Imatiwu 21

Aza ệ sị ụbanyị yị Ijeesu, ọ màa vaa ngụ Ijerusarẹmị

(Ịmk 11.1-10; Irk 19.28-38; Ịjọ 12.12-18)

1E mèe vee tù Ijerusarẹmị, dị ẹ sị ngụ ẹkụra Ịbẹtị-Ihwegi, ọgụrị Ataba Orivi, Dị Ijeesu tụ́ ezirẹma anị ẹẹva, 2dị ọ ka, “Nọ ịnị ẹkụra ana và eyi ká wụ nịnị avọọ! Wàa maanị yị sị ngụ ịzọọ nịnị kẹnẹ, u vee re ịkẹrịkẹtẹ ọnya ana a za zù, ọnịrị ozi anị. Ngwa wa, dụ wa kụ́ wa va mị nịnị! 3Àa nyị ọza ana kà ịsọnyị-ịsọnyịị wụ nịnị, dị ụ kà a yọ nịnị ka: ‘Ananyị yị ee sì wa nị.’ Ọ vaa navọ ka wa wụsẹ kụ́ wa vẹ nịnị.” 4Avaba ẹsẹnị vị ana mẹ, agụvị ịrẹyị ọnị ọnịsẹ kà, ọ̀ zụ sẹ, ka: 5#Iza 9.9“Kà ẹ yị ozi ọnẹẹ Anịzayọnị ka: ‘Ohinọyị awụ aa vẹ ịdị awụ. Ọza hẹẹ ọ vị nị, ộ tụra ịkẹrịkẹtẹ, ozi ịkẹrịkẹtẹ m maa kà aanị nị.’ ” 6Dị ezirẹma anị na, dị ẹ mẹ, anka Íjeesu mẹ̀ kà a yị wa nị. 7Dị ẹ sị ịkẹrịkẹtẹ ọnọọ ọnịrị ozi anị vẹ, dị ẹ tụ́ awuru ẹnịnị tụra wa, dị Ijeesu tụra a nị. 8Dị ọkọnị aza ọrụrụ-ọrụrụ tụ́ ịta ẹnịnị tụ́ oze nị, dị aza ẹnyị rẹ jị avọ́ ọchị, dị ẹ tụ́ ọ tụ́ oze nị. 9#Ahẹ 118.25,26Dị ọkọnị aza ene hi ọvịdị ọnịrị ịrẹma ee nowu ka, “Ihosana! Ozi Idevidi! Ohomorihi ọ̀ dà tụ́ ịnị ụbanyị yị ọza ana aa vẹ ịnị ịrẹha Ananyị yị. Yâ sị ụga yị Ohomorihi ẹbẹẹba!” 10Ọ mẹ̀ va sị ngụ Ijerusarẹmị, avaba ẹkụra ee zizi. Ẹ ka, “Ẹnẹ vị ọnọnị kẹ?” 11Dị ọkọnị aza ka Ijeesu, ọnịsẹ Ịnazarẹtị ana yà Igariri yọ.

Ijeesu ộ ngụ ini irehi Ohomorihi

(Ịmk 11.15-19; Irk 19.45-48; Ịjọ 2.13-22)

12Ijeesu ộ ngụ ini irehi Ohomorihi, dị aa dụ aza ana aa sẹ ohu ini irehi Ohomorihi ọnọọ nị. Dị ọ và iteevuru ọza anaā vara ẹkẹhị nịnị angga nị, ọnịrị aga aza anaā ná arekuku nịnị. 13#Ayị 56.7; Ijer 7.11Dị ọ kà a yị wa ka, “Â vịdị sị ọọ chẹrẹ ka: ‘A vaa hị́ irehi amị ịzị a yàā mẹ̀ aduwa.’ Ama ẹwụ nịnị ọ kụkụ sị ọọ vara ịzị ịjagụda nịnịị̄ tẹ̀.” 14Ogweyi nịnị ọnịrị oswahụ nịnị ệ kà vẹ ini irehi Ohomorihi ọnọọ, dị ọ mẹ wa ụkụ nị. 15Ịjị ohirẹsụ ẹbanyị irehi Ohomorihi ọnịrị ọzwọzọda nịnị re ụkọrọ ohyozirenu oni Ijeesu mẹ, dị ẹ rẹ wụ́, ezi eweyi mèe nowu ini irehi Ohomorihi ka, “Ihosana, ozi Idevidi”, ayị ọ sị kụ́ wa. 16#Ahẹ 8.2Dị ẹ kà a yị Ijeesu ka, “Wáá wụ́ ịsị ẹyaa kà?” Dị Ijeesu kà a yị wa ka, “Maa wụ́. Aanịka wẹẹ̀ yị kà a ini Iwe Ohomorihi nịnị ka, ‘Wa raà sị zụ̀ ezi eweyi ọnịrị ezi ene ee hú ịrẹva ka ẹ̀ẹ sị irenu ẹnịnịị sị ụgaa yị wụ ẹtẹẹtẹrẹ.’ ” 17Dị ọ hụrẹ ịdị ẹnịnị, dị ọ nọ ịnị ẹkụra Ịbẹtanị, dị ọ na sụ̀ ịzọọ nị.

