Imatiwu 17

Odeyi ẹẹta ê re igirima Ijeesu

(Ịmk 9.2-13; Irk 9.28-36)

1Ịrẹma ẹkụhị ịhịnọnyị, dị Ijeesu sị Ipita ọnịrị Ijemiisi beri Ịjọọnụ nọ ịrẹsụ ataba ọnẹba ọnya aanị nị. Ẹnịnya kẹnẹ ẹ yà ịzọọ nị. 2Dị a vara Ijeesu ẹngụ éyi ẹnịnị nị. Dị eyi Ijeesu aa za nyanga-nyanga anka ọyị avọọ nị. Dị awuru anị aa vwẹtẹ sẹnẹ-sẹnẹ kẹnẹ nị. 3Di e vene re ka Erija ọnịrị Imosiisi ệ vẹ nị. Dị ẹnịrị Ijeesu aa kà ịrẹyị nị. 4Dị Ipita kà a yị Ijeesu ka, “Ananyị yị ộ da zoza ka yâ yà ịzẹnị. Wèe sì, jẹẹ ya jị ajẹngụ ẹẹta tụ́ ịzẹnị; ọnyara ọ̀ọ vị áawụ, dị ọnya vị Ímosiisi, dị ọsa vị Éerija.” 5#Oyn 22.2; Ahẹ 2.7; Ayị 42.1; Imt 3.17; 12.18; Ịmk 1.11; Irk 3.22; Ọda 18.15#2 Ipi 1.17,18Ọ màa yịị kà ịrẹyị, re, dị eguhi ọnya aanị ana aa zẹtẹ, wụsẹ dà và kú wa nị. Re, dị ọngwẹ ọnya hụụnị eguhi ọnọọ vẹ ka, “Ozi emi oni mi sì ịrẹyị anị yị, ịnẹ amị ô hine tù ọọ ẹtẹẹtẹrẹ, waa wụ́ ịrẹyị anị nịnị!” 6Ịjị ezirẹma anị wụ́, ệ và eyi ku ẹtẹ, angwa ô hí wa ẹtẹẹtẹrẹ. 7Dị Ijeesu vẹ, dị ọ sị ụvọ kanyị wa, dị ọ ka, “Kwẹẹtẹ asị u rè hí angwa nịnị!” 8Ịjị ẹ kụ̀rà eyi tụ́ ẹba, e yi kuku re ọza ọnyọọnyị, ẹ̀ yị vị Ijeesu ọnịnya kẹnẹ. 9E mèe chíi hụụnị atabaa vẹ, di o hú wa ụvọ, dị ọ ka, “Asị ụ kà ịsa oni u re aanị yị ọza ọnyọọnyị pooro dị ẹmị Ozi ọza onigirima ọ̀ ha hụụnị isu!” 10#Ịma 4.5Dị ezirẹma anị họ̀ ọ ka, “Sị ẹ vẹ dị ọzwọzọda nịnị kà a ka Erija ọ vịdị vaa vẹ nị?” 11Dị Ijeesu tụ́ ohi, dị ọ ka, “Ịzẹyịza, Erija ọ vịdị vaa vẹ nị, ka ọnị ọ̀ va sị avaba ịsa tụ́ udi anị. 12#Imt 11.14Dị ma kà a wụ nịnị Erija ọ zị vẹ da, ama ẹnịnị ẹ yị yẹ ẹ; dị ẹ mẹ̀ ịsa ene zé wa eyi hi ọọ nị. Avọọ ẹ́mị Ozi ọza onigirima mẹ̀ rẹ yị vaa rị ụya ịnị ụvọ ẹnịnị nị.” 13Ịjọnọọ dị ezirẹma anị sị yẹ ka ịrẹyị Ịjọọnụ ọhwọzenyi aa kà a yị ẹnị nị.

