nị.

Currently Selected:

Imatiwu 20: EBTP

Highlight

Copy