Ijeesu ô chì hi ọchị ọnya

(Ịmk 11.12-14,20-24)

18Ẹnẹnẹ viri-viri eyinẹhẹ anị, ọ mẹ̀ varẹma aa nọ Ijerusarẹmị, ụngwẹ aa kụ̀ Ijeesu, 19Ô re ọchị ọnya aanị anka ọchị ezu óze. Ộ nọ ịnị ọchị ọnọọ, ẹ yị nyị ịsị o re ị́rẹsụ anị, ẹ̀ yị vị avị kẹnẹ. Dị ọ kà a yọ ka, “Wa mā vana tụ́ ẹtụtụ pooro hụrẹ ọyaanị na.” Obooboro ọnọọ, dị ọchị ọnọọ wụ nị. 20Ịjị ezirẹma anị re e, ô hí wa irenu, dị ẹ ka, “Ho! Ọchị ịsọọnị ộ wụsẹ jịnẹ sị wụ, ọ!” 21#Imt 17.20; 1 Ịkọ 13.2Dị Ijeesu kà a yị wa ka, “Ịzẹyịza m maa kà a wụ nịnị nị, wàa nyị ẹdọwụ, dị ụ wẹ̀ yị mẹ ayị ẹẹva nị, ẹ yị vị ịsa ọnị mị mẹ hi ọchị ọnọnị kẹnẹ, ụ vaa mẹ nịnị. Ama wàa hyakụ kà a yị ataba ọnọnị nịnị ka ọ̀ kwẹẹtẹ, di ò ne ẹngụ anị ngụ ini òkū, vị ọ vavọọ aa yà nị. 22Ịsa tụra ịsa ọnị ụ wàa dá ịpẹ anị nịnị wàaa mẹ̀ aduwa, dị ụ dọ wụ́ nịnị nị, u wee re waa dọ nị.”

Ịrẹyị ọda Ijeesu

(Ịmk 11.27-33; Irk 20.1-8)

23Ijeesu ọ rẹ vavẹ ini irehi Ohomorihi. Ọ màa zụ̀ aza ịsa, dị ohirẹsụ ẹbanyị irehi Ohomorihi beri ọdọvịdị nịnị ve tù ọọ nị. Dị ẹ họ̀ ọ ka, “Ọda ịsị ụ maanị aa sịị mẹ? Ẹnẹ sị ọda ọnọnịị wụ ka wa maanịị mẹ?” 24Dị Ijeesu ka, “Ẹmị raa họ̀ wụ nịnị use ịrẹyị ọnya. Wèe tụ́ mị ohi nịnị, ẹmị rẹ vaa kà a wụ nịnị ọda ọnị mị maanị aa sịị mẹ: 25Ọyịhwọzenyi ọnị Ịjọọnụ aa mẹ avọọ, ịzị o re e hụrẹ? Ohomorihi ọ́ọ́ sị ọda anịị yọ nị, à vị ọza?” Dị eyee pe ẹngụụ nyị ahankata nị, dị ẹ ka, “Yàa kà a ka Ohomorihi ọ sị yọ nị, dị ọ ka sị ẹ vẹ dị ẹyị ẹ̀ yị dọ ọ wụ́? 26Ị yáá vaa kà a ka ọza yọ nị? Angwa aza ee hí yị, agụvị ka avaba aza ệ dọ ka Ịjọọnụ vị ọnịsẹ.” 27Agụvị avọọ dị ẹ kà a yị Ijeesu ka, “Yẹ yị yẹ.” Dị Ijeesu ọnị rẹ kà a yị wa ka, “Ẹ̀hẹẹ, ẹmị ẹ yị rẹ vaa kà a wụ nịnị ọda ọnị mị maanị aa sịị mẹ.”

Ụhịrẹyị ezi ẹẹva

28“Si u ro ịnị ịrẹyị ọnọnị nịnị? Ọnọrụ ọnya yà ịzọọ, ộ nyị ezi anọrụ ẹẹva. O ne tù ọnịpaapa, dị ọ kà a yọ ka: ‘Nọ ịnị ụbazị amị, dị ụ wa na mẹ̀ ụkọrọ ịzọọ ajịnị!’ 29Di o tụ́ ohi, dị ọ ka: ‘Mẹ yị nọ nị.’ Ụpẹ ọnya, di o ro ịnẹ, dị ọ na mẹ̀ ụkọrọ ọnọọ nị. 30Dị ịnda ọnọọ re ne tù ọnọhụva, dị ọ rẹ vavọọ kà nị. Dị ọnị ka: ‘Maa nọ, Ọga’, ama ọ yị va nọ. 31Ye re ana mẹ̀ ịsa ana ada anị sì ịnị ẹnị ẹyịva avọọ?” Dị ẹ kà a yọ ka, “Ọnịpaapa yọ nị.” Dị Ijeesu kà a yị wa ka, “Ịzẹyịza m maa kà a wụ nị: Aza edivi ọnịrị ọsẹrẹka nịnị vaa vịdịị ngụ ịzị Ohomorihi yà aa mẹ ịjọvaa tụ́ wụ nịnị. 32#Irk 3.12; 7.29,30Ịjọọnụ ọhwọzenyi ộ vẹ ịdị awụ nịnị, ộ sị oze ana vọrọ zụ̀ wụ nịnị; ama ẹwụ nịnị ẹ yị dọ ọ wụ́. Ama aza edivi ọnịrị ọsẹrẹka nịnị ẹnị ệ dọ ọ wụ́. Ụ mẹ̀ daka yi re ọsọnị nịnị, we yi ro ịnẹ varẹma nịnị dị ụ wa dọ wụ́ nịnị.”

