Imatiwu 16

Anihwarisi nịnị ee sì ụkọrọ ohyozirenu

(Ịmk 8.11-13; Irk 11.16; 12.54-56)

1 # Imt 12.38; Irk 11.16 Anihwarisi nịnị ẹnịrị Anisadusi nịnị ệ ká Ijeesu vẹ ka ẹnị ẹ̀ va zama a re. Dị ẹ ka ọ̀ sị ụkọrọ ohyozirenu hụụnị ihinẹba zụ̀ ẹnị nị. 2Dị Ijeesu tụ́ ohi, dị ọ kà a yị wa ka, “Ọ yị àaa vaa ta dị eguhi èe ví nị, dị ụ ka ẹtẹ vaa nịya nịnị. 3Àa vị ẹnẹnẹ yọ, dị eguhi ee ví, dị ẹtẹ tịtẹ dụụmẹ nị, dị ụ ka orihi vaa zụ̀ ajịnị. Ẹwụ nịnị ọmọzakụyẹ, wâ yẹ ịsị eguhiī kà nịnị; sị ẹ vẹ dị ụ wẹ̀ yị yẹ ịsị apọtẹrẹwa ụmẹ ọnọnị aa kà nịnị? 4#Imt 12.39; Irk 11.29Aza edivi ọnịrị ọsẹrẹka nịnị kẹnẹ eē sì apọtẹrẹwa nị. Ẹ yị nyị ụkọrọ apọtẹrẹwa anaa vaa sịị zụ̀ wa, ẹ̀ yị vị apọtẹrẹwa Ijona ana vị ọnịsẹ kẹnẹ.” Dị ọ hụụ ịda ẹnịnị, dị aa na nị.

Òwù Anihwarisi nịnị

(Ịmk 8.14-21; Irk 12.1)

5Ézirẹma anị mẹ̀ jịnẹ nọ akẹnẹ irehu, ayị ô hí wa, ẹyị sị ịsọyịrị za. 6#Irk 12.1Dị Ijeesu kà a yị wa ka, “Sị eyi pe ẹngụ awụ nịnị agụvị òwù Anihwarisi ọnịrị Anisadusi nịnị.” 7Dị ẹyaa kà a yị ẹngụ ka, “Wáá yẹ ka agụvị ka yẹ yị sị ịsọyịrị za yọ nị?” 8Dị Ijeesu sị yẹ nị, dị ọ ka, “Ẹdọwụ awụ nịnị ộ da weyi. Sị ẹ vẹ dị ụ waa kà a ka wẹ yị za ịsọyịrị nịnị? 9#Imt 14.17-21Aanịka wẹ́ẹ́ yị yẹ nịnị? Wẹ yị tamayị Ịbụrẹẹdị ẹẹhị ana aza ẹnị akahị-akahị oze ẹẹhị rị nịnị? Wáá yẹ, uji yà ụ sị kụ́ ana vọ nịnị? 10#Imt 15.34-38Wẹ yị rẹ tamayị Ịbụrẹẹdị ịhịmba ana aza ẹnị akahị-akahị oze ẹẹna rị nịnị? Wáá rẹ yẹ, uji yà ụ sị kụ́ ana vọ nịnị? 11Aanịka wẹẹ̀ yị yẹ nịnị ka ẹ yị vị ịrẹyị ịsọyịrị m maa kà a wụ nịnị? Ama mị ka wa sị eyi pe ẹngụ awụ nịnị agụvị òwù Anihwarisi ọnịrị Anisadusi nịnị.” 12Ịjọnọọ dị ezirẹma anị sị yẹ ka ẹ yị vị òwù ana a sịị̄ tụ́ ịnị Ịbụrẹẹdị ọ ka ẹnị ẹ̀ hụ agụvị avọọ sị eyi pe ẹngụ ẹnịnị, ama agụvị ịsa ana Anihwarisi ọnịrị Anisadusi nịnị aa sịị zụ̀ aza aa kà nị.

Ipita ka Ijeesu ọ vị Ikirisiti nị

(Ịmk 8.27-30; Irk 9.18-21)