Ijeesu ộ mẹ̀ onodumpapara ọnya ụkụ

(Ịmk 9.14-29; Irk 9.37-43)

14Ịjị e chí vẹ ve tù ọkọnị aza ana vọ, dị ọnọrụ ọnya aanị kà vẹ nị. Di o ku ẹtẹ, 15dị ọ ka, “Ọga vayị ozi emi de! Odumpapara vị ana za a, dị aa sị ụyaa rị ọọ ẹtẹẹtẹrẹ. Ụmẹ tụra ụmẹ ọ sịị̄ hyẹdụ nee ngụ ịra ọnịrị ini enyi nị. 16Mâ sị ọọ ká ezirẹma awụ vẹ, ama ẹ yị nyẹngụ mẹ̀ ẹ yọ.” 17Dị Ijeesu tụ́ ohi, dị ọ ka, “Sị ẹ vẹ dị ẹwụ nịnị anụmẹ ọnọnị ẹ̀ yị dọ wụ́, dị ụ maanị nyeeyi nịnị aanị? Ịzị mị vaa yàa pe wu nịnị nee tù? Ịzị mị vaa sị ẹngụụ dọ ịrẹyị awụ nịnị nee tù? Sị ọọ ve tù mi ịzẹnị!” 18Dị Ijeesu tụ́ ụhwẹ echu ọnọọ ohuvọ, dị ọ hụụnị ẹngụ ozi ọnọọ nị. Ẹngụ ozi ọnọọ ộ ta hụrẹ ụmẹ ọnọọ. 19Ộ da kù chee, dị ezirẹma Ijeesu tangwa ve tù ọọ, dị ẹ ka, “Sị ẹ vẹ dị ẹyị ẹ̀ yị zụ dụ ụhwẹ ọnọọ jịnẹ?” 20#Imt 21.21; Ịmk 11.23; 1 Ịkọ 13.2Dị Ijeesu kà a yị wa ka, “Agụvị ka wẹ yị dọ wụ́ nịnịị yọ nị. Ịzẹyịza, m maa kà a wụ nịnị nị, ẹdọwụ awụ nịnị ọ̀ọ banyị anka ihu ikonya ene weyi hu keekere, wa zụ kà a yị ataba ọnọnị ka ò hu iruvo hụụ ịzẹnị na tụ́ ịzọsọọ, vi ee hu iruvo nị, ẹ yị nyị ịsị ụ wẹ̀ yị va zụụ mẹ nịnị. [21Ẹ yị nyị ịsị a zụ sị dụ ẹngụ ọnọnị jịnẹ, ẹ̀ yị vị aduwa ọnịrị awẹ ọyịba.”]

Ijeesu ọ rẹ kà ịrẹyị isu anị

(Ịmk 9.30-32; Irk 9.43-45)

22Ẹ́nịnị mẹ̀ yà Igariri, dị Ijeesu kà a yị wa ka, “A vaa sị ẹmị Ozi ọza onigirimaa chire aza ụvọ, 23dị ẹ wụ̀ mị; ịhyẹgwẹta anị, a vaa ha mịị hụụnị isu.” Ayị ezirẹma anị e si du ẹtẹẹtẹrẹ.

Ịrẹyị ẹkẹhị irehi Ohomorihi ọyịtụ́

24 # Kụra 30.13; 38.26 Dị Ijeesu ọnịrị ezirẹma anị va ngụ Ikapanawumi nị. Dị ọza anaā dọ ẹkẹhị irehi ahẹkẹ Aniju ve tù Ipita, dị ọ ka, “Aanịka ọga awụ ọ mā tụ́ ẹkẹhị irehi?” 25Dị Ipita ka, “Ọọ̄ tụ́ de.” Ọ mẹ̀ ngụ ini eehi, Ijeesu ẹ yị zẹẹ ka ọ̀ kà ịrẹyị; dị ọ wụsẹ họ̀ ọ ka, “Si u ro ịnị ịrẹyị ọnọnị, Ịsayịmọnị? Ene ohinọyị anẹhẹẹ̄ dọ ẹkẹhị irehi hụụnị ụvọ anị? Ozi ẹtẹ wáá yọ, à vị azọga?” 26Dị Ipita tụ́ ohi, dị ọ ka hụụnị ụvọ azọgaa yọ nị. Dị Ijeesu ka, “Ozi ẹtẹ nịnị ẹ mā yaanị tụ́. 27Ama ye yi sì ka ya mẹ ayị kụ́ wa. Agụvị avọọ, nọ ini irehu, di u we ne arị ngụ enyi, dị ụ wa sị ivovo ọnị ọ̀ọ vịdị za ịpaapa! Wàa ha a irenu, u vee re ẹkẹhị enyusẹ ọnya ịzọọ; sị ọọ dụ we si ne sí ụta ẹmịrị ẹwụ!”

Currently Selected:

Imatiwu 17: EBTP

Highlight

Copy