Ụhịrẹyị aza edivi anaa dà ẹtẹ yị

(Ịmk 12.1-12; Irk 20.9-19)

33 # Ayị 5.1,2 “Re wụ́ ụhịrẹyị ọsa nịnị! Â nyị adarehi ọnya aanị ana dà ụbazị, dị ọ họ̀ kara a nị. Dị ọ jị ụkọ ịzị a vaa yàa kwọrọ ẹtụtụ ọchị ene hi ịnị anị nị. Di o re hi ụta oserẹtẹ tụ́ ọọ nị. Di o si rere aza ẹnyị ka ọnị ọ̀ọ dọ wa ọtụrọsarẹsụ anị nị. Di o si hu aa hụrẹ eehi nị. 34Ịjị ụmẹ ẹtụtụ ee vee tù, dị ọ tụ́ ezi ahụ anị nọ ịda aza ẹnẹ ana a dà ẹtẹ yị, ka ẹ̀ na dọ ẹtụtụ anị vẹ nị. 35Dị aza ẹnẹẹ za ezi ahụ ẹnẹẹ, di e tụ́ ọnya, dị ẹ wụ ọsa; di e ne ọsa ịrẹta nị. 36Dị ọ rẹ tụ́ ezi ahụ ọsa ana rụrụ huna ị́ịpaapa, dị aza ana a dà ẹtẹ yị rẹ mẹ wa anka ịpaapa nị. 37Ọdịrẹma anị, dị ọ tụ́ ozi anị ụvọta na nị. Dị ọ ka: ‘Ẹ vaa nyị ịrẹsụ ọkahii yị ozi emi.’ 38Aza ẹnẹẹ ana a dà ẹtẹ yị mè re ozi ọnọọ, dị ẹ kụkụ gẹ eyi, dị ẹ ka, ‘Ozi ọnọnị ọ vaa kụ́ ogu ada anị nị; à vẹ ya wụ ọọ, di ogu anị ọ̀ kụkụ vị áayị!’ 39Dị ẹ za a, dị ẹ sị ọọ nọ ịrẹma ụbazị, dị ẹ wụ̀ ọ nị.

40“Ịjị ọza ana nyị ụbazị ọnọọ ọ̀ọ vẹ, si u ro ka ọ vaa mẹ aza ẹnẹẹ?” 41Dị ẹ kà a yị Ijeesu ka, “Vị aa wụ̀ aza edivi ẹnẹẹ ha piti-piti, dị ọ sị ụbazị anị rere aza ẹnẹsa ana vaa sị ẹtụtụ anịị vaa yọ, ụmẹ òo si tù nị.” 42#Ahẹ 118.22,23Dị Ijeesu kà a yị wa ka, “Aanịka wẹẹ̀ yị kà a ini Iwe Ohomorihi nịnị ka: ‘Ịrẹta ọnị ọtụrarehi nịnị yi tịtẹ, ọnị ọ vana vị ọọnyị ịnị ịrẹta anaa sịị̄ dà irehi nị. Ananyị yị ọ maanị mẹ nị, ô hí yi irenu!’ 43Agụvị avọọ, dị ma kà a wụ nịnị ka a vaa dọ wụ nịnị oze anaa vọrọ ka wa zị ngụ ịzị Ohomorihi yà aa mẹ ịjọva, dị a sị yị anẹkụra ana vaa nyị ẹtụtụ anị. 44[Ọza tụra ọza ana àa hyẹdụ nya ịrẹta ọnọnị, vị aa gara nị. Ama ọza ọnị ịrẹta ọnọọ ọ̀ọ hụrẹ nya, vị aa kwọ̀ ọ nẹrẹ-nẹrẹ nị.”] 45Ịjị ohirẹsụ ẹbanyị irehi Ohomorihi ọnịrị Anihwarisi nịnị wụ́ ụhịrẹyị anị, ẹ sị yẹ ka ẹnị aa kà nị. 46E mèe sì oze ka ẹnị ẹ̀ za a, angwa aza ee hí wa, agụvị ka ệ dọ ka ọnịsẹ ọ vị nị.

Currently Selected:

Imatiwu 21: EBTP

Highlight

Copy