13Ijeesu ộ nọ ọgụrị ẹkụra Ịsẹsarịya-Ihwiripi. Dị ọ họ̀ ezirẹma anị ka, “Ẹnị aza sị ọọ hị́ ka ẹmị Ozi ọza onigirima ọ́ọ vị?” 14#Imt 14.1,2; Ịmk 6.14,15; Irk 9.7,8Dị ẹ ka, “Aza ẹnyị ka Ịjọọnụ ọhwọzenyi ụ vị nị; aza ẹnyị rẹ ka Erija ụ vị nị, dị aza ẹnyị ka ẹwa vị Ijeremaya nị, à vị ọnya ịnị ọnịsẹ nịnị.” 15Dị Ijeesu ka, “Ẹwụ nịnịị yọ, ẹnẹ ẹwụ nịnị sị ọọ hị́ ka mâ vị?” 16#Ịjọ 6.68,69Dị Ịsayịmọnị Ipita tụ́ ohi, dị ọ ka, “Ẹwa vị Ikirisiti, Ozi Ohomorihi ana yára nị.” 17Dị Ijeesu ka, “Wâ da jẹ, Ịsayịmọnị ozi Ijona, agụvị ka ẹ yị vị ọzarẹyịrẹsụ ọ sị zụ̀ wụ, Ada amị ana yà ẹbẹẹba yọ nị. 18Dị ma rẹ kà a yị wụ ka ẹwa vị Ipita (ọnọọ vị ka ‘ịda’) ana yàa anka ịda nị. Ịrẹsụ ịda ọnọnị m maa dà ịragụ amịị tụ́ nị; isu ẹ yị vaa nyị ehuna anị. 19#Imt 18.18; Ịjọ 20.23Mị vaa sị ụkọkọrọ ẹbẹẹba yị wụ. Ịsị ụ wàa sụ́ ịnị ẹhẹ, a rẹ vaa sụ́ ọ ẹ́bẹẹba; ịsị ụ wàa ngwa ẹ́hẹ, a rẹ vaa ngwaa ẹ́bẹẹba.” 20Ịjọnọọ di o hú ezirẹma anị ụvọ ka asị ẹ kà a yị aza ka ọnị ọ vị Ikirisiti nị.

Ijeesu ộ kà ịrẹyị isu anị

(Ịmk 8.31-33; Irk 9.22)

21Hụrẹ ụmẹ ọnọọ, dị Ijeesu aa kà a yị ezirẹma anị ka â nyị ka ọnị ọ̀ nọ Ijerusarẹmị, dị azọkụ nịnị beri ohirẹsụ ẹbanyị irehi Ohomorihi ọnịrị ọzwọzọda nịnị ẹ̀ sị ụya rị ọnị ẹtẹẹtẹrẹ, dị ẹ̀ wụ ọnị, ịhyẹgwẹta anị, dị Ohomorihi ọ̀ rẹ ha ọnị hụụnị isu. 22Dị Ipita hị́ ọọ nọ oboka ọnya, dị aa tụ́ ọọ ohuvọ nị, dị ọ ka, “Ọchọnọyịrẹsụ awụ, Ọga! Ịsị ụ waa kà aanị, ọ yị vaa mẹ wụ!” 23Ama dị Ijeesu vara eyi dị ọ kà a yị Ipita ka, “Ẹwụ echu, và ị́rẹma amị! Ariro ọza ụ nyị nị, ẹ yị vị ariro Ohomorihi.”

Ẹ yị nyị ịsa ene huna ụhwẹ ọza

(Ịmk 8.31—9.1; Irk 9.23-27; Ịjọ 12.25)

24 # Imt 10.38; Irk 14.27 Dị Ijeesu kà a yị ezirẹma anị ka, “Ọza tụra ọza ana àa ka ọnị aa dụ mịị zị, â nyị ka ò hí ayị ẹngụ anị, dị ọ̀ za apavahị anị, dị ọ̀ọ dụ mị ịrẹmaa zị. 25#Imt 10.39; Irk 17.33; Ịjọ 12.25Ọza tụra ọza ana aa ka oni ee tenyi ụhwẹ anịị tẹ, vi ee vú ọọ nị; ama ọza ene èe ne ụhwẹ anị ta agụvị amị, vị aa sị ọọ tẹ nị. 26Ọza ọ̀ọ sị avaba ẹhẹ rị ọgụ, dị ụhwẹ anị vene si vú nị, ọgụ ịsị ọza ọnọọ kụkụ va rị? Sị ọza vaa sị vara ụhwẹ anị? 27#Imt 25.31; Ahẹ 62.12; Iro 2.6Agụvị ka Ozi ọza onigirima vaa vẹ beri anggẹẹrị nịnị ini igirima Ada anị; ịjọnọọ dị ọ sị ọgụ ụkọrọ ọzọza yọ anka ụkọrọ ọzọza. 28Ịzẹyịza m maa kà a wụ nịnị nị, â nyị aza ẹnyị ana jẹẹ ịzẹnị, ana ahịka e yi vee sú pooro, di è re, Ózi ọza onigirima màa vẹ vaa mẹ ịjọva.”

Currently Selected:

Imatiwu 16: EBTP

Highlight

Copy